Kagbla Lefɛɛnlɛ Sisaala Pre
12
A Yesu na yire wa mna paara pe pan yomɛɛlɛ nu mbo, “Ndro wa wra tre bribri see ka pe, mna ki le kagbla mu fni, mna wee kun ki lam, ŋga nu we na tresɛnyi simi yuwi, mna nyuŋgo gedeŋge ka sin ki lalaa, mna pie na yire mbra see kre sri, mna ki wru mu le falifɛɛnlɛ plɛ kɛɛ, a praa ki le, a wra sɛ chia ka na.
2 Ŋga yirɛ kun nyjila na da kre, a wra yire wa mna u sumifun wɔ mu tun falifɛɛnlɛ pre pan, na u sɛ kagbla kre sro shɔ mbe paan u ŋga.
3 A falifɛɛnlɛ pre na u yii mna u gbun, mna u ni, a wra ndru mu sɛ kɛ waara.
4 A wra ndru mna u sumifɛɛnlɛ pre shiinwo wɔ mu tun pe pan na, a pra wre yii mu u gbun mu u ndra vru, mna cheu wɔ u na.
5 A wra ndru mna fɔŋgɔ tun, a pra wre yii mu gbo. Pan pra tataara mblɛ wra kɔ mu tun pre kɔkro kre plɛ frɔ, mna plɛ gbo.
6 Na ki kro nunu wa tɛ. U pɔ nunu chom ŋmba u kori, wre wra tun kro pe pan mbo, ‘Ni pɔ wi ŋmba, pie wre nyifɛɛrɛ pe.’
7 Ŋga falifɛɛnlɛ pre na u nya kre, a pra kna mu yo peyɛ pan mbo, ‘Krɔlifun wre u paan kre. E ti mbe o u gbo. Kena krɔyirɛ yire pe o wee.’
8 A pra u yii mna u gbo, mna u fulo mu yili kagbla kre nu, mna sɛ u wa.
9 Kena na kagblafun wre waa pan, ŋgi we falifɛɛnlɛ mblɛ pe hin? We pan mbe pe gbo na, mbe tre see kre wru mbe le lefumblɔ kɛɛ.
10 E n da mu Nyiɛkpɔɔ kee kre pe nyunɔ mu tɛɛ kre tɔɔnri tun ra?
‘Dnɛ ŋga nyuŋgo sinfɛɛnlɛ pre na je kre,
ki kɔ mu pe nyuŋgo kre ndra.
11 O Tafun Nyiɛkpɔɔ wre kepele yi nyjɛ kro,
a yi pe kawako ni o yiɛ na.’”a
12 Bawa Yesu loŋgoolo pre plɛ naa u chaa mbe yii, yaka ma kra tia, pra chin na yomini kre u gbun kre, na pre na u nyi. A na praa fiɛ lenɛɛrɛ pre na. Kra tia pra sɛ mu u ti.
Tɔɔ Shɔɔ Kawiere
13 A pra Pharisee leele pre, na Herod leele pre plɛ tun mbe pe sɛ u nyu cha.
14 Ŋga pra pan kre, a pra yo u pan mbo, “Nyinafun, o chin na mu pe kprafun, a mu n na yaka le mbe yili ndro pan, a mna ndro yiɛ le, a mu Nyiɛkpɔɔ kee kre nyina kpra ni. Kena kii wa na kolo ni na oo na tɔɔ woni, mbra Caesar, waŋgra lopom wre kaan, ndee mni hin?
15 O na yi woni, ndee waa na yi woni hin?”
Ŋga wra pe yiɛnyumu kee kre nya ma kre, a wra kna mna yo pe pan mbo, “Mni a e na ni pini na le hin? E pan na swa kre ka ni mbe ni le.”
16 A pra pan na ka ni. A wra kna mu pe wie mbo, “Ŋmbi nyunɔmu na u tnɔmu yi ki na ŋga hin?”
A pra kna mbo, “Caesar wee yi.”
17 A Yesu na kna mu yo pe pan mbo, “Kena e Caesar wee wru e Caesar ŋga, e Nyiɛkpɔɔ wee wru e Nyiɛkpɔɔ ŋga.” Ŋga wra yo ma kre, u kala na pe kawako ni pe pan.
Kunnyiɛ Kawiere
18 A Sadducee leele mblɛ praa yuu na kunnyiɛ n wa kre na pan mna Yesu wie mbo,
19 “Nyinafun, Moses nyjila kre, wra nyunɔ mu o ŋga na, na wa nyjɔ, ndee u chunu ku mu u chɔ ti, a u n se chlɔ wre na kre, u nyjɔ, ndee u chunu we jaa u leŋge, mbe biile se mbe u ŋga.
20 A lobiile kɔɔnashin plɛ naa wa mu tni, a pe lopom wre na leŋge, u nsra se chlɔ wre na mna ku mu u ti.
21 A ŋmba wra taa shiin wre na chlɔ wre wru mna leŋge, a wre nsra se u na mna ku. A ŋmba wra taa taarɛ wre na sɛ chlɔ wre leŋge, kala nunu kre na yi na.
22 Leele kɔɔnashin pre kro na chlɔ wre leŋge mu fni kro, a wa nsra se u na. Pe kro kumu kɔkro kre, chlɔ wre titi na ku na.
