Yesu Semu
2
Yire ble yire nu ŋunu Augustus na mbra le na pe u waŋgra kre leele kro tɔɔnri.
Luke 2:1-24
2 Kre na yi leele tɔɔnrɔɔ ŋga kra yiɛ klu. A kre nyjila kre na Quirinius wi Syria waŋgra kre abani lopom.
3 Ŋga kra pan ma kre, ndro kro na sɛ u chia mbe pe sɛ u tɔɔnri.
4 Kra tia Joseph na yili Galilee chia ŋga pe yeeri Nazareth kre na, mna sɛ Judea chia ŋga pe yeeri Bethlehem kre na. Kre chia kre na pra ŋunu David se, a ŋunu David sele nu Joseph na yiri, kre kra tia Joseph na sɛ wa,
5 mbe sɛ wre na u chɔ Mary mɛɛ nyunɔ, mbe pe pe tɔɔnri. Kre nyjila kre, na pe Mary wru mu Joseph ŋga mbe u u leŋge, a na siiree wa u pan.
6 Kena ŋga praa wa Bethlehem na wa kre, Mary se nyjila na da.
7 A wra u bijlo se blɔ, mna u fo yokunumɛɛ nu mna u sniŋge mbaala ka yira nu. Ŋgi na hin? Lawee nsraa wa fumblɔ lehaa mbe pe tni.
Bitumblɔ Pre Na Mbaala Lefɛɛnlɛ Pre
8 Kre nyjila kre nu, na mbaala lefɛɛnlɛ plɛɛ wa nyaa na ŋunu na pe mbaala ni kre tra kre nu.
9 A Nyiɛkpɔɔ nyjeeri bituŋu wa na sɛ uyɛ wɔ mna pe nyina. A Nyiɛkpɔɔ yɛnyiŋge na tia lawee kre na fniŋge poŋgo, a fiɛrɛ na pe yii.
10 A nyjeeri bituŋu wre na kna mna yo pe pan mbo, “Yaa fiɛ! E le, ketaan ŋga kie pe yɛshɔɔrɔ ni leele kro pan ni ni paan e pan.
11 Aŋga pe o Tafun Kristo ŋmaashɔfun wre se David chia.
12 Kee ŋga ee nya mbe chin na ki pe kpra yi na, ee nya na pe pɔ wa fo yokunumɛɛ nu mu u sniŋge mbaala ka yira ka nu.”
13 Titɛɛ kre nu to, a bitumblɔ tataara plɛ na yiri nyjeeri mna pan mna ya bituŋu wre na, a praa Nyiɛkpɔɔ kaan mɛɛ, na yuu mbo,
14 “Nyiɛkpɔɔ ŋmba uu wa nyjeeri kre wo yi yɛnyiŋge,
a mblɛ na u yiɛshɔ tra mna kre, we pe ŋga wejinyiŋge.”
15 Ŋga bitumblɔ pre na yiri mna sɛ nyjeeri mu pe ti wa kre, mbaala lefɛɛnlɛ pre na kna mna yo peyɛ pan mbo, “E ti mbe o sɛ Bethlehem na, mbe sɛ kee ŋga ki pe wa, a o Tafun ki wɔ mu o nyina ŋga le.”
16 A pra pe nyaanyaa mna sɛ, mna Mary na Joseph na pɔ wre nya, na pe u sniŋge mbaala ka yira nu.
17 Ŋga mbaala lefɛɛnlɛ pre na pɔ wre nya mu kɔ kre, pra pɔ wre kee nyjɛ bituŋu wre na sɛ yo pe pan yire krɛrɛ yo.
18 Kee nyjɛ mbaala lefɛɛnlɛ pre na yo kre, na ndro ŋmba wraa wa wa kro pe kawako ni.
19 La, Mary na kee yire krɛrɛ loo, mna yi tɛɛ u jawala nu.
20 A mbaala lefɛɛnlɛ pre na ndru na shie na mɛɛ koni na Nyiɛkpɔɔ kaan yɛnyiŋge, kee nyjɛ pe loo mna sɛ yi nya ma, imi na bituŋu wre na yo pe pan kre na.
Biblɔ Wre Mɛɛ Tɛɛ
21 Ŋga pɔ wre na li ble kɔɔnatarɛ kre pra u fɛŋgɛ kun, mna u mɛɛ tɛɛ Yesu, mɛɛ ŋga bituŋu wre na u ŋga, a pra chin mna u siire ta kre.
Pra Sɛ Biblɔ Wre Ni Jerusalem Na
22 Ŋga nyjila na da mbe Joseph, na Mary sɛ cheche paala pe imi na Moses mbra yire naa nyina kre, pra sɛ na pɔ wre ni Jerusalem na, mna sɛ u wru mu le o Tafun wre kɛɛ,
23 imi na Moses na ki nyunɔ Nyiɛkpɔɔ mbra kee yire nu kre mbo,
“Biblɔ ŋmba pie klu mbe se wre,
we pe cheche mbe o Tafun wre ŋga.”a
24 A imi na o Tafun mbra yire nyina kre, “Pra sɛ na kotulo shiin ni mna sɛ sra wɔ.”
Simeon
25 Kre nyjila kre, na blɔ waa wa Jerusalem na, u mɛɛ naa Simeon. A wra pe lewo ŋmba u fraka, mnaa Israel ŋmaashɔmu kre sri. Kpra Ŋumu wre naa wa blɔ wre nu,
Luke 2:25-52
26 mna klu mu wɔ mu u nyina na, we o Tafun Kristo wre nya mbe chiin ku.
