Wuuble Klaa
12
Judae wuuble ka nu, Yesu na u twanfɛɛnlɛ pre na sɛ tro shɔlɔ see ka nu. Ŋga pra da wa kre, na klo twanfɛɛnlɛ pre ta, a pra yi sɛnyi yire yɛ mbru na kaa.
2 Ŋga Pharisee leele pre na pe nya kre, a pra pan mu Yesu wie mbo, “Ŋgi ki tia mu twanfɛɛnlɛ o Wuuble mbra taan mu na sro kuun wuuble ŋga hin?”
3 A Yesu na kna mu Pharisee leele pre wie mbo, “E n da mu tɔɔnri mu loo kala ŋga David na u kotɔmblɔ na pe, nyjila ŋga klo na pe ta,
4 a David na sɛ le Nyiɛkpɔɔ nyuŋgo, mna paanu ŋga praa teeri Nyiɛkpɔɔ yiɛ kre wru, a wre na u kotɔmblɔ pre na ka, la, na ki mbra taan, na pie kre paanu kre sembremu ka. Ŋgi na hin? Srawɔfɛɛnlɛ chiin praa kre paanu kre nyini kaa.
5 Ndee e n Moses mbra yire tɔɔnri mu nya na, Israel srawɔfɛɛnlɛ mblɛ praa lee Suminyuŋgo kre nu Wuuble na pe tnumu tuni kre, praa Wuuble yire klai ree? A nde pe nsra da mu yo wa pan na u Wuuble kla.
6 Kena e ti ni yo e pan mbe e loo, ndro waa wa mna mu wɛ Suminyuŋgo kre na.
7 Pe ki nyunɔ mu tɛɛ mbo, ‘Ni n na yurɔ srawɔɔ chaa, la, fooro chiɛn, kre ni chaa.’a Na e na kee ŋga nɔɔ loo kre, kaa leele mblɛ pe n fɔɔn pe kre, yaa naa pe gbuun na pimi ni.
8 Ŋgi na hin? Lewo Biblɔ wre wi Wuuble kre Tafun.”
Blɔ Kɛkuo Wre
9 Ŋga Yesu na yiri wa kre, a wra sɛ pe fninyuŋgo wa.
10 Ŋga wra le wa kre, na blɔ waa wa wa, a u kɛ ku. Kre nyjila kre nu, na leele plɛɛ wa fninyuŋgo wa na chaa na pie Yesu nyu cha, mbe u ta mbe yii. Kra tia pra Yesu wie mbo, “Kena mbra kolo ŋga na mu yaŋu tra Wuuble ra?”
11 A Yesu na kna mu yo pe pan mbo, “E ŋmbi haa mbɔɔ we to wee nu Wuuble, mbe ufun wa sɛ u wɔ hin?
12 Kena e ti ni e wie rɛ, mbɔɔ wɛ lewo na ra? Kena ni chaa mbe e loo na, mbra o ŋga kolo mbe o chichie pe Wuuble.”
13 A Yesu na kna mu yo kɛkuo wre pan mbo, “Mu kɛ kre tini.” Ŋga wra u kɛ kre tini to, a kra nyu na shiin wo kre yi.
Praa Kolo Chaa Mbe Yesu Gbo
14 A Pharisee leele pre na yili mna sɛ jina to, mna kolo ŋga na pie tro mbe Yesu gbo cha.
15 Ŋga Yesu na ki loo kre, a wra yili wa na shie, a lenɛɛrɛ na taa u kro, a wra pe mblɛ praa yaa kro tra.
16 Mblɛ wra tra pre kro, wra yo pe pan na pia shia u mɛɛ kpali.
17 Kre kee ŋga ki tia kee ŋga Isaiah na yo mu tɛɛ kre na pe yɛŋgɛ mbo,
18 “E le, ni sumifun ŋmba ni wɔ wi kre,
wre wi ŋmba ni kori,
a ni yiɛ shɔ u na, mbe ni Ŋumu le u nu,
mbe u leele mblɛ pe n pe Judae pre nyina kprakun kee kre.
19 A wa nyu kna ndro ni,
a wa gble lete na mbe ndro u mana loo.
20 We ti ŋmba u n yire kre yirehaa ta,
a ŋmba kanhun ki firi u nu kre,
we ti ki nyi,
we wi mbe sɛ su na kpra we yili.
21 A waŋgra leele kro we na kaan u na.”b
Pe Yo Ŋumufɔɔn Wa Yesu Nu
22 Bawa leele plɛ na pan na blɔ wa ni Yesu pan. Na ŋumufɔɔn wa u nu. Ki tia u nsraa nyaa, a u nsra ja na paara. Yesu na blɔ wre tra, a wra ja na paara na nyaa kama.
23 A kra leele pre kro pe kawako, a pra kna na peyɛ wie mbo, “David Nana wre ma ŋmbaa?”
24 Ŋga Pharisee leele pre na kee ŋga Yesu pe kre loo kre, a praa yuu mbo, “Beelzebub, ŋumufuɛn ŋunu wre u u ŋga jaŋga, kre ki tia u ja na ŋumufuɛn woni leele nu kre.”
25 Titɛɛ kre nu Yesu na leele pre jawala nya, mna kna mu yo pe pan mbo, “Na waŋgra kiyɛ yɔɔlɛ na wii na kiyɛ ni kre, waŋgra kre wa jaa yire. A chia ndee sele ŋga kie kiyɛ yɔɔlɛ mbra wii na kiyɛ ni kre, kia jaa yire.
