Judae Blefuŋgo Klaa
6
Wuuble ka nu, Yesu naa tro shɔlɔ see ka nu, a u twanfɛɛnlɛ pre naa shɔlɔ yire yɛ mbru na tuŋgo kɛɛ na kaa.
Luke 6:1-16
2 A Pharisee leele pre plɛ na kna mu pe wie mbo, “Yira ŋgi ki tia e na kee ŋga ki n fna mbe e pe Wuuble nu, a e na ki pini ŋga hin?”
3 A Yesu na kna mna yo pe pan mbo, “Nyjila ŋga ni klo na David, na u kotɔmblɔ pre ta kre, kee ŋga pra pe kre, e n ki tɔɔnri tun ra?
4 Imi na wra sɛ le Nyiɛkpɔɔ Suminyuŋgo, mna sɛ paanu ŋga praa teeri Nyiɛkpɔɔ pan kre wru mu ka, mna u kotɔmblɔ pre ŋga haŋa, a pra ka, nde na ki mbra taan na lewaa we kre paanu kre ka, fɔna srawɔfɛɛnlɛ pre chiin bɔkɔ.”
5 A wra kna mna yo pe pan mbo, “Lewo Biblɔ wre wi Wuuble kre Tafun.”
6 Judae Wuuble ka na to na, a Yesu na sɛ le fninyuŋgo ka nu mnaa leele pre nyina. Kre nyjila kre na blɔ waa wa wa, a u kalie kɛ ku.
7 A mbra nyinafɛɛnlɛ pre, na Pharisee leele pre naa Yesu le na we yaŋu wre tra, mbe pe yire ki na mbe u ta mbe yii.
8 La, Yesu na leele pre jawala chin, a wra kna mna yo kɛ kuo wre pan mbo, “Yiri mu yire mbe leele mblɛ kro mu nya.” A wra yiri mu yire.
9 A Yesu na kna mna yo leele pre pan mbo, “Ni chaa mbe e wie kee nunu. Kena mbra kolo ŋga mbe o chichie, ndee sisaa pe Wuuble ra? Ki fna o ndro ŋmaa shɔ ree, ki fna o u ŋmaa kla hin?”
10 A Yesu na kna mna leele pre kro le mu fni, mna kna mu yo yaŋu wre pan mbo, “Mu kɛ kre tini.” A wra ki tini, a kra ndru mu pe na ki fa yi.
11 Ŋga kra pan ma kre, krɔ na pe kun kpɔɔ, a pra kna na bɔɔnri na peyɛ ni, na kolo ŋga na pie tro Yesu ni chaa.
Twanfɛɛnlɛ Kɛmbɔshiin Pre Wɔhaa
12 Ki ble ka Yesu na sɛ nyua ka na nyiɛtali haa. Wra nyiɛtali chiin, a nyiŋge na pan mu se.
13 Ŋga ndram na saan kre, a wra u twanfɛɛnlɛ pre yeeri mu fni, mna kɛmbɔshiin pre wɔ, mna pe mɛɛ tɛɛ bitumblɔ.
14 Mblɛ wra wɔ pre mɛɛ yi kre,
Simon, a wra u ŋga Peter mu ya,
na Simon wre chunu Andrew,
na James,
na John,
na Philip,
na Bartholomew,
15 na Matthew,
na Thomas,
na Alphaeus pɔ James,
na Simon ŋmba praa yeeri Zealot wre,
16 na James pɔ Judas,
na Judas Iscariot, ŋmba wra kɔ mna Yesu wɔ mu ŋga wre.
Pe Pan Mbe Yesu Kee Loo
17 Ŋga wre na pre na yiri nyua kre na mna tii kre, pra pan mu yire lawee mbrɛrɛ ka nu, wre na u twanfɛɛnlɛ pre tataara ni. Lenɛɛrɛ na yiri Judea, na Jerusalem na, na lɔɔ nyu chiɛ nyjɛ pe yeeri Tyre na Sidon yire na, mna pan wa. Pra pan mbe paan u kee yire loo, mbe u pe tra.
