Luke Ketaan Kre
Paaraa
1
Theophilus chichuo, leele tataara na gbeŋmba mna kaalɛɛ nyjɛ yira pe o nu yire nyunɔ mu tɛɛ.
Luke 1:1-25
2 Pra yi nya na nyini ni, a imi na pra yi nya kre, pan pra yi yo o pan.
3 Kena Theophilus chichuo, kee nyjɛ pe yo yire, ni yi kee wie mu nya na yi pe kpra, a ni nya na ki nyu na mbe yi nyunɔ chiriri mbe paan mu ŋga,
4 imi kie pe mbe mu chin na kee nyjɛ pe mu nyina yire pe kpra.
John Sefɛɛnlɛ
5 Nyjila ŋga ni Herod na ŋunumu li Judea tra nu kre, na srawɔfun waa wa wa, a praa u yeeri Zechariah, a wra yiri Abijah srawɔfɛɛnlɛ feko kre nu. U chɔ mɛɛ naa Elizabeth, a wra pe Aaron sele ndro.
6 Pe kro shiin na fraka Nyiɛkpɔɔ yiɛ, mnaa lii Nyiɛkpɔɔ mbra, na u kaalɛɛ kro na.
7 Gbende na wi Elizabeth, kra tia pe nsraa biile ni, a na Zechariah pe blɛlɔɔ, a u chɔ pe chalɔ.
Pe John Semu Kee Nya Mu Yo
8 Kena kra da Zechariah na, mbe u sɛ sɔfum tnumu tun Nyiɛkpɔɔ Suminyuŋgo wa.
9 Imi na srawɔfɛɛnlɛ pre tnumu kre kolo naa nyina kre, pra kɛɛn tɛɛ paala kolo na, a kra Zechariah wɔ na wre ki fna mbe u sɛ Nyiɛkpɔɔ Suminyuŋgo wa mbe sɛ tuwe ndiom tɛɛn sro.
10 Nyjila ŋga ni wraa wa wa na tuwe ndiom tɛɛn yire sroi kre, na leele pree wa mu yire fimi na, na nyiɛtali.
11 Bawa Nyiɛkpɔɔ nyjeeri bituŋu na u yɛ wɔ mna u nyina, mna pan mu yire sragbunu ŋga na wraa tuwe ndiom tɛɛn sroi kre kalie.
12 Ŋga Zechariah na nyjeeri bituŋu wre nya ma kre, gbun na yɔ u na, a fiɛrɛ na u yii.
13 La, nyjeeri bituŋu wre na kna mu yo u pan mbo, “Zechariah maa fiɛ, Nyiɛkpɔɔ mu talaa loo. Mu chɔ Elizabeth we biblɔ se, mbe mu u mɛɛ tɛɛ John.
14 We ti mu yiɛ shɔ, a u seble lenɛɛrɛ yiɛ we shɔ. Ŋgi na Hin?
15 We pe lekpɔɔ Nyiɛkpɔɔ pan, a waa simi ka na ka gbɔ, a Kpra Ŋumu wre we tni u nu mbe yire u seble.
16 We yiri mbe Israel leele tataara kna, mbe pe paan taa pe Tafun Nyiɛkpɔɔ wre kro.
17 Wre we yiɛ klu o Tafun wre pan, mbe Kpra Ŋumu wre tni u nu mbe u jaŋga ta na Elijah wi. We ti mbe lɛɛlɛ ndru mbe pe biile kori. We ndikambla kna mbe pe kee nyjɛ yi fraka jawa, mbe ti leele peyɛ kna mbra o Tafun wre sri.”
18 A Zechariah na kna mna nyjeeri bituŋu wre wie mbo, “Ni lɛ blɛlɔɔ, a ni chɔ lɛ chalɔ, kena mni mbe pee shɔɔ li, na kee ŋga mu yuu kre pe kpra hin?”
19 A bituŋu wre na kna mbo, “Mi wi Gabriel. Nyiɛkpɔɔ u yire nyjeeri mu ni tun, na ni paan kre ketaan ŋga yo mu pan.
20 Le, kee nyjɛ krɛrɛ we pe yɛŋgɛ, la, ŋga mu n ni kee nyjɛ shɔnli ŋga ndra na, mu kaari kpo mbe sɛ su ŋga ble kee nyjɛ ni yuu mu pan ŋga we pe.”
21 Leele pre naa wa mu yire yire fimi na wa na Zechariah sri, kra pe pe kawako ni na u mu Suminyuŋgo wa.
22 Ŋga Zechariah na yili fimi na leele pre yiɛ na kre, na wa jaa paara na pe ni. Ŋga kra pan ma kre, pra chin na u yirɛ nya nyiɛlɛ na suminyuŋgo wa. Kra tia kɛ ni wraa paara pe pan.
23 Ŋga Zechariah na tnumu tun Suminyuŋgo wa mu kɔ kre, wra sɛ katoo.
