Yesu Na Le Jerusalem Na
21
Ŋga Yesu na u twanfɛɛnlɛ pre naa mbra Jerusalem na kre, pra le chia ka na praa ki yeeri Bethphage, a kii wa Olive nyua kre na. Bawa Yesu na u twanfɛɛnlɛ pre shiin wɔ mu tun mbo,
2 “E sɛ chia ŋga kii wa e yiɛ ŋga na. Na e le to, ee nya na pe bubnɔ pɔ tiŋge ka na, a u pɔɔ wa mu yire u jaara. E pe saan e pan na pe ni e ni ŋga.
3 Na ndro waa e wie kre, e yo na o Tafun u pe chaa, we ti mbe e pan na pe ni.”
4 Kre kee ŋga na pe mna tia Nyiɛkpɔɔ kee nyanyofun wre kee ŋga wra yo mu tɛɛ kre na pe yɛŋgɛ mbo,
5 “Yo Zion chia leele pan na,
‘E le, e ŋunu paan e pan,
a u nyjii kama,
a uu wa mu tni bubnɔ pɔ na.’”a
6 A twanfɛɛnlɛ pre na sɛ kee ŋga Yesu na yo pe sɛ pe kre pe.
7 Pra sɛ pan na bubnɔ wre na u pɔ wre ni, mna pe dodonyi wɔ mu taa taa pe na, a Yesu na tni.
8 A lenɛɛrɛ pre plɛ naa pe dodonyi na pe yonyi chaan kolo kre na, a pe plɛ naa tinyi wrɛ kuari na chaan u yiɛ.
9 A leele mblɛ pra yiɛ klu u pan kre, na mblɛ pra u kro tɔ kre kro naa gble leni na yuu mbo,
“Hosanna! David nana,
ŋmba u paan o kro Tafun wre mɛɛ na wre wo yi dwamu.
E Nyiɛkpɔɔ ŋmba uu wa nyjeeri wre
ŋga mɛɛ.”
10 Ŋga Yesu na le Jerusalem na kre, chia kre kro na yiri mu paari, pra peyɛ wie mbo, “A ndro ŋmbi wi ŋmba hin?”
11 A lenɛɛrɛ pre naa yuu mbo, “Nyiɛkpɔɔ keenyanyofun Yesu wre, ŋmba u yiri Nazareth chia ŋga kii wa Galilee tra nu kre, wre wi kre.”
Yesu Leele Ni Mu Yili Suminyuŋgo
12 A Yesu na sɛ le Nyiɛkpɔɔ Suminyuŋgo wa, mna mblɛ praa wa wa na jafa lii pre kro ni, mna mblɛ praa swa chinɛ, na mblɛ praa katoo kotulo prɛ pre yirɛ kna mu juule.
13 Mna kna mna yo pe pan mbo, “Pe ki nyunɔ mu tɛɛ na,
‘Pie ni katoo kre yeeri nyiɛtali haa.b
A yire ki wru mu pe juuro lawee.’”c
14 Bawa fuunlo na mblɛ pe fuuru kro na pan u pan suminyuŋgo wa, a wra pe tra.
15 Ŋga Judah srawɔfɛɛnlɛ loplombo pre na pe mbra nyinafɛɛnlɛ pre na kawako kee yire Yesu na pe kre nya, mna loo na biile gble suminyuŋgo wa na yuu na “E David nana wre ŋga mɛɛ” kre, pe krɔ na kun na u ni.
16 A pra tin mna pan Yesu pan mbo, “Le, mu loo kee nyjɛ biile mblɛ yuu ŋgaa?”
A Yesu na kna mu yo pe pan mbo, “Ɛnhɛɛn, e n da mu ki kee ŋga pe nyunɔ mu tɛɛ kre tɔɔnri tun ra?” Mbo,
“Hali biile fiɛn fiɛn kuraa
we u ŋga mɛɛ.”d
17 Ŋga kra pan ma kre, wra yili mu pe ti wa mna sɛ ŋunu Bethany na.
Yesu Na Tiŋge Sun
18 Ŋga nyiŋge na se bnimi kre, Yesu na ndru na shie Jerusalem na bnimi nyu kre na. Ki nyjila kre na klo u ta.
19 A wra kna mna fig tiŋge ka nya kolo mbɛɛ na, mna flo mu da ki jaara, ŋga wra da wa kre, u nsra sɛŋgɛ nya ki na, na wrɛ bribri yi tiŋge kre na. A Yesu na kna mu yo tiŋge kre pan mbo, “Ŋu waa sɛŋgɛ sɛ na fio.” Titɛɛ kre nu to, a tiŋge kre na yua mu nyaara.
20 Ŋga u twanfɛɛnlɛ pre na kre kee ŋga nya ma kre, kra pe pe kawako ni. A pra kna na wie mbo, “Mni fig tiŋge ŋga pe mu yua titɛɛ ŋga nu ma hin?”
21 A Yesu na kna mu yo pe pan mbo, “Kpra na ni yuu e pan na, na e shɔnli, a e n e jawala pe shiin shiin, kee ŋga ni pe fig tiŋge ŋga na ŋga chiin ma ee jaa pe, hali na e yo nyua ŋga pan na, kɔ mu sɛ to epo nu kuraa kre, kie kɔ mbe sɛ to ki nu.
22 A kee ŋga ee wie nyiɛtalaa nu kpan, ee ki ta, na e shɔnli wala.”
Yesu Na Srawɔfɛɛnlɛ Loplombo Pre
23 Ŋga Yesu na yiri wa kre, wra sɛ le pe Suminyuŋgo wa, na leele pre nyina, a Judah srawɔfɛɛnlɛ loplombo pre na pe loplombo na pan mu u wie mbo, “Ŋmbi u mu ŋga jaŋga a mna yire kee nyjɛ pini hin?”
