Kokuefun Wa Tra Haa
8
Ŋga Yesu na yiri nyua kre na mna tii tra kre, lenɛɛrɛ na taa u kro.
2 Bawa kokuefun wa na pan mna kosie kan u yiɛ mna yo u pan mbo, “Ni Tafun, jande na ki tna mu pan, ti mbe ni saanla.”
3 A Yesu na kɛ tini mu taa u na, mna kna mbo, “Ki tna ni pan, Kena saanla!” Titɛɛ kre nu, a wra saanla.
4 A Yesu na kna mu yo u pan mbo, “Le, maashia ki yo mbe ndro loo. La, sɛ Judah srawɔfɛɛnlɛ pre pan, mu sɛ sra yirɛ nyjɛ Moses mbra nyina yire wɔ, mbe ki mu dansiɛrɛ li pe yiɛ na.”a
Tnu Wa Tra Haa
5 Ŋga Yesu na sɛ le Capernaum na kre, Roman sojae lopom wa na pan mna Yesu tali mbo,
6 “Ni Tafun, ni sumifun wa fuuru mu sni katoo na kala nyaa tataara, kena jande, ni mu tali mbe mu paan ya ni na.”
7 A Yesu na kna mbo, “Ni loo, mbe paan u tra.”
8 A sojae lopom wre na kna mbo, “Ni Tafun, ni n fna na mu le ni katoo. Kena na mu yire mna mu paara kuraa kre, ni sumifun wre we saanla.
9 Mi chɔɔ, ni pe lewo ŋmba nii wa na jaŋga ni, a nii wa na sojae ni a pee wa ni jaara. Na ni yo wa pan na u sɛ, we sɛ, a na ni yo wa pan na u pan, mbe u pan. A na ni yo ni tnu pan na ŋga imi pe, we ki pe.”
10 Ŋga Yesu na kee nyjɛ blɔ wre na yo yire loo kre, kra u pe kawako ni, a wra kna mu yo mblɛ pra taa u kro pre pan mbo, “Kpra na ni yuu e pan na, Israel leele nu kuraa kre, ni n shɔnlie kpɔɔ ka nya imi tun.
11 Kpra na ni yuu e pan na, lenɛɛrɛ we yiri yila finhaa, na yila tohaa mbe paan chaa mbe li na Abraham, na Isaac, na Jacob ni Nyiɛkpɔɔ ŋunumu kre nu.
12 La, mblɛ wo yi ŋunumu kre, pie pe viŋge mbe wa haaleelee wɔmu nu. Bawa leele we na nyɛni mbra pe ŋgaala chrɛ.”
13 A Yesu na kna mna yo sojae lopom wre pan mbo, “Sɛ katoo! Imi na mu shɔnli kre, ki pe ma mbe mu ŋga.” Kre nyjila kre nu, na yaŋu wre saanla katoo.
Peter Nafun Tra Haa
14 Ŋga Yesu na yiri wa mna sɛ le Peter katoo kre, wra nya na kabro Peter nafun chlɔ gbun.
15 A Yesu na kɛ taa u kɛ na to, a kabro kre na laa u na, a wra yiri mna sro pe mu u ŋga.
Yira Nyininyini Tra Haa
16 Ki ble kre yilakɔŋgɔ kre, pra pan na ŋumufuɛnfɛɛnlɛ tataara ni Yesu pan, a wra u nyu kee tɛɛ mna ŋumufuɛn yire wɔ pe nu, mna mblɛ praa yaa kro tra.
17 Yire kee nyjɛ Nyiɛkpɔɔ kee nyanyofun Isaiah na nya mu yo kre mbo,
“Wra o pɔlɛm shɔ, mna o kanyana wru mu tio.”b
Na Mu Chaa Mbe Taa Yesu Kro
18 Ŋga Yesu na lenɛɛrɛ pre nya na pe u kun mu le lalaa ma kre, a wra kna mna yo u twanfɛɛnlɛ pre pan, na pe kun mbe sɛ tapla kre kro.
19 A Moses mbra nyinafɛɛnlɛ pre wa na kna mna yo Yesu pan mbo, “Nyinafun, ni chaa mbe taa mu kro. Mna mu sɛ kpan, mbe mi na ŋu sɛ.”
20 A Yesu na yo u pan mbo, “Ŋmbokuŋmboe wa na wee ni na sni, a nyjeeri hanyiɛlɛ wa na pe zeere ni, la, mi Lewo Biblɔ wre n wa ndra tɛɛ haa ni.”
21 A Yesu twanfɛɛnlɛ pre nunu na kna mbo, “Ni Tafun, ni ŋga kolo mbe ni sɛ ni lɛ gboo le tun, mbe chiin paan taa mu kro.”
22 A Yesu na kna mu yo u pan mbo, “Pan mbe o sɛ, ti mbe mblɛ pe ku pre na pe gboolo leni.”
Fuflɛ Kpɔɔ Na Gbun
23 A Yesu na u twanfɛɛnlɛ pre na yire wa mna le krɔ nu.
24 Ŋga praa shie kre, fuflɛ badaaŋga ka na gbun, a krɔ kre na chaa kna mbe juule, kre nyjila kre na Yesu sni na ŋunu krɔ kre nu.
25 A pra sɛ u gbun mu nyi mbo, “O Tafun, yiri mu o shɔɛ, lɔɔ chaa o li.”
26 A Yesu na kna mna yo pe pan mbo, “Mni a e na fiɛ ma hin? E shɔnlie fiɛn titi.” A wra yiri mna fuu fuflɛ kre na, a nyumu kre na yire dimm.
27 A kra leele pre praa wa krɔ kre nu pre pe kawako ni. A pra kna na yuu mbo, “Lewo ŋmbi nyini wi ŋmba kuraa a fuflɛ, na nyumu na u kayooro ndru ŋga hin?”
Ŋumufuɛn
28 Ŋga pra kun tapla kre kro mna to Gadarene tra nu kre, bilɛ shiin plɛ na yiri fanyi lawee mna pan mu u fni. Ŋumufuɛn naa wa pre bilɛ mblɛ nu, kra tia mna pra nyi kre, ndro nsra ja mbe tro wa.
29 Ŋga pra Yesu nya kre, titɛɛ kre nu, a pra gble fɔɔri mu le mbo, “Nyiɛkpɔɔ Biblɔ Yesu, kala ŋgi nu wre na ŋu nyi hin? O klahaa mu pan mbe nyjila kre chiin da ree?”
30 Kre nyjila kre, na prakoe tataara plɛɛ wa na kaa pe mbɛɛ na,
31 a ŋumufuɛn pre na Yesu tali mbo, “Jande, na mu o ni, ti mbe o sɛ le prakoe mblɛ nu.”
32 A Yesu na kna mu yo ŋumufuɛn pre pan mbo, “E yili pe nu.” Titɛɛ kre nu, a pra yili mna sɛ le prakoe pre nu, a prakoe pre na mɔŋɔ mna tii landɛɛ kre nu mna sɛ to epo kre nu, a kra pe li pei.
33 Ŋga kra pan ma kre, leele mblɛ praa prakoe pre le pre na taknɔ le, na shie chia lam, na kee ŋga ki pe kre yuu, na bilɛ shiin mblɛ nu ŋumufuɛn na nyi pre kee kre kpali.
34 Ŋga kra pan ma kre, chia kre leele kro na yili mna sɛ Yesu fni, mna u tali na u yili pe pan tra kre na mbe sɛ.