3 Bawa Moses mbra nyinafɛɛnlɛ pre na Pharisee leele pre na pan na chlɔ tiɛrifun wa ni, mna u yire lenɛɛrɛ pre lalaa.

4 Mna yo Yesu pan mbo, “Nyinafun, o chlɔ ŋmba yii na blɔ u chaa.

5 A Moses mbra nyjɛ wra o ŋga nyina na, na ndro tiɛri kre, ki fna pe u waari dnɛ ni mbe gbo. Kena fuŋgaami ŋga, mni ŋu yo hin?”

6 Pra kre kee ŋga yo, mu tɛɛ mbe Yesu nyu cha, mbe yire ki na mbe u taa yii.

7 Ŋga pra kro na u wie kre, a wra yiri mu fraka mna yo pe pan mbo, “Ŋu ŋmba mu n da mu sisaa pe tun, klu mu u wa dnɛ ni.”

8 A wra ndru mu lɛɛlɛ na nyunɔi tra wa.

9 Ŋga pra kre kee ŋga loo kre, pra sɛ nununu, mu yire loplombo na, mu sɛ su biile na. Yesu na chlɔ wre chiin pra kro mu yire wa.

10 A Yesu na ndra yire mna chlɔ wre wie mbo, “Maa, sena pe nyi hin? Pe wa n kro mbe mu gbun pimi ni ra?”

11 A chlɔ wre na kna mbo, “Ɔɔhɔn, Ni Tafun!”

12 Yesu na ndru mu yo pe pan mbo, “Mi wi waŋgra ŋga kania, ŋmba we taa ni kro kre, wa nyaari wɔmu nu, la, we kania ŋga ki ŋmaa kaan kre ta.”

13 A Pharisee leele pre na kna mu yo u pan mbo, “Muyɛ dansiɛrɛ mu lii kre. Kena nyjɛ mu yuu ŋga finfin yi.”

14 A Yesu na yo pe pan mbo, “Hali na ni niyɛ dansiɛrɛ li kuraa, ni kee kre pe kpra. Ŋgi na hin? Ni chin mna ni yiri mu pan, mu chin mna ni shie, la, yire e n chin mna ni yiri, a e n chin mna ni shie.

15 Yire e leele yiɛ le na pimi kuun, mi na ndro gbun pimi ni.

16 La na ni yo mbe pimi kun kre, kie pe kpra ni. Ŋgi ndra na hin? Mi nunu ma ni pimi kuun, mi na ni Lɛ ŋmba u ni tun wre wi.

17 Pe ki nyunɔ e mbra yire nu na, na leele shiin dansiɛrɛ waa pe nunu, kena kpra yi.

18 Ni niyɛ dansiɛrɛ li, a ni Lɛ wre u ni tun wre ni dansiɛrɛ li na.”

19 A pra kna mu Yesu wie mbo, “Sena mu Lɛ wre nyi hin?”

20 Yesu na yire kee nyjɛ yo na uu wa na nyina Suminyuŋgo lawee ŋga nu praa swa teeri kre nu, la, ndro nsra kɛ taa u na, ŋgi na hin? Na u nyjila n ta mu da tun.

21 Yesu na ndru mu yo pe pan mbo, “Mbe sɛ, a ee kɔɔ na ni chaa, la, ee ku e sisam nu, a yaa jaa sɛ mna ni shie kre.”

22 Judae loplombo pre na kna mbo, “Ŋga u yo, ‘yaa jaa sɛ mna ni shie ŋga,’ chaa u chaa mbe uyɛ gbo kre.”

23 Yesu na kna mna yo pe pan mbo, “Tra mna e yiri, la, mi yiri nyjeeri. Yire pe waŋgra ŋga wolo, la, mi n yiri waŋgra ŋga nu.

24 Kre ki tia ni yo e pan na ee ku e sisam nu kre. A ee ku e sisam nu yɛŋgɛ, imi na ni niyɛ nyini e pan, a e n ni shɔ mu li ŋga wala.”

25 A pra u wie mbo, “Ŋu wi ŋmbi hin?”

26 Nii wa na e kee nɛɛrɛ ni mbe yo, mbe tɛɛ mbe e gbun pimi ni. Ŋmba u ni tun wre pe kprafun, a nyjɛ ni yuu waŋgra nu yire pe kee nyjɛ ni loo mu yiri u pan.”

27 Pe n na chin na u Lɛ wre kee u yuu pe pan.

28 A Yesu na kna mbo, “Nyjila ŋga nu ee Lewo Biblɔ wre yire nyjeeri kre, ee chin na mi wi yɛŋgɛ, a ee chin na ni n na kee ka pini na niyɛ jaŋga ni, la, nyjɛ ni Lɛ wre ni nyina kre ni yuu.

