Yesu Na Blɔ Ŋmba Pra Se Fuunro Ni Kre Tra
9
Ki ble ka, Yesu naa tro mna blɔ wa nya, na pe u se fuunro ni.
2 A u twanfɛɛnlɛ pre na u wie mbo, “Nyinafun, ŋmbi sisam ki tia pe u se fuun ŋga hin? Wre titi sisam yi ree, u sefɛɛnlɛ hin?”
Jesus heals a blind man (John 9:1-41)
3 A Yesu na kna mbo, “U fuunro kre n yiri u sisam, ndee u sefɛɛnlɛ sisam pan. La, imi kie pe mbe leele Nyiɛkpɔɔ jaŋga ŋga ki tnumu tuni nya, kre ki tia pe u se fuun.
4 Ŋga nyiŋge se ŋga, ki fna mbe o ŋmba u ni tun wre tnumu tun. Ble paan mbe wɔ, mbe ndro wa jaa tnumu tun na.
5 Nyjila ŋga nu nii wa waŋgra nu ŋga, mi wi waŋgra kania.”
6 Ŋga Yesu na yire kee nyjɛ yo mu kɔ kre, a wra tɛɛnrɛ wo tra, mna tra tɔɔn mu tɛɛ mu blɔ wre nyiɛlɛ yire fa,
7 mna chin mu yo u pan mbo, “Sɛ yiɛ je lɔɔ ŋga pe yeeri Siloam kre nu.” Siloam kre nɔɔ nyina na “ŋmba pe tun.” Ŋga blɔ wre na sɛ yiɛ je kre, u nyiɛlɛ yire na nyaa, a wra ndru mu pan katoo.
Fuun Wre Tnifɛɛnlɛ U Wie Kebɛɛlɛ
8 Mblɛ wre na pre naa wa titɛɛ, na mblɛ pe da mu u nya na u tali kre, naa peyɛ wie mbo, “Blɔ ŋmba ma u jiin na tali kree?”
9 Plɛ na yo, “Wre wi.”
A plɛ na yo mbo, “Ɔɔhɔn. Wre ma, wru uu wru.”
A blɔ wre titi na ki nyu wɔ mbo, “Mi wi.”
10 A pra u wie mbo, “A mni mu pe na nyaa fuŋga hin?”
11 A blɔ wre na kna mbo, “Blɔ ŋmba pe yeeri Yesu wre u tra tɔɔn mu tɛɛ mu ni nyiɛlɛ fa, mu yo ni pan mbo, ‘Sɛ yiɛ je Siloam lɔɔ kre nu.’ Ŋga ni sɛ yiɛ je titɛɛ kre nu to, na ni nyaa.”
12 A pra kna mu u wie mbo, “Sena u nyi hin?”
A wra kna mbo, “Ni n u haa chin.”
Pharisee Leele Pre U Saanlaa Nɔɔ Wie
13 Pra wre blɔ ŋmba wra fun nyiɛlɛ na fa kre wru mna sɛ Pharisee leele pre pan.
14 Ble ŋga na Yesu na tra tɔɔn mu tɛɛ mu blɔ wre tra kre, na pe Wuuble.
15 A Pharisee leele pre na ndru mu blɔ wre wie mbo, “Mni mu pe na nyaa hin?”
A wra yo pe pan mbo, “Tra u tɔɔn mu ni nyiɛlɛ fa, a ni sɛ yiɛ je mu na nyaa.”
16 A Pharisee leele pre plɛ na yo mbo, “Blɔ ŋmba u kee ŋga pe ŋga, u n yiri Nyiɛkpɔɔ lawee. Ŋgi na hin? U n na lii Wuuble mbra na.”
A pe plɛ naa yuu mbo, “Mni sisampefun we pe, mbe jaa yire kawako kee nyjɛ nyini pe hin?” Kra tia leele pre na yɔɔlɛ.
17 A Pharisee leele pre na ndru mu u wie mbo, “Mu yo wre u mu nyiɛlɛ nyaa, kena ndro ŋmbi nyini mu u jawa hin?”
A wra kna mbo, “Nyiɛkpɔɔ kee nyanyofun wi.”
Pe Fuun Wre Sefɛɛnlɛ Wie U Saanlaa Nɔɔ
18 Judae loplombo pre nsra shɔ mu li na fuun na wi, a u kɔ mu na nyaa. A pra blɔ wre lɛ, na u lo yeeri,
19 mna pe wie mbo, “E pɔ wi blɔ ŋmbaa? Ŋga e na u se na ufun nyiɛlɛ naa? A mni u pe na nyaa aŋga hin?”
