Yesu Leele Kagbenyi Kunɔ Ŋga Sro
6
Nyjɛ kɔkro kre, Yesu na kun Galilee, ndee Tiberias epo kre kro.
2 Kawako kee nyjɛ wra pe, na yambla mblɛ wra tra kre ndra na, lenɛɛrɛ na taa u kro.
Jesus feeds a multitude (John 6:1-15)
3 Yesu na u twanfɛɛnlɛ pre na nduu mna sɛ tni nyua ka ndra na.
4 Kre nyjila kre, na Judae ble kpɔɔ ŋga pe yeeri Klɛntro kre da.
5 Ŋga Yesu na yiɛ wa mu le kre, wra nya na lenɛɛrɛ paan u jaara, a wra kna mna Philip wie mbo, “Sena oo sro ta mbe leele mblɛ ŋga mbe pe li hin?”
6 Wra kre kee ŋga yo mbe Philip jawala le, la, wre Yesu titi na chin ŋga we pe.
7 A Philip na kna mbo, “Na o denarii lafɛɛ shiin sro lɔ kuraa kre, yia pe da.”
8 U twanfɛɛnlɛ pre nunu, Andrew, Simon Peter chunu wre na kna mbo,
9 “Pɔ blɔ waa wa na paanu kunɔ, na mbroe shiin ni mna, a mni yie jaa lenɛɛrɛ mblɛ pe hin?”
10 Bawa Yesu na yo mbo, “E ti leele pre tni tni.” Nyaa naa wa lawee kre nu. A bilɛ kagbenyi kunɔ pre na tni tni tra nyaa yire na.
11 Yesu na paanu yire shɔ, mna Nyiɛkpɔɔ ŋga mboo, mna yi yɔɔlɛ mu pe kro ŋga. Pan chɔɔ wra ndru mu mbroe pre pe mna pe kɛ, a pe kro na ta imi na pe chaa.
12 Ŋga pra ka mu yɔɔ kre, a wra yo u twanfɛɛnlɛ pre pan mbo, “E kamprɛɛ yire koli, mbe ka wa kla.”
13 U twanfɛɛnlɛ pre na paanu yire na mbroe pre kuɛn koli a yira kakɛɛ nununu kɛmbɔshiin nyi.
14 Ŋga leele pre na Yesu kawako kee ŋga nya kre, a pra kna mbo, “Kpra na, Nyiɛkpɔɔ keenyanyofun ŋmba pe yo we pan waŋgra nu wre wi kre.”
15 Pra pe jawala pe na pie paan Yesu yii jaŋga na, mbe sɛ u pe ŋunu. Ŋga wra ki chin ma kre, wra yili pe nu, mna ndru mu sɛ nyua kre na, wre nunu.
Yesu Nyaari Lɔɔ Yiɛ Na
16 Ŋga yila na kɔ kre, u twanfɛɛnlɛ pre na sɛ epo nu,
Jesus walks on the water (John 6:16-22)
17 mna sɛ krɔ wru mbe kun mbe sɛ Capernaum na. Ble na wɔ, na Yesu n pan pe jaara tun.
18 Kre nyjila kre, na fuflɛ kpɔɔ ka gbuun na nyumu kre mɔŋɔi.
19 Twanfɛɛnlɛ pre na krɔ kre bri mna sɛ kɔnsni taarɛ ndee jijirɛ nyu na, mna nya na Yesu nyaari lɔɔ kre yiɛ na na paan pe pan, a fiɛrɛ na pe yii kpɔɔ.
20 A Yesu na kna mbo, “Yaa fiɛ, mi wi.”
21 A pra yɛshɔɔrɔ tɛɛ mna tia wra le krɔ kre nu to, a krɔ kre na da na pe ni mna praa shie kre.
Leele Pre Naa Yesu Haa Chaa
22 Ŋga nyiŋge na se kre, leele pre praa wa lɔɔ kro kre na nya na krɔ nunu kraa wa wa, a kre nu twanfɛɛnlɛ pre chiin na tni mu sɛ, a Yesu nsra chaa pe nu.
The Bread of Life (John 6:22-71)
23 A lawee ŋga nu o Tafun wre na Nyiɛkpɔɔ ŋga mboo, mna paanu yire yɔɔlɛ mu lenɛɛrɛ pre ŋga kre, krɔɛ yɛ na yiri Tiberias na mu pan mu yire wa.
