3 Ŋga Yesu na loo ma kre, a wra yili Judea na wa mna sɛ Galilee na.

4 Ŋga wraa shie kre, wra tro Samaria na,

5 mna sɛ le Samaria chia ŋga pe yeeri Sychar kre na. Kre chia ŋga na mbra tra ŋga Jacob na u pɔ Joseph ŋga kre na.

6 Bawa Jacob kɔlɔ ka na nyi, a imi Yesu na kolo kre nyaari mna fna kre, kra tia wra tni kɔlɔ kre mbɛɛ na. Ki nyjila kre na kie pe lafo na.

7 Samaria chlɔ wa na pan mbe nyumu ko kɔlɔ kre nu, a Yesu na yo u pan mbo, “Ni ŋga nyumu kre ka mbe ni gbɔ.”

8 Kre nyjila kre, na u twanfɛɛnlɛ pre sɛ chia lam sro lɔhaa.

9 A chlɔ wre na kna mna Yesu wie mbo, “Mni, mbe ŋu Judah ndro mi Samaria ndro tali nyumu hin?” Na Judah leele na Samaria leele peyɛ fun, a pia chaa mbe kala ka pe.

10 A Yesu na yo u pan mbo, “Na mna yira ŋga Nyiɛkpɔɔ kaan chin, mna ndro ŋmba nyini u mu tali nyumu mbe gbɔ ŋga chin, mu na u tali mbe wra mu ŋga ŋmaa nyumu.”

11 A chlɔ wre na kna mbo, “Ndoo, a na mu n kɔlɔ maŋa ni, a kɔlɔ kre juo, kena sena mu ŋmaa nyumu ta hin?

12 O lɛ Jacob ŋmba wra o ŋga kɔlɔ ŋga, a wre titi na u biile na u yurɛ naa gboo ki nu kre, mu wɛ u na ree?”

13 Bawa Yesu na yo mbo, “Ŋmba we nyumu ŋga ka gbɔ kre, gbɔɔ we u ta na,

14 la, ŋmba we nyumu ŋga mbe u ŋga kre gbɔ kre, gbɔɔ waa u ta na fio. Nyumu ŋga mbe u ŋga kre we kaari blo u lam, mbra u kaan blenyini ŋmaa.”

15 A chlɔ wre na kna mbo, “Ndoo, ni ŋga kre nyumu kre ka, mbe gbɔɔ waa ni ta na, mbe mbaa pan kɔlɔ ŋga nu mbe nyumu ko na.”

16 Yesu na yo u pan mbo, “Sɛ mu plɔ yeeri mu pan.”

17 A chlɔ wre na kna mbo, “Ni n blɔ ni.”

18 Mu leŋge bilɛ nununu kunɔ, hali ŋmba ŋu na wree wa mu tni ŋga, mu plɔ ma. Mu kpra yo ni pan.”

19 Bawa chlɔ wre na kna mbo, “Ndoo, ni chin na Nyiɛkpɔɔ kee nyanyofun wi ŋu.

20 O lɛɛlɛ rɛ, nyua ŋga na praa sumi, a yire Judae yo mbo Jerusalem chiin yi Nyiɛkpɔɔ sumi lawee.”

21 A Yesu na yo u pan mbo, “Maa, shɔ mu li, nyjila ka paan mbe ndro wa o Lɛ Nyiɛkpɔɔ wre sumi nyua ŋga na, ndee Jerusalem chiin na na.

22 Yire Samaria leele, e n chin ndro ŋmba e sumi, la, wre Judae rɛ, wre chin ŋmba o sumi, a wre Judae nu ndro we yiri mbe leele ŋmaa shɔ.

23 La, nyjila ka paan, a kre nu o nyi kre, kpra sumifɛɛnlɛ pre we na o Lɛ wre sumi ŋumu na kpra ni, a pre sumifɛɛnlɛ pre o Lɛ wre chaa mbe pe u sumi.

24 Nyiɛkpɔɔ pe ŋumu, kena mblɛ pe u sumi kre fna mbra sumi ŋumu na kpra ni.”

25 Chlɔ wre na kna mbo, “Ni chin na Messiah ŋmba pe yeeri Kristo wre paan. Na waa pan, wre we o nyina yirɛ kro.”

26 A Yesu na kna mbo, “Mi ŋmba ni paara mu pan ŋga, mi wi Kristo wre.”

27 Kre nyjila kre nu u twanfɛɛnlɛ pre na pan. Ŋga pra nya na Yesu paara chlɔ ni kre, kra pe pe kawako, la, pe wa nsra chlɔ wre wie ŋga u chaa, ndee mna Yesu wie ŋga na u paara na chlɔ wre ni.

