Yesu Nyjeeri Sɛhaa
24
Ŋga nyiŋge na se Aliɛri ble bnimi pupu kre, chiɛlɛ pre na pe tuwe ndiom tɛɛn nyjɛ pra pe yire wru, mna sɛ faŋga kre lawee.
Luke 24:1-35
2 Ŋga pra da wa kre, na pe dnɛ kre gbila mu laa wee kre nyu na.
3 La, ŋga pra le wee kre nu kre, pe nsra Yesu gboo wre nya.
4 Ŋga pra yire na ki jawa kre, titɛɛ kre nu to, a bilɛ shiin plɛ na pan mu yire pe jaara, mna dodonyi finyi prupru le, yira chiɛnri.
5 Fiɛrɛ na chiɛlɛ pre yii, a pra yiɛ juule tra, a bilɛ shiin pre na kna mna pe wie mbo, “Mni a e na ndro ŋmba u le chaa gboolo nu hin?
6 U n wa mna, u nyi. E kee ŋga wra yo e pan Galilee na kre sɔɔnri.”
7 Mbo, “Pie Lewo Biblɔ wre wɔ mbe le sisampefɛɛnlɛ pre kɛɛ, mbe pe u kan kanyana kumu kaan na, a u ble taarɛ ble na we nyi.”
8 Bawa pra Yesu kaalɛɛ nyjɛ wra yo pe pan yire sɔɔnri.
9 A pra flo faŋga kre jaara, mna sɛ mandiɛ kre kro yo u twanfɛɛnlɛ kɛmbɔnunu pre, na leele hamblɛ pre pan.
10 Chiɛlɛ mblɛ pra sɛ mandiɛ kre yo bitumblɔ pre pan na lɛ, Mary Magdalene, na Joanna, na Mary, James lo. Chiɛlɛ plɛ na ya pe na.
11 Kee kre na pe pe pan na mbuura yi, ki tia pe nsra ki shɔnli.
12 A Peter na yiri mna fɛ mu sɛ faŋga kre lawee, mna sɛ ja mu ki lam jle. Mbɔfiŋge ŋga ni pra Yesu pɔ kre chiin wra nya wa. Kee kre na u pe kawako, a wra ndru mna sɛ katoo.
Nyjila Ŋga Ni Praa Shie Emmaus Na
13 Ki ble kre lam, na u twanfɛɛnlɛ pre shiin shie seechia ka na, praa ki yeeri Emmaus, kre na Jerusalem we pe kɔnsni kɔɔnashin.
14 Ŋga praa shie kre, kaalɛɛ nyjɛ yira pe yire kee praa yuu na shie.
15 Ŋga praa yire kee yire yuu na peyɛ ni na shie kre, Yesu na pan mu chaa pe nu, a pe kro na chaa na shie.
16 Pra u nya, la, pe nsra chin na Yesu wi.
17 A wra kna mna pe wie mbo, “Kaalɛɛ nyji e yuu na shie ŋga hin?”
A pra yire na fooro yiɛ ni na u le.
18 A pe nunu wa praa yeeri Cleopas, na kna mna u wie mbo, “Kala ŋga ki pan Jerusalem na ble shiin ŋga nu ŋga, kena ŋu chiin wi fuŋu wa, a mu n ki loo ra?”
19 A Yesu na kna mbo, “Yira ŋgi kala ki pe wa hin?”
A pra kna mna yo u pan mbo, “Kaalɛɛ nyjɛ yi pan Yesu Nazareth wo wre na kre. Nyiɛkpɔɔ kee nyanyofun na wi, a wraa kekpɔɛ pini na paara na jaŋga ni, a Nyiɛkpɔɔ na leele kro u shɔnli.
20 A o srawɔfɛɛnlɛ loplombo pre, na Judae loplombo pre u wɔ mu ŋga na pe sɛ u gbo, a pe sɛ u kan kanyana kumu kaan na.
21 La, o naa kaan na wre we pan mbe Israel leele shɔ pe tnimu nu. A na o kee ŋga o yuu ŋga tɛɛ mbɛɛ na kre, ŋga pe u gbo aŋgaa ki ble taarɛ.
22 A chiɛlɛ mblɛ wre na pre nyaari kre plɛ pan mu kee ka yo o pan, a ki o fo. Pe sɛ faŋga kre lawee bnimi ŋga,
23 mu sɛ gboo wre cha mu la, mu ndru mu pan mu yo na, pe nyjeeri bitumblɔ nya wa, a pe yo na u nyi.
24 A o wolo pre plɛ sɛ wa, mu sɛ ki nya ma yɛŋgɛ, a pe n u nya faŋga kre nu.”
25 A Yesu na kna mna yo pe pan mbo, “Mni a e daŋga ma hin? E ndiile kan. Kee nyjɛ Nyiɛkpɔɔ kee nyanyofɛɛnlɛ pre na yo e pan yire krɛrɛ, e n yi shɔnli.
26 Nyiɛkpɔɔ kee nyanyofɛɛnlɛ pre nsra yo na ki fna mbe Kristo wre yire kaalɛɛ nyjɛ krɛrɛ nya tun mbe chiin sɛ u yɛnyiŋge kre nuu?”
