Lekuchɔ Shianfun Wre
21
Yesu naa wa Suminyuŋgo wa, mna yiɛ yire mna swafɛɛnlɛ nya, pra paan na swa leni swa leyira kre nu.
Luke 21:1-28
2 Bawa wra lekuchɔ shianfun wa nya, a wra pan mna swa damba le.
3 A Yesu na kna mbo, “Kpra na ni yuu e pan, lekuchɔ shianfun ŋmba swa le a ki wɛ leele mblɛ kro wee na.
4 Ŋgi na hin? Leele mblɛ kro, pe swɛ nyjɛ pe ta mu tro yire fiɛn fiɛn yɛ ni pe pan. La, chlɔ ŋmba rɛ, u shian kro nu, swa ŋga na u kaan kro u pan mu le kre.”
Sumindoo Klaa Kee Nyanyo Haa
5 Kre nyjila kre Yesu sumifɛɛnlɛ pre plɛ naa Suminyuŋgo kre kee yuu, imi na pra ki san na dnɛ, na yirɛ chichiele nyjɛ praa Nyiɛkpɔɔ kaan yire ni kre.
6 A Yesu na kna mbo, “Yirɛ nyjɛ e nyaa ŋga, nyjila ka paan, pia dnɛ ka ti ki ŋmbrɔ na, pie yi juari peii.”
Kee Nyjɛ Yie Pe Mbe Waŋgra Klaa Kre Chiin Da
7 A u twanfɛɛnlɛ pre na u wie mbo, “Nyinafun, nyjila ŋgi nu yire kee nyjɛ we pe hin? A na yire kee nyjɛ paan mbe pe, kawako kee nyji oo nya mbe chin na nyjila kre da hin?”
8 A wra kna mbo, “E eyɛ dɔɔta, mbe ndro waa shia e fana. Lenɛɛrɛ we pan na ni mɛɛ ni mbra yuu mbo, ‘Mi wi Kristo wre.’ Na e waa ki nya ma, kena e chin na nyjila kre da. La yaa shia taa pe na.
9 A na e waa na ŋunɛ, na kakrɔɛ kee ndru kre, yaa ti mbe fiɛrɛ e yii. Ki fna mbe yire kee nyjɛ klu mbe pan tun, nde na nyjila kre n da tun.”
Ŋunɛ Na Tra Seeree
10 A Yesu na kna mna yo pe pan mbo, “Waŋgra na waŋgra we to peyɛ na, mbe ŋunu na ŋunu to peyɛ na.
11 Tra we na seeri lawee lawee nu kpɔɔ. A klo we to, mbe yira pan, mbe fiɛrɛ na kawako kee na pini nyjeeri.
Prara
12 La, mi ndra na pie e yii mbe yire kee nyjɛ chiin pe, pie e fiŋge, mbe e le fninyinyi loplombo kɛɛ, mbe pe e le nyuŋgo. A pie sɛ na e ni ŋulo, na abani loplombo yiɛ.
13 Kre nyjila kre nu ee jaa ni dansiɛrɛ li pe yiɛ na.
Lewo Shɔɔ
14 Kena yaa kluu tni mbra yi kee jawa, mbra kawa na kee nyjɛ ee yo ni.
15 Ŋgi na hin? Mbe e ŋga nyu, na kachindɛ, mbe kee ŋga ee yo kre, e loŋgoolo wa ja mbe e kɔ ki na.
16 E sefɛɛnlɛ kuraa we e wɔ mbe ŋga. E nyjɔɔlɔ na e chinlɛ, na e sele leele, na e nɔɔlɔ kro we e wɔ mbe ŋga, mbe pe e plɛ gbo.
17 Mi ndra na, leele kro we e pra.
18 La, e wa ndra nyjuro ka wa fun.
19 Frɔ ŋga ee ta na, ee ŋmaa ta.
Jerusalem Klaa
20 La, na e waa nya na ŋunɔwifɛɛnlɛ Jerusalem kun mu le lalaa kre, kena e chin na ki kla nyjila dani.
21 Kena e ti mbe mblɛ pee wa Judea na pre na feni mbra nyuɛ ndru. Mbe mblɛ pee wa Jerusalem na pre na feni. A mblɛ pee wa fimi na pre waa shia le kakpɔɔ kre na.
22 Ŋgi na hin? Yire ble yire nu Nyiɛkpɔɔ we pe ndie tini kpɔɔ. Yire yie pan mbe ti mbe kee yire pe nyunɔ mu tɛɛ yire pe kpra.
23 Yire ble yire nu, siirefɛɛnlɛ na mblɛ biile pe ŋgɔɔri, pe atɛ. Ŋgi na hin? Kanyana kpɔɔ we pan tra, a Nyiɛkpɔɔ krɔ we kun kpɔɔ na leele pre ni.
24 Pie plɛ gbo na brɔfiɛn yiɛshiin ni, a pie plɛ yii mbe sɛ na pe ni waŋgrɛ nu. A leele mblɛ pe n Nyiɛkpɔɔ chin kre we Jerusalem kla peii, mbe sɛ su na pe nyjila we tro.
Lewo Biblɔ Wre Panhaa
25-26 Yire ble yire nu, kawako kee we pe yila, na yeŋge, na wɔɛlɛɛ na. Ki ble kre kanyana kpɔɔ we pan tra. Lewo wa chin imi we uyɛ pe. Epo we na kani, mbe fiɛrɛ leele yii mbe pra jirei. Ŋgi na hin? Jaŋga ŋga kii wa nyjeeri kro, Nyiɛkpɔɔ we ki nyaara.
27 Kre nu pie Lewo Biblɔ wre nya, na u paan tloe nu, na yɛnyiŋge kpɔɔ ni.
28 Na yire kaalɛɛ nyjɛ waa na pini kre, e yiri e yire, e na le nyjeeri, na e shɔ nyjila kre da.”
Fig Tiŋge Yomini
29 A Yesu na u twanfɛɛnlɛ pre gbun yomini ka mbo, “E na tinyi le.
Luke 21:29-38
30 Na e waa nya na yi wrɛ funi kre, e chin na ndram wrɛmu nyjila da.
31 Pan chɔɔ, na e waa nya na yire kaalɛɛ nyjɛ waa na pini kre, kena e chin na Nyiɛkpɔɔ ŋunumu kre da mna.
32 Kpra na ni yuu e pan, aŋga leele mblɛ wa kɔ fio, fɔna yire kaalɛɛ nyjɛ pe tun.
33 Nyjeeri na tra we kla, la, ni nyu kayooro we pe nyjila kro nu.
Jaaraa
34 La, e eyɛ dɔɔta, mbe yaa na eyɛ lii kpɔɔ, mbra gboo mbra tuuri. A yaa ti mbe waŋgra ŋga yirɛ keshiɛn wɛ e na. Na kre ma ble kre we paan e fo imi na pɛlɛ yurɔ foni na u yiri kre.
35 Ŋgi na hin? Leele mblɛ pee wa tra yiɛ na kro, ble yire we pan mbe pe fo.
36 La, e eyɛ shie nyjila kro nu, e na nyiɛtali na ee faŋga ta mbe eyɛ shɔ mbe yili yire kaalɛɛ nyjɛ yie pe yire nu, mbe jaa yire Lewo Biblɔ wre yiɛ.”