Pra Yesu Frɔ Fwa Ni Mna U Fiŋge
19
Bawa Pilate na tia pra Yesu frɔ na fwa ni.
2 A Sojae pre na wuuro tɛɛ mna ŋunu juulee tin mu u juule, mna u le dodoŋgi nyiɛ ka,
Jesus sentenced to death (John 19:1-16)
Pilate Na Yo Mu Yire Yesu Kro
4 A Pilate na ndru mu yili fimi na, mna yo lenɛɛrɛ pre pan mbo, “Ni paan na u ni mbe e ŋga, mbe ti mbe e chin na ni n sisaa ŋga u pe nya.”
5 A Yesu na yili fimi na, na wuuro juulee kree wa u ndra na, a u dodoŋgi nyiɛ kree wa u na. A Pilate na yo pe pan mbo, “Blɔ wre wi kre.”
6 Ŋga srawɔfɛɛnlɛ loplombo na Suminyuŋgo shiefɛɛnlɛ pre na u nya kre, a praa gble leni mbo, “U kan kanyana kumu kaan na. U kan kanyana kumu kaan na.”
A Pilate na kna mbo, “Kena yire titi, e u wru e sɛ u kan kanyana kumu kaan kre na. Mi n sisaa ŋga u pe nya.”
7 A lenɛɛrɛ pre na kna mbo, “O mbra nyina na ki fna u ku. Ŋgi na hin? U yo na Nyiɛkpɔɔ Biblɔ wi.”
8 Ŋga Pilate na kre kee ŋga loo kre, fiɛrɛ na u yii kpɔɔ,
9 A wra ndru mu le katoo, mna Yesu wie mbo, “Sena wo wi ŋu hin?” La Yesu nsra paara.
10 A Pilate na u wie na mbo, “Ma paara na ni ni ra? Mu chin na nii wa jaŋga ni na mbe jaa ti pe mu wa, a nii wa jaŋga ni mbe ti pe mu kan kanyana kumu kaan kre naa?”
11 A Yesu na kna mbo, “Na Nyiɛkpɔɔ nsra mu ŋga ki jaŋga, kaa mu n wa na jaŋga ni ni na. Ki tia ndro ŋmba u ni wɔ mu ŋga kre, wre u le sisam kpɔɔ nu mu wɛ mu na.”
Pilate Na Yesu Le Sojae Kɛɛ
12 Ŋga Pilate na kre kee ŋga loo kre, wraa kolo ka chaa mbe Yesu wa. La, lenɛɛrɛ pre na ndru mu gble le, mbo, “Na mu u wa, kena ŋunu Caesar nunu ma ŋu na. Lewo ŋmba u uyɛ pe ŋunu kre, ŋunu Caesar loŋgo wi.”
13 Ŋga Pilate na yire kee nyjɛ loo kre, a wra yili na Yesu ni fimi na, mna pan mu tni u kpra kun jɔɔn na, praa ki yeeri Dnɛ Bamba. Hebrew yolo nu praa ki yeeri Gabbatha.
14 Kie pe lafo na, na nyiŋge we se mbe pe Klɛntro ble yire li, a Pilate na yo Judae pre pan mbo, “E ŋunu wre we.”
15 A praa gble mbo, “U gbo, u gbo, u kan kanyana kumu kaan na.”
Bawa Pilate na pe wie mbo, “E chaa mbe ni e ŋunu wre kan kanyana kumu kaan naa?”
A srawɔfɛɛnlɛ loplombo pre na kna mbo, “Caesar chiin wi o ŋunu.”
16 Kra tia Pilate na Yesu wru mna le sojae pre kɛɛ, na pe sɛ u kan kanyana kumu kaan na, a pra u wru mu sɛ.
Yesu Na Kanyana Kumu Kaan Tio
17 A Yesu titi na u kanyana kumu kaan kre tio, a pra yili mu sɛ da lawee ka nu, pe ki yeeri lewo ndra kajle. Hebrew yolo nu pe ki yeeri Golgotha.
The crucifixion (John 19:17-37)
18 Bawa pra u kan kanyana kumu kaan kre na. Pra leele shiin plɛ kan mu ya u na. Nunu naa wa u kalie, a nunu naa wa u kamɛŋɛ, a wraa wa pe lalaa.
19 Pilate na kee ka nyunɔ mna mbra kanyana kumu kaan kre na mbo, “YESU NAZARETH WO, JUDAE ŊUNU WRE.”
20 Lenɛɛrɛ na kre kee ŋga tɔɔnri, ŋgi na hin? Lawee ŋga nu pra u kan kre haa nsra le kakpɔɔ kre ni. Wra kre kee ŋga nyunɔ Hebrew, na Latin, na Greek yolo nu.
21 A srawɔfɛɛnlɛ loplombo pre na pan mu yo Pilate pan mbo, “Maa nyunɔ na, ‘Judae Ŋunu,’ la, ki nyunɔ na ‘Blɔ ŋmba yo wre wi Judae Ŋunu.’”
