2 A Yesu na kna mbo, “Kena ŋga pra pre leele mblɛ gbo kre kolo ŋga na ŋga, e jawa na pe sisam na wɛ Galilee leele hamblɛ pre na ree?

3 Pan ma ki nyi, la, e ti ni yo mbe e loo, na e n e jawala chinɛ mu laa e sisam kro kre, pan ee ku na chɔɔ.

4 Ndee leele kɛmbɔkɔɔnatarɛ pre Siloam nyuŋgo gedeŋge kre na to mu gbo kre, e jawa na pe sisam na wɛ Jerusalem leele hamblɛ na ree?

5 Pan ma ki nyi, la, e ti ni yo e pan, na e n e jawala chinɛ mu laa e sisam kro kre, pan e kro we ku.”

6 A Yesu na kna mna yomini ka gbun mbo, “Blɔ wa wra u kagbla le, mna fig tiŋge ka luu ki lam. Ki ble ka wra sɛ na sɛŋgɛ chaa ki na, a u nsra ka ta.

7 A wra kna mna yo kagbla lefun wre pan mbo, ‘Le, yɛlɛ nununu taarɛ wo yi ŋga, na ni pan na sɛŋgɛ chaa fig tiŋge ŋga na, mba ka ta, kena ki kun mu wa, maa ti mbe kra tra kre klai finfin.’

8 A kagbla kre lefun wre na kna mbo, ‘Ni Tafun, ki ti ala mu ya, mbe ni tra gbun mbe le ki nɔɔ na, mbe tuwe le ki na.

9 Na yɛlɛ waa da a kia sɛ, kena ki nyu, a na ki n shia sɛ naa, mbe o ki kun mbe wa.’”

10 Judae wuuble ka na to, a Yesu na sɛ na leele nyina fninyinyi yire ka nu.

11 Kre nyjila kre na chlɔ waa wa wa, a ŋumufɔɔn naa wa u nu. Ŋumufɔɔn kre na tia chlɔ wre na yaa, mna kru. Kie pe yɛlɛ kɛmbɔkɔɔnatarɛ na wa jaa yiri mbe fraka.

12 Ŋga Yesu na chlɔ wre nya kre, a wra u yeeri mna yo u pan mbo, “Maa, mu yira kre laa mu na.”

13 A Yesu na kɛ tini mu taa u na. Titɛɛ kre nu, a chlɔ wre na yiri mna fraka, na Nyiɛkpɔɔ kaan mɛɛ.

14 Fninyuŋgo wa lopom wre krɔ na kun na Yesu ni na u yaŋu tra Wuuble. A lopom wre na fuu mna paara leele pre pan mbo, “Ble kɔɔnanu ni ki fna o tnumu tun. Kena na mu chaa mbe yambla tra kre, pan yire ble yire ka nu, la, maa shia pan o Wuuble nu na.”

15 A Yesu na kna mna yo u pan mbo, “Yire yiɛnyumufɛɛnlɛ, e n na tnumu tuni Wuuble kre ra? E n na e nui, na e bubunlɔ saanla nagbɛɛ, pra shie na kaa, na shie na gboo lɔɔ Wuuble nu kre ra?

16 Wre chlɔ ŋmba Sutna pɔ mu tɛɛ yɛlɛ nununu kɛmbɔkɔɔnatarɛ ŋga, Abraham nana ma kree? Kena ki n fna mbe pe u shɔ mbe wa Wuuble ra?”

17 Ŋga Yesu na yo ma kre, nyifɛɛrɛ na u loŋgoolo pre gbo. La, leele hamblɛ pre yiɛ na shɔ kawako kee ŋga Yesu na pe kre na.

18 A Yesu na kna mbo, “Mni nyini Nyiɛkpɔɔ ŋunumu kre nyi hin? A yira ŋgi sembremu na mbe ki wru mbe gbun hin?

19 Pan ki nyi na mustard bie fiɛn ŋga blɔ wa na wru mna sɛ luu u kagbla nu yi, a kra fin mna lɛ, mna yire tiŋge, a hanyiɛlɛ na zeere le le ki klɛ nu.”

