Yesu Na Nicodemus
3
Blɔ wa naa wa Pharisee leele pre nu, a praa u yeeri Nicodemus, a wra pe Judae loplombo pre wa.
2 Wre blɔ ŋmba wra sɛ Yesu da ki ble ka blee, mna yo u pan mbo, “Rabbi, o chin na ŋu wi nyinafun, a Nyiɛkpɔɔ mu tun. A ndro wa wa jaa mu kawako kee nyjɛ mu pini yire ka pe, fɔna Nyiɛkpɔɔ ya ufun na.”
Jesus speaks with Nicodemus (John 3:1-21)
3 A Yesu na yo u pan mbo, “Kpra na, ni yuu mu pan na, ndro n wa mbe jaa Nyiɛkpɔɔ ŋunumu kre nya, fɔŋga pie ndru mbe u se fɔŋgɔ bɔkɔ.”
4 A Nicodemus na kna mbo, “A na ndro lɛ, mni pie pe mbe ndru jaa u se na hin? We jaa le u lo lɛɛ mbe pe ndruu u se naa?”
5 A Yesu na yo u pan mbo, “Kpra na, ni yuu mu pan, na ndro wa jaa sɛ Nyiɛkpɔɔ ŋunumu kre nu, fɔŋga pie nyumu, na Kpra Ŋumu wre tɛɛ mbe u se.
6 Ŋmba lewo na nyjuro se kre, u pe wejikaara ndro, a ŋmba ni Ŋumu pan a pe u se kre, u pe Ŋumu ndro.
7 Kena maa ti mbe ki mu pe kawako, na ni yo mu pan na ki fna mbe pe ndru mbe mu se shiinwo na.”
8 Yesu na yo mbo, “Fuflɛ gbuun na shie mna ki chaa. Ki tiŋge mu ndru, la, mu n chin mna ki yiri na paan, ndee mna ki shie. Pan ŋmba pe se Ŋumu nu wre kee nyi na.”
9 Nicodemus na u wie kre kee ŋga nɔɔ.
10 A Yesu na kna mbo, “Mu pe nyinafun kpɔɔ Israel leele nu, a mu n ŋga chin.
11 Kpra na, ni yuu mu pan, nyjɛ o chin kee o yuu, na nyjɛ o da mu nya dansiɛrɛ lii, a nde e je, e n na chaa mbe li o kee kre na.
12 Ni tra mna kee yo e pan, a e n ki shɔ mu li, na mbaa nyjeeri kee yo e pan, mni ee pe mbe ki shɔɔ li hin?
13 Ndro wa n da mu nduu mu sɛ nyjeeri tun, fɔna Lewo Biblɔ ŋmba u yire wa mu pan kre.
14 Imi na e loo na fa kre Moses na wɔɔ wre mbiile kaan na, mu u yire nyjeeri tablɔ tra nu wa kre, pan chɔɔ ee nya na pe Lewo Biblɔ wre yire nyjeeri na,a
15 mbe ŋmba we u shɔ mbe li kre blenyini ŋmaa ta.
16 Imi na Nyiɛkpɔɔ waŋgra leele kori mu da kre ndra na, wra u Biblɔ nunu chom wre tun, na ŋmba we u shɔ mbe li kre, mbe wa ku, la, mbe u blenyini ŋmaa ta.
17 Nyiɛkpɔɔ nsra u Biblɔ wre tun na u pan mbe kpra kun waŋgra nu, la, mbo u pan mbe waŋgra leele shɔ.
18 Ŋmba we u shɔ mbe li kre, wa pimi li Nyiɛkpɔɔ yiɛ, la, ŋmba u n u shɔ mu li kre, pe klu mu ufun gbun na pimi ni, na u n Nyiɛkpɔɔ Biblɔ nunu wre shɔ mu li.
19 A ŋga ni pie lewo kpra kun yi na, kania kre pan waŋgra nu, a leele je na wɔmu kee chaa mu wɛ kania kre na. Pe sisam kepele ndra na.
20 Ŋmba u sisaa pini kre, u kania fun, ki tia wa pan kania jaara. Ŋgi na hin? U n na chaa mbe pe u sisam nya.
21 La, ŋmba u kpra kee pini kre kania chaa, imi kie pe mbe leele kro nya na u kee kro pini Nyiɛkpɔɔ fiɛrɛ ni.”
Ki Fna Mbe Yesu Mɛɛ Kpɔɔ
22 Nyjɛ kɔkro ni kre, Yesu na u twanfɛɛnlɛ pre na sɛ Judea tra nu, a wra sɛ ble chiɛri li wa, mna leele ndrɛ je.
John testifies about Jesus (John 3:22-36)
23 Kre nyjila kre, na John wa Aenon lɔɔ ŋga ki mbra Salim na kre nu, na leele ndrɛ jee na. Na kre lawee kre nu nyumu nyi nɛɛrɛ, a leele naa shie u pan, a wraa pe ndrɛ jee.
24 Kre nyjila kre, na pe n ta mu John yii mu le nyuŋgo tun.
25 Ki ble ka, John twanfɛɛnlɛ pre na Judae wo wa naa kakra lii, mu wru pre Judae pre wejinyi jee paala yire kee na.
26 A pra sɛ yo John pan mbo, “Nyinafun, blɔ ŋmba ŋu na wre naa wa Jordan lɔɔ kre kro kre, ŋmba dansiɛrɛ mnaa lii kre, uu wa na leele ndrɛ jee, a leele kro na shie u pan.”
27 A John na kna mbo, “Ndro wa ja mbe yaka ta, fɔna Nyiɛkpɔɔ u ŋga ki yi.
28 Yire titi we ni dansiɛrɛ li na, ndaa yo na mi ma Kristo wre, la, tuun pe mi tun, a ni yiɛ klu u pan.
29 Bijɔ plɔ wre wo wi bijɔ wre. Bijɔ plɔ nunu wre rɛ, mbɛɛ na wre nyi mu tni na ndru, na waa bijɔ plɔ wre mana loo, mbe u yiɛ shɔ. Kena fuŋga ni yɛshɔɔrɔ ta poŋgo.
30 Ki fna mbe wre mɛɛ kpɔɔ, mbe mi mɛɛ pe fiɛn.”
Nyiɛkpɔɔ Biblɔ Wre U Yiri Nyjeeri
31 Ŋmba u yiri nyjeeri kre wɛ ndro kro na, a ŋmba u yiri tra mna kre pe tra mna wo, a tra mna kee u yuu. Ŋmba u yiri nyjeeri kre, wre wɛ yira kro kro na.
32 Wre u nyjɛ u nya, na nyjɛ u loo kee yuu, a ndro n u shɔnli.
33 La, ŋmba we u kee kre shɔ mbe li kre, we yire kee kre na mbe dansiɛrɛ li na Nyiɛkpɔɔ pe kprafun.
34 Ŋmba Nyiɛkpɔɔ tun kre, Nyiɛkpɔɔ kee u yuu, a wre Nyiɛkpɔɔ u u ŋga u Ŋumu poŋgo.
35 Lɛ wre u Biblɔ wre kori mu yira kro wru mu u ŋga.
36 Ŋmba we u Biblɔ wre shɔ mbe li kre, we blenyini ŋmaa ta, a ŋmba wa u shɔ mbe li kre, wa ŋmaa ta, la, Nyiɛkpɔɔ krɔɔ wa na u ni blenyini.