Ŋunu Pɔ Bijam Yomini
22
Ŋga Yesu nyu na to kre, a wra ndru mu pe gbun yomini fɔŋgɔ ka na mbo,
2 “Pan nyjeeri ŋunumu kre nyi na, ŋunu wa na chlɔ leŋge mna u pɔ ŋga. Bijam kre nu pra sro pe kama, mbe leele li.
3 Ŋunu wre na u sumifɛɛnlɛ tun, mbe pe mblɛ u kɛ wa mu yeeri pre kro yeeri, mbe pe paan li, a pra je, pe nsra pan.
4 A Ŋunu wre na ndru mna sumifɛɛnlɛ pre plɛ tun shiinwo na, mandiɛ nunu kre ni na chɔɔ mbo, ‘E le, e sɛ yo mblɛ ni kɛ wa mu yeeri kre pan na ni yira kro pe mu kɔ. Ni nui, na yurɛ mblɛ nu nyina nyi gbo, mu sro pe kama, kena pe paan bijam sro li.’
5 Mblɛ pra sɛ yeeri pre nsra ki wru mu pe keshian, wa na yiri mna sɛ u see, a wa na sɛ na u jafa lii,
6 a hamblɛ pre na sumifɛɛnlɛ pre yii mna pe gbun, mna pe fiŋge, mna pe gbo mu wa.
7 Ŋga kra pan ma kre, ŋunu wre krɔ na kun, kra tia wra sojae wɔ mu tun a pra sɛ linkufɛɛnlɛ pre kro gbo, mna kanhun le pe chia na mna ki sro.
8 Bawa ŋunu wre na kna mna yo u sumifɛɛnlɛ pre plɛ pan mbo, ‘Ni bijam sro kre pe mu kɔ, a mblɛ ni kɛ wa mu yeeri pre n pe cheche na pie ki li.
9 Kena e sɛ lete na, mblɛ ee nya kpan, e pe yeeri mbe pe pan mbe sro kre li.’
10 A sumifɛɛnlɛ pre na yili mna to lete na, mna mblɛ pra nya kro yeeri, mblɛ pra nyu, na pe mblɛ pe nsra nyu kro, a pra pan mu bijɔ plɔ katoo kre nyi.
11 Ŋga ŋunu wre na yiri mna pan mu fumblɔ pre le kre, wra fumblɔ pre wa nya na u n uyɛ kna na bijam lawee u paan.
12 Ŋga ŋunu wre na u nya ma kre, a wra kna mna yo u pan mbo, ‘Awe, mni a mu n bijam dodonyi le mu pan mna ŋga hin? Mu n muyɛ pe na bijam lawee mu paan.’ A blɔ wre na yire na ŋunu wre yiɛ le.
13 A ŋunu wre na kna mu yo u sumifɛɛnlɛ mblɛ praa wa mu yire na fumblɔ pre le kre pan mbo, ‘E u yii, e u kɛnyi na u jeelee pɔ, e sɛ u wa fimi na, wɔmu lawee kre nu.’ Bawa leele we na nyɛni mbra ŋgaala chirɛ.
14 Ŋgi na hin? Nyiɛkpɔɔ we tataara yeeri, la, chiɛri plɛ we wɔ.”
Tɔɔ Shɔɔ Kee
15 Ŋga Yesu nyu na to kre, Pharisee leele pre na yili wa, mna sɛ jina to, mbe paan u wie kebɛɛlɛ, mbe u ta mbe yii.
16 Pharisee leele pre na sɛ pe bitumblɔ wɔ mna ya ŋunu Herod lekpɔɛ plɛ na, mna pe tun Yesu pan. A pra pan mu Yesu da mbo, “Nyinafun, o chin na mu pe kprafun, a mna Nyiɛkpɔɔ kolo nyina na kpra ni. A mu kee ka ma ŋga lewo we yo ni. A mu n na lewo yiɛ fiɛ.
17 Kena mu jawala yi ŋgi kre kee ŋga ni hin? Ki fna o tɔɔ tɔ mbe ŋunu lopom Caesar ŋga ndee mni hin?”
18 La, Yesu na kolo sisaa ŋga praa chaa na u ni kre nya, a wra kna mbo, “Yire yiɛnyumufɛɛnlɛ, mni a e na ni pini na le ŋga hin?
