3 Yambla tataara naa shie na jiin bambae yire na, fuunlo, finla, na mblɛ kokoe yi ku ku kro. Bawa pra nyi nyjila kro nu, na lɔɔ kre siri.

4 Nyiɛkpɔɔ bituŋu naa paan nyjila nyjila, na lɔɔ kre fiiri, kena yaŋu ŋmba we klu mbe tii ki nu kre, u yira ŋga kii wa u na kro we laa u na.

5 Blɔ wa naa wa wa na yaa mu da yɛlɛ fulo na kɛmbɔkɔɔnatarɛ.

6 Ŋga Yesu na da wa kre, wra nya na blɔ wree wa mu sni. Yesu na chin na u sni wa mu mu, a wra u wie mbo, “Mu chaa mbe saanla ra?”

7 A yaŋu wre na yo mbo, “Ndoo ni n ndro ni mbe u ni wru mbe tii tapla kre nu. Na pe ki fiiri kpan, nyjila ŋga ni mbe da wa kre, na wa klu, mu tii ki nu.”

8 A Yesu na kna mbo, “Yiri mu mu dɛŋglɛ kru mu nyaari!”

9 Titɛɛ kre nu, na blɔ wre saanla, mna yiri mu u dɛŋglɛ kru na nyaari.

10 A Judae loplombo na yo blɔ ŋmba u saanla wre pan mbo, “Aŋgaa Wuuble. Ki pe kefuŋgo na mu mu dɛŋglɛ tio.”

11 A yaŋu wre na kna mbo, “Blɔ ŋmba u ni tra kre, u yo ni yiri mbe ni dɛŋglɛ wru mbe nyaari.”

12 A pra u wie mbo, “Ndro ŋmbi u yo mu pan na mu yiri mbe mu dɛŋglɛ wru mbe nyaari hin?”

13 Blɔ wre nsra ŋmba u u tra kre chin, ŋgi na hin? Lenɛɛrɛ naa wa wa, a Yesu na chaa pe nu.

14 Mbakɔ, Yesu na sɛ blɔ wre nya Suminyuŋgo mna yo u pan mbo, “Le, ŋga mu saanla ŋga, maa shia sisaa pe na, mbe yira fɔŋgɔ ŋga ki wɛ ŋga na waa to mu na na.”

15 Bawa blɔ wre na chin mu sɛ yo Judae loplombo pre pan na Yesu wra u tra.

16 Kre kee ŋga na Judae loplombo pre na yire mna u pra, na u ndro tra Wuuble.

17 Bawa Yesu na yo mbo, “Ni Lɛɛ wa na tnumu tuni, kena, ki fna mbe ni tnumu tun.”

18 Kre kee ŋga na tia Judae loplombo pre krɔ na kun kpɔɔ, a praa Yesu chaa mbe gbo, a ki n pe na mbra kre wra kla Judae Wuuble kre chiin na yi, la, ŋga wra yo na u Lɛ wi Nyiɛkpɔɔ, mu uyɛ pe na u da Nyiɛkpɔɔ ni kre ndra na.

19 Kre kee ŋga na tia Yesu na kna mu yo pe pan mbo, “Kpra na, ni yuu e pan na, Biblɔ wre wa jaa yaka pe uyɛ, fɔna ŋga we nya na u Lɛ wre pini. Ŋga Lɛ wre pini kpan, kre Biblɔ wre pini na.

20 Lɛ wre u Biblɔ wre kee chaa, mu na u nyina kee nyjɛ wre titi pini. A we u nyina kee nyjɛ yi wɛ nyjɛ na mbe u yi pe, mbe ki e pe kawako.

21 A imi na Lɛ wre gboolo nyini na pe kaan ŋmaa kre, pan chɔɔ Biblɔ wre mblɛ u chaa kaan ŋmaa na.

22 Lɛ wre, wraa ndro kpra kun, la, u u Biblɔ wre ŋga u jaŋga kro mbe u kpra kun,

23 imi kie pe mbe ndro kro Biblɔ wre ŋga yɛnyiŋge, imi na pe u Lɛ wre kaan yɛnyiŋge kre. Ŋmba u n Biblɔ wre ŋga u yɛnyiŋge kre, pan chɔɔ u n u Lɛ ŋmba u u tun wre ŋga yɛnyiŋge na.

