Faŋga Waa Kre
16
Ŋga Wuuble kre na tro kre, Mary Magdalene, na James lo Mary, na Salome, na sɛ tuwe ndiom taan ka lɔ, mbe sɛ Yesu gboo fa na ki ni.
2 Aliɛri ble bnimi, na yila paan mbe yili, a pra yiri na shie faŋga kre lawee.
3 A pra kna na peyɛ wie mbo, “A ŋmbi we dnɛ kre laa faŋga kre nyu na o pan hin?”
4 Ŋga pra yiɛ yire mbe le kre, pra nya na pe dnɛ kre laa faŋga kre nyu na, na dnɛ kre kpɔɔ.
5 Ŋga pra le faŋga kre nu, pra nya na nyanyjɛble waa wa mu tni pe kalie, mu dodoŋgi titnɔŋɔ fiŋge le. Ŋga pra u nya ma kre, fiɛrɛ na pe yii.
6 A wra kna mu yo pe pan mbo, “Yaa fiɛ. Yesu Nazareth wo ŋmba pra kan kanyana kumu kaan na wre e chaa ra? U nyi. U n wa mna, e le, lawee ŋga nu pra u sniŋge yi kre.
7 E sɛ yo Peter na twanfɛɛnlɛ hamblɛ pre pan, na u yiɛ klu na shie Galilee na. Bawa ee u nya, imi na wra yo e pan kre.”
8 Titɛɛ kre nu, a pra krɔ kna mna fɛ mu yili faŋga ndoo wa mna sɛ. Na seeree na fiɛrɛ wo pe kro na. Pe nsra kala ka yo ndro pan, ŋgi na hin? Na pe fiɛ.
Mary Magdalene Yesu Nya
9 Ŋga Yesu na nyi Aliɛri ble bnimi kre, Mary Magdalene, ŋmba nu wra ŋumufuɛn kɔɔnashin wɔ wre wra klu mu uyɛ wɔ mu nyina.
10 A wra sɛ ki yo mblɛ pre na Yesu naa nyaari fa pre pan, na pee wa na fooro lii, na nyɛni.
11 Ŋga pre na loo na u u nya, a uu wa na le kre, pe nsra ki shɔnli.
Mblɛ Praa Shie Emmaus Na Kre
12 Kre kɔkro kre, wra uyɛ wɔ mna pe shiin plɛ nyina kepele fɔŋgɔ ka na, na pe nyaari na shie kable ka na.
13 A pra ndru mna pan mna ki yo hamblɛ pre pan, a pe nsra pe shɔnli na.
Yesu Uyɛ Wɔ Mu Pe Kro Nyina
14 Kre kɔkro na, na u twanfɛɛnlɛ kɛmbɔnunu pree wa mu tni na lii, a wra uyɛ wɔ mu pe nyina, mna pe yiɛ kee yo pe pan, shɔɔ ŋga pe nsra shɔnli, na pe ndikana sisaa, na ŋga pe nsra mblɛ pra u nya mu pan mu yo pre shɔnli kre ndra na.
Bitumblɔ Pre, Na Sɛ Ketaan Kre Yohaa
15 A wra yo pe pan mbo, “E sɛ waŋgra kro nu. E sɛ ketaan kre yo e leele kro nyina.
16 Ŋmba we shɔ mbe li, mbe e u ndra je kre, we ŋmaa ta, a ŋmba u n shɔnli kre, pie u gbun pimi ni.
17 Kee nyjɛ mɛɛ yie taa ni shɔnlifɛɛnlɛ pre na yi kre, ni mɛɛ ni, pie ŋumufuɛn wɔ leele nu, mbe paara yolo fɔnyi nu.
18 Pie wɔɔlɔ yii na kɛ ni, a na pe tuwe sisaa gbɔ kuraa kre, kia jaa pe pe yaka. Pie kɛ taa yambla na, mbe pe faŋga ta.”
Yesu Nyjeeri Sɛhaa