24 Kie pe ble chiɛri yɛ kɔkro kre, u chɔ Elizabeth na siire ta. U nyiɛpɔ nununu kunɔ, na wra yili fimi na,
25 mnaa yuu mbo, “Fuŋga Nyiɛkpɔɔ kala pe mu ni ŋga, mu nyifɛɛrɛ ŋga ki ni kuu leele nu kre laa ni na.”
Pe Yesu Semu Kee Nya Mu Yo
26 Ŋga Elizabeth siire kre na ta nyiɛpɔ kɔɔnanu kre, Nyiɛkpɔɔ na nyjeeri bituŋu Gabriel tun Galilee chia ŋga pe yeeri Nazareth kre na,
Luke 1:26-56
27 Kre nyjila kre, na pe bichable ŋmba u n blɔ chin wru mu blɔ wa ŋga wa mbe u u leŋge. Blɔ wre mɛɛ naa Joseph. A wra yiri Ŋunu David sele nu. Bichable wre mɛɛ naa Mary.
28 A nyjeeri bituŋu wre na pan mu yo bichable wre pan mbo, “Chlɔ, ti mbe mu yiɛ shɔ. Pe mu dumi chiɛlɛ nu, a o Tafun wree wa mu kro.”
29 Ŋga Mary na kala kre bituŋu wre na yo kre loo kre, u gbun na yɔ u na, a fiɛrɛ na u yii, a wra yo u jawala nu mbo, “A shaaraa ŋgi nyini yi ŋga hin?”
30 A nyjeeri bituŋu wre na kna mu yo u pan mbo, “Mary maa fiɛ! Nyiɛkpɔɔ u mu dumi.
31 Le, mu siire ta, mbe biblɔ se, mbe u mɛɛ tɛɛ Yesu.
32 We pe lekpɔɔ, mbe pe u yeeri Nyiɛkpɔɔ ŋmba uu wa nyjeeri wre Biblɔ. O Tafun wre we u ŋga u tolɛɛ David ŋunumu kre.
33 A we ŋunumu li Jacob jlom kre na nyjila kro nu, a u ŋunumu lie kre nyu waa to fio.”
34 A Mary na kna mna nyjeeri bituŋu wre wie mbo, “Mni mbe pe mbe jaa se hin? Na ni n blɔ chin tun.”
35 A Nyiɛkpɔɔ bituŋu wre na kna mu yo u pan mbo, “Kpra Ŋumu wre we paan tni mu nu, mbe Nyiɛkpɔɔ jaŋga kre pan mu nu. Kre kie ti pɔ cheche ŋmba mu se kre, mbe pe u yeeri Nyiɛkpɔɔ Biblɔ.
36 Le, mu sele ndro Elizabeth ŋmba pe yeeri gbende kre, u chalɛm nu kre, u siire ta, u nyiɛpɔ kɔɔnanu wo nu u nyi kre.
37 Kee ka n wa mbe Nyiɛkpɔɔ wa jaa ki pe.”
38 A Mary na kna mbo, “O Tafun wre letaa wi mi, kena kee ŋga mu yo kre ki pe ma mbe ni ŋga.” A nyjeeri bituŋu wre na u ti wa mu sɛ.
Mary Na Elizabeth
39 Yire ble yire nu, Mary na yiri nyaanyaa mna fɔɔri mu sɛ nyua jaara chia ŋga kii wa Judea tra nu kre na.
40 Wra sɛ le Zechariah katoo mu Elizabeth shaari.
41 Ŋga Mary shaaraa kre na to Elizabeth ndie kre, a u pɔ wre na seeri u lɛɛ.
42 A Kpra Ŋumu wre na pan mu le Elizabeth nu, a wra kna mu paara kpɔɔ mbo, “Pe mu dwan chiɛlɛ nu, mu pɔ ŋmba uu wa mu lɛɛ wre dwan na.
43 Ŋgi ki pan na kre kekpɔɔ ŋga ni, a ni Tafun lo pan ni shaari haa ŋga hin?
44 Ŋga mu shaaraa to ni ndie to, a ni pɔ wre seeri ni lɛɛ na yɛshɔɔrɔ ni.
45 Mu dwamu ta, ŋga mu shɔnli na ŋga o Tafun yo mu pan kre we pe ma yɛŋgɛ kre na.”
Mary Mɛɛ Kɔ
46 A Mary na kna mbo,
“Mbe ni loloŋgo kro tɛɛ mbe Nyiɛkpɔɔ ŋga mboo.
47 Ni ŋmaashɔfun Nyiɛkpɔɔ tia ni nyiɛ yiɛshɔ.
48 Ŋgi na hin? U u letaa ŋmba u n fna kre sɔɔnri.
Mu yire aŋga na shie kre, leele kro we ni yeeri, ‘ŋmba Nyiɛkpɔɔ dwan.’
49 Ŋgi na hin? Jaŋgafun ŋmba mɛɛ ki pe cheche kre, u kekpɔɔ pe mu ni ŋga.