27 A Kpra Ŋumu wre na sɛ na Simeon ni Suminyuŋgo wa, na kre nyjila kre na pe sɛ na Yesu ni wa mbe sɛ paala kolo ŋga mbra yire nyina kre pe.
28 A Simeon na sɛ Yesu wru mna yii kɛɛ, mna Nyiɛkpɔɔ ŋga mboo, mna kna mbo,
29 “Fuŋga rɛ, ni Tafun, mu tia mu kee ŋga mu yo mu tɛɛ kre pe yɛŋgɛ, kena ti mbe mu sumifun ku wejinyiŋge nu.
30-31 Ŋgi na hin? Ni mu ŋmaashɔmu ŋga mu gbeele mu waŋgra kro ŋga kre nya na nyini ni.
32 Wre we pe kania mbe leele mblɛ pe n pe Judae pre ŋga, mbe ti Israel leele pre yɛnyiŋge ta.”
33 Ŋga kra pan ma kre, Yesu lo, na u lɛ na kee yire Simeon yo yire kro loo, a kra pe pe kawako ni.
34 A Simeon na pe dwan mna kna mna yo Mary pan mbo, “Le, wre pɔ ŋmba pe wɔ, a Israel leele tataara we yire u na mbe to, a tataara we yire u na mbe yiri. A wre Nyiɛkpɔɔ wɔ mbe pe paara mbe u taanla.
35 A wre we leele jawala kee wɔ fimi na, a u kee kre we pe na snimi yi, mbe le mu loloŋgo nu.”
Anna
36-37 Kre nyjila kre na chlɔ Nyiɛkpɔɔ kee nyanyofun waa wa Jerusalem na wa, a u mɛɛ naa Anna, Phanuel pɔ na wi, a wra yiri Asher sele nu. Chlɔ wre plɔ na u leŋge mna u da, a pra tni yɛlɛ kɔɔnashin, a u plɔ na ku mu u ti. A wra kaari lekuchlɔ mna tni yɛlɛ fuloe jijirɛ na jijirɛ. Wra lɛ chalɔ kama, nde u nsraa laa Suminyuŋgo wa. Nyjila kro nu wraa wa na sumi, na blefuni, na nyiɛtali lafo na blee.
38 Nyjila ŋga nu praa wa Suminyuŋgo wa kre, chlɔ wre na pan mna pe da, mna Nyiɛkpɔɔ ŋga mboo, mna pɔ wre kee yo mblɛ praa Nyiɛkpɔɔ sri, mbe u paan Jerusalem shɔ kre kro pan.
Pra Ndru Mu Sɛ Nazareth Na
39 Ŋga pra yira kro pe mna kɔ o Tafun wre mbra kolo na kre, pra ndru mna sɛ pe chia Nazareth na, Galilee tra nu.
40 Pɔ wre naa lee, mna faŋga ta, mna kala chin, a Nyiɛkpɔɔ na u dwan.
Yesu Wa Suminyuŋgo
41 Yɛlɛ nyini, Yesu sefɛɛnlɛ naa shie Jerusalem na, na shie na klɛntro ble kpɔɛ yire lii.
42 Ŋga Yesu na li yɛlɛ kɛmbɔshiin kre, pra sɛ ble kpɔɛ yire lihaa imi na praa pini yɛlɛ nyini kre.
43 Ŋga pra ble yire li mu kɔ kre, pra ndru mbe sɛ pe chia, ŋga praa shie kre, Yesu na kro Jerusalem na, a pe nsra ki chin.
44 Hali pra ble poŋgo kolo nyaari mnaa jawa na aada wre na u nɔɔlɔ lɛ, la, ŋga pe nsraa u nyaa kre, pra u cha mu tro pe sele leele, na pe nɔɔlɔ lawee nu kro.
45 Ŋga pra u cha, a pe nsra u nya kre, pra ndru mna sɛ u cha Jerusalem na wa.
46 Pra u cha ble nununu taarɛ mna chin mu sɛ u nya Suminyuŋgo wa, na uu wa mu tni nyinafɛɛnlɛ pre nu, na ndru pe pan, na pe wie kaalɛɛ.
47 A mblɛ pra u kee yire loo, mna nya imi na wraa kee nyu woni kachindɛ ni kre, u kee na pe pe pan kawako.
48 A ŋga u sefɛɛnlɛ pre na sɛ u nya kre, kra pe pe kawako ni kpɔɔ, a u lo na kna mna yo u pan mbo, “Ni pɔ, mni a mu o fiŋge ma hin? Mi na mu lɛ yiɛnyina, a o na mu chaa fuŋga ma.”
49 A wra kna mbo, “Mni a e na ni chaa hin? E n chin na ki fna ni tni ni lɛ katoo ree?”
50 Paaraa ŋga wra paara kre, pe nsra ki nɔɔloo.
Yesu Ndie Tɛɛ