19 E ni ŋga swa nyjɛ ni e tɔɔ toni yire ka.” A pra pan na swa bie ka ni mu u ŋga.
20 A Yesu na kna mna pe wie mbo, “Ŋmbi kumu na u mɛɛ yi swa ŋga na ŋga hin?”
21 A pra kna mbo, “Ŋunu lopom Caesar wi.”
A Yesu na kna mbo, “Kena yirɛ nyjɛ yi pe Caesar wee kre, e u ŋga u yirɛ. A nyjɛ yi pe Nyiɛkpɔɔ wee kre, e Nyiɛkpɔɔ ŋga yi yi.”
22 Ŋga pra Yesu kee kre loo kre, kra pe pe kawako ni, a pra u ti wa mna sɛ.
Kunnyiɛ Kee
23 Ki ble kre lam Sadducee leele mblɛ pe yuu na, na ndro ku wa jaa nyi na kre, na pan mu Yesu wie mbo,
24 “Nyinafun, Moses na yo na, na lewo leŋge, a u n shia se chlɔ wre na, a waa ku mu chlɔ wre ti kre, ki fna mbe u chunu, ndee u nyjɔ u lekuchɔ wre wru mbe leŋge, mbe se, mbe gboo wre mɛɛ wa fun.”
25 A pra kna mbo, “Kena nyjɔɔlɔ na chinlɛ kɔɔnashin plɛ praa wa mu tni mna. Jlewo wre na leŋge, a u nsra se chlɔ wre na, mna ku mu u ti u chunu pan.
26 Pan kra shiinwo wre nya na, hali mu sɛ su kɔɔnashinwo wre na.
27 Kre kɔkro kre, chlɔ wre na ku.
28 Kena kunnyiɛ ble kre, leele kɔɔnashin mblɛ, ŋmbi haa chɔ wi chlɔ wre hin? Na pe kro u leŋge mu fni.”
29 A Yesu na kna mbo, “Na e n kee kre pe nyunɔ mu tɛɛ kre nɔɔloo, a e n Nyiɛkpɔɔ jaŋga kre nɔɔ chin, kre ki tia e na jawa ma kre,
30 Ŋgi na hin? Kunnyiɛ kɔkro kre, ndro wa leŋge. Ndro kro we pe na nyjeeri bituŋu wi.
31 A kunnyiɛ kre kee ŋga Nyiɛkpɔɔ na yire u kee nyanyofɛɛnlɛ na mu yo e pan kre, e n ki tɔɔnri tun ree?”
32 Mbo, “Mi wi Abraham, Isaac, na Jacob Nyiɛkpɔɔ wre.”a U n pe gboolo Nyiɛkpɔɔ, la, ŋmaafɛɛnlɛ Nyiɛkpɔɔ wi.
33 Ŋga lenɛɛrɛ pre na kee kre loo ma kre, kra pe pe kawako ni.
Koroo Yi Mbra Ŋga Ki Yiɛklu
34 La, ŋga Pharisee leele pre na loo na Yesu Sadducee leele pre nyu gbo kre, pre na ndru mna sɛ fni.
35 A pe mbra twanfun wa na pan mna Yesu wie kee ka mna u pe mu le mbo,
36 “Nyinafun, mbra yire nu, ŋgi kee ki shian titi hin?”
37 A Yesu na kna mbo, “Ki fna mbe mu mu Tafun Nyiɛkpɔɔ kori na mu loloŋgo kro ni, na mu faŋga kro ni, na mu jawala kro ni.b
38 Kre mbra ŋga kee ki shian titi.
39 A ŋga ki taa kre, pan ki nyi to na jlewo kre yi. Ki fna mu mu ŋmbrɔ kori, imi na mu muyɛ kori kre.”c
40 A Yesu na kna mna yo pe pan mbo, “Yire mbra shiin nyjɛ ni e nyina ŋga, yire yi Nyiɛkpɔɔ kee nyanyofɛɛnlɛ pre mbra yire kro ndra.”
David Nana Na David Tafun
41 Pharisee leele pre plɛ na fni, a Yesu na pe wie mbo,
42 “Mni sembremu e Kristo wre kee jawa hin? A ndro ŋmbi sele ndro wi hin?”
A pra kna mbo, “David nana wi.”
43 A Yesu na kna mu pe wie mbo, “Ŋgi ki tia Kpra Ŋumu wre na tia David na u yeeri u Tafun hin? David wre titi na yo mbo,
44 ‘O Tafun, Nyiɛkpɔɔ wre,
na yo ni Tafun pan na,
tni ni kalie,
mu sɛ su nyjila ŋga mbe ti
mu mu jeelee taa mu loŋgoolo na.’d