22 A Pilate na yo mbo, “Ŋga ni nyunɔ kre, kre ni nyunɔ.”
Pra Yesu Dodoŋgi Yɔɔlɛ Mu Ta
23 Ŋga sojae pre na Yesu kan kanyana kumu kaan kre na mu kɔ kre, a pra u dodoŋgi wru mna ki yɔɔlɛ jijirɛ, a sojae jijirɛ pre na yi ta nununu. A pra ndru mu u dodoŋgi titnɔŋɔ ŋga pra tin poŋgo, a frahaa nsraa wa ki na kre wru.
24 A sojae pre na yo peyɛ pan mbo, “Yaa ti mbe o ki wla, la, e ti mbe o kɛɛn tɛɛ, mbe chin ŋmba we ki ta.” Kre kee ŋga na tia Nyiɛkpɔɔ kee kre pra nyunɔ mu tɛɛ kre na pe yɛŋgɛ mbo,
“Pe ni dodoŋgi fimi wo yɔɔlɛ mu peyɛ ŋga,
mu kɛɛn tɛɛ,
mbe chin ŋmba we ni dodoŋgi lam wo ta.”a
A kre kee ŋga sojae pre na ki pe yɛŋgɛ.
25 Leele mblɛ praa wa mu yire mu mbra kanyana kumu kaan kre na pre na lɛ, Yesu lo, na Yesu lo chunu Mary, Clopas chɔ wre, na Mary Magdalene.
26 Yesu na u lo, na u twanfun ŋmba kee wraa chaa wre nya, na pee wa mu yire u jaara. A wra kna mu yo u lo pan mbo, “Maa, mu pɔ wi kre.”
27 Mna kna mu yo twanfun wre pan mbo, “Le, mu lo wi kre.” Kra yire kre kee ŋga na, a twanfun wre na Yesu lo wru, a wra sɛ tni u katoo.
Yesu Kumu
28 Yesu na chin na u kala kro kɔ, la, imi kie pe mbe Nyiɛkpɔɔ kee ŋga pe nyunɔ mu tɛɛ kre pe yɛŋgɛ kre, a wra yo mbo, “Gbɔɔ ni ta.”
29 Na chɔ kaa wa mu yire na simi nyanya ka ni. A pra zeere ka kun mna ni ki nu, mna ki pɔ kaan nyu na, mna ki yire nyjeeri mu sɛ taa u nyu na.
30 Ŋga Yesu na ki gbɔ mu kɔ to, mna kna mbo, “Ki kɔ.” Mna ndra soo to, mna fii.
Pe Yesu Su Chombo Ni U Gbugbuɛ Nu
31 A Judae loplombo pre na pan, mu yo Pilate pan na u pe ŋga kolo mbe pe leele taarɛ pre jeelee kuari, mbe pe laala kɛɛn yire na. Ki ble kre na pe Ajuan, a pe nsraa chaa mbe Wuuble da, na gboolo pree wa kɛɛn yire na tɛ. Na Wuuble kre pe ble kpɔɔ.
32 A sojae pre na sɛ yɛklo wre jeelee kuari, mna nunu wre wee kuari na.
33 La, ŋga pra da Yesu na kre, pra nya na u fii, kra tia pe nsra u jeelee kuari.
34 Sojae pre nunu na je mu Yesu su na chombo ni u gbugbuɛ nu, titɛɛ kre nu, na nyimi na nyumu fuu na woni.
35 Ŋmba wra kre kee ŋga nya kre u ki dansiɛrɛ lii kre. A u chin na kekpra u yuu, imi kie pe mbe e shɔ mbe li.
36 Yire kee nyjɛ na pe, imi kie pe mbe Nyiɛkpɔɔ kee ŋga pe nyunɔ mu tɛɛ kre pe kpra mbo,
“Pia u kajle nunu chom kuraa ka.”b
37 A pe ki nyunɔ hlɛ fɔŋgɔ nu na mbo,
“Leele we na ŋmba pe su chombo ni wre le.”c
Yesu Gboo Lehaa
38 Nyjɛ kɔkro kre, Joseph ŋmba wra yiri Arimathea na kre na pan mna Pilate tali, Yesu gboo wre. Wra pe Yesu twanfun ŋmba wra yila Judae pre fiɛrɛ na mnaa uyɛ ndra. Pilate na u ŋga kolo, a wra sɛ gboo wre wru.
The resurrection (John 19:38–20:18)
39 Nicodemus ŋmba wra da mu sɛ Yesu pan ki ble ka blee kre, wre na Joseph pra sɛ. Pra sɛ na tuwe ndiom taan ka ni, tinyi naŋgrɔɛ, na nyumu ni pe ki pini. Ki snamu na da weŋge bɔtɔ ni.
40 Pre leele shiin mblɛ na Yesu gboo wre wru, mna u fo yonyi finyi ni, mna tuwe kre wo u na, imi na Judae gboolo lee paala nyi.
41 Kagbla ka naa wa lawee ŋga nu pra Yesu gbo kre mbɛɛ na, dnɛ wee ka naa wa ki lam, na pe n da mu gboo le ki nu tun.
42 Na nyiŋge we se Judae Wuuble kre ndra na, a na dnɛ wee kre mbra wa, ki tia pra Yesu le wa.