Canaan Bijam
2
Ble shiin, ki taarɛwo na, na pe bijam pini chia ŋga pe yeeri Cana kre na, Galilee tra nu. Yesu lo naa wa bijam kre nu,
2 a pra kɛ wa mna Yesu, na u twanfɛɛnlɛ pre yeeri, a pra pan mu tni bijam kre nu na.
3 Ŋga pe simi gbɔwo na kɔ kre, a Yesu lo na yo u pan mbo, “Pe simi kre kɔ.”
4 A Yesu na kna mna u lo wie mbo, “Maa, mni a mna yuu ni pan hin? Ni nyjila n da tun.”
The miracle at Cana (John 2:1-12)
5 Bawa u lo wre na kna mna yo sumifɛɛnlɛ mblɛ praa wa bijam kre nu kre pan mbo, “Kee ŋga we yo e pe kpan, e ki pe.”
6 Na laŋgɛɛ badɛnyi kɔɔnanu yɛɛ wa wa, nyjɛ nu praa nyumu leni na pe kɛnyi, na pe li yirɛ jee paala kolo na. Yire chɔɛ nyjɛ, nyumu gram jijirɛ na shie kɔɔnanu yiraa lee nunu nu.
7 A Yesu na yo sumifɛɛnlɛ pre pan mbo, “E nyumu le laŋgɛɛ kɔɔnanu yire nu mbe yi nyi.” A pra nyumu ko mna le yi nu, a yira nyi.
8 A wra kna mu yo pe pan mbo, “E ka ko e sɛ nunu lopom wre ŋga mbe u gbɔ.”
A pra ka ko mna sɛ u ŋga.
9 Ŋga nunu lopom wre na ki gbɔ mu le kre, na ki kna simi, a u nsra chin mna ki yiri, la, sumifɛɛnlɛ pre pra nyumu kre ko kre na chin mna ki yiri. A nunu lopom wre na bijɔplɔ wre yeeri,
10 mna yo u pan mbo, “Ndro kro, simi chichie ni u klu na paan, na leele pre gbɔ a ki pe da, kre, mbe u chin mbe pan na ŋga ki n tna ni, a ŋu ŋga ki tna kre tɛɛ chiin mu pan mu da imi nyu ŋga na.”
11 Kre kawako kee ŋga Yesu na klu mu pe Galilee chia ŋga pe yeeri Cana kre na, mna u yɛnyiŋge nyina, a u twanfɛɛnlɛ pre na u shɔ mu li.
Yesu Jafalifɛɛnlɛ Ni Suminyuŋgo
12 Nyjɛ kɔkro ni kre, Yesu na u lo, na u chinlɛ, na u twanfɛɛnlɛ na ndru mu sɛ Capernaum na, mna sɛ tni wa ble chiɛri yɛ.
13 Na Judae klɛntro ble lie yire chaa da, a kra tia Yesu na sɛ Jerusalem na.
Jesus in the Temple courtyard (John 2:13-25)
14 Bawa wra sɛ Suminyuŋgo wa, mna sɛ nya na pe nui, na mbaala, na katoo kotulo prɛ, a swa chinɛfɛɛnlɛ na swa chinɛ.
15 Yesu na maŋa fwa mbiile, mna pe frɔ mu ni kro, pre na pe mbaala, na pe nui pre ni, mna yili suminyuŋgo wa, mna swa chinɛfɛɛnlɛ pre swa yire kna mu wo, mna pe tebru yire kna mu juule poŋgo.
16 Mna kna mu yo katoo kotulo prɛfɛɛnlɛ pre pan mbo, “E e kotulo pre wru e yili mna. Yaa ni Lɛ katoo pe jafalihaa.”
17 Kra tia u twanfɛɛnlɛ pre na sɔɔnri na pra ki nyunɔ Nyiɛkpɔɔ hlɛ kre nu mbo,
“Nyiɛkpɔɔ, mu katoo chaara na,
ni loloŋgo ni sroi na kanhun yi.”a
18 Judae loplombo na pan mu u wie mbo, “Kawako kee ŋgi mu pe mbe o chin na muu jaŋga ni na kee nyjɛ pini hin?”
19 Bawa Yesu na yo pe pan mbo, “E Suminyuŋgo ŋga juari, mbe ble taarɛ tɛɛ mbe ki sin.”
20 A Judae pre na kna mu yo u pan mbo, “Nyuŋgo ŋga wre yɛlɛ fuloe shiin na kɔɔnanu tɛɛ mu sin. Kre ŋu yo mu jaa ble taarɛ tɛɛ mbe ki siin?”
21 La, Suminyuŋgo ŋga kee wraa yuu kre, uyɛ na wra nyi.
22 Kena ŋga Yesu na kɔ mu ku mu nyi kre, kre u twanfɛɛnlɛ pre na ki sɔɔnri, na wra da mu ki yo. A pra yire wa mna Nyiɛkpɔɔ kee, na Yesu kee nyjɛ wra yo yire shɔ mu li.
Yesu Loloŋgo Kee Kro Chin