Yirɛ Bie Wofun Wa Yomini
13
Ki ble kre lam Yesu na yili wa mna sɛ tni epo kre mbɛɛ na.
2 A lenɛɛrɛ na pan u jaara, kra tia wra le krɔ lam mna tni, a leele pre kro naa wa mu yire epo kre nyu na.
3 A wra tni wa mna pe nyina kee tataara yomɛɛlɛ nu mbo, “Kena falifun wa wra sɛ u yirɛ bie wohaa.
4 Ŋga wraa yirɛ bie yire woni kre, yɛ na sɛ wo kolo mbɛɛ na, a hanyiɛlɛ na yi nya, mna yi yoori mu li.
5 A yɛ na sɛ wo dnɛ lawee ŋga nu tra nsra nɛɛ nu. Yira ŋɔɔ mu yili yaari. Ŋga yi didinyi nsra le tra kre ndra na,
6 Ŋga yila na yili mna yi gbun to, a yira ku.
7 A yɛ na sɛ wo wuuro nu, a wuuro yire na fin mu yi fɔ, a yira ku.
8 A yɛ na sɛ wo tra chichie na, mna fin mu sɛ, yɛ na sɛ lafaa lafaa, a yɛ na sɛ fuloe tataarɛ, a yɛ na sɛ fulo na kɛ kɛ.”
9 A Yesu na kna mu yo pe pan mbo, “Ŋmba uu ndie ni kre, u ndie tɛɛ u loo.”
Yomini Kre Nɔɔ
10 Ŋga kra pan ma kre, Yesu twanfɛɛnlɛ pre na pan mu u wie mbo, “Mni a mna paara na leele mblɛ nyina yomɛɛlɛ nu ŋga hin?”
11 A Yesu na kna mbo, “Nyjeeri ŋunumu kee ŋga ki ndra kre, pe yire nyina ki yi, la, pre rɛ, pe n pe nyina ki yi.
12 Lewo ŋmba uu wa na ka ni kre, pie ka ya u pan mbe u ta nɛɛrɛ. La, ŋmba u n ka ni kre, fiɛn ŋga kii wa u pan kre, pie ki shɔ u kɛɛ.
13 Kee ŋga ki tia ndaa paara pe pan yomɛɛlɛ nu yi kre,
pee nyiɛlɛ ni, nde pe n na nyaa,
pee ndiile ni, nde pe n na ndru,
a pe n na kee kre nɔɔ ndru.
14 Pe kepele yire tia Isaiah kee yire wra yo mu tɛɛ yire, a yi pe ma yɛŋgɛ mbo,
‘Ee kee kre loo, la, yaa ki nɔɔ loo,
ee le chiin, a yaa nya.
15 Ŋgi na hin? Pre leele mblɛ jawala ku,
a pe ndiile yurɔ,
a pe nyiɛlɛ tɔ,
ki tia pe n na nyaa,
a pe n na ndru,
mbe pe jawala tɛɛ,
mbe kee kre nɔɔ loo.
Ndee mbe pe jawala chinɛ,
mbe pan ni pan,
mbe ni pe shɔ.’a
16 A yire rɛ, e ndra nyu titi. E nyaa, na ndru.
17 E ti ni yo mbe e loo, Nyiɛkpɔɔ kee nyanyofɛɛnlɛ pre, na Nyiɛkpɔɔ leele pre tataara naa chaa, na pie na kalɛɛ nyjɛ e nya, mu loo ŋga nya, mbra yi loo. La, pe nsra yi nya, a pe n sra yi loo.
Yomini Kre Nɔɔ
18 Kena e ndie tɛɛ, mbe ni e nyina yirɛ bie yomini kre nɔɔ.
19 Ŋmba we Nyiɛkpɔɔ ŋunumu kre ketaan kre loo, a wa ki nɔɔloo kre, pan we pe na yirɛ bie nyjɛ pra wo a yira sɛ wo kolo mbɛɛ na kre yi. Na Sutna pan, we paan kee kre pe luu ufun loloŋgo nu kre wɔ u nu.
20 A yirɛ bie nyjɛ yira sɛ wo dnɛ lawee yire nu kre, pre lɛ mblɛ pe ketaan kre ndru, mbe ki shɔ na yɛshɔɔrɔ ni.
21 La, kee kre wa didinyi kan pe lolonyi nu. Na ki pe chiɛri, a kanyana, ndee na pe yila ketaan kre na mu pe pra to, na pe fɛ mu wa.
