5 Pe chaa kee nyjɛ pe pini kro, mbe leele na yi nyaa. Ŋgi na hin? Pe Nyiɛkpɔɔ nyu kee nyunɔ mu le hlɛ nu, mu yi fra mu pɔ pe nduweele, na pe kɛnyi na, mu yirɛ pɔ mu hlu pe dodonyi nyu na.

6 A na pe sɛ lenɛɛrɛ fninlihaa nu kre, kpɔɔmu lawee pe chaa. A na pe sɛ fninyinyi nu, tni hɛɛ chichiele nu pe jiin,

7 na lete shaaraa chaa, na chaa mbe leele na pe yeeri nyinafɛɛnlɛ.

8 La, yire rɛ, yaa ti mbe pra e yeeri nyinafɛɛnlɛ. Ŋgi na hin? E nyinafun wree nunu, a e kro ndra yila, nyjɔɔlɔ na chinlɛ lɛ e kro.

9 A yaa ndro wa yeeri, ‘O lɛ’ tra ŋga na. Ŋgi na hin? E Lɛ wree nunu chom, wre wi ŋmba uu wa nyjeeri wre.

10 A yaa ti mbe pra e yeeri yiɛkulo. Ŋgi na hin? E yɛklo wree nunu, wre wi Kristo wre.

11 Kena ŋmba u pe lekpɔɔ e nu kre, u pe e kro sumifun.

12 La, ŋmba we uyɛ kpɔɔ kre, pie u pe fiɛn. A ŋmba we uyɛ nyjii kre, pie ufun kpɔɔ.

13-14 Yire Judah mbra nyinafɛɛnlɛ, na Pharisee leele yiɛnyumufɛɛnlɛ, e atɛ. Ŋgi ndra na? E nyjeeri ŋunumu kre kolo tɔ leele na, a yire titi wa sɛ ki nu. A yaa leele mblɛ pie sɛ pre ŋga kolo. E eyɛ pe na e pe cheche mu wɛ ndro kro na, na yire lete na, na nyiɛtali titnɔŋɔ, a nde e lekuchiɛlɛ yirɛ juu pe kalonyi nu. Ki tia e sisam fɔtɔɔrɔ we kpɔɔ.

15 Yire Judah mbra nyinafɛɛnlɛ, na Pharisee leele yiɛnyumufɛɛnlɛ, e atɛ. E nyaari na shie lee, mbe sɛ ndro nunu chom cha mbe u jawala chinɛ mbe u pe na yire lɛ, a na e u ta mu kɔ kre, mbe ufun sisam fɔtɔɔrɔ kpɔɔ mbe wɛ e na.

16 Fuunlo lɛ yire, a e na leele nyina kolo, e atɛ. Yire e yuu leele pan na, na ndro Suminyuŋgo kre da na we yaka pe, a u n ja mu ki pe kre, ki n shian, la, na ndro swanyiɛ ŋga kii wa Suminyuŋgo wa kre da kre, kena ufun fna mbe li u nyu kee na.

17 Fuunlo jijiele lɛ yire, yirɛ shiin nyjɛ, ŋgi ki wɛ ŋgi na hin? Suminyuŋgo ŋga nu swanyiɛ kre nyi mu ki pe cheche kre ki wɛ, ndee swanyiɛ kre yi hin?

18 Yire chɔɔ e leele nyina na, na wa sra gbunu kre da, ki n shian na we li u nyu kee na, la, na ndro yirɛ nyjɛ pe taa sragbunu kre na kre da kre, kena ufun fna mbe li u nyu kee na.

19 Fuunlo mblɛ, ŋgi haa ki wɛ ŋgi na hin? Srayirɛ yire yi wɛ ndee, sragbunu ŋga na pe yirɛ yire taari mbe ki ti yi pe cheche kre yi hin?

20 Kena e ti ni yo e pan mbe e loo na, ŋmba we sragbunu kre da kpan, kena u kre na yirɛ nyjɛ pe taa ki na kre kro da.

21 Kena ŋmba we Suminyuŋgo kre da kpan, kena u kre na Nyiɛkpɔɔ ŋmba uu wa ki nu kro da.

22 A ŋmba we nyjeeri da kpan, kena u Nyiɛkpɔɔ ŋujɔɔn, na Nyiɛkpɔɔ wre titi da.

23 Yire Judae mbra nyinafɛɛnlɛ, na Pharisee leele yiɛnyumufɛɛnlɛ, e atɛ. Ŋgi na hin? E kagblɛ yirɛ chiɛri nyjɛ e taa yire, e yi yɔɔlɛ kɛ mbe Nyiɛkpɔɔ ŋga nunu kama. La, kee nyjɛ yi shian titi u mbra yire nu kre, e yire wa. Yire yi kpra kɔɔn, na fooro chiɛn, na shɔnlie. Yire kee nyjɛ yi fna e naa pini mbe ya.