24 Ŋga leele pre na nya na Yesu n wa, a u twanfɛɛnlɛ pre n wa na kre, a pra tni krɔɛ yire nu mna sɛ Capernaum na, mbe sɛ u cha.
25 Ŋga leele pre na sɛ Yesu nya lɔɔ kro wa kre, a pra u wie mbo, “Nyinafun, nyjila ŋgi nu mu pan mna hin?”
26 A Yesu na yo mbo, “Kpra na, paanu nyjɛ ndaa e ŋga, a e na ka mu yɔɔ kre na e ni chaa, ki n pe ni kawako kee, ndee kee nyjɛ ni yo yire nɔɔ e loo.
27 Yaa ti mbe e yiɛ nyina sro ŋga kie jaa kla kre na. La e ti e yiɛ nyina sro ŋga ki blenyini ŋmaa kaan kre tnumu na, sro ŋga Lewo Biblɔ wre we e ŋga kre. Ni Lɛ wre ni dansiɛrɛ li na wre u ni tun.”
28 A pra kna mu u wie mbo, “Ŋgi ki fna o pe, mbe ki tna Nyiɛkpɔɔ pan hin?”
29 A Yesu na yo pe pan mbo, “Kee ŋga Nyiɛkpɔɔ yo e pe yi na, ee ŋmba u tun wre shɔ mbe li.”
Paanu Ŋga Ki Yiri Nyjeeri
30 A pra kna mu yo mbo, “Kawako kee ŋgi mu pe mbe o nya mbe mu shɔ mbe li hin? Kee ŋgi nyini mu pe hin?
31 O tolɛɛlɛ na manna ka fimi tra nu, imi na pra ki nyunɔ Nyiɛkpɔɔ hlɛ kre nu mu tɛɛ kre mbo,
‘Wra pe ŋga paanu mu yiri nyjeeri,
a pra ka.’”a
32 A Yesu na kna mbo, “Mbe kpra yo e pan, Moses nsra e ŋga paanu ŋga ki yiri nyjeeri. Ni Lɛ u e kaan kpra paanu ŋga ki yirii nyjeeri.
33 Nyiɛkpɔɔ paanu ŋga u kaan wi, ŋmba u yiri nyjeeri mu pan, mbe waŋgra leele ŋga ŋmaa kre.”
34 A pra yo mbo, “O Tafun, ta o kaan kre paanu kre nyjila kro nu.”
35 A Yesu na yo pe pan mbo, “Mi wi ŋmaa paanu kre. Ŋmba we pan ni pan kre, klo wa u ta na, a ŋmba we ni shɔ mbe li kre, gbɔɔ wa u ta na fio.
36 La, ndaa ki yo e pan na e ni nya, la, e n shɔ mu li tɛ.
37 Mblɛ ni Lɛ ni ŋga kro we pan ni pan. A mblɛ pie pan ni pan kre, mba pe je.
38 Nyjeeri ni yiri mu pan, mbe paan ŋmba u ni tun wre kee ŋga u chaa pe. Ni n pan mi titi kee pe haa.
39 Ŋmba u ni tun wre chaara yi na, mblɛ u ni ŋga kre, mba ti mbe wa fun, a mbe pe nyi ble haŋa kre nu.
40 Ŋga ni Lɛ chaa yi kre, na ŋmba we Biblɔ wre nya, mbe u shɔ mbe li kre, wre we blenyini ŋmaa ta, mbe ni u nyi ble ŋga kie kro tɔ kre nu.”
41 Judae pre naa taanri Yesu na, ŋga wra yo na, “Mi wi paanu ŋga ki yiri nyjeeri” kre.
42 A pra kna mbo, “Blɔ ŋmba, wre ma Yesu, Joseph pɔ wre kree? O u lɛ na u lo chin, a mni ki pe a wra yuu na nyjeeri u yiri hin?”
43 Yesu na kna mu yo pe pan mbo, “E taanraa ti.
44 Ndro n wa mbe jaa pan ni pan, fɔna ni Lɛ ŋmba u ni tun wre u tini mu ni ŋga, mbe ni kɔɔ u nyi ble ŋga ki kro tɔ kre nu.
45 Fa kre, Nyiɛkpɔɔ kee nyanyofɛɛnlɛ pre na ki nyunɔ na,
‘Nyiɛkpɔɔ we leele kro nyina kee kre.’b
A ŋmba we ndie tɛɛ mbe loo, mbe tuan ni Lɛ wre pan kre, we pan ni pan.
