3 A u jaala pre na kla Yesu pan mbo, “O Tafun, mu nunu kpɔɔ wre yaa.”

4 Ŋga Yesu na ki loo kre, a wra yo mbo, “Kre yira ŋga nu ma Lazarus we ku, la, ki pe Nyiɛkpɔɔ yɛnyiŋge kee. Kre kie ti mbe Nyiɛkpɔɔ Biblɔ wre yɛnyiŋge ta.”

5 Yesu na Martha, na Mary, na Lazarus kori chichie,

6 nde ŋga wra loo na Lazarus yaa kre, wra je mu ble shiin li mna wra nyi kre.

7 Ŋga ble shiin yire na tro kre, wra yo u twanfɛɛnlɛ pre pan mbo, “E ti o ndru mbe sɛ Judea na.”

8 A u twanfɛɛnlɛ pre na kna mbo, “Nyinafun, kie pe ble chiɛri yi ŋga, Judae pre naa mu chaa mbe mu waari dnɛ ni, kre mu ndru na chaa mbe sɛ wa ŋgaa?”

9 A Yesu na kna mbo, “Nyisee yire bnimi mbe sɛ su yilakɔŋgɔ, pan maa? Na ndro nyaari nyisee nu, wa gbro. Ŋgi na hin? U nyaa.

10 La, na ndro nyaari wɔmu nu kre u gbroi. Ŋgi na hin? U n na nyaa.”

11 Ŋga Yesu nyu na to kre, ŋga wra yo mu taa na yi mbo, “O nunu Lazarus sni na ŋunu, la, mbe sɛ u nyi.”

12 A u twanfɛɛnlɛ pre na kna mbo, “O Tafun, na sni u sni kena we saanla hin?”

13 Yesu naa nyina na Lazarus ku, la, pre naa jawa na sni u sni yɛŋgɛ.

14 Ki tia Yesu na ki yo mu wali mbo, “Lazarus ku,

15 la, e saara na, ni yiɛ shɔ, na ni nsraa wa u jaara, imi kie pe mbe e shɔ mbe li. E ti o sɛ mna u nyi kre.”

16 Bawa Thomas, ŋmba pe yeeri Atta kre, na kna mu yo u ŋmbilɛ twanfɛɛnlɛ pre pan mbo, “E ti mbe wre na o Nyinafun wre sɛ, mbe o kro sɛ ku.”

17 Ŋga Yesu na le kre, na pe Lazarus le, kie pe ble jijirɛ.

18 Mu yire Jerusalem na mu sɛ Bethany na, ki n le, kie pe kɔnsni shiin.

19 Kra tia Judae tataara na yiri wa mna pan na Martha, na Mary bre pe lɛm kumu kre na.

20 Ŋga Martha na loo na Yesu paan kre, a wra yili mu sɛ u fni, a Mary naa wa mu tni katoo.

21 Martha na kna mu yo Yesu pan mbo, “Ni Tafun, na mnaa wa mna, ni lɛm ŋmba wa na ku.

22 La, ni chin na ŋga mu wie Nyiɛkpɔɔ pan kre, we mu ŋga ki yi.”

23 A Yesu na kna mbo, “Mu lɛm wre we nyi mbe ŋmaa ta.”

24 A Martha na yo mbo, “Ni chin na kunnyiɛ ble haŋa kre nu, we nyi mbe ŋmaa ta.”

25 A Yesu na kna mbo, “Mi wi kunnyiɛ, na ŋmaa tafun. Ŋmba u ni shɔ mu li kre, hali na u ku, we ŋmaa ta.

26 A ŋmba uu wa na le, mu ni shɔ mu li kre, wa ku fio. Mu ki shɔ mu lii?”

27 A wra kna mbo, “Ɛnhɛɛn, ni Tafun. Ni ki shɔ mu li na ŋu wi Kristo, Nyiɛkpɔɔ Biblɔ ŋmba we pan waŋgra nu kre.”

28 Ŋga Martha na yo ma mu kɔ kre, a wra sɛ Mary yeeri mna ju mu yo u pan mbo, “Nyinafun wre pan mna na mu chaa.”

29 Ŋga Mary na ki loo kre, a wra yiri nyaanyaa, mu yili mbe sɛ u fni.

30 Na Yesu n ta mu le chia kre lam tun, na uu wa mu yire mna Martha sɛ u fni kre.

31 Judae mblɛ praa wa katoo wa na Mary bre kre, na yiri mu taa u kro. Ŋga wra fiɛlɛ mu yili fimi na ma kre, praa jawa na faŋga lawee wa u shie mbe sɛ nyɛni.

32 Ŋga Mary na da mna Yesu nyi kre, a wra kosie kan u yiɛ mbo, “Ni Tafun, na mnaa wa, kaa ni lɛm ŋmba wa na ku.”

