John Ketaan Kre
Kee Ŋga Nu Ŋmaa Nyi
1
Jle kre, na Kee kree wa. Kee kre na Nyiɛkpɔɔ praa wa, a Kee kre na wi Nyiɛkpɔɔ.
2 Jle gbamm kre, wre na Nyiɛkpɔɔ praa wa.
The Word (John 1:1-18)
3 Wre na Nyiɛkpɔɔ na yire mu yirɛ kro gbeele. Kre yira n wa, a wra la ki gbeelee nu.
4 Wre nu ŋmaa nyi, a ŋmaa kre pe leele kania.
5 Kania kre nyaa wɔmu nu, a wɔmu kre wa jaa ki tɔ.
Dansiɛlifun John
6 Nyiɛkpɔɔ na ndro wa tun, praa u yeeri John.
7 Wre wra pan mu kania kre kee kpali leele pan, imi kie pe mbe pe yire u na mbe shɔ mbe li.
8 John titi na ma kania kre, la, paan wra pan mu kania kre kee kpali mbo,
9 kpra kania ŋga kie ti mbe ndro kro na nyaa kre paan waŋgra nu.
10 Wraa wa waŋgra nu, a wre na Nyiɛkpɔɔ na yire mu waŋgra gbeele, a nde waŋgra leele nsra u chin.
11 Wra pan u tra nu, a nde u tra leele nsra u shɔ.
12 La, mblɛ pra u yii, mu u shɔ mu li kre, wra pe ŋga jaŋga na pe pe Nyiɛkpɔɔ biile.
13 Kre semu ŋga, ki nsra pe lewo semu kolo na, la, Nyiɛkpɔɔ wre titi wra pe wru mu pe u biile.
John Dansiɛrɛ Lie
14 Kee kre na pan mu pe lewo, mna tni o nu. O na u yɛnyiŋge nya, latam na kpra bribri. Yɛnyiŋge ŋga wra ta kre, kra pe wre, u lɛ Biblɔ nunu chom wre wo.
15 John na u kee yo mbo, “Ndro ŋmba kee ndaa yuu na u paan kro, a u jaŋga wɛ ni wo na wre wi kre. Nyjila ŋga ni pe nsra ta mu ni se kre, na uu wa.”
16 Latam kpɔɔ ŋga kii wa u nu kre saara na, u o dwan, na ka yaa o dwamu na.
17 Moses na Nyiɛkpɔɔ na yire mu o ŋga mbra yire, la, latam na kpra rɛ, Yesu Kristo pan yi yiri.
18 Ndro n da mu Nyiɛkpɔɔ nya tun, fɔna u Biblɔ nunu chom ŋmba wre na Nyiɛkpɔɔ wree nunu, a uu wa u jaara wre bɔkɔ. Wre u tia o chin imi na u Lɛ Nyiɛkpɔɔ wre nyi.
John Wi Mana Kre
19 Ki ble ka, Judae loplombo mblɛ praa wa Jerusalem na kre, na srawɔfun, na Levi leele plɛ tun John pan na pe sɛ u wie mbo, “Ndro ŋmbi nyini wi ŋu hin?”
John Baptizes Jesus (John 1:19-34)
21 A pra ndru mu u wie mbo, “A kena ŋmbi wi ŋu hin? Ŋu wi Elijah ree?”
A John na kna mbo, “Mi ma!”
A pra kna mbo, “A ŋu wi Nyiɛkpɔɔ keenyanyofun wre ree?”
A wra yo, “Ɔɔhɔn!”
22 A pra ndru mna u wie mbo, “A ŋmbi wi ŋu wo? O nyina ndro ŋmba nyini wi ŋu, kena o sɛ mandiɛ bɔ mblɛ pe o tun pre pan mbe chin. Muyɛ kee ŋgi mu ta mbe yo hin?”
23 A John na kna mbo,
“Mi wi ŋmba mana ki yilii badaaŋga, tablɔ tra kre nu na,
‘E o Tafun kolo kre fraka,’
imi na Nyiɛkpɔɔ kee nyanyofun Isaiah na yo kre.”a
24 A Pharisee leele mblɛ pra tun pre,
25 na John wie mbo, “Na Kristo wre ma ŋu, a Elijah ma ŋu, a Nyiɛkpɔɔ kee nyanyofun wre ma ŋu, ŋgi ki tia mna leele ndrɛ jee hin?”
