Falifun Wa Yirɛ Bie Wohaa
4
Ki ble ka Yesu na ndru mna sɛ na nyina epo nyu kre na wa, a lenɛɛrɛ na pan mu lawee kre tɔ. A kra tia wra le krɔ ka lam, mu tni mna lenɛɛrɛ pre ti lɔɔ kre nyu na, na paara pe pan.
2 Yesu na pe nyina kenɛɛrɛ yomɛɛlɛ nu. U paaraa kre nu wra yo mbo,
3 “E loo! Kena falifun wa wra sɛ u yirɛ bie wohaa.
4 Ŋga wraa yirɛ bie yire nyina kre, yɛ na sɛ wo kolo mbɛɛ na, a hanyiɛlɛ na pan mna yi li.
5 A yɛ na sɛ wo dnɛ lawee, mna tra nsraa wa nɛɛrɛ. Yira ja mu fin yira, a na tra nsra nɛɛ wa chiriri kre ndra na,
6 ŋga yila na wɛɛri mna yi gbun to, a yira ku, ŋgi na hin? Yi nsra didinyi kan.
7 Yirɛ bie yire yɛ na sɛ wo wuuro nu, a wuuro yire na yiri mna yi fɔ, a kra tia yi nsra ja mu sɛ.
8 A yirɛ bie yire yɛ na sɛ wo tra taan nu, mna fin mu lɛ, mu klɛ wa tataara, mu sɛ tataara. Yɛ na sɛ ma gbee fulo na kɛ kɛ, a yɛ na sɛ fuloe tataarɛ, a yɛ na sɛ lafaa lafaa.”
9 A Yesu na kna mbo, “Ŋmba uu wa na ndie ni mbe loo kre, ti u ndie tɛɛ mbe loo.”
10 Ŋga kra kro Yesu na u twanfɛɛnlɛ kɛmbɔshiin pre na leele mblɛ pra kro u mbɛɛ na pre chiin kre, a pra u wie u yomɛɛlɛ yire nɔɔ.
11 A Yesu na kna mna yo pe pan mbo, “Yire rɛ, Nyiɛkpɔɔ e nyina u Ŋunumu kre kee ŋga ki ndra kre, la, waŋgra leele pre, yomɛɛlɛ nu u paara pe pan,
12 ‘Ki tia kee kre,
pie ki nya, la, pia ki chin,
pie ki loo, la, pia ki nɔɔ loo mbe chinɛ
mbe ndru mbe pan Nyiɛkpɔɔ pan,
mbe u pe shɔ, mbe pe sisam ti mbe pe kɛ.’”a
Yomɛɛlɛ Yire Nɔɔ
13 Bawa Yesu na kna mu pe wie mbo, “A na e n yomini ŋga nɔɔloo, kena mni ee pe mbe hɛnyi nyjɛ nɔɔloo hin?
14 Falifun wre wi Nyiɛkpɔɔ ketaan yofun wre.
15 A yirɛ bie nyjɛ yira wo kolo mbɛɛ na pre lɛ mblɛ pe ketaan kre ndru, titɛɛ kre nu to, mbe Sutna pan mbe ki wɔ mbe yili pe nu.
16 A nyjɛ yira wo dnɛ lawee kre, pre lɛ mblɛ pe ketaan kre ndru, mbe ki shɔ mbe li na yɛshɔɔrɔ ni,
17 a nde kee kre wa jaa didinyi kan pe nu. Pie tni sumɛɛ kre nu chiɛri, la, na kanyana, ndee na pe waa na pe fiŋge ketaan kre tlo to, kena pe fɛ mbe wa, mbe sumiɛ ti.
18 A nyjɛ yira wo wuuro nu kre, yire yi leele mblɛ pe kee kre ndru,
19 na waŋgra ŋga yirɛ chaara, na swa fanaa, na waŋgra ŋga yirɛ niŋge waa pan mu le pe sumiɛ nu, mu nya mbe pe shɔnlie to, kee kre wa jaa sɛŋgɛ sɛ pe nu.
20 A yirɛ bie nyjɛ yira wo tra taan kre nu pre lɛ mblɛ pe Nyiɛkpɔɔ ketaan kre ndru, mbe ki shɔ mbe li, mbe ki sɛŋgɛ sɛ gbee fulo na kɛ kɛ, plɛ fuloe tataarɛ, plɛ lafaa lafaa.”
Kaniɛ Tnumu
21 Ba Yesu na ndru mna pe wie mbo, “Ndro ŋmbi we kaniɛ mu mbe bokiti tɛɛ mbe ki juule, ndee mbe sɛ ki le mpa tapan, mbe wa ki taa tebru ndra na hin?