46 Ndro n da mu ni Lɛ wre nya, fɔna ŋmba u yiri Nyiɛkpɔɔ wre pan wre, wre chiin u da mu u nya.”
47 “Kpra na, ni yuu e pan, ŋmba u ni shɔ mu li kre, uu wa na blenyini ŋmaa ni.
48 Mi wi ŋmaa paanu kre.
49 E tolɛɛlɛ na manna ka tablɔ tra kre nu, la, pra ku.
50 Paanu ŋga ki yiri nyjeeri mu pan tra kre, na ndro ki ka wa ku.
51 Mi wi ŋmaa paanu ŋga ki yiri nyjeeri mu pan tra kre, na ndro kre paanu ŋga ka wa ku fio. Paanu ŋga mbe waŋgra leele ŋga mbe pe ŋmaa ta kre yi ni wejikaara kre.”
52 Kre kee ŋga na pe kakra kpɔɔ Judae pre nu, a praa yuu mbo, “Mni blɔ ŋmba we pe mbe o ŋga u wejikaara mbe o ka hin?”
53 A Yesu na kna mbo, “Kpra na, ni yuu e pan, na e n Lewo Biblɔ wre wejikaara ka, mu u nyimi gbɔ, kena e n wa ŋmaa ni.
54 La, ŋmba we ni wejikaara ka, mbe ni nyimi gbɔ kre, u blenyini ŋmaa ta, a mbe u nyi ble ŋga ki kro tɔ kre nu.
55 Ni wejikaara pe sro yɛŋgɛ, a ni nyimi pe gbɔwo yɛŋgɛ.
56 Ŋmba we ni wejikaara ka, mbe ni nyimi gbɔ kre, uu wa ni nu, a nii wa u nu.
57 Ni Lɛ ŋmba uu ŋmaa ni wre u ni tun, a u saara na nii ŋmaa ni kre. Pan chɔɔ, ŋmba we ni wejikaara ka we ŋmaa ta ni saara na.
58 Paanu ŋga, nyjeeri ki yiri mu pan tra. Ki n pe na nyjɛ e tolɛɛlɛ na ka mu ku kre yi, la, ŋmba we paanu ŋga ka kre, wa ku fio.”
59 Capernaum fninyuŋgo Yesu na sɛ na nyina, mna yire kee nyjɛ yo.
Kotɔmblɔ Pre Plɛ Na Ndru Yesu Kro
60 Ŋga wra yire kee nyjɛ paara a u kotɔmblɔ pre na loo kre, pe nɛɛrɛ na yo mbo, “Kee nyjɛ u nyina ŋga sheli titi, ŋmbi we jaa taa yi na hin?”
61 Ŋga Yesu na chin na pe taanri yire kee nyjɛ na kre, a wra kna mbo, “Ni kee nyjɛ ni yo ŋga, yi n tna e pan ra?
62 A na kia pan na e Lewo Biblɔ wre nya na u ndru na shie nyjeeri mna wra nyi fa hin?
63 Ŋga ki ŋmaa kaan yi Nyiɛkpɔɔ Ŋumu. Lewo jaŋga wa jaa yaka pe. Kee nyjɛ ni yo ŋga Nyiɛkpɔɔ Ŋumu yi, a yire yi ŋmaa.
64 La, e plɛɛ wa a pe n shɔ mu li.” Yesu na klu mu chin mblɛ pe n shɔ mu li, na ŋmba we u wɔ mbe ŋga.
65 A Yesu na ndru mu yo mbo, “Kre ki tia ni yo na ndro wa jaa pan ni pan, fɔna ni Lɛ wre u ŋga kolo kre.”
66 Mu yire kre kee ŋga na, u kotɔmblɔ pre nɛɛrɛ na laa u kro, a pe n na taa u na na.
Yesu Na Peter
67 A Yesu na kna mna u twanfɛɛnlɛ kɛmbɔshiin pre wie mbo, “A yire hin? E chaa mbe sɛ na ra?”
68 A Simon Peter na kna mbo, “O Tafun, ŋmbi pan oo sɛ hin? Mu kee yire nu blenyini ŋmaa nyi.
69 Fuŋga o mu shɔ mu li, mu chin na ŋu wi Nyiɛkpɔɔ ndro cheche wre.”