20 U sefɛɛnlɛ pre na kna mbo, “O chin na o pɔ wi, a fuun o na u se.
21 La, o n chin imi u pe na nyaa, a o n ndro ŋmba u tia wra nyaa chin. E wre titi wie, u lɛ mbe jaa uyɛ nyu wɔ.”
22 U sefɛɛnlɛ na kre kee ŋga yo, ŋgi na hin? Praa Judae loplombo pre fiɛ, na pe ki yo mu tɛɛ na ŋmba we yo Yesu wi Kristo wre kre, pia ti u le pe Suminyuŋgo kre nu na.
23 Kre kra tia u sefɛɛnlɛ pre na yo mbo, “u lɛ, e wre titi wie” kre.
24 Pra ndru mu blɔ ŋmba wra fun nyiɛlɛ na fa kre yeeri shiinwo na, mna yo u pan mbo, “Kpra yo mu Nyiɛkpɔɔ ŋga, o chin na blɔ ŋmba sisampefun wi.”
25 A blɔ wre na yo mbo, “Na sisampefun wi o, mi n chin, la, kala nunu ŋga ni chin yi na, ndaa pe fuun, a fuŋga ni nyaa.”
26 A pra kna mu u wie mbo, “Mni nyini u mu pe hin? A mni nyini u pe mu mu nyiɛlɛ yire nyaa hin?”
27 A blɔ wre na kna mu yo pe pan mbo, “Ni kee kre yo e pan, a e n na chaa mbe ki shɔ mbe li. Ki ŋgi e chaa ni yo na hin? E chaa mbe pe u twanfɛɛnlɛ ndee?”
28 A pra u tɛɛlɛ mna yo u pan mbo, “Ŋu wi u kotɔŋu. Wre rɛ, Moses kotɔmblɔ lɛ wre.
29 O chin na Nyiɛkpɔɔ na paara na Moses ni, la, blɔ ŋmba rɛ, o n chin mna u yiri mu pan.”
30 A blɔ wre na kna mbo, “Kii kawako ni, na e n mna u yiri mu pan chin, a nde wre u mi nyiɛlɛ nyaa.
31 O chin na Nyiɛkpɔɔ na sisampefɛɛnlɛ kee loo, la, na wa pe Nyiɛkpɔɔ sumifun, na ŋga Nyiɛkpɔɔ chaa pini kre, wre nyu kayooro Nyiɛkpɔɔ ndru.
32 Mu yire ŋga pe waŋgra gbeele, o n da mu loo na pe ndro se fuun, a ndro ja mu u nyaa tun.
33 Na kre blɔ ŋmba nsra yiri Nyiɛkpɔɔ pan kre, wa na ja mbe yaka pe.”
34 A pra kna mu yo u pan mbo, “Ŋu ŋmba pe se sisam nu kre, ŋu chaa mbe wre nyina kee ra?” A pra u ni Suminyuŋgo wa.
Blɔ Wre Shɔnlihaa
35 Yesu na loo na pe u ni Suminyuŋgo wa. Ŋga wra u nya kre, a wra u wie mbo, “Mu Lewo Biblɔ wre shɔ mu li ŋgaa?”
36 A blɔ wre na kna mbo, “Wre wi ŋmbi hin, ni Tafun? Ni nyina mbe ni u shɔ mbe li.”
37 A Yesu na kna mu yo u pan mbo, “Mu u nya, a wre u paara na mu ni kre.”
38 A wra yo mbo, “Ni Tafun, ni shɔ mu li!” To, mna kosie kan u yiɛ.
39 Yesu na kna mu yo mbo, “kprakuɔn na ni pan waŋgra nu, mbe mblɛ pe n na nyaa kre, na nyaa, mbe mblɛ pe peyɛ pe na pe nyaa kre kaari fuunlo.”
40 Pharisee leele mblɛ praa wa mu yire u mbɛɛ na wa kre na ki loo, mna u wie mbo, “Kena fuunlo lɛ wre ra?”
41 A Yesu na kna mu yo pe pan mbo, “Na fuunlo lɛ yire, kena yaa pimi li, la, ŋga e yo na e nyaa ŋga, ee wa e pimi nu tɛ.”