24 Yire fuunlo mblɛ, na shunshun to e simi nu, e wre woni na waa, la, na nyuuma to e simi nu kre, e na wre wɔ mbe wa, e wre juru.

25 Yire Judae mbra nyinafɛɛnlɛ, na Pharisee leele yiɛnyumufɛɛnlɛ, e atɛ. Yire e e gbɔ yirɛ, na e taahɛɛ krɔ jee, mbe yi lam ti, mu juuro yirɛ, na jajaara yirɛ le yi nu a yi nyi.

26 Yire Pharisee leele fuunlo, e e gbɔ yirɛ, na e taahɛɛ lam je tun, e chin e yi krɔɛ je.

27 Yire Judae mbra nyinafɛɛnlɛ, na Pharisee leele yiɛnyumufɛɛnlɛ, e atɛ. Pan e nyi na fanyi nyjɛ pe faanri mu yi fniŋge na kaaroo ni yi. Yi nyu fimi na kama, la, gboolo kajle, na nɛɛrɛ yirɛ bribri yi yi lam.

28 Kena leele yiɛ na kre, e fraka kama, la, yiɛnyumu kee, na sisam bribri yi e nyi.

29 Yire Judae mbra nyinafɛɛnlɛ, na Pharisee leele yiɛnyumufɛɛnlɛ, e atɛ. Yire e fawolo Nyiɛkpɔɔ kee nyanyofɛɛnlɛ mblɛ pra fraka, a pra pe gbo gbo pre fanyi faanri, mu yi san kama.

30 Na yuu na, na o naa wa o tolɛɛlɛ pre nyjila, waa na chaa mblɛ pra Nyiɛkpɔɔ kee nyanyofɛɛnlɛ mblɛ gbo gbo pre nu.

31 Na e tolɛɛlɛ lɛ mblɛ pra Nyiɛkpɔɔ kee nyanyofɛɛnlɛ pre gbo kre, kena e nyu kee e dansiɛrɛ li mu e taan.

32 Kena kee nyjɛ e tolɛɛlɛ na pe kre, e yi taa e pe.

33 Leesaala, na leesaala biile, mni ee pe mbe shɔ mbe pia sɛ na e ni kanyana kanhun kre nu hin?”

34 A Yesu na kna mbo, “E ti ni yo e pan mbe e loo. Mbe Nyiɛkpɔɔ kee nyanyofɛɛnlɛ, na kachimblɛ, na nyinafɛɛnlɛ tun mbe pe pan e pan, mbe e plɛ gbo gbo, mbe plɛ kan kanyana kumu kaan na, a ee plɛ frɔ e fni nyinyi nu, mbra pe kɔŋgɔ nini e chiɛ yire na mbra tro.

35 Kena mu yire Abel na, mu sɛ su Zechariah, Berekiah biblɔ ŋmba e tolɛɛlɛ na gbo sragbuɛnlɛɛ yire, na suminyuŋgo kre lalaa wre, na Nyiɛkpɔɔ kee nyanyofɛɛnlɛ mblɛ pra gbo finfin pre kro, pe hakɛɛ wa e na.

36 Kpra na ni yuu e pan, pre leele mblɛ krɛrɛ hakɛɛ wa e na.

37 Jerusalem leele, yire e Nyiɛkpɔɔ kee nyanyofɛɛnlɛ yii mu gbo gbo, mu leele mblɛ pe tun e pan waari na dnɛ ni. Nyjila kro nu ni chaa mbe e yii mbe le kuɛn jaara, imi na ŋgolo u biile leni u kuɛn jaara kre, a e je.

38 Ki tia mba e shɔ na.

39 Kpra na ni yuu e pan, yaa ni nya na fio, fɔna ŋga ble ee na yuu na, ‘Ŋmba u paan o Tafun mɛɛ nu wre wo yi dwamu kre bɔkɔ.’”^a