Yesu Kunnyiɛ
20
Aliɛri ble bnimi pupu, na ndramu n saan tun, a Mary Magdalene na gbolo mna yiri mu sɛ faŋga lawee wa. Ŋga wra da wa kre, wra nya na pe dnɛ ŋga ni pra faŋga kre nyu tɔ kre gbila mu laa ki na.
2 A wra fɛ mu sɛ yo Simon Peter, na twanfun nunu ŋmba Yesu na kori wre pan mbo, “Pe o Tafun wɔ mu yili faŋga kre nu, a o n chin mna pe sɛ u tɛɛ.”
3 A Peter na twanfun nunu wre na yili mna sɛ faŋga lawee wa.
4 Pe kro shiin na tafɛŋgɛ wru, la, twanfun nunu wre na fɛ mu wɛ Peter na mna klu mu da faŋga kre na.
5 A wra lɛɛlɛ mu faŋga kre lam jle, mna yonyi finyi yire nya, la, u nsra le wee kre lam.
6 A Simon Peter na yiri kro, mna pan mu le wee kre nu, mna yonyi finyi nyjɛ ni pra u fo yire nya faŋga kre nu.
7 Yoŋgo ŋga ni pra u ndra pɔ kre nsra chaa yonyi yire nu, la, na kii wa mu mbiile mu tni kiyɛ.
8 A twanfun ŋmba wra klu mu da faŋga kre na wre na chin mu le ki nu, mna yi nya, mna shɔ mu li.
9 La, na pe n ta mu Nyiɛkpɔɔ kee ŋga pe nyunɔ mu tɛɛ na, “We nyi mbe yili kuulo nu,” kre nɔɔloo tun.
10 A u twanfɛɛnlɛ pre na ndru mna sɛ katoo.
Yesu Na Uyɛ Wɔ Mu Mary Magdalene Nyina
11 Mary na yire faŋga kre lawee wa na nyɛni. U nyɛnɛɛ kre nu, wra lɛɛlɛ mu faŋga kre lam jle,
12 mna nyjeeri bitumblɔ shiin plɛ nya, na pe dodonyi finyi le, mu tni mna pra Yesu gboo sniŋge kre. Wa naa wa ndra nyjeeri, a wa naa wa tlɔɛtapan.
13 A nyjeeri bitumblɔ pre na u wie mbo, “Maa, mni mna nyɛni hin?”
A wra kna mbo, “Ni Tafun pe wru, a ni n chin mna pe sɛ u tɛɛ.”
14 Ŋga u nyu na to, a wra kna to, na Yesu wi ŋmba, la, u nsra chin na Yesu wi.
15 A Yesu na kna mbo, “Maa, mni a mna nyɛni hin? Ndro ŋmbi mu chaa hin?”
Mary naa jawa na kagbla kre tafun wi, a wra kna mbo, “Ndoo, na ŋu mu u wru, jande, ni nyina mna mu sɛ u tɛɛ, mbe ni sɛ u wru.”
16 A Yesu na kna mbo, “Mary.”
A Mary na yiɛ kna, mna shɔ mbo, “Rabboni.” Ki nɔɔ yi “Nyinafun.”
17 A Yesu na yo u pan mbo, “Maa shia kɛ taa ni na. Ni n ta mu sɛ nyjeeri ni Lɛ wre pan tun. La, sɛ yo ni wolo pre pan, na ni ndru na shie ni Lɛ, na e Lɛ wre, ni Nyiɛkpɔɔ, na e Nyiɛkpɔɔ wre pan.”
18 A Mary Magdalene na sɛ ki yo twanfɛɛnlɛ pre pan mbo, “Ni o Tafun wre nya.” Mna kee nyjɛ u yo u pan yire kro tɔɔnri pe pan.
Yesu Na Uyɛ Wɔ Mu U Twanfɛɛnlɛ Pre Nyina
19 Ki ble kre lam, Aliɛri ble kre yilakɔŋgɔ, na twanfɛɛnlɛ pre fni titɛɛ mu krɔ tɔ, ŋgi na hin? Na pe Judae loplombo pre fiɛ. Yesu na pan mu yire pe lalaa, mna yo pe pan mbo, “E tni wejinyiŋge nu.”
Jesus appears to the disciples (John 20:19-31)
20 Ŋga wra yo ma mu kɔ kre, a wra pe nyina u kɛnyi, na u babaari. A twanfɛɛnlɛ pre yiɛ na shɔ kpɔɔ na pe pe Tafun wre nya.
21 A Yesu na ndru mu yo pe pan mbo, “E tni wejinyiŋge nu. Imi na Ndoo ni tun kre, pan ni e tuni na.”
22 Ŋga wra kre kee ŋga yo mu kɔ kre, a wra ŋu mu wo pe na, mna kna mbo, “E Kpra Ŋumu wre shɔ.”
23 Ŋmba sisam ee ti mbe u kɛ kre, ni ufun sisam ti mu u kɛ, a ŋmba sisam e n ti mu kɛ kre, kena ni n ufun sisam ti mu u kɛ.
Thomas Kakralie
24 Kre nyjila kre, na Thomas, twanfɛɛnlɛ kɛmbɔshiin pre nunu ŋmba pe yeeri Atta na kre, na u n wa pe nu.
25 A u ŋmbilɛ twanfɛɛnlɛ pre na yo u pan mbo, “O o Tafun wre nya.”
A Thomas na yo mbo, “Na ni n u kɛ lam ŋmɛɛ tloe yire nya, mu yi tali, mu kɛ taa u babaari na mu le, mba ki shɔ mbe li.”
Yesu Na Uyɛ Nyina Shiin Wo
26 Ki kranu nyu na kre, na twanfɛɛnlɛ pree wa katoo lam, pre na Thomas ni, mna krɔɛ yire kan peyɛ na lam, a Yesu na le mu yire pe lalaa mna kna mbo, “E tni wejinyiŋge nu.”
27 A wra kna mu yo Thomas pan mbo, “Kɛ taa ni kɛnyi tloe yire na mu le, mu kɛ taa ni babaari na mu le. Kakra lie ti, mu shɔ mu li.”
28 A Thomas na kna mbo, “Ni Tafun, na ni Nyiɛkpɔɔ.”
29 A Yesu na kna mbo, “Kena ŋga mu ni nya kre, kre ki tia mu ki shɔ mu lii? Mblɛ pe n nya, mu shɔ mu li pre wo yi dwamu.”
Ŋga Na Pe Hlɛ Ŋga Nyunɔ