Bitumblɔ Pre Yeeree
5
Ki ble ka Yesu na sɛ yire Gennesaret epo kre nyu na, a lenɛɛrɛ na kan mna pan mu wo u na, na Nyiɛkpɔɔ kee chaa mbe loo.
Luke 5:1-16
2 A wra kna mna mbroe wɔfɛɛnlɛ plɛ krɔɛ shiin yɛ nya, na pe yi pɔ epo kre nyu na, na krɔɛ yirefɛɛnlɛ tii yi nu mu sɛ na pe asau jee.
3 A Yesu na le krɔɛ yire ka nu, na Simon wo yi krɔ kre. A wra kna mna yo u pan na u krɔ kre ŋunɔ mbe ki sɛ lalaa chiɛri. A Yesu na tni krɔ kre nu mna na paara na leele pre nyina.
4 Ŋga Yesu na paara leele pre pan mna kɔ kre, a wra kna mna yo Simon pan mbo, “Sɛ na krɔ kre ni lawee ŋga ki juo nu, mbe ŋu na mu wolo pre sɛ e asau yire wa wa, ee mbroe wɔ.”
5 A Simon na kna mbo, “Ni Tafun, o tnumu tun blee chiin, a o n yaka ta. La, mu nyu kee kre ndra na mbe asau kre wa.”
6 Ŋga pra asau kre wa lɔɔ kre nu kre, pra mbroe wɔ tataara, a asau kre na chaa knumu.
7 A pra pe wolo mblɛ praa wa krɔ shiin wo kre nu pre yeeri, na pe paan ya pe na, a pra pan mna ya pe na, a pra mbroe pre wɔ krɔɛ shiin yire nyini, a krɔɛ yire naa chaa mbe tii tapan.
8 Ŋga Simon Peter na kee kre nya ma kre, a wra kna mna kosie kan Yesu yiɛ mbo, “Jande, ni Tafun, sisam pefun wi mi. Kena maa da ni na.”
9 Mbroe pre pra wɔ kre na wre na mblɛ praa wa wa kre kro pe kawako.
10 Pan chɔɔ kra Simon nɔɔlɔ James na John, Zebedee biile pre pe kawako.
A Yesu na kna mna yo Simon pan mbo, “Maa fiɛ, mu yire aŋga na shie mu pe leele wɔfun.”
11 Ŋga pra pan mna krɔɛ yire pɔ lɔɔ nyu na kre, pra pe yirɛ kro ti wa mna taa Yesu kro.
Yiranyiɛrɛfun Wa Tra Haa
12 Ki ble ka Yesu naa wa kakpɔɛ yire ka na, a blɔ wa na pan u pan, na kokue u knumu kro poŋgo, a wra pan mna to Yesu yiɛ mna u tali mbo, “Ni Tafun, na mu chaa, ti mbe ni saanla.”
13 A Yesu na kɛ tini mna taa u na, mna kna mbo, “Ni chaa. Kena, saanla!” Titɛɛ kre nu a kokue yire na laa blɔ wre na.
14 A wra u jaari mna yo u pan mbo, “Maashia ki yo ndro pan. La, sɛ muyɛ nyina Judae srawɔfun wre pan, mu sra yirɛ nyjɛ Moses mbra nyina yire wɔ, mbe ki mu dansiɛrɛ li.”
15 La, fuŋga Yesu mɛɛ na kpali kpɔɔ kuraa mu ya, a lenɛɛrɛ na kan mu pan mbe u kee yire loo, mbe u pe tra.
16 La, Yesu naa pe tii na shie fimi lawee ka nu mbe sɛ nyiɛtali.
Fna Wa Tra Haa
17 Ki ble ka Yesu naa leele nyina, na kre nyjila kre, na Pharisee leele plɛ na mbra nyinafɛɛnlɛ mblɛ pra yiri Galilee, na Judea chiɛ yire kro na, na Jerusalem na, mna pan mna fni wa, a o Tafun Nyiɛkpɔɔ wre jaŋga na pan Yesu nu, a wra yambla tra.
Luke 5:17-39
18 A bilɛ plɛ na fna wa tio dɛŋglɛ ni, mna pan na kolo chaa mbe le na u ni katoo ŋga nu Yesu na nyi kre nu, mbe u tɛɛ Yesu yiɛ.
19 A imi leele pre na nɛɛ kre ndra na, pe n sra kolo ta mbe da na u ni Yesu na. Kra tia pra nduu na yaŋu wre ni katoo ŋga nu Yesu na nyi kre ndra na, mna lahoo ŋga kra Yesu tɔ kre tuu mu vru, mna yaŋu wre tre u dɛŋglɛ ni mu tɛɛ Yesu yiɛ tata.