24 Kpra na, ni yuu e pan na, ŋmba we ni kee loo mbe ŋmba u ni tun wre shɔ mbe li kre, we blenyini ŋmaa ta. Ufun n wa kprakuɔn ka ni na, ufun yili kumu kɛɛ mu pan ŋmaa nu.

25 Kpra na, ni yuu e pan na, nyjila ka paan, a kre nu o nyi kre, na gboolo we Nyiɛkpɔɔ Biblɔ wre mana loo, a mblɛ pie ki loo kre we ŋmaa ta.

26 Imi na Lɛ wree wa na ŋmaa ni uyɛ nu na leele kaan kre, pan chɔɔ u u Biblɔ wre ŋga ki yi.

27 Wre u u Biblɔ wre ŋga jaŋga na wra kpra kuun, ŋgi na hin? U pe Lewo Biblɔ.

28 Yaa shia ti mbe kee nyjɛ e pe kawako. Nyjila ka paan mbe gboolo mblɛ pee wa fanyi nu kro, u mana loo,

29 mbe yili pe fanyi nu. A mblɛ pra chichie pe kre we nyi mbe ŋmaa ta. La mblɛ pra sisaa pe kre we nyi mbe pe pe gbun pimi ni.”

30 Yesu na yo mbo, “Mba ja mbe yaka pe ni yɛ jaŋga ni. Imi ni Lɛ we yo, kre mbe pe. Ki tia ni kprakuɔn fraka, na ni n na ŋga mi titi chaa pini. Ŋga ni Lɛ ŋmba u ni tun wre chaa, kre ni pini.

31 Na mi titi ni yɛ dansiɛrɛ li kre, kena ni kee nyjɛ ni yuu n pe kpra.

32 La, lefuŋuu wa na ni dansiɛrɛ lii, a ni chin na ni kee nyjɛ u yuu yire kro pe kpra.

33 E na leele tun John pan, a wra kpra kre dansiɛrɛ li mu e nyina.

34 Ki n pe na lewo ni chaa mbe u ni dansiɛrɛ li, la, ni yire kee nyjɛ yuu mbe ki ti e ŋmaa ta.

35 John na pe na kania ŋga pe mu, a kra nyini na nyaa yi, a e naa chaa mbra kania kre nya, mbe e yiɛ na shɔ nyjila chiɛri.

36 La, ni dansiɛrɛ ŋga ni ta fuŋgaami kre wɛ John dansiɛrɛ ŋga wra li kre na. Tnumu nyjɛ ni Lɛ le ni kɛɛ na ni yi pe kre, yire yi ni dansiɛrɛ lii na ni Lɛ wre u ni tun.

37 A ni Lɛ ŋmba u ni tun wre titi, ni dansiɛrɛ lii. E n da mu u mana loo, a e n u sembremu chin.

38 A u kee kre n wa e nu, a ki yire ŋga e n ŋmba u tun wre shɔ mu li kre na.

39 E Nyiɛkpɔɔ kee nyjɛ pe nyunɔ mu tɛɛ yire tuan nyjila kro nu, mu na jawa na yire nu ee blenyini ŋmaa ta. A mi kee hlɛ yire yuu,

40 a nde e n na chaa mbe pan ni pan, mbe ŋmaa ta.

41 Ki n pe leele ni chaa mbe pe ni mɛɛ yile.

42 Ni e chin na e n wa Nyiɛkpɔɔ koroo ni e lolonyi nu.

43 Ni pan na ni Lɛ mɛɛ ni, a e ni je. Na wa waa pan na wre titi mɛɛ ni kre, wre ee shɔ.

44 Na e yɛnyiŋge chaa e ŋmbilɛ pan, a e n na Nyiɛkpɔɔ nunu chom wre yɛnyiŋge chaa, mni ee pe mbe shɔɔ li hin?

45 Yaa shia jawa na mi mbe e gbun na pimi ni ni Lɛ wre yiɛ, la, Moses ŋmba na e kaan kre, wre we e gbun na pimi ni.

46 Na e na Moses shɔ mu li kre, ka ee na ni shɔ mbe li, ŋgi na hin? Mi kee Moses na nyunɔ kre.

47 A ŋga e n kee nyjɛ wra nyunɔ yire shɔ mu li ŋga, mni ee pe mbe mi kee shɔ mbe li hin?”