27 A Yesu na pe nyina u kee nyjɛ Moses na nyunɔ u hlɛ yire nu, na u kee nyjɛ Nyiɛkpɔɔ kee nyanyofɛɛnlɛ pre na nyunɔ mu tɛɛ yire kro.
28 Ŋga pra mbra seechia ŋga na praa shie kre na kre, a Yesu na pe na u chaa mbe troo sɛ yiɛ.
29 A pra u yii mna yo u pan mbo, “Jande, maa sɛ ma, ble wɔ mu kɔ. Kena o sɛ katoo.” A wre na pre na sɛ katoo.
30 Wre na pre na tni na lii. A wra paanu wru, mna ki dwan, mna ki pile mu pe ŋga.
31 Titɛɛ kre nu to, a Nyiɛkpɔɔ na pe nyiɛlɛ nyaa, a pra u nya mna chin na Yesu wi. Titɛɛ kre nu to, a wra fun pe yiɛ na.
32 A pra kna na yuu peyɛ pan mbo, “Nyjila ŋga ni u o nyina u kee yire pe nyunɔ mu tɛɛ kolo wa kre, na ki pe yɛshɔɔrɔ ni.”
Bitumblɔ Shiin Pre Na Ndru Mu Sɛ Jerusalem Na
33 Titɛɛ kre nu to, a pra yiri mna sɛ Jerusalem na, pra sɛ bitumblɔ kɛmbɔnunu pre, na leele hamblɛ pre da, na pe fni titɛɛ.
34 Na yuu mbo, “O Tafun wre nyi yɛŋgɛ. U uyɛ wɔ mu Simon nyina.”
35 A leele shiin pre na kee nyjɛ pra nya kolo wa kre yo, na imi na wra paanu pile mu pe ŋga, a pe yiɛ na chin mu kna u na.
Yesu Na Uyɛ Wɔ Mna Bitumblɔ Pre Nyina
36 Nyjila ŋga nu praa kaalɛɛ yire yuu pe pan kre to, Yesu wre titi na pan mu yire pe lalaa mu yo pe pan mbo, “E tni wejinyiŋge nu.”
Luke 24:36-53
37 A fiɛrɛ na pe yii. Pra seeri, mnaa jawa na pe gboo nya.
38 A wra kna mna yo pe pan mbo, “Mni a fiɛrɛ e yii, a e jawala pe shiin shiin ŋga hin?
39 E ni kɛ lam, na ni jeelee le, e ni yii e le, ee chin na mi wi. Gboo n wa na wejikaara na kajle ni, imi na ni nyi mu yire ŋga.”
40 Ŋga wra yo ma kre, a wra pe nyina u kɛnyi, na u jeelee yire.
41 Kee kre na pe pe yɛshɔɔrɔ na kawako, ande na pe n ta mu u shɔnli peii mu kɔ. A wra kna mna pe wie mbo, “Yakaa wa e pan mna mbe e ka ree?”
42-43 A pra mbro sɔɔ wo wa peeri mna u ŋga, a wra ka pe yiɛ na.
Ketaan Kre Nɔɔ Nyina Haa
44 A Yesu na kna mna yo pe pan mbo, “Yire kee nyjɛ, nyjila ŋga ni ndaa wa e jaara kre, ndaa yi yo e pan, na ni kee yire Moses nyunɔ u mbra yire nu mu tɛɛ kre, na nyjɛ Nyiɛkpɔɔ kee nyanyofɛɛnlɛ pre nyunɔ kre, na nyjɛ yii wa mɛɛ hlɛ kre nu yire kro we pe yɛŋgɛ.”
45 A wra pe jawala nyaa, a pra kee yire pe nyunɔ mu tɛɛ yire nɔɔ loo.
46 A wra yo pe pan mbo, “Pra ki nyunɔ mu tɛɛ fa na, Kristo wre fna mbe kala nya, mbe pe u gbo, mbe u nyi u ble taarɛ ble na mbe yili kuulo nu.
47 Mbe u mɛɛ kre ti mbe jawala chinɛɛ, na sisam tinkɛɛ kee kre, mbe ki kpali waŋgra kro nu, mbe yire Jerusalem na.
48 Yire ee kee yire krɛrɛ dansiɛrɛ li.
49 A nyu ŋga ni lɛ na yo kre, mbe ti ki pe ma mbe ŋga, yaa shia sɛ haka. E tni Jerusalem na, mbe sɛ su na ee jaŋga ŋga ki yiri nyjeeri kre ta tun.”
Yesu Nyjeeri Sɛhaa
50 A wra yili na pe ni chia kre na, mna sɛ da na pe ni Bethany na, mna kɛnyi yire nyjeeri mna pe dwan.
51 Ŋga wraa pe dwan kre to, a pra u wru na shie nyjeeri.
52 A bitumblɔ pre na kosie kan mna u sumi na yɛshɔɔrɔ kpɔɔ ni, mna ndru mna sɛ Jerusalem na.
53 A nyjila kro nu, praa wa Suminyuŋgo wa na Nyiɛkpɔɔ kaan mɛɛ.
Luke -credits