33 Ŋga Yesu na nya na wre na Judae mblɛ pe taa u kro pre nyɛni kre, wrekroo na u yii.

34 A wra pe wie mbo, “Sena e Lazarus le hin?”

35 Yesu na nyɛni.

36 A Judae pre na kna mbo, “E le imi u Lazarus kori mu da.”

37 La, plɛ na yo mbo, “Wre ma wra fuun nyaa kree? Kena wa na jaa Lazarus ŋmaa shɔ ŋgaa?”

38 Wrekroo na Yesu yii mu ya, a wra sɛ faŋga ŋga nu Lazarus na sni kre lawee. Dnɛ wee na yi, a pra dnɛ ka tɛɛ mu ki nyu tɔ.

39 A wra kna mbo, “E dnɛ kre gbila e laa wee kre nyu na.”

40 A Yesu na kna mu yo u pan mbo, “Ni n yo mu pan na, na mu shɔ mu li, mu Nyiɛkpɔɔ yɛnyiŋge nyaa?”

41 A pra dnɛ kre gbila mu laa wee kre nyu na. A Yesu na yiɛ wa nyjeeri mna yo mbo, “Ndoo ni mu kaan mboo, na mu ni nyu kee loo.

42 Ni chin na mu ndru ni pan nyjila kro nu, la, leele mblɛ pe yire mna ŋga na ni ki yo, mbe pe shɔ mbe li, mbe chin na ŋu mu ni tun.”

43 Ŋga wra yo ma mu kɔ kre, a wra fuu badaaŋga mbo, “Lazarus, yili mu pan.”

44 A Lazarus na nyi mna yili fimi na. Na pe u kɛnyi, na u jeelee, na u yiɛ pɔ yonyi ni mu tɔ. A Yesu na yo mbo, “E u saan mbe u sɛ.”

45 Judae pre tataara mblɛ pra pan Mary shaari haa kre na kee ŋga Yesu pe kre nya, mna u shɔ mu li.

46 La, pe plɛ na sɛ kee ŋga Yesu pe kre yo Pharisee leele pre pan.

47 A Srawɔfɛɛnlɛ loplombo pre, na Pharisee leele pre, na chia loplombo pre yeeri a pra sɛ fni. A pra kna mbo, “Ŋgi ki fna o pe blɔ ŋmba kawako kee tataara nyjɛ u pini ŋga na hin?”

48 A pra yo mbo, “Na o tia u kro na yire kee nyjɛ pini, ndro kro we kɔɔ u shɔ mbe li, a Roman leele we kɔ mbe pan mbe o Suminyuŋgo cheche ŋga juari, mbe o waŋgra ŋga kla.”

49 La, blɔ wa naa wa pe nu, praa u yeeri Caiaphas, wra pe srawɔfun lopom titi kre yɛlɛ kre na. A wra kna mbo, “E n kala ka chin.

50 E n chin na, na ndro nunu ku mu lenɛɛrɛ ndra lɔ, ki nyu mu wɛ waŋgra ŋga poŋgo klaa naa?”

51-52 Caiaphas nsra kre kee ŋga yo na wre titi jaŋga ni. Ŋga wra pe srawɔfun lopom titi kre yɛlɛ kre na kre, kre kra tia wra ki nya mu yo na Yesu we ku mbe Judae ŋga. A pre chiin ma we ku mbe ŋga, la, Nyiɛkpɔɔ biile mblɛ pe nyina waŋgra ŋga nu kro kre, pre we yoori mbe pe chaa, mbe pe pe nunu.

53 Mu yire kre ble kre na, Judae loplombo pre na nyu le mbe Yesu gbo.

54 Ki tia Yesu nsraa uyɛ leni lenɛɛrɛ nu Judea tra kre nu na. Wra yiri wa, a wre na u twanfɛɛnlɛ pre na sɛ tni tablɔ tra chia ŋga pe yeeri Ephraim kre na.

55 Na Judae Klɛntro ble kpɔɔ kre lie chaa da, a lenɛɛrɛ na yiri pe chiɛ na, na shie Jerusalem na, mbe sɛ peyɛ jee paala kre pe, mbe ble kpɔɔ kre chin mbe da.

56 Praa Yesu chaa, kra tia ŋga pra fni suminyuŋgo wa kre, a praa peyɛ wie mbo, “Mni e jawa hin? E shɔnli na we pan ble kpɔɔ ŋga nu, ndee wa pan hin?”

57 Srawɔfɛɛnlɛ loplombo, na Pharisee leele pre na ki kpali na ŋmba u Yesu haa chin kre, u pan u yo, mbe pe sɛ u yii.