22 Yaka n wa mbe ndra, a kia kɔ mbe yili. A ndrandra kee ka n wa mbe kia kɔ mbe kpali.”
23 Yesu na yo pe pan mbo, “Ŋmba uu wa na ndie ni, u ndie tɛɛ u loo.”
24 A Yesu na kna mna yo pe pan mbo, “Kee ŋga e ndru ŋga, e ki loo chichie. Lakaja ŋga nyini ni e yirɛ kra na plɛ kaan kre, kre ni Nyiɛkpɔɔ we kra mbe e ŋga, mbe ka ya e pan.
25 Ŋmba uu wa ka ni kre, we ufun ŋga ka mbe ya. A ŋmba u n ka ni kre, chiɛri ŋga kii wa u pan kre kuraa, we ki shɔ u pan.”
Nyiɛkpɔɔ Ŋunumu
26 Yesu na yo na mbo, “Imi na Nyiɛkpɔɔ ŋunumu kre nyi yi kre, pan ki nyi na falifun wa we sɛ u yirɛ bie nyina see lam,
27 mbe ndie wɔ yi na, mbra sni mbra yiri lafo na blee, mbe yirɛ bie yire kɔ mbe fin mbe lɛ, mbe wa chin imi na yi pe mu fin mu lɛ.
28 Ŋga we nya yi na tra kre tia yirɛ yire ŋɔɔ, mu fin, mu wrɛ jle le, mu lɛ mu sɛ.
29 Yirɛ yire nyina haa yi to, mbe falifun wre sɛ le yi nu na u brɔfiɛn ni mbra knumu.”
Mustard Bie Yomɛɛlɛ
30 Yesu paara na mbo, “Yira ŋgi kuraa ni mbe tɛɛ mbe Nyiɛkpɔɔ Ŋunumu kre kra hin?
31 Pan ki nyi na mustard bie yi. Kii fiɛn yirɛ bie kro nu,
32 nde na mu ki luu a ki yiri, yɛlɛ kie li mbe ndru mbe yua, a nde ki kpɔɔri mbe wɛ tinyi nɛɛrɛ na. Ki ja mbe klɛ wa, mbe hanyiɛlɛ jaa zeere le le ki nu.”
Yesu Chia Leele Nyinai Yomɛɛlɛ Nu
33 Yire yomɛɛlɛ nyjɛ nyini nu Yesu naa Nyiɛkpɔɔ kee kre yuu pe pan, imi kie pe mbe pe jaa kala kre nɔɔloo.
34 Yesu nsraa paara, mbe yomɛɛlɛ la u kee nu, la na ki kɔ mu kro wre na u twanfɛɛnlɛ pre chiin kre, mbe u pe nyina yi nɔɔ.
Yesu Tia Fuflɛ Yire
35 Ki ble kre yilakɔŋgɔ nyu na, Yesu na yo u twanfɛɛnlɛ pre pan mbo, “E ti mbe o sɛ epo kre kro kokoo ŋga wa na.”
Jesus Calms the Storm (Mark 4:35-41)
36 A Yesu twanfɛɛnlɛ pre na u bali na krɔ kre ni, imi na wra nyi mu tni ki nu kre, mna leele pre ti wa. Ŋga praa shie kre na krɔɛ yɛɛ wa mu ya pe na.
37 Epo kre yiɛ na kre, fuflɛ badaaŋga ka na gbun, mna nyumu gbun mu le krɔ kre lam, a kra chaa nyi.
38 Kre nyjila kre na Yesu wa mu sni mu ndra gbun ndragbɔɔn na, na ŋunu krɔ kre nɔɔhaa wa. A u twanfɛɛnlɛ pre na u nyi mna u wie mbo, “O Nyinafun, kena ŋga epo kre chaa o li ŋga, ki n mu shian ra?”
39 Titɛɛ kre nu a Yesu na yiri mu fuu fuflɛ kre na, mna kna mu yo epo kre pan mbo, “Pieri, mu yire titɛɛ!” A fuflɛ kre na yire dimm!
40 A Yesu na kna mu u twanfɛɛnlɛ pre wie mbo, “Yira ŋgi ki tia e kro pe fiɛrɛfɛɛnlɛ ma hin? Ŋgi ki tia a e n shɔnlie ni kuraa ŋga hin?”
41 Fiɛrɛ na pe yii kpɔɔ, a pra kna na yuu peyɛ pan mbo, “A ndro ŋmbi sembremu wi ŋmba kuraa, hali fuflɛ, na epo na u nyu kayooro ndru ŋga hin?”