John Ndra Jefun Kee Kpalaa
3
Kre nyjila kre nu John ndra jefun wre na yiri, na Nyiɛkpɔɔ kee yuu Judea tablɔ tra kre nu mbo,
2 “E e jawala chinɛ, Nyiɛkpɔɔ ŋunumu kre mbra mna.”
3 Wre John ŋmba kee Nyiɛkpɔɔ kee nyanyofun Isaiah na nya mu yo kre mbo,
“Ndro waa wa na gble leni tablɔ tra kre nu mbo,
‘E o Tafun kolo gbeele.
E u trohaa fraka.’”a
4 Nyuuma yooro yoŋgo John naa toni. A yurɔ hlɛ na yi u greree, a u sro na yi kpatɔ, na srɛ.
5 A Jerusalem leele, na Judea leele, na Jordan lɔɔ kre mbɛɛ tnifɛɛnlɛ kro na yili mna sɛ u pan,
6 mna sɛ pe sisam yo, a wra pe ndrɛ je Jordan lɔɔ kre nu.
7 Ŋga John na Pharisee, na Sadducee leele pre nya tataara na pe paan mbe u pe ndrɛ je kre, a wra kna mu yo pe pan mbo, “Leesaala biile, ŋmbi u e nyina na e fɛ mbe yili krɔ kɔɔn ŋga ki paan kre nu hin?
8 Kena e na kee nyjɛ yi nyina na e laa e sisam kro pini.
9 Mbe yaa kro mbra eyɛ fana mbra yuu na, ‘O lɛ wi Abraham.’ E ti ni yo e pan mbe e loo, Nyiɛkpɔɔ we jaa dnɛ nyjɛ kaari biile mbe Abraham ŋga.
10 Pe gbana taa tinyi yire didinyi na, tiŋge ŋga ki n na sɛŋgɛ chichie sɛni kre, pie ki kun mbe sɛ ki wa kanhun.”
Kristo Paan Na U Tnumu
11 “Mi rɛ, nyumu ni ni e ndrɛ jee, mbe ki nyina na e laa e sisam kro, la, ŋmba uu wa ni kro na paan wre, Kpra Ŋumu wre, na kanhun ni we e ndrɛ je. U jaŋga wɛ ni na. Mi kuraa n fna mbe u kpawrɛ yii. Wre we paan e ndrɛ je Kpra Ŋumu wre, na kanhun ni.
12 U kɔɔŋgɔɔ ŋga ni u yirɛ foo wa u kɛɛ. Kre ni we yirɛ fue yire fɔ mbe yili yi bie nu, mbe sɛ yi bie yire tɛɛ lawee chichie nu, mbe sɛ yi fue yire le kanhun ŋga kraa fii nu.”
Yesu Ndra Jee
13 A Yesu na yiri Galilee na mna sɛ Jordan lɔɔ kre mbɛɛ na wa John pan, na u u ndra je.
14 A John na kna mbo, “Mi ŋmba ki fna mbe ŋu mi ndra je kre, a ŋu pan na yuu na ni mu ndra je.”
15 A Yesu na kna mbo, “Fuŋgaami ŋga, pan ki fna mbe pan. Ŋgi na hin? Kre kolo ŋga na oo tro mbe chiin ŋga Nyiɛkpɔɔ chaa pe.” Ŋga wra yo ma kre, kra tia John na u ndra je.