24 A Yesu na kna mbo, “Mbe e wie kee nunu ka. Na e ja mu ki nyu wɔ, mbe e nyina mna ni ni jaŋga kre ta.
25 E ti ni e wie. Sena haa John ndra jee kre jaŋga na yiri hin? Nyiɛkpɔɔ pan kra yiri ndee lewo pan hin?”
A pra kna na kakra lii na peyɛ ni mbo, “Na o yo na nyjeeri kra yiri kre, we yo o pan na, a ŋgi ki tia e nsra u shɔnli hin?
26 A waa sro mbe yo na lewo pan kra yiri, o fiɛ lenɛɛrɛ pre na. Ŋgi na hin? Pe kro chin na Nyiɛkpɔɔ kee nyanyofun na wi John.”
27 A pra kna mna yo Yesu pan mbo, “O n chin.” A Yesu na kna mbo, “Kena mba e nyina mna ni ni jaŋga kre ta.”
Nyjiimu Na Ndikana
28 A Yesu na kna mu pe wie mbo, “Mni e kee ŋga jawa hin? Blɔ wa naa bibilɛ shiin ni. Ki ble ka a wra yiri mna sɛ lopom wre da mbo, ‘Ni biblɔ, sɛ fali ni see wa aŋga.’
29 A pɔ wre na kna mu yo u lɛ pan mbo, ‘Ndoo, mba sɛ.’ La, wra kɔ mu u jawala chinɛ mna sɛ see kre nu.
30 A pe lɛ wre na sɛ shiin wo wre pan mna sɛ kee nunu kre chɔɔ yo u pan, a wre na kna mbo, ‘Ndoo, mbe sɛ.’ La, u nsra kɔ mu sɛ.
31 Kena biile mblɛ shiin ŋmbi haa wra kee ŋga u lɛ chaa pe hin?”
A pra kna mbo, “Lopom wre wi.” A Yesu na kna mna yo pe pan mbo, “Kpra na ni yuu e pan na, tɔɔ shɔfɛɛnlɛ na tiɛrifɛɛnlɛ pre, we le Nyiɛkpɔɔ ŋunumu kre nu mbe e ti.
32 Ŋgi na hin? John ndrajefun wre na pan mu e nyina kpra kolo kre, a e nsra u shɔnli. La, tɔɔ shɔfɛɛnlɛ pre na tiɛrifɛɛnlɛ pre na u shɔnli. E kpra kre nya, a e je, e n e jawala chinɛ mu shɔnli.”
Falifɛɛnlɛ Sisaala Pre Yomini
33 Bawa Yesu na kna mu yo pe pan mbo, “E ndie tɛɛ e yomini ŋga loo. Falifun wa wra u see tɛɛ, mna ki le kagbla mu fni, mna wee kun ki lam, ŋga nu we na tre sɛnyi simi yuwi. Mna nyuŋgo sin gedeŋge see kre lam, mna ki wru mu le tnumutunfɛɛnlɛ plɛ kɛɛ, mna sɛ waŋgra ka nu.
34 Ŋga sro na le kre, a blɔ wre na yire mna wra sɛ kre, mna u sumifɛɛnlɛ plɛ tun u see kre lefɛɛnlɛ pre pan, mbe pe sɛ sro shɔ mbe paan u ŋga.
35 Ŋga pra sɛ kre, see kre lefɛɛnlɛ pre na sumifɛɛnlɛ pre yii mna nunu frɔ, mna nunu gbo, mna nunu waari na dnɛ ni.
36 A seefun wre na ndru mna u sumifɛɛnlɛ pre plɛ wɔ mu tun shiinwo na, pre na nɛɛ mu wɛ jle wolo pre na. A pra pe pe imi pra jle wolo pre pe kre chɔɔ.
37 Ŋga kra pan ma kre, a wra wre titi pɔ wɔ mu tun pe pan. Wraa jawa na pie u pɔ wre shɔ mbe li.
38 Ŋga pra pɔ wre nya na u paan kre, a pra kna mna yo peyɛ pan mbo, ‘Wolo, pɔ ŋmba we u lɛ wre krɔ li u paan kre, e pan mbe o u gbo. Kena krɔ yirɛ yire pe o wee.’
39 A pra pɔ wre yii mna u tini mu yili see kre lam, mna sɛ u gbo.
40 Kena na seefun wre waa pan, mni e jawa na we pe pe hin?”
41 A leele pre na kna mna yo Yesu pan mbo, “Na seefun wre titi waa pan kre, pre sisampefɛɛnlɛ pre nyini, we pe luuro pre sro peii, mbe see kre wru mbe le lefumblɔ kɛɛ, mblɛ pie see kre le, na ki sro pan, mbe pe u ŋga nyjɛ yi fna u ta.”
42 A Yesu na kna mu yo pe pan mbo, “E n kee kre pe nyunɔ mu tɛɛ kre tɔɔnri mu nya tun ree?
‘Dnɛ ŋga nyuŋgo sinfɛɛnlɛ pre na je
na ki n nyu kre,
kre ki kɔ mu pe nyuŋgo kre ndra.
O Tafun Nyiɛkpɔɔ wre kepele yi nyjɛ kro,
a yi pe kawako ni o pan.’e
43 Kena e ti ni yo e pan mbe e loo, Nyiɛkpɔɔ ŋunumu kre, pie ki shɔ e pan mbe sɛ waŋgra ŋga pie ki le mbe tnu pan ki nu kre ŋga ki yi.
44 Kena ŋmba we gbro dnɛ kre na mbe to kre we pile. A ŋmba na dnɛ kre we to kpan, kie u brɛri.”