Pimi Gbɔɔn
7
“Maa na leele gbuun pimi ni nyaanyaa, mbe Nyiɛkpɔɔ wa kɔɔ mu gbun pimi ni.
2 Ŋgi na hin? Pimi ŋga ni mu ndro gbun kpan, kre pimi kre chɔɔ ni Nyiɛkpɔɔ we mu gbun. A kolo ŋga na mu tro na lewo ni kre chɔɔ na Nyiɛkpɔɔ we tro na mu ni.
3 Yira ŋgi ki tia kra fiɛn ŋga kii wa mu ŋmbrɔ nyini kre, a mu kre nya, la, kpɔɔ ŋga kii wa ŋu titi nyini kre, a mu n kre nya hin?
4 Ndee ŋgi ki ti mbe mu yo mu ŋmbrɔ pan na, ti mbe ni kra fiɛn ŋga wɔ mu nyini, a kpɔɔ ŋga kii wa ŋu titi nyini kre, a mu n kre wɔ tun hin?
5 Ŋu yiɛnyumufun, kra kpɔɔ ŋga mu nyini kre wɔ tun, kre mu nya chiriri, mbe chiin jaa mu ŋmbrɔ wo fiɛn kre wɔ u pan.
6 Maa shia Nyiɛkpɔɔ ŋunumu kee titi kre yo mblɛ pe ki le kewaa kre pan. Ŋgi na hin? Na mu yirɛ chichiele wa nyikaanla, na prakoe yiɛ kre, pie yi taanla mbe kla, mbe knaa to mu na.”
Talaa
7 “Kena e Nyiɛkpɔɔ tali, we e ŋga. E na chaa u pan, ee nyjɛ e chaa yire kro nya. E u krɔ koori, we ki nyaa e pan.
8 Ŋmba u tali kre taa, a ŋmba u chaa kre we nya. A ŋmba u u krɔ koori kre, u ki nyaari u pan.
9 Kena e ŋmbi haa pɔ we u tali paanu, mbe u u ŋga dnɛ hin?
10 Ndee e ŋmbi haa pɔ we u tali mbro, mbe u wɔɔ yii mbe le u kɛɛ hin?
11 A kena na yire sisampefɛɛnlɛ mblɛ kuraa chin, mu na e biile kaan yirɛ chichiele kre, e jawa e chin na, e Lɛ ŋmba uu wa nyjeeri wre, we jaa mblɛ pe u wie kre ŋga yirɛ chichiele.
12 Kena kee nyjɛ e chaa mbe pra pini e na kre, e na yi pini e ŋmbilɛ na. Pan Moses mbra yire na Nyiɛkpɔɔ kee nyanyofɛɛnlɛ pre kee yire nyina.”
Kooloe Shiin
13 “E tro jlonwee fiɛn kre na. Jlonwee ŋga ki shie kanhun nu kre vala, a ki kolo vala na, a kre na lenɛɛrɛ troi.
14 La, jlonwee ŋga ki shie ŋmaa lawee kre pe fiɛn, a kolo kre pe foo, ki tia leele chiɛri plɛ pe troi ki na.”
Jaaraa
15 “E eyɛ le chichie kafinɛ Nyiɛkpɔɔ kee nyanyofɛɛnlɛ pre haa. Pie peyɛ nyjii imi na mbaala pe yɛ nyjiri kre, mbe pan e pan. La, pan pe nyi na komboolo lɛ.
16 Pe kepele ni ee pe chin. Ŋgi na hin? Wufiŋge tiŋge wa jaa lombru sɛ, a mbrambra tiŋge wa jaa gbena sɛ.
17 Tiŋge chiriri ki sɛŋgɛ chiriri sɛni, a tiŋge sisaa na sɛŋgɛ sisaa sɛni.
18 Tiŋge chichie wa sɛŋgɛ sisaa sɛ, a tiŋge sisaa wa jaa sɛŋgɛ chichie sɛ.
19 Tiŋge ŋga kraa sɛ chiriri kre, pie ki kun mbe wa kanhun.
20 Kena kafinɛ Nyiɛkpɔɔ kee nyanyofɛɛnlɛ pre, pe kepele ni ee pe chin.”
Nyjeeri Ŋunumu Sɛɛ
21 “Ki n pe mblɛ pe ni yeeri, ‘Ni Tafun, Ni Tafun,’ pre kro pie sɛ nyjeeri ŋunumu kre nu. La, mblɛ pe ŋga ni Lɛ ŋmba uu wa nyjeeri chaa pini kre, pre pie le u ŋunumu kre nu.
22 Na ki ble kre waa da, leele tataara we pan mbe yo mbo, ‘O Tafun, mu mɛɛ ni ma o naa mu kee nyaa na yuu kree? A o n na mu mɛɛ tɛɛ mna ŋumufuɛn wɔ leele nu, mna kawako kee tataara pe kree?’
23 Bawa mbe kna mbe yo pe pan na, ‘Yire sisampefɛɛnlɛ mblɛ, e laa ni na e sɛ. Ni n e chin.’”
Kachiŋu Na Jijuo Nyuŋgo Sin
24 “Kena ndro ŋmba we ni kee nyjɛ loo mbe li yi na kre, we pe na kachiŋu ŋmba wra u nyuŋgo sin dnɛ lawee nu wre wi.
25 Ŋga wra ki sin mu kɔ kre, nyiɛ na pan, a lɔɛ na nyi mna fo mu le nyuŋgo kre jaara, a fuflɛ na gbun badaaŋga mna le nyuŋgo kre nu, a nde ki nsra ja mu nyuŋgo kre chan, ŋgi na hin? Wra ki sin mu taa dnɛ na.
26 A ŋmba we ni kee nyjɛ loo, a u n li yi na kre, we pe na jijuo ŋmba wra yo we u nyuŋgo sin, mna sɛ ki sin tablɔ nu wre wi.
27 Ŋga nyiɛ na pan kre, a lɔɛ na nyi mna fo mu le nyuŋgo kre jaara, a fuflɛ na gbun kpɔɔ mna le nyuŋgo kre nu, a nyuŋgo kre na to, kra tia ki too na peere.”a
28 Ŋga Yesu na kee nyjɛ krɛrɛ yo mu kɔ kre, u kee nyjɛ wraa nyina yire na lenɛɛrɛ pre pe kawako ni.
29 Ŋgi na hin? U nsraa u kee yire nyina na pe nyinafɛɛnlɛ pre lɛ, la, wraa paara na jaŋga ni.