29 A ŋmba u ni tun kre, mi na wre wi, u n da mu mi nunu ti tun. Ŋgi na hin? Ŋga u chaa kre ni pini nyjila kro nu.”

30 Lenɛɛrɛ mblɛ pra kee nyjɛ wra yo yire loo kre na u shɔ mu li.

31 Yesu na yo Judae mblɛ pra u shɔ mu li pre pan mbo, “Ŋmba we li ni kee na kre, wre wi ni twanfun titi.

32 We kpra kre chin, mbe kpra kre ti u uyɛ ta.”

33 A pra kna mna yo Yesu pan mbo, “Abraham nanae lɛ wre, a ndro tinlɛ ma wre, ŋgi ki tia mu yo na, oo oyɛ ta hin?”

34 A Yesu na yo pe pan mbo, “Kpra ni yuu e pan kre, ŋmba u sisaa pini kre, sisam tnu wi.

35 Tnu na kro sele nu suwi, la, sele pɔ rɛ, wree wa sele kre nu nyjila kro nu.

36 Kena na u Biblɔ wre tia e eyɛ ta kre, ee eyɛ ta titi.

37 Ni chin na Abraham nanae lɛ yire. A nde e ni chaa mbe gbo. Ŋgi ndra na hin? E n na chaa mbe ni kee kre wru.

38 Kee nyjɛ ni nya ni Lɛ pan yire ni yuu e pan, a nyjɛ yire loo e lɛ pan kre e piin.”

39 A pra kna mbo, “O lɛ wi Abraham.”

40 Ŋga ni pini kro yi na, kpra ŋga ni loo mu yiri Nyiɛkpɔɔ pan kre ni yuu e pan. La, e je na chaa mbe ni gbo. Abraham nsra da mu yire kee nyjɛ ka pe.

41 Nyjɛ e lɛ wre pini kre, yire e piin.”

42 A Yesu na kna mbo, “Na e lɛ na wi Nyiɛkpɔɔ titi kre, ee na ni kori. Ŋgi na hin? Nyiɛkpɔɔ pan ni yiri mu pan mna. Niyɛ jaŋga ni ma ni pan, la, wre u ni tun.

43 Ŋgi ki tia e n na ni kee kre nɔɔ ndru hin? Ki yire ŋga yaa jaa ŋga ni yuu kre loo kre na.

44 E lɛ Sutna wre biile lɛ yire, a ŋga e chaa yi na, ee e lɛ wre kee ŋga ki tna u pan pe. Jle kre krɛrɛ na linkufun wi, a u kee ka ma na kpra kre ni, ŋga kpra n wa u nu kre ndra na. Kafinɛ n pe u pan kefɔŋgɔ, u tnumu yi fa. Ŋgi na hin? Kafnu wi, a kafinɛ kro yiri u pan.

45 Mu yire ŋga ni kpra yuu kre ndra na, e n ni shɔ mu li.

46 E ŋmbi haa we jaa ni gbun sisaa pimi ni hin? Na kpra ni yuu, ŋgi ki tia yaa ni shɔ mbe li ŋga hin?

47 Ŋmba u pe Nyiɛkpɔɔ wo wre, Nyiɛkpɔɔ kee u ndru, a ŋga ki tia e n na yi ndru yi na, e n pe Nyiɛkpɔɔ wolo.”

48 A Judae pre na kna mbo, “Ŋga o yo na Samaritan ndro wi ŋu, a ŋumufɔɔn wa mu nu kre, o fnii?”

49 A Yesu na kna mbo, “Ŋumufɔɔn n wa ni nu. Ni ni Lɛ kaan mɛɛ, la, yire e mi klai.

50 Ni n na yɛnyiŋge chaa mbe niyɛ ŋga. Ŋmba u ki chaa ni pan wree wa, a wre wi kpra kunfun.

51 Kpra na ni yuu e pan, ŋmba we taa ni kee nyjɛ na kre, wa ku fio.”

52 A Judae pre na yo u pan mbo, “Fuŋga o chin titi na ŋumufɔɔn wa mu nu. Abraham na ku, a fafa Nyiɛkpɔɔ kee nyanyofɛɛnlɛ pre na ku, a ŋu yo ŋmba we taa ŋu na wre wa ku.

53 Kena ŋu wɛ o lɛ Abraham, na Nyiɛkpɔɔ kee nyanyofɛɛnlɛ mblɛ pra ku pre na ra? A ŋu pe ndro ŋmbi sembremu hin?”

54 A Yesu na yo mbo, “Na ndaa niyɛ kaan yɛnyiŋge kre, kaa ni yɛnyiŋge n pe yaka. Ŋmba u ni kaan yɛnyiŋge wi ni Lɛ wre. Wre nunu wre na e nyi, na e Nyiɛkpɔɔ wi kre.

55 E n u chin, a mi u chin. Na ni yo na ni n u chin kre, kena ni pe kafnu na yire lɛ, la, ni u chin, mu taa u kee na.

56 E lɛ Abraham yiɛ na shɔ na ki fna u ni pan ble nya, a wra ki nya, a u yiɛ na shɔ.”

57 Judae pre na yo u pan mbo, “Mu n da yɛlɛ lafaa yɔɔ tun, mni mu pe mu Abraham chin hin?”

58 A Yesu na yo pe pan mbo, “Kpra na, ni yuu e pan, nyjila ŋga pe nsra ta mu Abraham se kuraa kre, na nii wa.”

59 A pra dnɛ koli mbe u waari, la, Yesu na ndra mna yili Suminyuŋgo wa.