Nyiɛkpɔɔ Bitumblɔ Hlɛ
Yesu Nyi A Pe U Nya
1
Theophilus, hlɛ jle kre ndaa mu nyunɔ kre na pe kee nyjɛ Yesu na klu mu pe, na kee nyjɛ wra nyina,
2 mu sɛ su nyjila ŋga nu wra yire Kpra Ŋumu wre na, mna u bitumblɔ mblɛ wra wɔ pre ŋga mbra yire, a Nyiɛkpɔɔ na chin mu u bali mu sɛ nyjeeri.
3 U kanyana yire kɔkro, kie pe ble fuloe shiin kre, wra yire kawako kee tataara na, mna uyɛ wɔ mu pe nyina, na uu wa na le. A pra u nya, a wraa Nyiɛkpɔɔ ŋunumu kre kee yuu pe pan.
4 Ŋga wra tni na pe ni kre, wra yo pe pan na, pia shia yili Jerusalem na mbe sɛ haka, la, pe nyjila ŋga nyu Nyiɛkpɔɔ na le na we pe kre shie tun. Wra yo mbo, “Imi e na ki loo mu yili ni nyuu kre,
Jesus Ascends to Heaven (Acts 1:4-11)
5 John rɛ, nyumu ni wraa leele ndrɛ jee, a yire rɛ, ble nyjɛ nu e nyi ŋga, kia mu kuraa, mbe pe e ndrɛ je Kpra Ŋumu wre ni.”
6 Ŋga pra fni kre, a pra u wie mbo, “O Tafun, nyjila ŋgi nu mu ndru mbe Israel leele ŋga pe ŋunumu kre hin?”
7 A wra kna mbo, “E kee ma na ee nyjila, ndee ble ŋga Ndoo wre le wre titi jaŋga ni kre chin.
8 La, na Kpra Ŋumu wre waa pan e nu kre, kre ee faŋga ta, mbe ni dansiɛrɛ li Jerusalem na, na Judea, na Samaria na, mbe sɛ su lawee kro nu.”
Kristo Wre Sɛ Nyjeeri
9 Ŋga wra yire kee nyjɛ yo pe pan mu kɔ to, a pra u bali mu sɛ nyjeeri, a tloe na u tɔ, a pe nsraa u nyaa na.
10 Ŋga wra fun pe yiɛ na, a pra yire na le nyjeeri poŋgo ma kre, a pra kna mna bilɛ shiin plɛ nya na pe dodonyi finyi le le mu yire pe jaara.
11 A bilɛ pre na kna mna yo pe pan mbo, “Galilee bilɛ, mni a e yire na le nyjeeri ma hin? Yesu ŋmba pe wru e jaara mu sɛ nyjeeri ŋga, imi e u nya a wra shie nyjeeri ŋga, pan chɔɔ we ndru mbe pan na.”
Bitumblɔ Pre Fni Jerusalem Na
12 A pra ndru mna yiri kre nyua ŋga pe yeeri Olive nyua, a ki mbra Jerusalem na wa kre jaara, mna pan Jerusalem lam, kie pe kɔnsni yɔɔ.
13 Ŋga pra le Jerusalem na kre, a pra sɛ pe abansru katoo nyuŋgo ŋga nu pra nyi kre nu.
Bawa Peter, na John,
na James, na Andrew,
na Philip, na Thomas,
na Bartholomew, na Matthew,
na Alphaeus pɔ James,
na Simon Canaan wo wre,
na James pɔ Judah wre, bawa pe kro na nyi.
14 Leele mblɛ pra sɛ fni wa pre kro na nyu nunu wru mna nyiɛtalaa yii kɛ shiin, pre na chiɛlɛ pre ni, na Mary Yesu lo, na Yesu chinlɛ pre ni kro.
Peter Paarahaa
15 Yire ble yire nu, shɔnlifɛɛnlɛ mblɛ pra fni kre naa leele lafaa na fulo, a Peter na yiri mu yire pe lalaa mna yo pe pan mbo,
16 “Wolo, fna ki fna mbe Nyiɛkpɔɔ kee ŋga Kpra Ŋumu wre na nyaari David na mna klu mu yo kre, na imi na Judas, ŋmba wra yiɛ klu a pra pan mu Yesu wre yii kre, mbe ki kee kre pe ma.
17 A pra u tɔɔnri mu chaa o nu, a wra u sumi haa ta na sumi.
18 Wre wra nɛɛrɛ swa tɛɛ mna tra lɔ. A wra to mu ndra kan, a u lɛɛ na ja, a u lɛɛ bie na yili.
19 A leele mblɛ praa wa Jerusalem na pre kro na ki loo, a kra tia pra tra kre ŋga mɛɛ pre titi yolo nu mbo, ‘Akeldama,’ ki nyina na nyimi tra.
20 Imi na pra klu mu ki nyunɔ Mɛɛ hlɛ nu kre mbo,
‘E ti mbe u tnihaa kre tni waara,
mbe ndro wa tni ki nu,’a
‘mbe lefuŋu u tnumu kre wru.’b
21 Kena ki fna mbe bilɛ mblɛ wre na pre naa nyaari na shie na paan, nyjila ŋga nu Yesu naa wa,
22 mu yire John ndrajefun wre nyjila, mu pan mu su ble ŋga na pra Yesu bali o jaara kre, mbe o wa ta, mbe ya oyɛ na, mbe o pe u kunnyiɛ kre dansiɛlifɛɛnlɛ.”
Matthias Wɔhaa
23 A pra leele shiin wɔ mu yire, Joseph ŋmba praa yeeri Barsabbas, a pra u ŋga mɛɛ Justus wre, na Matthias.
24 A pra nyiɛtali mbo, “Ŋu o Tafun, ŋu mu lewo loloŋgo kee chin, kena o nyina leele shiin mblɛ ŋmba mu wɔ
25 mbe u bitumblɔ pre tnumu ŋga Judas laa mu ti, mu wre titi wo wru kre tun.”
26 A pra kɛɛn tɛɛ, a kɛɛn yire na Matthias wɔ, a pra u ya bitumblɔ kɛmbɔnunu pre na.