Yesu Wa Pilate Yiɛ
15
Ŋga nyiŋge naa sii bnimi pupu to, a srawɔfɛɛnlɛ loplombo pre na nyinafɛɛnlɛ pre, na loplombo pre na mblɛ pra fni wa pre kro na sɛ bɔɔnri, mna Yesu pɔ mna sɛ u le Ŋunu Pilate kɛɛ.
2 Bawa Pilate na u wie mbo, “Ŋu wi Judae ŋunu wre kree?”
A Yesu na kna mbo, “Ŋga mu yo kre pe kpra.”
Crucifixion and Resurrection of Jesus (Mark 15:1–16:7)
3 A srawɔfɛɛnlɛ loplombo pre na kee tataara yo na Yesu yi pe.
4 A Pilate na ndru mu u wie mbo, “Kena ma ka nyu kun ra? Kee tataara nyjɛ pe yuu na mu taanla ŋga le ma rɛ.”
5 Yesu nsra paara na, a kra Pilate wre pe kawako ni.
6 Kena na pe pe ble kpɔɔ kre lii kre, u ndro nunu ŋmba pe chaa woni nyuŋgo mbe wa.
7 A kre nyjila kre, na linkufɛɛnlɛ plɛ kanyaa le mu abani taan, mna ndro gbo, a pra pe yii mna sɛ le nyuŋgo, na nunu waa wa pe nu, a praa u yeeri Barabbas.
8 A leele tataara pre na flo mu da na yuu Pilate pan, na u wa wɔ nyuŋgo mbe pe ŋga imi na u pini na pe kaan kre.
9 A Pilate na pe wie mbo, “E chaa mbe ni Judae ŋunu wre wɔ mbe e ŋga ree?”
10-11 Wra chin na prara na srawɔfɛɛnlɛ loplombo pre na kanhun le leele pre nu, na pe ti mbe u Barabbas wɔ mbe pe ŋga.
12 A Pilate na ndru mu kna mu pe wie mbo, “Kena mni e chaa mbe ni ŋmba e yeeri Judae ŋunu wre pe hin?”
13 A lenɛɛrɛ pre na kna mbo, “U kan kanyana kumu kaan na.”
14 A Pilate na kna mbo, “Mni hin? sisaa ŋgi u pe hin?”
A pra ndru mu gble le kpɔɔ mbo, “O yo mu u kan kanyana kumu kaan kre na.”
15 Ŋga Pilate naa chaa mbe lenɛɛrɛ pre gbun nyiŋge kre ndra na, a wra Barabbas ti mna pe ŋga, mna tia pra Yesu frɔ na fwa ni, mna pe ŋga kolo na pe sɛ u kan kanyana kumu kaan kre na.
Pe Pna Na Yesu Ni
16 A sojae pre na sɛ na u ni ŋunu wre katoo, mna sojae pre kro yeeri a pra pan mu fni.
17 A pra u le dodoŋgi nyiɛ ka, mna wuuro juulee tin mu u juule.
18 A praa u shaari na yuu mbo, “Judae Ŋunu, mu ka pe.”
19 A pra braŋgɔ fwa tɛɛ mu u ndra lalaa fɔɔri, mnaa tɛɛnrɛ woni u na, na kosie kani u yiɛ, na sumi pe u sumi.
Golgotha Lawee
20 Ŋga pra pna na u ni mu kɔ kre, a pra dodoŋgi nyiɛ kre tini mu wɔ u na, mna u le wre titi dodoŋgi kre, mna sɛ na u ni, mbe sɛ u kan kanyana kumu kaan kre na.
21 Ŋga praa shie kre, pra Cyrene ndro, Simon ŋmba biile lɛ Alexander na Rufus wre fni, na u yiri see na paan, a pra u yii jaŋga na mna u tio kanyana kumu kaan kre.
22 Ŋga pra sɛ da na Yesu ni lawee ŋga praa yeeri Golgotha na kre, ki nɔɔ nyina lewo ndra kajle lawee,
23 bawa pra tuwe susrom ka chaa simi nu, mu taa u nyu na, a u nsra ki gbɔ.
24 A pra u kan kanyana kumu kaan kre na, mna u dodonyi yire wru mu yɔɔlɛ mu peyɛ ŋga, hali mna yi kɛɛn tɛɛ, mbe chin ŋga pie ta ta.
25 Ŋga pra u kan kanyana kumu kaan kre na kre, na kie pe bnimi nyjila kɔɔnanyjirɛ.
26 A pra u pimi kee nyunɔ u ndra nyjeeri mbo,
“JUDAH ŊUNU.”