20 A wra ndru mu kna mbo, “Yira ŋgi sembremu kuraa ni mbe tɛɛ mbe Nyiɛkpɔɔ ŋunumu ŋga kra hin?

21 Pan ki nyi na yiisi ŋga chlɔ we wɔ mbe le paanu mimi taa kpɔɔ nyini nu, mbe ki bri, mbe ki ti mimi kre tin mbe kpɔɔ.”

22 Yesu na yiɛ le Jerusalem na. Ŋga wraa shie kre, wra tro kakpɔɛ, na kabɛɛlɛ yɛ na, na pe nyina Nyiɛkpɔɔ kee kre na.

23 A ndro wa na u wie mbo, “Ni Tafun, kena leele chiɛri plɛ ŋmaa pie shɔ ree?”

24 “E gbeŋmba na ee tro kolo foo kre na. Ŋgi na hin? Lenɛɛrɛ we na chaa mbe tro ki na, a pia ki ja.

25 Na katoofun wre waa yiri mu katoo krɔ tɔ kre, bawa ee pan mbe yire krɔ kro, mbe krɔ kre koori, mbe kna mbra yuu na, ‘O Tafun, jande, krɔ nyaa o pan.’

26 Bawa ee kna mbra yuu na, ‘Wre na ŋu nsra chaa mu ka, mu gbɔ, a mnaa leele nyina mu kee yire o chiɛ na kree?’

27 La, mbe kna mbe yo e pan na, ‘Ni n e yirihaa chin. E laa ni na e sɛ, yire sisaapefɛɛnlɛ mblɛ.’

28 Na e waa yire krɔ kro, maa Abraham, na Isaac, na Jacob, na Nyiɛkpɔɔ kee nyanyofɛɛnlɛ pre nya Nyiɛkpɔɔ ŋunumu kre nu kre, bawa ee yire mbra nyɛni, mbra ŋgaala chirɛ.

29 A leele we yiri lawee kro nu, mbe paan fni mbe li Nyiɛkpɔɔ ŋunumu kre nu.

30 A e le, mblɛ pe kro tɔ kre we kna mbe yiɛklu, mbe yiɛkulo pre kna mbe kro tɔ.”

31 Kre nyjila kre nu Pharisee leele plɛ na pan mna yo Yesu pan mbo, “Yili tra ŋga nu mu sɛ lawee fɔŋgɔ nu. Ŋgi na, Ŋunu Herod mu chaa mbe gbo.”

32 A Yesu na kna mna yo pe pan mbo, “E sɛ yo leele fanafun wre pan na, ‘Ni yo mbe ŋumufuɛn wɔ leele nu, mbe yambla tra aŋga na baŋga, ble taarɛ ble na, kre mbe ni tnumu nyu le.’

33 Fna ki fna mbe ni ni kolo kre taa mbe kun aŋga, na baŋga, na ki nyisee. Kia jaa pan na Nyiɛkpɔɔ kee nyanyofun we ku lawee ka nu, fɔna Jerusalem na.

34 Jerusalem atɛ. Ŋu mu Nyiɛkpɔɔ kee nyanyofɛɛnlɛ mblɛ pe tun mu pan pre yii mu gbo gbo, mu leele mblɛ pe tun mu pan waari dnɛ ni. Nyjila tataara nu ni chaa mbe mu biile yii mbe le kuɛn jaara, imi na ŋgolo u biile leni kuɛn jaara kre, a mu je ma ni ŋga kolo.

35 Le, mu katoo we tni waara, a ti ni yo mbe mu loo, ma ni nya na, fɔna ŋga ble ee na yuu na ‘Ŋmba u paan o Tafun Nyiɛkpɔɔ mɛɛ nu wre wo yi dwamu bɔkɔ.’”^a