Yesu Nyi
28
Ŋga Judae Wuuble kre na tro, a ki nyiŋge naa sii kre, Mary Magdalene, na Mary shiinwo wre na gbolo mu sɛ faŋga kre jaara.
2 Ŋga pra da wa kre, tra na seeri badaaŋga, a o Tafun wre nyjeeri bituŋu na tii wa, mna dnɛ ŋga ni pra faŋga kre nyu tɔ kre gbila mu tɛɛ mbɛɛ na, mna tni ki na.
3 A wraa chiɛnri na nyiɛ ki nyini, a u dodoŋgi na fniŋge prupru u na, na nyiɛ subie yi.
4 Ŋga kra pan ma kre, fiɛrɛ na mblɛ praa faŋga kre sri pre yii kpɔɔ, a pra to mu sni na gboolo lɛ.
5 A nyjeeri bituŋu wre na kna mna yo chiɛlɛ pre pan mbo, “Yaa fiɛ, ni chin na Yesu ŋmba pra kan kanyana kumu kaan na wre e chaa mbe nya.
6 U n wa mna. U nyi imi wra ki yo kre. E n nyaa, e pan e u snihaa kre le.
7 E sɛ nyaanyaa. E sɛ yo u twanfɛɛnlɛ pre pan na u nyi. A u yiɛ klu na shie Galilee na. Bawa ee u nya imi na ni yuu e pan ŋga.”
Pra Yesu Fni
8 Titɛɛ kre nu, a pra krɔ kna mna fɛ mu yili faŋga lawee wa, na fiɛrɛ, na yɛshɔɔrɔ badaaŋga ni, na shie u twanfɛɛnlɛ pre pan.
9 Ŋga praa shie kre, Yesu na pe fni mna yo pe pan mbo, “E shaari.” Ŋga wra yo ma to, a pra fɛ mna pan mu kosie kan u yiɛ, mna u jeelee yii.
10 A Yesu na kna mbo, “Yaa fiɛ, e sɛ yo ni wolo pan na pra shie Galilee na, bawa pie sɛ ni nya.”
Srawɔfɛɛnlɛ Loplombo Pre Na Sojae Pre Dɔli
11 Ŋga chiɛlɛ pre na kna na shie kre, kre nyjila kre, na leele mblɛ pra wɔ a pra sɛ na Yesu faŋga kre sri kre, na pe plɛ sɛ chia lam, na kala ŋga ki pe faŋga lawee wa kre kro yuu srawɔfɛɛnlɛ loplombo pre pan.
12 Ŋga pe kro na chia loplombo pre kro na fni kre, pra bɔɔnri, mna sojae pre pra sɛ faŋga kre shie pre ŋga swa tataara.
13 Mna yo pe pan mbo, “E yo na, ‘U twanfɛɛnlɛ pre pra pan mu u ju mu wɔ ble, na e sni na ŋunu.’
14 Kena na ki waa pan na waŋgra lopom ki loo kuraa kre, oo yo mbe yire e kro, kena kala kɔ.”
15 A sojae pre na swa kre shɔ, mna sɛ kee ŋga pra yo pe sɛ pe kre pe. Ki tia kre kee ŋga na kpali Judah leele nu mu yire kre ble kre mu pan mu su aŋga na.
Kee Kre Kpalaa
16 Twanfɛɛnlɛ kɛmbɔnunu pre na sɛ Galilee nyua ŋga kee Yesu na yo pe pan kre na.
17 Ŋga pra Yesu fni wa kre, pra kosie kan mna u sumi, la, kre nyjila kre na pe plɛ jawalaa shiin shiin.
18 A Yesu na flo mu da pe na mna yo pe pan mbo, “Pe ni ŋga jaŋga ŋga kii wa nyjeeri na tra kro.
19 Kena e sɛ waŋgra kro nu, e sɛ leele pe ni twanfɛɛnlɛ, e pe ndrɛ je e le ni Lɛ wre, na u Biblɔ wre, na Kpra Ŋumu wre mɛɛ nu.a
20 E pe nyina mbe pe taa nyjɛ ni e nyina yire kro na. E le, nii wa e kro mbe sɛ su waŋgra kla ble.”