2 Mna sɛ kaalɛɛ fnɛ mu taa u na mbo, “O blɔ ŋmba yii na u o leele fana, na yuu pe pan na pia na tɔɔ toni mbra waŋgra lopom Caesar kaan, na yuu wre wi Kristo wre, a ŋunu wi.”

3 A Pilate na kna mu u wie mbo, “Ŋu wi Judae ŋunu wre kree?”

4 A Pilate na kna mna yo srawɔfɛɛnlɛ loplombo pre, na lenɛɛrɛ pre pan mbo, “Ni n nya sisaa ŋga blɔ ŋmba pe.”

5 A pra je na yuu mbo, “U kee yire u nyina kre ndra na, u pan na kakrɔ ni Judea leele nu. Galilee na wra nɔɔhle, a fuŋgaami u da mna.”

6 Ŋga Pilate na kre kee ŋga loo kre, a wra u wie, na Galilee ndro wi Yesu rɛ?

7 Ŋga Pilate na chin na ŋunu Herod tra nu Yesu yiri kre, wra tia pra sɛ na u ni ŋunu Herod pan. Kre nyjila kre chɔɔ, na wree wa Jerusalem na wa.

8 Ŋga ŋunu Herod na Yesu nya kre, u yiɛ na shɔ. Ŋgi na hin? Na u u chaa mbe nya fa. Ŋgi na hin? Na u u kee loo, na kaan na we u kawako kee yire ka nya.

9 Ki tia, wra Yesu wie kaalɛɛ mna mu, la, Yesu nsra ka nyu wɔ.

10 Na Judah srawɔfɛɛnlɛ loplombo pre, na mbra nyinafɛɛnlɛ pree wa mu yire na kaalɛɛ badɛnyi yuu na taari u na.

11 A ŋunu Herod na u sojae naa u pini na tɛɛ, na u le na lewaa wi, a Herod na tia pra u le dodoŋgi titnɔŋɔ chichie ka, mna ndru mna tia pra sɛ na u ni Pilate pan.

12 Ki ble kre lam ŋunu Herod na Pilate na nɔɔlɔ yii, la, jle kre, na pe n tna na peyɛ ni.

13 Ŋga kra pan ma kre, Pilate na Judah srawɔfɛɛnlɛ loplombo pre, na chia loplombo pre, na leele pre kro yeeri a pra pan mu fni,

14 a wra yo pe pan mbo, “Yire e pan mu ni ŋga blɔ ŋmba, na u paara na leele pre fana, a ŋga ni u wie e yiɛ na kre, kee nyjɛ e yo mu taa u na yire krɛrɛ, u n ka pimi li.

15 Pan chɔɔ Herod nya na u n pimi li, a u ndru mu tia pe pan na u ni mu o ŋga. Blɔ ŋmba n kee ka pe, a ki fna ni u gbun kumu pimi ni.

16 Kena mbe ti pe u frɔ fotro ni, mbe ni u wa mbe u sɛ.”

17 Na pe klɛntro ble lii kre, ki fna mbe Pilate ndro nunu ŋmba leele pre chaa wɔ nyuŋgo mbe wa.

18 La, leele pre kro na gble le mbo, “E blɔ ŋmba gbo. E Barabbas wɔ e o ŋga.”

19 Na Barabbas kakrɔ ka tun chia kre na mu ndro gbo, a pra yila ki na mna u yii mu sɛ le nyuŋgo.

20 Pilate naa chaa mbe Yesu wa. Kra tia wra leele pre yeeri na, mna paara pe pan.

21 La, pra je na gble leni kpɔɔ na yuu mbo, “E u kan kanyana kumu kaan na.”

22 A wra ndru mna paara pe pan taarɛwo na mbo, “Sisaa ŋgi u pe ma hin? U n sisaa ka pe a ni nya, a ki tia u fna kumu ni. Kena mbe ti pe u frɔ fotro ni, mbe ni u wa mbe u sɛ.”

23 A pra kro na gble leni kpɔɔ na yuu na pe Yesu kan kanyana kumu kaan na.

24 Imi na pra kro na gble leni kre na tia Pilate na li pe wo kre na, mna Yesu gbun pimi ni.

25 A wra Barabbas linkufun wre wɔ mu wa, mna Yesu wɔ mu pe ŋga imi pre titi naa chaa.

26 Ŋga pra Yesu yii na shie kre, pra blɔ wa fni, praa u yeeri Simon, a wra yiri Cyrene na, na shie Jerusalem na wa. A pra u yii mna u tio Yesu kanyana kumu kaan kre, a wra taa na ki ni Yesu kro.

