Yesu Na U Chinlɛ
7
Nyjɛ kɔkro, Yesu na sɛ na kila Galilee tra nu, u n naa chaa mbe sɛ Judea tra nu na, ŋgi na hin? Judae loplombo pre praa wa wa pre naa u chaa mbe gbo.
2 Ki nyjila kre, na Judae asɛkɛ ble kpɔɔ lie kre chaa da.
Jewish leaders want to kill Jesus (John 7:1-24)
3 Kra tia Yesu chinlɛ na yo u pan mbo, “Yili chia ŋga na, mu sɛ Judea na, imi kie pe mbe mu twanfɛɛnlɛ mu kawako kee nyjɛ mu pini yire nya.
4 Na ndro chaa mbe pe u kee ŋga u pini chin kre, wra ki pe mbe ndra. Ŋga mu mu kee nyjɛ pini ŋga, ti ndro kro mu nya.”
5 A nde wre titi chinlɛ pre kuraa nsra u shɔ mu li.
6 Yesu na kna mbo, “Ni nyjila n ta mu da tun, la, yiree wa kolo ni nyjila kro nu.
7 Waŋgra leele wa jaa e pra, la, pe mi pra, ŋga ni pe kefuɛn nyjɛ pe pini yuu pe pan kre ndra na.
8 E sɛ ble kpɔɔ kre li. Mi n na shie, ŋgi na? Ni nyjila n ta mu da tun.”
9 Ŋga wra yo ma kre, wra kro Galilee na wa.
Yesu Kɔ Mu Sɛ Ble Lie Yire Nu
10 Ŋga u chinlɛ pre na sɛ ble lie yire nu kre kɔkro, Yesu titi na kɔ mu ndra mu sɛ, ndro nsra u nya.
11 Judae loplombo pre naa u chaa ble lie yire nu, mnaa u wie na tro, mbo, “Sena u nyi hin?”
12 Lenɛɛrɛ naa juu na yuu mbo, “Lewo chichuo wi,” a plɛ naa yuu mbo, “Ɔɔhɔn, leele pre u fana.”
13 La, Judae loplombo pre fiɛrɛ ndra na, pe nsra sro mu nyu nyaa mbe u kee yo kpɔɔ.
Yesu Leele Nyina Nyiɛkpɔɔ Kee
14 Ŋga pra ble yire li mu da lalaa kre, Yesu na sɛ suminyuŋgo wa, mna sɛ na pe nyina Nyiɛkpɔɔ kee.
15 Kra Judae pre pe kawako, a praa yuu mbo, “Mni blɔ ŋmba pe mu kee nyjɛ chin ma hin? A nde u n hlɛ tuan.”
16 A Yesu na kna mbo, “Mi titi kee ma ni nyina, la, ŋmba u ni tun wre kee yi.
17 Ŋmba u chaa mbe nyjɛ Nyiɛkpɔɔ chaa pe kre, we jaa chin na nyjɛ ni yuu ŋga, Nyiɛkpɔɔ pan yi yiri, mi titi jaŋga ma.
18 Ŋmba u paara uyɛ jaŋga ni kre, wre titi yɛnyiŋge u chaa, la, ŋmba u yɛnyiŋge chaa na u tunfun kaan kre, wre wi kprafun ŋmba wra ndro fana.
19 Moses ma wra e ŋga mbra yiree? A nde e wa n ja mu li yi na. Mni a e na ni chaa mbe gbo hin?”
20 A lenɛɛrɛ pre na kna mbo, “Ŋumu fɔɔn wa mu nu. Ŋmbi u mu chaa mbe gbo hin?”
21 A Yesu na kna mbo, “Kekpɔɔ nunu ni pe, a ki e kro pe kawako kre.
22 Moses na tia e naa e biile fɛnyi kuun, la, Moses ma wra ki hle, e tolɛɛlɛ na lɛ. A e naa yi kuun Wuuble na.
23 Na pie ndro fɛŋgɛ kun Wuuble mbe Moses mbra wa kla kre, kena ŋgi ki tia ni ndro poŋgo tra Wuuble, a e krɔ kun na ni ni ŋga hin?