Loplombo Pre Kro Pna Yesu Ni
27 Na pe kokɔɔnlɔ shiin plɛ kan mu ya u na, nunu naa wa u kalie, a nunu naa wa u kamɛŋɛ.
28 (Bawa Nyiɛkpɔɔ kee ŋga pra nyunɔ kre, na pie u chaa sisampefɛɛnlɛ nu kre, na pan ma.)a
29 Leele mblɛ praa tro na u nyaa pre naa u tɛɛlɛ na tro, na pe ndrɛ nyaara mbo, “Ŋu ŋmba mu Suminyuŋgo juari mbe wo, mbe ndru mbe ki sin ble taarɛ kre, ŋu wi ŋmbaa?
30 Muyɛ shɔ mu yili kanyana kumu kaan ŋga na mu tii tra.”
31 Pan chɔɔ, srawɔfɛɛnlɛ loplombo pre na nyinafɛɛnlɛ pre naa pna na u ni na yuu mbo, “Wraa plɛ shio, a wa jaa uyɛ shɔ.
32 Fuŋgaami ŋga e ti mbe Kristo wre, Israel Ŋunu wre, mbe u tii kanyana kumu kaan kre na mbe o nya mbe shɔ mbe li.” A mblɛ pra kan mu ya u na wa pre naa u tɛɛlɛ ka na.
Yesu Kumu
33 Ŋga nyjila kɛmbɔshiin na gbun kre, ndram na wɔ lawee kro nu, mna sɛ su nyjila taarɛ lafo na.
34 Ki nyjila taarɛwo kre nu Yesu na mana kpɔɔ tɛɛ mu fuu, mbo, “Eli! Eli! Lama sabach-thani?” Ki nyina na “Ni Nyiɛkpɔɔ! Ni Nyiɛkpɔɔ! Mni a mu laa ni kro hin?”
35 Ŋga leele mblɛ praa wa wa pre plɛ na kee kre loo kre, a pra kna mbo, “E loo, u Elijah yeeri!”
36 A pe nunu na fɛ mu sɛ zeere le simi ŋga ki taan nyanya ka nu, mu ki su braŋgɔ kaan nyu na, mna u ŋga mbe u gbɔ mbo, “E ti mbe o na le, na Elijah we paan u tre tra rɛ.”
37 Ŋga Yesu na ndru mu gble kpɔɔ le ma na to, mna fii.
38 Kre nyjila kre nu yoŋgo ŋga pra pɔ mu suminyuŋgo kre yɔ kre na peeri shiin, mu yire nyjeeri mu pan mu su tapan.
39 Ŋga sojae lopom ŋmba wraa wa mu yire u yɛsimi na u le wre, na u kumu kre nya ma kre, a wra kna mbo, “Kpra na, ndro ŋmba, Nyiɛkpɔɔ Biblɔ wre wi yɛŋgɛ.”
40 Na chiɛlɛ plɛɛ wa mu yire haalee na le, na Mary Magdalene, na James ble, na Joseph lo Mary, na Salome, na pee wa mu chaa pe nu.
41 Pre chiɛlɛ mblɛ, nyjila ŋga ni Yesu naa wa Galilee na kre, pe kro na taa u kro mna yaa u na, a chiɛlɛ mblɛ pra taa u kro mu pan Jerusalem na wa kre plɛ na chaa.
Yesu Lehaa
42 Ŋga kra da yilakɔŋgɔ nyu na kre, na kre ble kre yi peyɛ kna ble, mbe nyiŋge se Judae Wuuble. Kra tia,
43 Joseph, ŋmba u yiri Arimathea na, ŋmba wra chaa loplombo kalalifɛɛnlɛ pre nu, a pra u shɔnli kama, a wraa Nyiɛkpɔɔ ŋunumu kre sri na chɔɔ, na gbuntitirem wru mna sɛ Pilate yiɛ, mna sɛ u tali Yesu gboo wre.
44 Ŋga Pilate na loo na Yesu ku fuŋga ma kre, kra u fo, a wra u sojae lopom wre yeeri mna u wie na yɛŋgɛ yi rɛ.
45 Ŋga sojae lopom wre na yo u pan na u ku kre, a wra tia Joseph na sɛ u gboo wre wru.
46 A Joseph na sɛ mbɔfiŋge lɔ, mna sɛ Yesu laa kaan kre na, mna mbɔfiŋge kre tɛɛ mu u pɔ, mna sɛ u le dnɛ wee ŋga pe tuu mu wa ka nu, mna dnɛ gbila mu wee kre nyu tɔ.
47 Mary Magdalene, na Joseph lo Mary, na Yesu lehaa kre nya.