John Ndrajefun Wre Paaraa
3
Ŋga Caesar Tiberius na waŋgra ŋunumu li kre, u yɛlɛ kɛmbɔkunɔ wo nu kre, na Pontius Pilate wi Judea ŋunu. Kre nyjila kre chɔɔ na Herod wi ŋunu Galilee na, a na u chunu Philip wi ŋunu Iturea na Traconitis tra yire nu na. A Lysanias na wi Abilene ŋunu.
Luke 3:1-20
2 A Annas, na Caiaphas na lɛ Judah srawɔfɛɛnlɛ loplombo. Kre nyjila kre Nyiɛkpɔɔ na u kee wɔ mu Zechariah pɔ John wre nyina tablɔ tra kre nu.
3 A John naa kila chiɛ nyjɛ yira wa Jordan lɔɔ lawee kre nu na yuu mbo, “E e jawala chinɛ, e laa e sisam kro, mbe pe e ndrɛ je, kre ee sisam tinkɛɛ ta.”
4 Imi na pra ki nyunɔ Isaiah Nyiɛkpɔɔ kee nyanyofun wre hlɛ kre nu kre mbo,
“Ndro wa mana yilii tablɔ tra kre nu na,
‘E o Tafun kolo gbeele,
e u trohaa kre fraka.
5 Weele, na nyuɛ kro we pe mbrɛrɛ,
a kooloe nyjɛ yi glɔma, mu joli, joli, yire kro,
pie yi fraka, mbe yi gbeele.
6 A lewo kro we Nyiɛkpɔɔ ŋmaashɔmu kre nya.’”a
7 Lenɛɛrɛ na yili mna sɛ John pan mbe u pe ndrɛ je, a wra kna mna yo pe pan mbo, “Yire leesaala mblɛ! Ŋmbi u yo e pan na e fɛ mbe yili kanyana ŋga ki paan e pan ŋga nu hin?
8 E na kepele nyjɛ yi nyina na e laa e sisam kro pini. Yaa tni mbra yuu na, ‘Abraham nanae lɛ wre!’ E ti ni yo e pan mbe e loo, Nyiɛkpɔɔ we jaa dnɛ kaari nanae mbe Abraham ŋga.
9 E le, pe gbana taa tinyi yire didinyi na, kena tiŋge ŋga ki n sɛŋgɛ chichie sɛ kre, pie ki kun mbe chan, mbe ki le kanhun.”
10 A lenɛɛrɛ pre na kna mu u wie mbo, “Kena ŋgi ki fna o pe hin?”
11 A wra kna mna yo pe pan mbo, “Ŋmba pan dodonyi shiin nyi kre, u ŋmba u n ka ni kre ŋga nunu. A ŋmba u sro ta kre, u ŋmbrɔ ŋmba u n ka ta kre ŋga ka.”
12 Bawa tɔɔshɔfɛɛnlɛ plɛ na pan, mbe u pe ndrɛ je, a pra kna mu John wie mbo, “Nyinafun, kee ŋgi ki fna o pe hin?”
13 A wra kna mbo, “Yaa na shio mbra weni nyjɛ pe kun mu e ŋga na.”
14 A sojae na pan mna u wie mbo, “A wre hin? Mni ki fna mbe o pe hin?”
A wra kna mna yo pe pan mbo, “Yaa shia swa dnumu ndro pan jaŋga na, ndee mbe kala fnɛ mbe taa ndro na mbe u yii, a fɔtɔɔrɔ ŋga ee ta kpan, e ti mbe ki e yiɛ nyi.”
Kristo Paan
15 Ŋga leele pre kro naa Kristo wre paan kre sri kre ndra na, kra tia praa jawa na aada John wi Kristo wre.
16 A John na kna mna yo pe kro pan mbo, “Mi rɛ, nyumu ni ni e ndrɛ jee, la, ŋmba uu wa na jaŋga ni mu wɛ mi na wree wa kro na paan, ni n fna kple na mbe kɛ taa u kpawrɛ na, wre we e ndrɛ je na Kpra ŋumu wre, na kanhun ni.
17 U kɔɔŋgɔɔ ŋga ni u yirɛ foo wa u kɛɛ, mbe u tɛɛ mbe yirɛ bie yire fɔ mbe yi wɔ mbe tɛɛ, mbe sɛ fue yire le kanhun ŋga kra fii nu.”