22 A yirɛ bie yire yira wo wuuro nu kre, pre lɛ mblɛ pe ketaan kre ndru, la, waŋgra yirɛ jawala tataara, na swa chaara we ti kee kre ku pe nu.
23 A yirɛ bie yire yira sɛ wo tra taan kre nu kre, pre lɛ mblɛ pe ketaan kre ndru mbe ki nɔɔloo, mbe ki sɛŋgɛ sɛ, mbe plɛ sɛ lafaa lafaa, mbe plɛ sɛ fuloe tataarɛ, mbe plɛ sɛ fulo na kɛ kɛ.”
Yomini Fɔŋgɔ
24 Yesu na ndru mu pe gbun yomini fɔŋgɔ mbo, “Pan nyjeeri ŋunumu kre nyi na, blɔ wa na sɛ u yirɛ bie chichiele yɛ wo u see.
25 Ŋga ble na wɔ a leele na sni peii kre, a u loŋgo na yiri mna sɛ nyaa fuɛn yɛ sɛnyi wo mu chaa yi nu.
26 Kena nyjila ŋga ni yirɛ yire na fin kre, a nyaa fuɛn yire na fin mu chaa yi nu na.
27 Ŋga blɔ wre sumifɛɛnlɛ na sɛ yi nya kre, a pra pan mu yo u pan mbo, ‘O Tafun, yirɛ bie chichie yire mna wo see wa kre, nyaa fuɛn yɛ fin mu chaa yi nu, sena yi yiri hin?’
28 A seefun wre na kna mbo, ‘Ni loŋgo wa u sɛ yi wo mu chaa yi nu kre.’
A u sumifɛɛnlɛ pre na kna mbo, ‘Kena mu chaa mbe o sɛ yi klɔ mbe wo ra?’
29 A seefun wre na kna mbo, ‘E frɔ, na kre ma, na e yo ee yi klɔ kre, e waa yirɛ chichiele yire yɛ klɔ mbe chaa yi nu.
30 Kena e yi ti mbe yire na yirɛ chichiele yire kro chaa mbe lɛ, na yirɛ yire kun nyjila waa da, mbe yo kunfɛɛnlɛ pre pan mbe pe kluu nyaa yire klɔ, mbe yi pɔ mbe yi sro, mbe chiin yirɛ chichiele yire kun mbe sɛ yi le sugbaa.’”
Mustard Bie Yomini
31 Yesu na ndru mna pe gbun yomini fɔŋgɔ mbo, “Pan nyjeeri ŋunumu kre nyi na mustard bie ŋga lewo wru mu sɛ luu u see yi.
32 Kre ki pe fiɛn yirɛ bie kro nu, la, na pe ki luu, a ki fin mu lɛ, ki tiŋge kpɔɔri mbe wɛ tinyi tataara na. Ki tiŋge kpɔɔri mbe hanyiɛlɛ jaa zeere le ki klɛ nu.”
Yiisi Yomini
33 Wra ndru mna pe gbun yomini ka na mbo, “Pan nyjeeri ŋunumu kre nyi na yiisi yi. Na paanu fɔfun ki chiɛri wɔ mu le paanu mimi nu kre, kie paanu mimi kre shɔ mbe ta, mbe ti ki tin.”
Yesu Chia Leele Nyinai Yomɛɛlɛ Nu
34 Yomɛɛlɛ nu Yesu naa paara lenɛɛrɛ pre pan. Nyjila ŋga nu we paara pe pan kpan, yomɛɛlɛ nu wraa paara.
35 Pan wraa paara, ki tia Nyiɛkpɔɔ kee nyanyofun wre kee ŋga wra yo mu tɛɛ kre na pe kpra mbo,
“Yomɛɛlɛ nu mbe paara pe pan,
a kee nyjɛ yi ndra
mu yire waŋgra gbeele nyjila krɛrɛ kre,
mbe yi wɔ mbe pe nyina.”b
Nyaa Fuɛn Yomini Kre Nɔɔ
36 Ŋga Yesu na lenɛɛrɛ pre ti wa mna sɛ katoo kre, a u twanfɛɛnlɛ pre na u kɔŋgɔ ni mna sɛ yo u pan mbo, “Jande, o nyina nyaa fuɛn yire yira fin see kre nu kre yomini kre nɔɔ.”
