Chiɛlɛ Plɛ Na Taa Yesu Na
8
Nyjila chiɛri ka kɔkro kre, Yesu na kila mna tro kakpɔɛ, na kabɛɛlɛ yɛ na, na ketaan kre, na Nyiɛkpɔɔ ŋunumu kre kee yuu.
Luke 8:1-21
2 Wre na bitumblɔ kɛmbɔshiin pre, na chiɛlɛ mblɛ nu wra ŋumufuɛn wɔ mna pe tra kre kro pra sɛ. Mary ŋmba praa yeeri Magdalene ŋmba nu wra ŋumufuɛn kɔɔnashin wɔ kre,
3 na Joanna, Herod katoo lefun ŋmba praa yeeri Cuza wre chɔ, na Susanna, na chiɛlɛ tataara mblɛ pra peyɛ wru na yaa Yesu na u bitumblɔ na kre.
Yirɛ Wofun Wre Yomɛɛlɛ
4 Ŋga lenɛɛrɛ mblɛ pra yiri chiɛ yire na pre na pan mu fni u lawee kre, a wra pe gbun yomini ka mbo,
5 “Blɔ wa wra sɛ u yirɛ bie yɛ wohaa. Ŋga wraa yi woni kre, yɛ na wo kolo mbɛɛ na, a leele na yi taanla, a hanyiɛlɛ na yi li.
6 A yi yɛ na wo tra ŋga nu dnɛ nyi nu, ŋga yira ŋɔɔ mbe yili to, mna ku. Ŋgi na hin? Yi nsra nyumu ta.
7 A yi yɛ na wo wuuro nu, a yire na wuuro yire na chaa mu fin, a wuuro yire na yi fɔ, a yira ku.
8 A Yirɛ bie yire yɛ na wo tra taan na, mna fin, mna sɛ lafaa lafaa.”
A Yesu na kna mbo, “Ŋmba uu ndie ni wre u ndie tɛɛ u loo.”
Yomini Kre Nɔɔ
9 Yesu twanfɛɛnlɛ pre na u wie, na yomini kre nɔɔ yi ŋgi hin?
10 A wra kna mbo, “Nyiɛkpɔɔ ŋunumu kee ŋga ki ndra kre, pe yire nyina ki yi, la, leele hamblɛ pre pan rɛ, yomɛɛlɛ nu pie pe nyina ki yi.
Pie nyiɛlɛ nyaa mbra le,
la, pia kee kre nya.
Pie kee kre loo,
la, pia ki nɔɔloo.a
11 Kena yomini kre nɔɔ yi kre, yirɛ bie yire yi Nyiɛkpɔɔ ketaan kre.
12 Nyjɛ yira wo kolo mbɛɛ na pre lɛ mblɛ pe ketaan kre ndru, mbe Satan pan mbe ki wɔ pe lolonyi nu, mbe pia kee kre shɔ mbe li, mbe ŋmaashɔmu ta.
13 A nyjɛ yira wo dnɛ lawee nu kre, pre lɛ mblɛ pe ketaan kre ndru, mbe ki shɔ na yɛshɔɔrɔ ni, la, kee kre wa tni pe nu. Na pe kee kre shɔnli chiɛri, a penlee waa pan to, na pe fɛ mu wa.
14 A yirɛ bie nyjɛ yira sɛ wo wuuro nu kre, pre lɛ mblɛ pe ketaan kre ndru, mbe waŋgra kebɛɛlɛ, na waŋgra yirɛ, na yi yɛshɔɔrɔ pan mbe tni pe nu, mbe ketaan wa sɛŋgɛ sɛ pe nu.
15 A nyjɛ yira sɛ wo tra taan kre nu kre, pre lɛ mblɛ pe ketaan kre ndru na loloŋgo chichie ni, mbe frɔ ta, mbe kee kre jaa sɛŋgɛ sɛ pe nu.
Kaniɛ Tnumu
16 Ndro wa kania mu mbe yira tɛɛ mbe ki juule, ndee mbe ki le mpa ndoo. La, kania taa yira na pe ki muni na taari, na ndro le katoo mbe u nya ki na.
17 Ŋgi na hin? Kre yira n wa, a pe ki ndra mbe kia kɔ mbe yili fimi na.
18 Kena kee kre e ndru kre, e ki dɔɔta. Ŋgi na hin? Ŋmba uu ka ni mu ki le chichie kre, pie ka ya u pan mbe u ta nɛɛrɛ. A ŋmba uu fiɛn ni a u n ki le chichie kre, chiɛri ŋga ni u nyi kre kuraa, pie ki shɔ u kɛɛ.”