26 A na Sutna kna na wii na uyɛ ni, mni u ŋunumu kre we pe mbe yire hin?
27 Kena na Beelzebub, ŋumufuɛn ŋunu wre ni ni ŋumufuɛn woni leele nu kre, kena yire titi biile pre, jaŋga ŋgi ni pre ŋumufuɛn woni leele nu hin? E biile pre titi kuraa chin na kala e fni.
28 Kena na Nyiɛkpɔɔ wre u ni ŋga ŋumu wre a ndaa ŋumufuɛn woni kre, kena e ja e chin na Nyiɛkpɔɔ ŋunumu kre mbra e na.
29 Ndro wa jaa le faŋgafun nyuŋgo mbe u yirɛ koli, fɔna u klu mu faŋgafun wre pɔ tun, kre we jaa le u nyuŋgo, mbe u yirɛ koli.
Ŋumu Wre Tɛɛlɛɛ
30 Ŋmba u n wa ni kro kre, mu chin na u ni pra. A ŋmba wa ya ni na mbe o leele ble titɛɛ kre, mu chin na wre u pe zaanri.
31 Kena e ti ni yo e pan mbe e loo, sisam, na jiɛnlɛ kee ŋga lewo we yo kpan, Nyiɛkpɔɔ we jaa ki ti mbe u kɛ, la, ŋmba we jiɛnlɛ kee yo mbe Kpra Ŋumu wre taan kre, Nyiɛkpɔɔ wa ki tii u kɛ fio.
32 A ŋmba we paara mbe Lewo Biblɔ wre taan kre, we jaa sisam tinkɛɛ ta, la, ŋmba we paara mbe Kpra Ŋumu wre taan kre, wa sisam tinkɛɛ ta fio, hali kunnyiɛ kɔkro.
Loloŋgo Shelee
33 Tiŋge chichie ki sɛŋgɛ chichie sɛni, a tiŋge sisaa na sɛŋgɛ sisaa sɛni. A tiŋge sɛŋgɛ na pe yire na ki chini.
34 Yire leesaala mblɛ, ŋga sisam kee wa e nu ŋga, mni ee pe mbe jaa paaraa chichie paara hin? Kala ŋga ki yili nyuu kre, mu chin na loloŋgo nu ki yili.
35 Lewo kepele chichie ŋga kii wa u loloŋgo nu kre, kre ki tia wra chichie pini. A lewo kepele sisaa ŋga kii wa u loloŋgo nu kre, kre ki tia wra sisaa pini.
36 E ti ni yo e pan mbe e loo, Nyiɛkpɔɔ kpra kun ble kre, kee ŋga ki da mu yili lewo nyuu kpan, we ki nyu wɔ.
37 A lewo nyu kayooro na pie yire mbe u kee li, mbaa u gbun pimi ni, ndee mbaa u ŋga tam.”
Pe Kawako Kee Chaa Mbe Nya
38 Bawa Moses mbra nyinafɛɛnlɛ pre plɛ na Pharisee leele pre plɛ na yiri mna paara mbo, “Nyinafun, o chaa mbe mu kawako kee yire ka pe mbe o nya.”
39 A Yesu na kna mbo, “Yire aŋga leele sisam pefɛɛnlɛ mblɛ, e Nyiɛkpɔɔ je, na kawako kee chaa mbe nya. Yaa ka nya na, fɔna Nyiɛkpɔɔ kee nyanyofun Jonah kee kre chiin bɔkɔ.
40 Imi Jonah na ble taarɛ li, lafo na blee, mbro badaaŋga wre lɛɛ kre, pan chɔɔ Lewo Biblɔ wre we ble taarɛ li wee nu tra, lafo na blee.
41 Kena Nyiɛkpɔɔ kprakun ble kre, yire na Nineveh leele we yiri, mbe pe paara mbe e taan. Ŋgi na hin? Ŋga Jonah na kɔ mu ketaan kre kee yo Nineveh leele pan kre, pra ki loo mna pe jawala chinɛ, mna laa pe sisam kro. La, ndro waa wa mna fuŋgaami, a u wɛ Jonah na, a e n u shɔnli.
42 Nyiɛkpɔɔ kprakun ble kre, yire na Sheba ŋuchlɔ wre we yiri, mbe u paara mbe e taan. Ŋgi na hin? Wra yiri haalee mna pan mu ŋunu Solomon kachindɛ kee kre loo. A e le, ndro waa wa mna fuŋgaami mu wɛ ŋunu Solomon na, a e n u shɔnli.c
43 Na ŋumufɔɔn yili lewo nu, kie sɛ kuraa tablɔ tra kre nu mbe sɛ lawee chaa tni. La, na ki n shia lawee ta kre,
44 mbe ki kna mbe yo kiyɛ pan mbo, ‘Mbe ndru mbe sɛ katoo ŋga nu ndaa yili kre nu.’ Na ki waa ndru mu pan mu tnihaa kre nya, na pe ki pɔ pleple, a yaka n wa ki nu kre,
45 kie ndru mbe sɛ ŋumufuɛn kɔɔnashin nyjɛ yi wɛ ki na cha, mbe yi paan tni ki tnihaa lɛɛ kre nu. Na ki pan ma, kre ndro wre sisam we wɛ u fa na. Pan aŋga leele sisampefɛɛnlɛ mblɛ pe n ni shɔnli ŋga we pe.”
Yesu Sele Leele Naa U Chaa
46 Ŋga Yesu na yire wa na paara na leele pre nyina kre, u lo, na u chinlɛ na pan u pan, mna yire fimi na, na u yeeri mbe paara na u ni.
47 A leele pre praa wa wa pre wa na kna mu yo Yesu pan mbo, “Le, mu lo, na mu chinlɛ wa mu yire fimi na na mu chaa.”