26 A John na kna mbo, “Nyumu ni mi e ndrɛ jee, la, ndro waa wa mu chaa e nu, a nde e n u chin.
27 Wre uu wa ni kro na paan, mu wɛ mi na, a ni n fna na mbe kɛ taa u kpawrɛ na kple.”
28 Yire kee nyjɛ na pe Bethany na, Jordan lɔɔ kre kro, bawa John naa leele ndrɛ jee.
Nyiɛkpɔɔ Mbɔɔ Pɔ Wre
29 Ŋga nyiŋge na se kre, John na Yesu nya na u paan u pan, a wra yo leele pre pan, mbo, “E le, Nyiɛkpɔɔ Mbɔɔ Pɔ wre wi kre. Wre u paan, mbe waŋgra leele kro sisam laa pe na kre.”
30 Mbo, “Ŋmba kee ndaa na yuu na, ‘blɔ waa wa ni kro na paan mu wɛ mi na kre. Wraa wa fa, a pra chin mu mi se, wre wi kre.’
31 Mi titi nsra u chin, la, mi ni pan na leele ndrɛ jee na nyumu ni, imi kie pe mbe Israel leele u chin.”
32 John na u dansiɛrɛ li mbo, “Ndaa nya na Kpra Ŋumu wre yiri nyjeeri na katoo kotro wi, mna pan mu to u na.
33 Kre nyjila ŋga krɛrɛ na ni n u chin tun, la, Nyiɛkpɔɔ ŋmba wra ni tun na ni paan na leele ndrɛ je nyumu ni kre wra yo mbo, ‘Ndro ŋmba mu nya na Kpra Ŋumu wre pan mu to u na kre, kena wre wi ŋmba we na ndrɛ jee Kpra Ŋumu ni kre.’
34 A ni ki nya ma yɛŋgɛ, na ki yuu e pan na wre wi Nyiɛkpɔɔ Biblɔ wre.”
Yesu Twanfɛɛnlɛ Jle Wolo
35 Ŋga nyiŋge na se kre, na John na u twanfɛɛnlɛ shiin wa mu yire,
The disciples follow Jesus (John 1:35-51)
37 Ŋga u twanfɛɛnlɛ shiin pre na kee kre loo kre, a pra sɛ taa Yesu kro.
38 Yesu na kna mu pe nya na pe taa u kro, a wra pe wie mbo, “Yira ŋgi e chaa hin?”
A pre na kna mu Yesu wie mbo, “Rabbi, sena mu katoo nyi hin?” (Rabbi kre nɔɔ yi Nyinafun.)
39 A Yesu na kna mu yo pe pan mbo, “E pan e sɛ ki le.”
A pra taa u na mna sɛ u tnihaa nya. Ŋga pra da wa kre, na kie pe yilakɔŋgɔ nyjila jijirɛ, a pra tni wa, a yila na taa mu kɔ.
40 Leele shiin pre pra John kee kre loo mna taa Yesu na kre nunu na wi Andrew, Simon Peter chunu wre.
41 Andrew na sɛ nyaanyaa mna sɛ u nyjɔ Simon haa cha, mna yo u pan mbo, “O Messiah ŋmba Nyiɛkpɔɔ wɔ wre nya.” (Messiah kre nɔɔ yi Kristo).
42 Bawa Andrew na Simon wru mna pan Yesu pan.
A Yesu na yire mu u le gbrumm, mna kna mbo, “Simon John pɔ, fuŋga mu mɛɛ Cephas.” Cephas na Peter, yi nɔɔ nyina “Dnɛ.”
Philip Na Nathanael Yeerihaa
43 Ŋga nyiŋge na se kre, Yesu naa shie Galilee na, mna Philip nya, mna yo u pan mbo, “Pan mu taa ni kro.”
44 Philip na yiri Bethsaida na, a kre chia kre na Andrew na Peter na yiri na.
45 Philip na sɛ Nathanael nya mna yo u pan mbo, “O ndro ŋmba kee Moses na nyunɔ mbra hlɛ nu wre nya. Wre kee Nyiɛkpɔɔ keenyanyofɛɛnlɛ na nyunɔ kre. Wre wi Yesu, Joseph pɔ, ŋmba u yiri Nazareth na kre.”
46 A Nathanael na Philip wie mbo, “Yira chichie ka we jaa yiri Nazareth na ra?”
A Philip na kna mbo, “Pan mu le ɛ!”
47 Ŋga Yesu na Nathanael nya na u paan u pan kre, u kee ŋga wra yo na yi mbo, “Israel ndro titi ŋmba u pe kprafun wi kre.”
48 Kra Nathanael pe kawako ni, a wra kna mu Yesu wie mbo, “Mni mu pe mu ni chin hin?”
A Yesu na kna mbo, “Nyjila ŋga muu wa fig tiŋge kre jaara kre, kre ni mu nya, a Philip chin mu sɛ mu yeeri.”
49 Nathanael na kna mu yo mbo, “Nyinafun, Nyiɛkpɔɔ Biblɔ wi ŋu, a ŋu wi Israel ŋunu wre.”