Yesu Lo Na U Lobiile
19 Kre nyjila kre nu Yesu lo, na u chinlɛ na pan na u chaa, a imi leele pre na nɛɛ kre ndra na, pe nsra kolo ta mbe da u na.
20 A pra yo u pan mbo, “Mu lo, na mu chinlɛɛ wa mu yire fimi na, na mu chaa mbe nya.”
21 A Yesu na kna mna yo pe pan mbo, “Ni lo, na ni chinlɛ lɛ mblɛ pe Nyiɛkpɔɔ kee kre ndru, na lii ki na kre.”
Yesu Fuflɛ Yire
22 Ki ble ka Yesu na u twanfɛɛnlɛ pre na le krɔ nu, a wra yo pe pan mbo, “E ti mbe o kun lɔɔ kro kokoo ŋga wa na.”
Luke 8:22-39
23 Ŋga praa shie kre, Yesu naa ŋunu. A fuflɛ kpɔɔ ka na gbun lɔɔ kre yiɛ na, a nyumu na le krɔ kre nu, a kraa chaa mbe kna.
24 A u twanfɛɛnlɛ pre na u gbun mu nyi, mna yo u pan mbo, “O Tafun, lɔɔ chaa o li.”
A Yesu na yiri mna fuu fuflɛ kre, na nyumu kre na, a yira yire dimm.
25 A wra kna mna yo pe pan mbo, “Sena e shɔnlie sɛ hin?”
Kee kre na pe pe kawako ni, a fiɛrɛ na pe yii, a pra kna na peyɛ wie mbo, “Ndro ŋmbi nyini wi ŋmba hin, na u fuu fuflɛ, na nyumu na, mbe yi yire dimm ŋga hin?”
Yesu Na Ŋumufɔɔn Wɔ Blɔ Wa Nu
26 A pra sɛ le Gerasene leele tra nu, Galilee tapla kre mbɛɛ na.
27 Ŋga wra le tra kre nu kre, blɔ wa na pan mna u fni, na ŋumufɔɔn wa u nu, kie pe nyjila tataara, na wra yoŋgo tɔ, a wa tni katoo, fanyi weele nu wraa sni.
28 Ŋga wra Yesu nya kre, a wra gble fɔɔri mu le, mna pan mu to u yiɛ, mna paara gedeŋge mbo, “Yesu, Nyiɛkpɔɔ ŋmba uu wa nyjeeri wre Biblɔ, mu yira ŋgi kii wa ni pan hin? Ni mu tali, maashia ni kla”
29 Na Yesu klu mu yo ŋumufɔɔn wre pan na u yili blɔ wre nu. Nyjila tataara nu na ŋumufɔɔn wre yiri u nu, a pe u kan pan tuŋmble na kre, we tɔɔnrɔ kre kɔ mbe wa, mbe ŋumufɔɔn wre ti u to nyaa.
30 A Yesu na kna mna u wie mbo, “Mu mɛɛ yi ŋgi hin?”
A wra kna mbo, “Ni mɛɛ Legion.” Ŋgi na hin? Na ŋumufuɛn nɛɛ u nu.
31 A ŋumufuɛn pre na u tali chiin, na waa shia pe ni mbe pe sɛ wee ŋga ki n nyukɔɔrɔ ni kre nu.
32 Kre nyjila kre na prakoe plɛɛ wa na kaa nyua ka mbɛɛ na wa, a pra Yesu tali na u ti mbe pe sɛ le prakoe pre nu. A wra pe ŋga kolo.
33 A ŋumufuɛn pre na yili blɔ wre nu, mna sɛ le prakoe pre nu, a pra mɔŋɔ poŋgo mna sɛ to tapla kre nu, a kra pe li pei.
34 Ŋga yurɛ pre lefɛɛnlɛ na kee ŋga kra pe kre nya kre, pra fɛ mna sɛ mandiɛ bɔ chiɛ nyjɛ yiraa wa wa yire kro na.
35 A leele na yili mna sɛ kee ŋga ki pe kre lehaa. Pra sɛ Yesu lawee mna blɔ ŋmba nu u ŋumufuɛn yire wɔ wre nya, na uu wa mu tni u jaara. Na u yiɛ to kama, a wra yirɛ le uyɛ na, a kra tia fiɛrɛ na pe yii.