37 A Yesu na kna mbo, “Blɔ ŋmba wra yirɛ bie yire wo kre na wi mi Lewo Biblɔ wre.
38 A see kre nu wra yi wo kre na yi waŋgra ŋga. Yirɛ bie chichiele yire yi Nyiɛkpɔɔ leele pre, a nyaa yire yi Sutna leele pre.
39 A loŋgo ŋmba wra sɛ nyaa yire wo kre na wi Sutna wre. A yirɛ kun ble kre yi waŋgra kla ble kre. A kunfɛɛnlɛ pre lɛ nyjeeri bitumblɔ pre.
40 Imi na pe nyaa fuɛn ble titɛɛ mbe kanhun le yi na kre, pan chɔɔ waŋgra kla ble kre we pe.
41 Ki ble kre, mi Lewo Biblɔ wre we ni nyjeeri bitumblɔ pre tun, mbe pe paan nyjɛ yi tia leele na sisam pini, na sisam pefɛɛnlɛ pre kro wɔ mbe yili ni ŋunumu kre nu,
42 mbe sɛ pe wa kanyana kanhun kre nu, bawa pie na nyɛni mbra pe ŋgaala chirɛ.
43 A Nyiɛkpɔɔ leele pre we na chiɛnri na yila yi, pe lɛ ŋunumu kre nu. Kena ŋmba uu wa na ndie ni kre, u loo.”
Krɔyira
44 “Kena pan nyjeeri ŋunumu kre nyi na swanyiɛɛ wa tra ka nu, a lewo sɛ ki nya, mu ndru mu gbeele mu ki tɔ tra ni mu ya, mbe ki yɛshɔɔrɔ sisaa ti mbe u sɛ yirɛ nyjɛ yii wa u pan kro prɛ, mbe sɛ kre tra kre lɔ.”
45 “Nyjeeri ŋunumu kre, pan ki nyi na jafalifun yira chichie ka chaa,
46 na waa sɛ ki nya, imi na ki ndrɔ we da kpan, mbe u sɛ yirɛ nyjɛ yii wa u pan kro prɛ, mbe sɛ ki lɔ.”
Asau Yomini
47 “Nyjeeri ŋunumu kre, pan ki nyi imi na pe asau waa lɔɔ nu, mbe ki mbroe nyini nyini wɔ.
48 Na ki nyi kre, asau kre wafun we ki tini mbe paan tɛɛ tanyiɛ na, mbe tni mbe mbroe pre yoori, mbe chichiele pre le yira lam, mbe fuɛn pre wa.
49 Pan kie pe waŋgra kpra kun ble kre. Ki ble kre, nyjeeri bitumblɔ pre we sɛ sisam pefɛɛnlɛ pre yoori mbe yili chichie pefɛɛnlɛ pre nu,
50 mbe sɛ fuɛn pre le kanyana kanhun kre nu. Bawa pie na nyɛni, mbra ŋgaala chirɛ.”
51 A Yesu na kna mu pe wie mbo, “E kee nyjɛ krɛrɛ nɔɔloo?”
A pra kna mbo, “Ɛnhɛɛn!”
52 A Yesu na kna mbo, “Kena Judae mbra nyinafɛɛnlɛ pre, pe ŋmba we paan pe twanfun nyjeeri ŋunumu kre nu kre, we kee chichiele shiin ta, lɛɛ na fɔŋgɔ, mbe leele nyina.”
Yesu Na Sɛ Nazareth Na
53 Ŋga Yesu na paara pe pan yomɛɛlɛ nu mu kɔ kre, a wra yili wa,
54 mna sɛ u chia Nazareth na, mnaa leele nyina pe fni nyinyi nu, a kra pe pe kawako ni. A pra kna na peyɛ wie mbo, “Sena ŋmba yiri na jaŋga, na kachindɛ kee nyjɛ sembremu ni imi hin?
55 Kapinta pɔ wre ma ŋmbaa? Wre ma Mary pɔ wree? Wre chinlɛ ma James, na Joseph, na Simon, na Judas kree?
56 Wre jaala ma pee wa o pan mna kree? A sena u yiri na yire kee nyjɛ ni hin?”
57 U kee na pe pe kawako ni mu tro, a kra tia u kee na pe bin.
A Yesu na kna mna yo pe pan mbo, “Nyiɛkpɔɔ kee nyanyofun kro, pe u shɔnli lawee kro nu, fɔna u chia, na u sele leele nu.”
58 Ki tia Yesu nsra kawako kee nɛɛrɛ pe wa, ŋga pe nsra u shɔnli kre na.