50 U leele mblɛ pe u fiɛ pre fooro chini nyjila kro nu.
51 U u jaŋga kre tɛɛ mu kekpɔɛ pe, a mblɛ pe peyɛ kpɔɔri kee nyjɛ yii wa pe jawala nu ni kre, u pe gbun mu nyina.
52 U ŋulo jaŋgafɛɛnlɛ kɔ pe ŋujɔɛn na, mu tinlɛ tɛɛ yi na.
53 U mblɛ klo ta pre ŋga yirɛ chichiele, mu swafɛɛnlɛ ni a pe sɛ kɛ wɛɛ.
54 U ya u sumifɛɛnlɛ Israel leele pre na, mu pe fooro chin,
55 imi wra yo o tolɛɛ Abraham, na u sele leele pan fa kre.”
56 Mary na tni Elizabeth jaara nyiɛpɔ taarɛ mna chin mu sɛ u katoo.
John Ndrajefun Wre Semu
57 Ŋga Elizabeth se nyjila na da kre, wra biblɔ se.
Luke 1:57-80
58 Ŋga kra pan ma kre, u sele leele, na u tnifɛɛnlɛ kro na nya na Nyiɛkpɔɔ kekpɔɔ pe mu u ŋga, kra tia pe kro yiɛ na shɔ.
59 Ŋga pɔ wre na li ble kɔɔnatarɛ kre, pra sɛ u fɛŋgɛ kun, mbe u lɛ Zechariah mɛɛ taa u na.
60 A pɔ wre lo na kna mbo, “Ɔɔhɔn, e u mɛɛ tɛɛ John.”
61 A pra kna mna yo u pan mbo, “Mu sele ndro wa mɛɛ ma kre mɛɛ ŋga.”
62 A pra kna mu paara kɛ ni Zechariah pan, mu u wie na mɛɛ ŋgi u chaa mbe pe u pɔ wre ŋga hin?
63 A wra kna mna kɛ pe mbo pe u ŋga yira mbe u nyunɔ ki na, a wra nyunɔ ki na mbo, “U mɛɛ John.” A kra leele pre kro pe kawako ni.
64 Titɛɛ kre nu wa to, a Zechariah na ja mna nyu nyaa, a u ndile na saan u nyuu, a wra ja mna paara, mna Nyiɛkpɔɔ ŋga mɛɛ.
65 Ŋga kra pan ma kre fiɛrɛ na u tnifɛɛnlɛ pre kro yii, a pra kee kre kpali Judea tra nu kro mu tro.
66 Leele mblɛ pra kee kre loo kro naa yuu pe jawala nu mbo, “Ndro ŋmbi sembremu pɔ ŋmba nyini we kɔɔ pe hin? Yaka n nyina na Nyiɛkpɔɔ jaŋga n wa u nu.”
Dwamu Mɛɛ
67 A Kpra Ŋumu wre na pan mu le u lɛ Zechariah nu, a wraa Nyiɛkpɔɔ kee nyaa na yuu mbo,
68 “Israel Nyiɛkpɔɔ wre wo yi dwamu. Ŋgi na hin? U pan mu u leele le mu pe shɔ,
69 mu tia ŋmaashɔfun pan u sumifun David katoo.
70 Imi na wra yire u kee nyanyofɛɛnlɛ na mna ki yo fa kre.
71 Wra kre kee ŋga yo na we ti mbe pe paan o shɔ mbe yili o loŋgoolo, na jaŋgafɛɛnlɛ mblɛ pe o pra kre kɛɛ.
72 Wra yo na we o tolɛɛlɛ pre fooro le, mbe u nyu nunu ŋga wre na pre na pe mu tɛɛ kre sɔɔnri.
73 Wra u nyu yo o tolɛɛ Abraham pan,
74 mna da mu u nyina na we o shɔ mbe yili o loŋgoolo kɛɛ, mbe ti o u sumi, mbe waa fiɛ.
75 A oo pe cheche mbe pe kprafɛɛnlɛ u yiɛ ble nyjɛ oo li kro nu.
76 A ŋu, ni pɔ, pie mu yeeri Nyiɛkpɔɔ ŋmba uu wa nyjeeri kre kee nyanyofun. Ŋgi na hin? Ŋu mu yiɛklu mbe o Tafun wre kolo gbeele,
77 mbe mu leele pre nyina na, pie sisam tinkɛɛ ta, mbe ŋmaa ta.
78 Nyiɛkpɔɔ koroo, na u foorochiɛn we ti mbe o nya na yila ki yili.a
79 Kie ti wre mblɛ oo wa wɔmu, na kumu jaŋga jaara kre na nyaa, mbe ya o na mbe o tni wejinyiŋge nu.”
80 Pɔ wre na lɛ mna faŋga ta Nyiɛkpɔɔ ŋumu nu. Tablɔ tra kre nu wra nyi chiin, mna hɛ su ŋga ble wra uyɛ wɔ mna Israel leele nyina.