36 Mblɛ pra sɛ u nya pre na sɛ leele bɔ mandiɛ, imi na ŋumufuɛnfun wre saanla mu da.
37 A leele mblɛ praa wa Gerasene tra nu kre kro, naa yuu na Yesu u yili pe pan tra kre nu. Ŋgi na hin. Fiɛrɛ na pe yii kpɔɔ. Kra tia Yesu na le krɔ kre nu, mna ndru u kro.
38 Blɔ ŋmba nu ŋumufuɛn yire na yili wre na Yesu tali mbo, “Jande ti mbe mi na ŋu sɛ.”
39 A Yesu na kna mna yo u pan mbo, “Ndru mu sɛ katoo, mu sɛ kee ŋga Nyiɛkpɔɔ pe mu mu ŋga kre bɔ.” A blɔ wre na sɛ chia lam, mna sɛ na kee ŋga Yesu pe u na kre kpali na tro.
Jairus Pɔ Chlɔ
40 Ŋga Yesu na ndru mu kun epo kre kro kre, na lenɛɛrɛɛ wa mu ble wa na u siri. Ŋgi na hin? Na pe loo na u paan.
Luke 8:40-56
41 Bawa Judah fninyuŋgo loplombo pre ŋmba praa yeeri Jairus wre na pan mna kosie kan Yesu yiɛ, mna u tali na u ti pe sɛ u katoo.
42 Ŋgi na hin? Na u pɔ bichable nunu chom, we pe yɛlɛ kɛmbɔshiin, na u yaa mu chaa ku.
Chlɔ Nyimi Wofun Wa Tra Haa
Ŋga Yesu naa shie blɔ wre katoo kre, lenɛɛrɛ pre na wɛ u na, na u ŋunɔ.
43 Na nyimi woni chlɔ wa pan mu wɛ yɛlɛ kɛmbɔshiin na, a u tra chiin mu pra.
44 A chlɔ wre na yiri mu chaa lenɛɛrɛ pre nu mu taa Yesu kro, mna sɛ kɛ taa u dodoŋgi nyu na, titɛɛ kre nu to, a u nyimi woo kre na kun.
45 A Yesu na kna mbo, “Ndro ŋmbi u kɛ taa ni na ŋga hin?” A pe kro naa kaala.
A Peter na kna mbo, “Ni Tafun, na leele pre nɛɛ mu na, na gbuun mu na kro poŋgo.”
46 A Yesu na kna mbo, “Ndro kɛ taa ni na. Ŋgi na hin? Ni chin na faŋga ka yili ni nu.”
47 Chlɔ wre na nya na wa jaa ndra, a wra pan mna kosie kan Yesu yiɛ, na seeri, mna paara lenɛɛrɛ pre kro yiɛ na, mna nyina ŋga ki tia a u kɛ taa u na, na imi na u saanla titɛɛ kre nu.
48 A Yesu na kna mu yo u pan mbo, “Ni pɔ, mu shɔnlie mu shɔ. Sɛ na wejinyiŋge ni.”
Jairus Pɔ Chlɔ Ku Mu Nyi
49 Yesu naa wa mu yire na paara, a blɔ wa na yiri Judae fninyuŋgo lopom wre katoo mna pan mbo, “Mu pɔ wre ku. Kena maa tuwi mbe nyinafun wre hau na.”
50 La, ŋga Yesu na kee kre loo kre, a wra kna mna yo u pan mbo, “Maa fiɛ, shɔnli rɛ, we ŋmaa ta.”
51 Ŋga Yesu na sɛ le katoo wa kre, u nsra tia ndro na le wa, fɔna wre na Peter, na John, na James, na pɔ wre lɛ na u lo chiin.
52 Mblɛ praa wa wa kro naa nyɛni na fooro lii, a Yesu na kna mbo, “Yaa nyɛni. Ŋgi na hin? Pɔ wre n ku. Ŋunu u ŋunu.”
53 A pra laa mu to na Yesu tɛɛ, na pre chin na pɔ wre ku.
54 A Yesu na sɛ pɔ wre yii kɛ na, mna kna mbo, “Bichable, yiri!”
55 A u ŋumu na ndru mu pan u nu, a wra taan mu yiri. A Yesu na yo pe pan na pe u ŋga yaka mbe u ka.
56 A kra u sefɛɛnlɛ pre pe kawako ni, la, Yesu na pe jaari na piashia kee ŋga ki pe kre kpali mbe ndro loo.