28 Bawa chlɔ wre na u chɔkoo ti kɔlɔ kre jaara, mna fɛ mu sɛ chia lam na leele yeeri, mbo,

29 “E pan e blɔ ŋmba le, wre u kee nyjɛ ni da mu pe fa kro yo ni pan. Kena ŋmba ma Kristo wre ree?”

30 A leele na kan chia lam, na paan mbe Yesu le.

31 Ŋga chlɔ wre na sɛ chia lam kre, twanfɛɛnlɛ pre na Yesu tali mbo, “Nyinafun, yaka le lɛɛ.”

32 A wra kna mu yo pe pan mbo, “Nii wa sro ni mbe li, a e n ki chin.”

33 Twanfɛɛnlɛ pre na kna na peyɛ wie mbo, “A wafun pan mu u ŋga sro ree?”

34 A Yesu na kna mu yo pe pan, mbo, “Ni sro yi na mbe ŋmba u ni tun wre chaara pe, mbe sɛ su nyjila ŋga nu mbe u tnumu nyu le.

35 Na e ja na yuu na, ‘Ki kro nyiɛpɔ jijirɛ mbe o yua kun rɔ?’ La, mi yuu e pan, na e yiɛ wa e see yirɛ le, imi na yirɛ yire kro lɛ mu da kɔɔn na.

36 Ŋmba u kuun kre, uu wa fɔtɔɔrɔ ni, a u nyjɛ u kuun yire ble titɛɛ mbe blenyini ŋmaa ŋga, imi kie pe mbe ŋmba wra yi luu, na ŋmba we yi kun pre kro, mbe pe yɛshɔɔrɔ li.

37 Yomini ŋga pe gbuun kre pe kpra mbo, ‘Wa u ndru, a wa na kuun.’

38 Ni e tun mbe e sɛ yirɛ kun tra ŋga nu e n tnumu tun na. Plɛ tnumu tun wa fa, mbe yire sɛ tnu ta mbe yili pe tnumu kre nu.”

39 Samaria leele tataara na Yesu shɔ mu li, imi na chlɔ wre na yo na, “U ni kee nyjɛ ni da mu pe fa kro yo ni pan,” kre na.

40 Ŋga Samaria leele pre na pan kre, pra Yesu tali mbe wre na pre sɛ tni. Kra tia Yesu na tni chia kre na ble shiin.

41 Ŋga pra u kee yire loo kre, kra tia lenɛɛrɛ na shɔ mu li mu wɛ jle wolo pre na.

42 A pra yo chlɔ wre pan mbo, “Ki n pe na mu kee kre chiin ki tia o shɔ mu li na, la, wre titi u kee yire loo mu chin na wre wi waŋgra ŋga ŋmaashɔfun wre yɛŋgɛ.”

43 Ble shiin yire kɔkro kre, wra yili chia kre na mna sɛ Galilee na.

44 Yesu titi naa yuu mbo, “Nyiɛkpɔɔ kee nyanyofun kro, wre titi chia leele na u shɔ mbe li fio.”

45 La, ŋga wra le Galilee na kre, Galilee leele na u shɔ yɛshɔɔrɔ ni, a kra yire ŋga pra sɛ Klɛntro Ble lie yire nu Jerusalem na mna u kee nyjɛ wra pe yire nya kre ndra na.

46 Yesu na ndru mu sɛ Cana na, Galilee tra nu. Kre chia kre na wra da mu nyumu kna simi kre. Kre nyjila kre na abani lopom wa biblɔ yaa Capernaum na.

47 Ŋga wra loo na Yesu yiri Judea na mu pan Galilee tra nu kre, a wra sɛ u pan, mna u tali mbe u sɛ Capernaum na, mbe sɛ u biblɔ wre tra u pan. Na u pɔ wre yaa mu yire kumu kɛ na.

48 A Yesu na kna mu yo u pan mbo, “E wa n wa mbe shɔ mbe li, fɔna u kawako kee nya tun.”

49 A lopom wre na kna mbo, “Ni Tafun, jande, pan mbe o sɛ mbe ni pɔ ŋmba wa ku.”

50 Bawa Yesu na yo u pan mbo, “Sɛ, mu pɔ wre we ŋmaa ta.”

51 Ŋga wraa shie kre to, kolo wra u sumifɛɛnlɛ fni na ketaan ni, na u pɔ wre saanla.

52 A wra pe wie nyjila ŋga nu pɔ wre saanla. A pra kna mbo, “Na kie pe nyjila nunu, aŋge lafo na, kre u kabro kre na laa u na.”

53 Bawa blɔ wre na sɔɔnri na nyjila ŋga nu Yesu na yo u pan na, “Mu pɔ wre we saanla,” kre chɔɔ, kre nu wra saanla. Kra tia wre na u sele leele kro na Yesu shɔ mu li.

54 Kre kee ŋga na yi kawako kee shiin wo ŋga Yesu na pe Galilee na wa, ŋga wra yire Judea na mna pan kre.