Luke 6:17-36
18 A wra mblɛ ŋumufuɛn naa tɔɔra pre tra.
19 A lenɛɛrɛ pre kro naa u chaa mbe kɛ taa u na. Ŋgi na hin? Jaŋga naa yilii u nu na pe kro trai.
Tablɔ Tra Kee Yoo
20 A Yesu na kna mu yiɛ kan u twanfɛɛnlɛ pre na, mna yo pe pan mbo,
“E mblɛ e shian wo yi dwamu.
Ŋgi na hin?
Yire wo yi Nyiɛkpɔɔ ŋunumu kre.
21 E mblɛ klo ta aŋga wo yi dwamu.
Ŋgi na hin?
Yire ee kɔ mbe yɔɔ.
E mblɛ e nyɛni aŋga wo yi dwamu.
Ŋgi na hin?
Yire ee kɔ mbe tɛɛ.
22 Mi ndra na, e mblɛ pe pra,
mu e wɔ mu ŋga, mu na e tɛɛlɛ,
mu na e yeeri Sutna kre,
e wo yi dwamu.
23 Na ki pan ma kre, e ti mbe e yiɛ shɔ kpɔɔ.
Ŋgi na hin? E fɔtɔɔrɔ kpɔɔ nyjeeri.
Pan chɔɔ, e tolɛɛlɛ na Nyiɛkpɔɔ keenyanyofɛɛnlɛ pre pe.
24 La, yire mblɛ e ta kre, e atɛ!
Ŋgi na hin?
E eyɛ li mu kɔ.
25 Yire mblɛ e yɔɔ fuŋgaami kre, e atɛ.
Ŋgi na hin?
Klo we kɔɔ e gbo.
Yire mblɛ e tɛɛ aŋga kre, e atɛ.
Ŋgi na hin?
Ee kɔɔ nyɛni kpɔɔ.
26 A yire mblɛ leele kro, e kee chichie yuu kre, e atɛ!
Ŋgi na hin?
Pan chɔɔ, e tolɛɛlɛ pre naa kafinɛ Nyiɛkpɔɔ kee nyanyofɛɛnlɛ pre pini.
E E Loŋgoolo Kori
27 La, yire mblɛ e ni kee ndru kre, ni yuu e pan, e e loŋgoolo kori, e na mblɛ pe e pra pre pini chichie.
28 E na dwan e na mblɛ pe e suni pre kaan, a mblɛ pe e tɛɛlɛ pre, e na nyiɛtali e na pe kaan.
29 A na ndro mu yiɛ kokoo ŋga ja kre, kokoo haŋa kre kna mu tɛɛ u pan. A na ndro mu dodoŋgi fimi wo shɔ kre, u ŋga lam wo mbe u ya.
30 A ndro ŋmba we e tali yira kpan, e u ŋga, a na ndro e yira wru jaŋga na kre, yaa ki shɔ u pan.
31 Kena nyjɛ e chaa mbe pra pini e na kre, e na yire pini e ŋmbilɛ na.
32 Kena na e mblɛ pe e kori pre chiin kori, mɛɛ ŋgi kii wa ki nu hin? Pan sisampefɛɛnlɛ pre pini, mblɛ pe pe kori pre pe kori na.
33 A na e chichie pini, na mblɛ pe e pini chichie pre chiin kaan, mɛɛ ŋgi kii wa ki nu hin? Pan chɔɔ sisampefɛɛnlɛ pre pini.
34 A mblɛ na e kaan, na ee ta mbe shɔ pe pan kre, na e pre jini, mɛɛ ŋgi ee ta hin? Sisampefɛɛnlɛ pre, peyɛ pan pe jini, na shio peyɛ pan na chɔɔ.
35 Kena e e loŋgoolo kori, e na chichie pini e na jini, la, yaa na kaan na pie tɔ mbe e ŋga. Na e pe ma, kre e fɔtɔɔrɔ we kpɔɔ, a ee pe Nyiɛkpɔɔ ŋmba uu wa nyjeeri kre biile. Ŋgi na hin? U lɛɛ tna na ayɛtefɛɛnlɛ na sisampefɛɛnlɛ ni kro.