Pra John Yii Mu Le Nyuŋgo
18 John na paara tataara mna leele pre jaari, mna ketaan kre yo pe pan.
19 La, wra paara mna waŋgra ŋunu Herod taan. Ŋgi ndra na hin? Na u u chunu chɔ ŋmba praa yeeri Herodias wre shɔ mu leŋge, mna sisam tataara pe mu ya.
20 Nyjɛ krɛrɛ kɔkro kre, sisam kpɔɔ ŋga Herod na pe yi na, wra tia pra John yii mna sɛ le nyuŋgo.
Yesu Ndra Jee
21 Ŋga John na lenɛɛrɛ pre ndrɛ je mu kɔ kre, Yesu na pan, a wra u ndra je. Ŋga wraa nyiɛtali, titɛɛ kre nu wa to, nyjeeri na nyaa,
Luke 3:21-38
22 a Kpra Ŋumu wre na tii u na, mna pe na katoo kotro wi. A mana ka na yiri nyjeeri mbo, “Ŋmba wi ni Biblɔ ŋmba ni kori, a ni yiɛ shɔ u na.”
Yesu Sele
23 Ŋga Yesu na u tnumu nɔɔ hle kre, na we pe yɛlɛ fulo na kɛ, Leele naa jawa na Joseph wra Yesu se. Joseph lɛ na wi Heli,
24 a Heli lɛ na wi Matthat,
a Matthat lɛ na wi Levi,
a Levi lɛ na wi Melki,
a Melki lɛ na wi Jannai,
a Jannai lɛ na wi Joseph.
A Joseph lɛ na wi Mattathias.
25 Mattathias lɛ na wi Amos,
a Amos lɛ na wi Nahum.
Nahum lɛ na wi Esli,
Esli lɛ na wi Naggai,
Naggai lɛ na wi Maath.
26 Maath lɛ na wi Mattathias,
Mattathias lɛ na wi Semein,
Semein lɛ na wi Josech,
Josech lɛ na wi Joda.
27 Joda lɛ na wi Joanan,
Joanan lɛ na wi Rhesa,
Rhesa lɛ na wi Zerubbabel,
Zerubbabel lɛ na wi Shealtiel,
Shealtiel lɛ na wi Neri,
Neri lɛ na wi Melki.
28 Melki lɛ na wi Addi,
Addi lɛ na wi Cosam,
Cosam lɛ na wi Elmadam,
Elmadam lɛ na wi Er,
Er lɛ na wi Joshua.
29 Joshua lɛ na wi Eliezer,
Eliezer lɛ na wi Jorim,
Jorim lɛ na wi Matthat,
Matthat lɛ na wi Levi,
Levi lɛ na wi Simeon.
30 Simeon lɛ na wi Judah,
Judah lɛ na wi Joseph,
Joseph lɛ na wi Jonam,
Jonam lɛ na wi Eliakim.
31 Eliakim lɛ na wi Melea,
Melea lɛ na wi Menna,
Menna lɛ na wi Mattatha,
Mattatha lɛ na wi Nathan,
Nathan lɛ na wi David,
32 David lɛ na wi Jesse,
Jesse lɛ na wi Obed,
Obed lɛ na wi Boaz,
Boaz lɛ na wi Salmon,
Salmon lɛ na wi Nahshon,
Nahshon lɛ na wi Amminadab.
33 Amminadab lɛ na wi Admin,
Admin lɛ na wi Arni,
Arni lɛ na wi Hezron,
Hezron lɛ na wi Perez,
Perez lɛ na wi Judah,
Judah lɛ na wi Jacob.
34 Jacob lɛ na wi Isaac,
Isaac lɛ na wi Abraham,
Abraham lɛ na wi Terah,
Terah lɛ na wi Nahor,
35 Nahor lɛ na wi Serug,
Serug lɛ na wi Reu,
Reu lɛ na wi Peleg,
Peleg lɛ na wi Eber,
Eber lɛ na wi Shelah,
Shelah lɛ na wi Cainan.
36 Cainan lɛ na wi Arphaxad,
Arphaxad lɛ na wi Shem,
Shem lɛ na wi Noah,
Noah lɛ na wi Lamech,
Lamech lɛ na wi Methuselah.
37 Methuselah lɛ na wi Enoch,
Enoch lɛ na wi Jared,
Jared lɛ na wi Mahalalel,
Mahalalel lɛ na wi Kenan,
38 Kenan lɛ na wi Enosh,
Enosh lɛ na wi Seth,
Seth lɛ na wi Adam,
Adam lɛ na wi Nyiɛkpɔɔ.