Yesu Na Uyɛ Wɔ Mu Twanfɛɛnlɛ Kɔɔnashin Nyina
21
Kre kɔkro ni, Yesu na ndru mu uyɛ wɔ mu u twanfɛɛnlɛ pre plɛ nyina Tiberias epo kre mbɛɛ na. Imi wra uyɛ wɔ mu pe nyina na yi kre.
2 Simon Peter, na Thomas ŋmba pe yeeri Atta wre, na Nathanael ŋmba u yiri Cana na, Galilee tra nu wre, na Zebedee biile, na twanfɛɛnlɛ pre shiin plɛ, na pee wa mu tni titɛɛ.
Jesus at the Sea of Galilee (John 21:1-25)
3 A Simon Peter na kna mu yo hamblɛ pre pan mbo, “Ni shie lɔɔ mbroe pan.” A pe kro na kna mbo, “Wre na ŋu we sɛ.” A pe kro na yili fimi na mna sɛ le krɔ nu. Pra sɛ tnumu tun, a nyiŋge na pan mu se na pe n yaka ta.
4 Ŋga ndram naa saanri kre, na Yesu wa mu yire lɔɔ kre nyu na, la, u twanfɛɛnlɛ pre nsra chin na Yesu wi.
5 A Yesu na pe wie mbo, “Nyanyjɛbɛɛlɛ, e n mbroe ta ra?”
A pra kna mbo, “Ɔɔhɔn, o n yaka ta.”
6 A Yesu na yo pe pan mbo, “E asau kre wa krɔ kre kalie haa, ee plɛ ta mbe wɔ.” A pra ki wa. Pe nsra ja mbe ki tini. Ŋgi na hin? mbroe na nɛɛ ki nu.
7 A twanfun ŋmba Yesu na kori wre na yo Peter pan mbo, “Mu chin na O Tafun wre wi ŋgaa?” Ŋga Peter na loo na, “O Tafun wre wi” kre, titɛɛ kre nu, a wra u yirɛ wru mu le, mna ye mu to lɔɔ kre nu. Na u klu mu u yirɛ wɔ mu tɛɛ, na tnumu tuni.
8 Twanfɛɛnlɛ pre hamblɛ, mblɛ pra kro krɔ kre nu pre, na krɔ kre bri mu asau kre tini mu pan tanyiɛ na, lɔɔ kre mbɛɛ na. Na mbroe bribri pe ki nyi. Pe haa nsra le na fimi ni. Na pre na fimi we pe sɔɔlɛɛ lafaa.
Kristo Na Twanfɛɛnlɛ Pre Na Li
9 Ŋga pra da fimi na kre, pra kaanlɛɛ kanhun ka nya, na pe mbro kla ki na, na paanu ni.
10 A Yesu na yo pe pan mbo, “E pan na mbroe mblɛ e wɔ fuŋgaami kre plɛ ni.”
11 A Simon Peter na le krɔ kre lam mna asau kre tini mu pan fimi na, na mbroe badɛnyi bribri pe ki nyi. Pe kro naa lafaa na fuloe shiin, na kɛmbɔtaarɛ. Mbroe pre na nɛɛ, nde asau kre nsra knumu.
12 A Yesu na yo pe pan mbo, “E pan e li.” Hali u twanfɛɛnlɛ pre wa nsra tuwi mu u wie mbo, “Ŋu wi ŋmbi hin?” Na pe chin na o Tafun wre wi.
13 A Yesu na sɛ paanu kre na mbro wre wru, mna knumu mu pe ŋga.
14 Kre na yi gbee taarɛwo, ŋga Yesu na uyɛ wɔ mu u twanfɛɛnlɛ pre nyina u kunnyiɛ kre kɔkro.
Yesu Na Peter Paara
15 Ŋga pra li mu kɔ kre, Yesu na Simon Peter wie mbo, “Simon, John pɔ, mu ni kori mu wɛ nyjɛ na ree?”
A wra kna mbo, “Ɛnhɛɛn, ni Tafun, mu chin na ni mu kori.”
A Yesu na yo u pan mbo, “Ta ni mbaala biile pre le.”
16 Yesu na u wie shiin wo na mbo, “Simon, John pɔ, mu ni korii?”
A wra kna mbo, “Ɛnhɛɛn, ni Tafun, ŋu titi chin na ni mu kori.” A Yesu na kna mbo, “Ta ni mbaala pre le.”
17 Yesu na ndru mna u wie gbee taarɛwo na, mbo, “Simon, John pɔ, mu ni korii?”
Fooro na Peter yii, na Yesu u wie gbee taarɛwo na “Mu ni korii?” Kra tia Peter na kna mu yo mbo, “Ni Tafun, kee ka wa jaa ndra mu na, mu chin na ni mu kori.”
A Yesu na yo u pan na mbo, “Ta ni mbaala pre le.
18 Kpra na ni yuu mu pan, nyjila ŋga ni mna pe nyanyjɛble kre, ŋu titi mnaa mu kpla grere muyɛ, mbe sɛ mna mu chaa, la, na maa lɛ blɛlɔɔ kre, kɛnyi mu nyaa, mbe lefuŋu mu grere, mbe sɛ na mu ni mna mu n na chaa.”
19 Yesu na kre kee ŋga yo, mnaa nyina kumu ŋga nyini Peter we ku, mbe Nyiɛkpɔɔ ŋga yɛnyiŋge. A wra yo Peter pan mbo, “Taa ni kro.”
Twanfun Ŋmba Yesu Na Kori
20 Peter na kna mu le, mna u ŋmbrɔ twanfun ŋmba Yesu na kori wre nya, na u yire mu mbra u na. Wre twanfun ŋmba wra tni mu mbra Yesu na, pe lie haŋa kre nu, mna Yesu wie mbo, “O Tafun ŋmbi we mu wɔ mbe ŋga kre hin?”
21 Ŋga Peter na kna mna u nya kre, a wra Yesu wie mbo, “Ni Tafun, a ŋmba hin?”
22 A Yesu na kna mbo, “Na ni chaa mbe u tni mbe sɛ su nyjila ŋga mbe ndruu pan, mu kee ŋgi yi hin? Ŋu mu taa ni kro rɛ.”
23 Kre kee ŋga na kpali Yesu kotɔmblɔ pre nu na wre twanfun ŋmba wa ku fio. La, Yesu nsra yo na wa ku, la, ŋga wra yo yi mbo, “Na ni chaa mbe wa ku mbe sɛ su na mbe ndruu pan, mu kee ŋgi yi hin?”
24 Wre twanfun ŋmba kee pe yuu ŋga, wre wra hlɛ ŋga nyunɔ, a o chin na ŋga u yo kre, kpra yi.
25 Kenɛɛrɛ naa wa na, nyjɛ Yesu na pe. Na pra yi kro nyunɔ nununu kre, kaa ki nyuŋgo n wa waŋgra ŋga nu mbe ki le.