36 Kena e pe foorochinfɛɛnlɛ, imi na e lɛ Nyiɛkpɔɔ wre pe foorochinfun kre.
Pimi Gbɔɔn Sisaa
37 Kena yaa na kpra kuun nyaanyaa, mbe Nyiɛkpɔɔ waa kɔɔn e gbun pimi ni. A yaa na e ŋmbilɛ gbuun pimi ni, mbe Nyiɛkpɔɔ waa e gbun na pimi ni. E na tii e na kee, mbe Nyiɛkpɔɔ ti mbe e kɛ.
Luke 6:37-49
38 E na e ŋmbilɛ kee, Nyiɛkpɔɔ we e kɛ. We lakaja tɛɛ mbe yirɛ kra mbe e ŋga, mbe ki fɛɛri, mbe ki nyaara, mbe yi le mbe nyi mbe wo. Ŋgi na hin? Lakaja ŋga ni mu yirɛ kra mbe ŋga kre, kre ni Nyiɛkpɔɔ we kra mbe mu ŋga.”
39 Yesu na pe gbun yomini ka mbo, “Fuun we ja mbe fuun yii kaan na ree? Na ki pan ma, pe kro shiin wa to wee nunu nu ree?
40 Twanfun na wɛ u nyinafun na. La, na u u nyina chiriri, we pe na u nyinafun wre wi.
41 A yira ŋgi ki tia kra fiɛn ŋga kii wa mu ŋmbrɔ nyini kre, a mu kre nya, la, kpɔɔ ŋga kii wa ŋu titi nyibie kre, a mu n kre nya hin?
42 Ndee ŋgi ki ti mbe mu yo mu ŋmbrɔ pan na awe, ti mbe ni kra fiɛn ŋga wɔ mu nyini, a kpɔɔ ŋga kii wa ŋu titi nyini kre, a mu n kre wɔ tun hin? Yire yiɛnyumufɛɛnlɛ, e kra kpɔɛ nyjɛ yii wa e nyiɛlɛ yire wɔ tun, kre ee nya chiriri, mbe chiin jaa e ŋmbilɛ wee fiɛn fiɛn yire wɔ pe pan.
Tiŋge Sɛŋgɛ Ni Pe Ki Chini
43 Tiŋge chichie n na sɛŋgɛ sisaa sɛ, a tiŋge sisaa wa jaa sɛŋgɛ chichie sɛ.
44 Tiŋge kro, ki sɛŋgɛ na pe yire na ki chini. Ŋgi na hin? Ma jaa lombru sɛŋgɛ kun, wufiŋge tiŋge na.
45 Lewo kepele chichie ŋga kii wa u loloŋgo nu kre, kre ki tia wra chichie pini. A lewo sisam kepele ŋga kii wa u loloŋgo nu kre, kre ki tia wra sisaa pini. Kena kee ŋga kii wa loloŋgo nu mu ki nyi kre, kre nyu yuu.
46 Yira ŋgi ki tia e na ni yeeri Tafun, a la, nyjɛ ni yo e pe yire, a yaa yi pe hin?
47 Lewo ŋmba we pan ni pan, mbe ni kee yire loo, mbe li yi na kre, mbe e nyina imi we pe.
48 Pan ufun wre nyi na blɔ ŋmba wra yo we u katoo sin, mna sɛ dnɛ ndra tuu, a kra jio, a wra ki nɔɔ le mu taa dnɛ kre na. Ŋga nyiɛ na pan, a lɔɛ na nyi mna fo mu pan mu le ki nu, ki nsra ja mna ki chan. Ŋgi na hin? Wra ki sin chichie.
49 La, ŋmba u ni kee yire ndru, a wa li yi na kre, pan u nyi na blɔ ŋmba wra yo we u nyuŋgo sin, mna ki sin to mu taa tra yiɛ na, u nsra ki nɔɔ le chiriri. Ŋga nyiɛ na pan mna fo mu le ki nu to, a kra to. Nyuŋgo kre too na peere.”