24 Yaa na kala nyaa to, mbra tam kuun, la, e na tam kuun ki kolo na.”
Leele Pre Kakra Lii Yesu Na
25 Jerusalem leele pre plɛ na kna mbo, “Wre blɔ ŋmba ma pe chaa mbe gbo kree?
Jewish leaders try to arrest Jesus (John 7:25-53)
26 Le, wre u paara lenɛɛrɛ nu ma kre, a nde ndro n nyu kun na u ni. Mu nya ŋga, loplombo chin na wre wi Kristo wre mbe?
27 A nde, na Kristo wre pan, ndro wa u yirihaa chin, a blɔ ŋmba rɛ, o wre yirihaa chin.”
28 Yesu na yire Suminyuŋgo wa mu yo kpɔɔ mbo, “E ni chin, mu mna ni yiri chin. La, ni n pan na niyɛ jaŋga ni. Ŋmba u ni tun wre pe kprafun, a e n u chin.
29 Mi ni u chin, u jaara ni yiri, a wre u ni tun.”
30 Ŋga kra pan ma kre, praa chaa mbe u yii, la, ndro nsra ja mu kɛ taa u na. Ŋgi na hin? Na u nyjila n ta mu da.
31 Lenɛɛrɛ na je mu shɔ mu li, mnaa yuu mbo, “Kena na Kristo wre pan, we jaa kawako kee pe, mbe wɛ nyjɛ blɔ ŋmba pe ŋga naa?”
Sojae Na Sɛ Yesu Yiihaa
32 Ŋga Pharisee leele pre na loo na lenɛɛrɛ pre juu na Yesu kee yuu kre, srawɔfɛɛnlɛ loplombo, na Pharisee pre, na sojae tun mbe pe sɛ u yii.
33 Ba Yesu na yo pe pan mbo, “Nyjila chiɛri ka mi na yire we tni, mbe ni ndru mbe sɛ ŋmba u ni tun wre pan.
34 Ee na ni chaa, a yaa ni nya, a mna ni shie kre, yaa jaa sɛ wa.”
35 A Judae loplombo pre na kna na yuu peyɛ pan mbo, “Sena blɔ ŋmba chaa mbe sɛ, mbe waa u nya na hin? Greek tra nu u chaa mbe sɛ, mbe sɛ tni o leele pre nu mbra pe nyina ree?
36 Ŋga u yo mbo, ‘Ee na ni chaa, a yaa ni nya, a mna ni shie kre, yaa jaa pan wa kre, mni u chaa mbe nyina hin?’”
Ŋmaa Nyumu
37 Ŋga kra da ble haŋa ŋga ki shian titi kre na kre, Yesu na yire sholo, mna paara badaaŋga mbo, “Ŋmba gbɔɔ ta kre, u pan u gbɔ ni pan.
38 Ŋmba u ni shɔ mu li kre, imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
‘Ŋmaa nyumu we fo mbe yili u loloŋgo nu.’”
39 Kpra Ŋumu wre kee Yesu naa yuu na mblɛ pie u shɔ mbe li kre, pie Ŋumu wre ta. Kre nyjila kre, na ndro n ta mu Ŋumu wre ta tun. Ŋgi na hin? Na Yesu n ta mu u yɛnyiŋge kre ta.
Lenɛɛrɛ Pre Yɔɔlɛ
40 Ŋga pra kee nyjɛ loo kre, leele pre plɛ naa yuu mbo, “Kpra na, Nyiɛkpɔɔ kee nyanyofun wre wi kre.”
41 A plɛ na yo mbo, “Kristo wre wi.”
A plɛ na yo mbo, “Kristo wre, Galilee na ma we yiri.
42 Nyiɛkpɔɔ hlɛ kre yo na David sele nu Kristo wre we yiri, mbe pe u se Bethlehem na, seechia ŋga na David na yiri kre.”a
43 U ndra na, leele pre na yɔɔlɛ.
44 Leele pre plɛ naa chaa mbe u yii, la, ndro nsra kɛ taa u na.
Pe Nsra Ja Mu Yesu Yii
45 Sojae pre na ndru mu sɛ srawɔfɛɛnlɛ loplombo na Pharisee leele pre pan, a pra pe wie mbo, “Mni a e n pan na u ni hin?”
46 A sojae pre na kna mbo, “Ndro n da mu paara na wre blɔ ŋmba wi tun.”
47 A Pharisee leele pre na kna mbo, “Kena u yire ta na ra?
48 E nya a loplombo pre wa, ndee wre Pharisee leele pre wa u kee yire shɔ mu lii?
49 La, lenɛɛrɛ mblɛ, pe n Moses mbra yire chin, ki tia Nyiɛkpɔɔ pe sun.”
50 Pharisee leele pre nunu ŋmba, praa yeeri Nicodemus, a wra da mu sɛ Yesu pan kre, na kna mu yo pe pan mbo,
51 “Kii wa o mbra nu na, na mu n lewo nyu kee loo, mu kee ŋga u pe chin, ma jaa u gbun pimi ni.”