23 Kena na pe kro waa nyi kunnyiɛ kre nu, pe ŋmbihaa chɔ wi chlɔ wre hin? Na leele kɔɔnashin pre kro u leŋge mu fni?”
24 A Yesu na kna mu yo pe pan mbo, “Na e n Nyiɛkpɔɔ jaŋga na u kee kre pe nyunɔ kre chin, kre ki tia e punu kre.
25 Na pe ta mu ku mu nyi mu kɔ, pia leŋge na, wrunkɛɛ na leŋgeere n wa bawa. Pe kro we pe na nyjeeri bitumblɔ lɛ.
26 Kunnyiɛ kee kre, e n ki tɔɔnri Moses hlɛ kre nu tun ra? Imi na Nyiɛkpɔɔ na paara Moses pan kanhun muŋgo kre nu mbo,
‘Mi wi Abraham,
na Isaac,
na Jacob Nyiɛkpɔɔ wre.’b
27 U n pe gboolo Nyiɛkpɔɔ, la, ŋmaafɛɛnlɛ Nyiɛkpɔɔ wi. Yire e punu kee kre na tataara.”
Koroo Yi Mbra Ŋga Ki Yiɛklu
28 Ŋga nyinafɛɛnlɛ pre nunu na pan mna nya na pe kakra lii, a Yesu na kee yire nyu wɔ chichie kre, a wra kna mu Yesu wie mbo, “Mbra yire, ŋgi haa kee ki shian titi hin?”
29 A Yesu na kna mu yo u pan, mbo, “Ŋga ki yiɛklu mbra yire nu yi,
‘Israel, e loo!
O Tafun Nyiɛkpɔɔ wre,
Tafun nunu wi.
30 Kena mu Tafun Nyiɛkpɔɔ wre kori mu loloŋgo nu,
na mu ŋumu kro ni,
na mu jawala kro ni,
na mu faŋga kro ni.’c
31 A ŋga ki taa shiinwo yi,
‘Mu ŋmbrɔ kori na ŋu titi wi.’d
Mbra ka n wa na, mu wɛ nyjɛ na.”
32 A nyinafun wre na kna mu yo Yesu pan mbo, “Nyinafun, mu kpra yo na Nyiɛkpɔɔ, uu nunu. A wa n wa na, na wre chiin bɔkɔ,
33 mbe mu u kori na mu loloŋgo kro ni, na mu nɔɔloo kro ni, na mu faŋga kro ni, mbe mu ŋmbrɔ kori na ŋu titi wi. Kre ki nyu mu wɛ yurɔ poŋgo sroo sra, na Nyiɛkpɔɔ srayira kro na.”
34 Ŋga Yesu na nya na u kee kre nyu wɔ kachindɛ ni kre, a wra kna mu yo u pan mbo, “Ŋu na Nyiɛkpɔɔ ŋunumu kre haa n le.” Mu yire kre na, ndro nsra ja mna Yesu wie kee ka wa na.
David Nana, Na David Tafun
35 Ŋga Yesu naa nyina Suminyuŋgo kre, bawa wra pe wie mbo, “Ŋgi ki tia a nyinafɛɛnlɛ pre na yuu na Kristo wre, David nana wi hin?
36 A David wre titi na ki yo Kpra Ŋumu wre jaŋga ni fa na,
‘O Tafun Nyiɛkpɔɔ wre na yo ni Tafun pan na,
tni ni kalie,
mu sɛ su nyjila ŋga nu
mbe ti mu mu jeelee taa mu loŋgoolo na.’e
37 David wre titi na Kristo wre yeeri, ‘Ni Tafun.’ Mni ki kɔ mu pe a u pan mu u ta nana hin?”
Bawa lenɛɛrɛ na ndie tɛɛ mna u kee kre loo na yɛshɔɔrɔ ni.
Nyinafɛɛnlɛ Pre Jaaraa
38 Ŋga wraa pe nyina kre, wra yo pe pan mbo, “E eyɛ dɔɔ ta na nyinafɛɛnlɛ mblɛ pe dodonyi tutnɔnyi le na kila chaa, na lete shaaraa,
39 na loplombo tnihɛɛ chaa pe fninyinyi, na pe lihɛɛ nu.
40 Pre pe lekuchiɛlɛ yirɛ shio pe pan, mbe tuwi mbe nyiɛtali tutnɔŋɔ leele yiɛ na. Pre pie Nyiɛkpɔɔ kanyana kre nya kpɔɔ.”
Lekuchɔ Shianfun Wre U Swa Kro Le
41 A Yesu na sɛ tni pe swa leyira kre yiɛ, na pe le a praa paan na pe swa leni. Swafɛɛnlɛ tataara na pan mu swɛ badɛnyi le.
The Widow’s offering (Mark 12:41-44)
43 A Yesu na u twanfɛɛnlɛ pre yeeri a pra pan. A wra yo pe pan mbo, “Kpra na ni yuu e pan na lekuchɔ shianfun ŋmba pan mu swa le nɛɛrɛ mu wɛ leele mblɛ na kro.
44 Ŋgi na hin? Mblɛ pe pan mu swa le ŋga krɛrɛ, pe swɛ nɛɛrɛ nyjɛ pe ta yire, yi fiɛn fiɛn yɛ ni pe pan, a chlɔ ŋmba rɛ, u shian kro nu, swa ŋga na u kaan kro, kre u pan mu le kre.”