John Ndrajefun Wre Kumu
14
Ŋga Yesu naa kila na tro kre, ŋunu Herod na u kawako kee yire wraa pini yire loo.
2 Ki tia wra yo u sumifɛɛnlɛ pan mbo, “Kie pe John ŋmba ndaa gbo wre u ndru mu nyi, kre ki tia u jaŋga ŋga sembremu ta kre.”
3-8 Ŋga kra tia Ŋunu Herod na John gbo rɛ, Herod na u chunu Philip chɔ ŋmba praa yeeri Herodias wre shɔ mna leŋge. A John na paara mu ŋunu Herod taan, na ki n fna mbe u u chunu chɔ shɔ mbe leŋge. John na ki yo u pan gbee tataara.
Ŋga wra ki yo jle kre, Herodias krɔ na kun titi, a wra tia ŋunu Herod na John yii mu sɛ le nyuŋgo. Ŋunu Herod naa chaa mbe John gbo, la, leele tataara na John shɔnli, na Nyiɛkpɔɔ keenyanyofun wi. Kra tia Herod naa fiɛ na we u gbo jle kre.
Ki ble ka, ŋunu Herod naa u seble lii, a Herodias pɔ bichable wa na pan mu yɔ, a ŋunu Herod yiɛ na shɔ. Kra tia wra da mu pɔ wre ŋga lenɛɛrɛ pre yiɛ na, na yira ŋga we na chaa kro, we u ŋga ki yi. A pɔ wre na sɛ ki yo u lo pan, a u lo na u nyina na u sɛ yo na John ndra u chaa. A pɔ wre na pan mbo, “Tolɛɛ, John ndra taa paawa na mu ni ŋga fuŋgaami.”
9-11 Ŋga kra pan ma kre, ŋunu Herod yiɛ na je chiɛri, la, ŋga wra da mu pɔ wre ŋga fumblɔ yiɛ na, a u nsraa chaa mbe kɔ u danyi yire na kre ndra na, wra yire wa mna tia pra sɛ John ndra kɔ mu taa paawa na, mna pan mu bichable wre ŋga lalaa wa, a wra sɛ u lo ŋga ki yi.
12 Ŋga pra John gbo kre, a u twanfɛɛnlɛ na sɛ u gboo kre wru mu sɛ le, mna chin mu sɛ Yesu bɔ mandiɛ.
Leele Kagbenyi Kunɔ Sro Ŋga Haa
13 Ŋga Yesu na ŋunu Herod kee kre loo kre, wra sɛ krɔ wru, mna sɛ lawee waa ka nu, wre na u twanfɛɛnlɛ pre ni. Leele pre na lawee ŋga nu wraa shie kre haa chin, a pra nyaari tra mna u kɔŋgɔ ni.
14 Nyjila ŋga wra yili krɔ kre nu mu to fimi na kre, wra leele pre nya tataara, a pe kee na pe fooro ni u pan mu tro, a wra pe mblɛ praa yaa pre kro tra.
15 Ki ble kre yilakɔŋgɔ, u twanfɛɛnlɛ pre na pan mna yo u pan mbo, “O Tafun, yila kɔ, a leele ma pee wa lawee ŋga nu, mbe lenɛɛrɛ mblɛ yaka ta mbe lɔɔ ka, kena pe wa kolo mbe pe sɛ sro cha mbe lɔ kabɛɛlɛ yire na mbe li.”
16 A Yesu na kna mbo, “Ki n shian na pie sɛ sro cha peyɛ, kena e pe ŋga yaka mbe pe ka.”
17 A twanfɛɛnlɛ pre na kna mbo, “paanu kunɔ na mbroe shiin chiin ni o nyi mna.”
18 A Yesu na kna mu yo pe pan mbo, “E pan na yi ni e ni ŋga.”
19 A wra kna mu yo leele pre pan na pe tni nyaa yire na. A wra paanu kunɔ yire, na mbroe shiin pre wru mu yii kɛɛ, mna yiɛ wa nyjeeri, mna Nyiɛkpɔɔ ŋga mboo, mna paanu yire na mbroe pre pile mna le u twanfɛɛnlɛ pre kɛɛ, a pra yi kɛ mna leele pre ŋga.
20 Leele pre kro na ka mna yɔɔ, a twanfɛɛnlɛ pre na pe kamprɛɛ yire koli kakɛɛ kɛmbɔshiin.
21 Bilɛ mblɛ pra yirɛ yire ka pre naa kagbenyi kunɔ. Pe nsra chiɛlɛ na biile tɔɔnri mu chaa.
Yesu Na Nyiɛtali Nyua Na
22 Ŋga pra li mu kɔ kre, a Yesu na yo u twanfɛɛnlɛ pre pan na pe krɔ wru mbra yiɛklu tapla kre kro, mbe u leele pre wa kolo mbe pan.
23 Ŋga Yesu na leele pre wa kolo mu kɔ kre, a wre nunu na sɛ nyiɛtali nyua ka na. Yila na u kɔ wa.
24 Kre nyjila kre na krɔ kre da tapla kre lalaa, a fuflɛ naa gbuun na pe fnii, a pe yiɛ sɛɛ na sheli.
Yesu Na Nyaari Epo Yiɛ Na
25 Kre nyjila kre na kie pe nyjila jijirɛ nyisee nyu na, a Yesu naa nyaari tapla kre yiɛ na, na shie u twanfɛɛnlɛ pre pan.
26 Ŋga u twanfɛɛnlɛ pre na u nya na u nyaari nyumu kre yiɛ na kre, fiɛrɛ na pe yii, a praa jawa na gboo wi, kra tia praa gble leni.
27 Titɛɛ kre nu, a Yesu na paara na pe ni mbo, “E eyɛ gbun yii, mi wi, kena yaa fiɛ.”
28 A Peter na kna mna yo Yesu pan mbo, “Ni Tafun, na ŋu wi kain kre, ti mbe ni nyaari nyumu ŋga yiɛ na mbe pan mu jaara.”
29 A Yesu na kna mbo, “Yiri mu pan!”
A Peter na yili krɔ kre lam mu to tapla kre yiɛ na, na nyaari na shie Yesu pan.
30 Ŋga Peter na nya imi fuflɛ kre nyumu kre mɔŋɔi ma kre, fiɛrɛ na u yii, to, a wraa tri tapan, ŋga wra ki nya ma kre, a wra gble fɔɔri mu le mbo, “Ni Tafun, ni shɔ.”
31 A Yesu na kɛ tini mu u fa mu yii, mna kna mu yo u pan mbo, “Mu shɔnlie fiɛn kpa, mni a mu mu jawala pe shiin shiin ŋga hin?”
32 A Yesu na Peter yii, a pe kro shiin na le krɔ kre lam.
33 A leele pre kro naa kosie kani na yiri na yuu mbo, “Kpra na, Nyiɛkpɔɔ Biblɔ titi wi ŋu.”
Gennesaret Yambla Tra Haa
34 Ŋga pra tapla kre kun kre, pra to Gennesaret tra nu.
35 Leele pre praa wa wa kre na Yesu nya mna u chin, titɛɛ kre nu, a praa feni na pe yambla wru na paan Yesu pan. Ki nsra da nyjila ka, na pe pan na tra kre yambla kro ni mu ble Yesu yiɛ,
36 na u tali na u ti mbe yambla pre kɛnyi taa u dodoŋgi nyu na. A mblɛ pra ja mna kɛ taa u dodoŋgi na pre kro na saanla.
Jesus Walks on Water (Matthew 14:22-36)