27 Lenɛɛrɛ na taa u kro na nyɛni na u kaan, chiɛlɛ na chaa pe nu.

28 A Yesu na kna mna yo pe pan mbo, “Jerusalem chiɛlɛ, yaa ni nyɛni, la, e na yire na e biile nyɛni.

29 Ble yɛ paan, yire nu leele we na yuu mbo, ‘Gbendee, na chiɛlɛ mblɛ pe n biile ni kre nyiɛ nyu.’

30 Yire ble yire nu leele we na yuu nyuɛ pan na, ‘E klɔ e pan e o fɛɛri.’

31 Kena na pe tiŋge nyiŋge ŋga pe imi, kena tiŋge waa kre, mni pie kre pe hin?”

32 Bilɛ shiin plɛ na sisaa kpɔɔ ka pe, a pra pe yii mna ya Yesu na, mbe sɛ pe gbo.

33 Pra da lawee ka nu, praa ki yeeri Lewo Ndra Kajle. Bawa pra Yesu kan kanyana kumu kaan na. Pra sisampefɛɛnlɛ shiin pre wa kan Yesu kalie, mna nunu kan u kamɛŋɛ.

34 A Yesu na kna mbo, “Ndoo, pe sisam ti mu pe kɛ. Na pe n chin kee ŋga pe pini.” A sojae pre na Yesu yirɛ nyjɛ wra le yire yɔɔlɛ mna kɛɛn tɛɛ, mbe chin imi pie ta ta.

35 A leele pre na yire na kaalɛɛ nyjɛ yi pini yire le, a Judae loplombo pre naa u pini na tɛɛ mbo, “Wraa plɛ shio, na Nyiɛkpɔɔ Kristo ŋmba u wɔ wre wi, e ti mbe u uyɛ shɔ.”

36 A sojae pre naa u pini na tɛɛ. A pra pan mna u ŋga simi susrom ka mbe u gbɔ,

37 mna yo u pan mbo, “Na ŋu wi Judae ŋunu wre kre, kena mu yɛ shɔ.”

38 Pra yira ka nyunɔ mna kan u ndra nyjeeri mbo, “JUDAE ŊUNU WRE WI KRE.”

39 Sisampefɛɛnlɛ pre pra kan mna mbra Yesu na pre nunu na Yesu tɛɛlɛ mna yo mbo, “Ŋu ma Kristo wre kree? Muyɛ shɔ, mu o shɔ na.”

40 A haŋu wre na kna mna u ŋmbrɔ wre yiɛ kee yo u pan mbo, “Mu n na Nyiɛkpɔɔ fiɛ mbe? Kanyana nunu o kro nyaa kre.

41 Wre kanyana ŋga fna na o ni. Ŋgi na hin? Kee ŋga o pe ndra na, pe o pini ma, la, wre blɔ ŋmba n sisaa ka pe.”

42 A wra kna mna yo Yesu pan mbo, “Na maa mu ŋunumu kre li, jande, mu ni sɔɔnri.”

43 A Yesu na kna mna yo u pan mbo, “Kpra na ni yuu mu pan na, aŋga lam, mi na ŋu we tni Paradise Nyiɛkpɔɔ lawee chichie kre nu.”

44 Kra gbun kie pe nyjila kɛmbɔshiin lafo na, a ndram na wɔ lawee kro nu, mna sɛ su nyjila taarɛ.

45 Nyjila ŋga ndram na wɔ lawee kro nu kre, yoŋgo ŋga pra tɛɛ mna Suminyuŋgo kre yɔ shiin kre na peeri shiin.

46 A Yesu na fuu kpɔɔ mbo, “Ndoo, mu kɛɛ ni ni ŋumu wru mu le.” Ŋga wra yo ma to, mna ŋu haŋa.

47 Ŋga sojae lopom wre na kee ŋga ki pe kre nya kre, wra Nyiɛkpɔɔ ŋga mɛɛ, mna kna mbo, “Kpra na, lewo chiriri wi blɔ ŋmba yɛŋgɛ.”

48 Leele mblɛ pra fni wa na kala le kre, ŋga pra kee ŋga kra pe kre nya kre, pra kɛnyi taa taa gbun na mna ndru mu sɛ katoo na fooro ni.

49 A Yesu nɔɔlɔ, na Galilee chiɛlɛ mblɛ pra taa u kro pre na yire haalee na kala ŋga ki pini kre le.

50 Blɔ wa naa wa praa u yeeri Joseph, a wra yiri Judea chia ŋga praa yeeri Arimathea kre na. Wra pe pe kalalihaa loplombo pre wa, a wra pe kprafun, mna pe ndro chichuo.

51 A u nsra li kee nyjɛ loplombo pre naa pini yire na. Ŋgi na hin? Na u Nyiɛkpɔɔ ŋunumu kre paan sri.

52 Wre blɔ ŋmba na sɛ Pilate pan, mna sɛ u tali Yesu gboo.

53 Wra u ŋga gboo wre, a wra u kɔ kaan kre na, mna u fo na mbɔfiŋge ni, mna sɛ u le dnɛ wee ka nu, na pe n da mu gboo le wa tun.

54 Na Ajuan ble yi, mbe nyiŋge sɛ Judae Wuuble.

55 Chiɛlɛ mblɛ pra taa Yesu na mu yiri Galilee na kre, na taa u na mna sɛ faŋga kre lawee nya, mna lawee ŋga nu wra u sniŋge krɛrɛ nya.

56 A pra ndru mna pan katoo, mna pan mu tuwe ndiom tɛɛn yɛ pe, mbe sɛ u gboo wre fa. Ŋga nyiŋge na se kre, na Wuuble yi, a pra wuu Moses mbra kolo na.