20 Ŋga Yesu na nya na leele pre shɔnlie kpɔɔ kre, a wra kna mna yo yaŋu wre pan, mbo, “Awe, mu sisam kro ki laa mu na.”
21 A mbra nyinafɛɛnlɛ pre, na Pharisee leele pre na kna na peyɛ wie, mbo, “A ndro ŋmbi wi ŋmba, a wra jiɛnlɛ kee yuu ma ŋga hin? Na Nyiɛkpɔɔ bɔkɔ, ndro ŋmbi we jaa sisam ti mbe kɛ hin?”
22 Yesu na pe jawala kee nya, mna kna mna yo pe pan mbo, “Mni a e na kee nyjɛ jawa e ndra hin?
23 Ŋga mbe yo na ‘mu sisam kro ki laa mu na’ yoo kii foofoo ree, ndee ŋga mbe yo na ‘yiri mu nyaari yi’ hin?
24 La, ŋga ni chaa mbe e chin yi na, Lewo Biblɔ wree jaŋga ni tra mna mbe jaa sisam ti mbe kɛ.” A wra kna mu yo fna wre pan mbo, “Ni yo mu pan na yiri mu mu dɛŋglɛ wru mu sɛ mu katoo.”
25 Titɛɛ kre nu, a blɔ wre na yiri mna u dɛŋglɛ kru leele pre yiɛ na, mna sɛ katoo, na Nyiɛkpɔɔ kaa mɛɛ.
26 Kra leele pre kro pe kawako ni, a fiɛrɛ na pe yii, a praa Nyiɛkpɔɔ kaan mɛɛ na yuu mbo, “Aŋga rɛ, o kawako kee nya.”
Levi Yeeree
27 Yire kee nyjɛ kɔkro kre, Yesu na yili fimi na mna sɛ tɔɔshɔfun wa nya na uu wa mu tni u tɔɔ shɔ nyuŋgo. Praa u yeeri Levi. A Yesu na kna mu yo u pan mbo, “Yiri mu taa ni kro!”
28 A Levi na yiri mna u yirɛ kro ti wa, mna taa Yesu kro.
29 A Levi na sɛ sro pe badaaŋga wre titi katoo Yesu pan, a tɔɔshɔfɛɛnlɛ tataara, na lenɛɛrɛ na sɛ chaa mu li na pe ni.
30 A Pharisee leele pre, na pe mbra nyinafɛɛnlɛ pre naa taanri Yesu twanfɛɛnlɛ pre na mbo, “Yira ŋgi ki tia e chaa mu li, mu gbɔ na tɔɔshɔfɛɛnlɛ, na sisam pefɛɛnlɛ mblɛ ni ŋga hin?”
31 A Yesu na kna mna yo pe pan, mbo, “Mblɛ pe n na yaa kre n trafun shian, fɔna mblɛ pe yaa.
32 Ni n pan mbe leele mblɛ pe fraka yeerihaa, la, sisampefɛɛnlɛ pan ni pan, mbe pe pe jawala chinɛ.”
Blefuun Kee
33 A pra kna mna yo Yesu pan mbo, “John twanfɛɛnlɛ pre naa blefuni, na nyiɛtali nyjila kro nu, a pan chɔɔ Pharisee leele pre twanfɛɛnlɛ pre pini, la, ŋu twanfɛɛnlɛ mblɛ lii, na gboo.”
34 A Yesu na kna mna pe wie mbo, “Kena ŋga bijɔplɔ wree wa u nɔɔlɔ jaara ŋga, u nɔɔlɔ pre fna mbe blefun ra?
35 La, nyjila ka paan mbe pe paan bijɔplɔ wre bali mbe sɛ, yire ble yire nu pie blefun.”
36 A Yesu na kna mna pe gbun yomini ka mbo, “Ndro n wa mbe dodoŋgi fɔŋgɔ kun mbe ki tɛɛ mbe lɛɛ tɔ, na ki pe ma kre, fɔŋgɔ kre we kla, a lɛɛ kre wa jaa tɔ chiriri mbe nyu.
37 A ndro wa n wa mbe sifiŋge fɔŋgɔ le yurɔ hlɛ gbolo lɛɛ nu. Na kre ma, sifiŋge kre we kan mbe gbolo lɛɛ kre wali, mbe simi kre kna mbe wo, mbe gbolo kre kla (fawolo pre naa simi leni yurɔ hlɛ gbolo nu).
38 La, sifiŋge fɔŋgɔ fna yurɔ hlɛ gbolo fɔŋgɔ nu.
39 A ndro n wa mbe simi ŋga ki lɛ gbɔ mbe yiri kre kro mbra ŋga ki n lɛ chaa, we yo na lɛɛ kre nyu.”