Mbaala Nagbɛɛ Yomini
10
A Yesu na yo mbo, “Kpra na ni yuu e pan, ŋmba u n tro mbaala nagbɛɛ kre nyu na mu le, la, maa sɛ nduu ki mbɛɛ ka na mu le ki nu kre, juo wi.
2 Ndro ŋmba u tro mbaala nagbɛɛ nyu na mbe le ki nu kre, wre wi mbaala pre lefun.
Jesus the Good Shepherd (John 10:1-21)
3 Wre pan nagbɛɛ nyu shiefun wre nagbɛɛ kre nyaari, a mbaala pre pe lefun wre mana chin, na u pe yeeri pe mɛɛ na, mbe pe yili mbe taa u kro.
4 Na u yili na pe ni fimi na, mbe u yiɛ klu pe pan mbe pe taa. Ŋgi na hin? Na pe u mana chin.
5 Pia lewo fuŋu kro tɔ fio, pie fɛ mbe laa u kro, ŋga pe n u mana chin kre na.”
6 Yesu na pe gbun kre yomini ŋga, la, pe nsra ki nɔɔloo.
Yesu Wi Mbaala Lefun Titi Wre
7 A Yesu na ndru mu yo mbo, “Kpra na, ni yuu e pan, mi wi mbaala nagbɛɛ kre nyu.
8 Mblɛ pra yiɛ klu ni na kre, juolo na lɛ, kra tia mbaala pre nsra ndie tɛɛ pe pan.
9 Mi wi jlonwee kre. Ŋmba we tro ni na mbe le kre, we ŋmaa ta, mbra lee mbra yilii, mbra nyjɛ u chaa kro taa.
10 Juo rɛ, wre paan mbe ju, mbe gbo, mbe kla. Mi rɛ, mi pan, mbe leele ŋmaa ta, mbe ki ta poŋgo.
11 Mi wi mbaala lefun titi wre. Mbaala lefun titi wre we jaa ku u mbaala pre tlo, mbe mbaala pre ŋmaa ta.
12 Ndro ŋmba pe wru na u fɔlɔ toni kre, u n pe mbaala pre tafun. Na kombo pan mu le pe nu, we jaa pe ti mbe fɛ, mbe kombo wre plɛ yii, mbe hamblɛ pre nyina.
13 Ŋga wru pe u wru na u fɔlɔ toni kre ndra na, we fɛ. Ŋgi na hin? U kee ka ma na mbaala pre chichie chaara ni.
14 Mi wi mbaala lefun titi wre, ni ni mbaala chin, a pe ni chin.
15 Imi na Ndoo ni chin, a ni u chin kre, pan ni ni mbaala chin, a pe ni chin, a ndaa chaa mbe ku pe tlo.
16 Mbaala pre plɛɛ wa, mu pe ni wolo, a pe n wa nagbɛɛ ŋga nu. Ki fna ni pan na pe ni. Pie ni nyu loo, mbe paan chaa mbaala mblɛ nu, mbe pe lefun pe nunu.
17 Ni Lɛ wre ni kori, ŋgi na hin? Ni chaa mbe ni ŋmaa tɛɛ, mbe ndruu kɔɔ ki wru.
18 Ndro ma u ki shio ni pan. Mi titi ni chaa mbe ki tɛɛ. Nii wa jaŋga ni mbe ki tɛɛ, mu wa na jaŋga ni na mbe ndruu ki wru. Ŋga ni Lɛ wre yo ni pe yi.”
19 Yire kee nyjɛ ndra na, Judae pre na ndru mna yɔɔlɛ na.
20 Leele pre tataara naa yuu mbo, “Ŋumufɔɔn wa u nu. U ndra n wa. Ŋgi na e u kee kre ndru hin?”
21 La, leele pre plɛ naa yuu mbo, “Lewo ŋmba nu ŋumufɔɔn nyi wa jaa paara imi. Mni nyini ŋumufɔɔnfun we pe mbe jaa fuunlo nyaa hin?”
Judae Na Yesu Je
22 Jerusalem Suminyuŋgo nyu nyaa ble lie kre na da, na weere nyjila yi.
Jesus accused of blasphemy (John 10:22-42)
23 Yesu naa wa na nyaari Suminyuŋgo lawee ŋga praa yeeri Solomon bamba kre na,
24 a Judae pre na sɛ fɛ mu u kun, mna u wie mbo, “Ŋgi ble mu o nyina ndro ŋmba nyini wi ŋu hin? Kpra yo o pan, ŋu wi Kristo wre, ree?”
25 A Yesu na kna mbo, “Ni ki yo e pan fa, la, e n ki shɔ mu li. Kawako kee nyjɛ ni pini ni Lɛ wre mɛɛ nu kre, yi ni dansiɛrɛ lii.
26 La, e n ni shɔ mu li, ŋgi na hin? E n pe ni mbaala.
27 Ni mbaala ni mana chin, a ni pe chin, a pe taari ni na.
28 Ni pe kaan blenyini ŋmaa, a pia ku fio, a ndro wa ja mbe pe shɔ ni kɛɛ.
29 Ni Lɛ ŋmba u ni ŋga pe lɛ kre, u wɛ yira kro na, a ndro n wa mbe jaa pe shɔ ni Lɛ wre kɛɛ.
30 Mi Na Ni Lɛ Wree Nunu.”
31 A Judae pre na ndru mu dnɛ koli mbe u waari.
32 A Yesu na kna mu yo mbo, “Ni kawako kee tataara nyjɛ yi yiri ni Lɛ wre pan pe e yiɛ na. Kena yi ŋgi haa na e chaa mbe ni waari dnɛ ni ŋga hin?”
33 A Judae pre na yo mbo, “Ki n pe mu kee chichie nyjɛ mu pini na o chaa mbe mu waari dnɛ ni, la, jiɛnlɛ kee ŋga nu mu le yi na, lewo wi ŋu, a mna muyɛ pini Nyiɛkpɔɔ.”
34 A Yesu na kna mbo, “Pe ki nyunɔ e mbra yire nu na Nyiɛkpɔɔ yo mbo,
‘Pan e nyi na wre Nyiɛkpɔɔ wi.’a
35 O chin na kee ŋga pe nyunɔ Nyiɛkpɔɔ hlɛ kre nu kre pe kpra nyjila kro nu, a Nyiɛkpɔɔ na mblɛ wra ŋga u kee kre yeeri u biile.
36 Mi rɛ, ni Lɛ wre u ni wɔ, mu ni tun waŋgra ŋga nu, mni ki pe, a ni yo na Nyiɛkpɔɔ Biblɔ wi mi, a e yo na ni Nyiɛkpɔɔ tɛɛlɛ hin?
37 Na ni n na ni Lɛ tnumu kre tuni, kena yaa shia ni shɔɔ li.
38 La, na ni lɛ wre kee yire ni pini wala, kii wa na e n mi titi shɔ mu li, ki fna mbe e kawako kee nyjɛ ni pini yire le, mbe yi shɔ mbe li, mbe ki ti e chin na ndoo wree wa ni nu, a nii wa ndoo wre nu.”
39 Pra ndru na chaa mbe u yii na, la, wra shɔ pe kɛɛ mna sɛ.
Yesu Na Jordan Lɔɔ Kre Kun Na