Yesu Suminyuŋgo Kee Nya Mu Yo
24
Ŋga Yesu na yili Suminyuŋgo kre nu na shie kre, u twanfɛɛnlɛ pre na pan u jaara, mna kna na u nyina Suminyuŋgo kre.
2 A Yesu na kna mna yo pe pan mbo, “E yirɛ nyjɛ krɛrɛ nyaa? Kpra na ni yuu e pan na, pie yi krɛrɛ juari mbe wo, dnɛ ka n wa mbe pe ki ti ki ŋmbrɔ na.”
Kristo Paan Shiin Wo
3 Yesu na yiri wa mna sɛ tni Olive nyua kre na, bawa u twanfɛɛnlɛ pre na pan u jaara, mna u wie brɛmm mbo, “Jande, o nyina nyjila ŋga nu yire kee nyjɛ krɛrɛ we pan, na kee nyjɛ yie pe mu paan shiin wo kre nu. A na waŋgra kre waa na paan mbe kɔ kre, kee nyji yie pe hin?”
4 A Yesu na kna mbo, “E le, e eyɛ dɔɔta mbe ndro waashia e fana.
5 Ŋgi na hin? Leele tataara we pan na ni mɛɛ ni, mbra yuu na, ‘Mi wi Kristo wre.’ A pie leele tataara wa mbe fun.
6 Ee nya na waŋgra na waŋgra, na chia na chia tuni, mbra kakrɔɛ kee ndru, a la, yaa shia fiɛ. Ŋgi na hin? Yire kee nyjɛ krɛrɛ fna mbe pan. La, na nyjila kre n ta mu da tun.
7-8 Waŋgra we yiri mbe wi na waŋgra ni, mbe ŋunu, na ŋunu to peyɛ na, mbe klo to waŋgrɛ nu, mbe tra na seeri lawee lawee nu. Na chlɔ yo we se, imi na lɛɛ klu na u yaa kre, pan yire kee nyjɛ we yiɛ klu mbe pe.
Lewo Wɔŋgaa
9 Yire ble yire nu, pie e yii mbe leele ŋga, mbe pe e fiŋge, mbe e gbo. Mi ndra na, waŋgra leele kro we e pra.
10 Kre nyjila kre nu, tataara we laa pe shɔnlie kro, mbe pe ŋmbilɛ wɔ mbe ŋga, mbe peyɛ pra.
11 Kre nyjila kre, kafinɛ Nyiɛkpɔɔ kee nyanyofɛɛnlɛ tataara we yiri, mbe lenɛɛrɛ wa mbe fun.
12 Kre nyjila kre, sisam we nɛɛ, a lewo koroo wa jaa sna.
13 La, ŋmba we jaa frɔ ta kee nyjɛ krɛrɛ nu kre, we ŋmaa ta.
14 A Nyjeeri ŋunumu kre ketaan kre we kpali mbe tro waŋgra kro nu, mbe ki pe dansiɛrɛ, mbe waŋgra nyukɔɔrɔ ble kre chiin da.
Afuŋgo Kee Ŋga Ki Waŋgra Jee
15 Kena na e waa afuŋgo kee ŋga ki lawee jee kre nya cheche lawee kre nu, ŋga kee Nyiɛkpɔɔ kee nyanyofun Daniel na yo mu tɛɛ kre, kena e ti mbe tɔɔnrifun wre kee kre nɔɔ loo.a
16 Mbe e ti mblɛ pee wa Judea na pre na feni mbra nyua ndru.
17 A ŋmba uu wa nyuŋgo ndra na kre, waashia tii mbe le katoo lam mbe yaka wru.
18 A ŋmba uu wa see kre, waa shia ndru mbe pan katoo mbe u yoŋgo bali.
19 Yire ble yire nu chiɛlɛ siirefɛɛnlɛ, na mblɛ biile pee fiɛnfiɛn kre, pe atɛ.
Ble Shelee Kre
20 Kena e nyiɛtali mbe kre ble kre waashia pan weere nyjila, na Wuuble nu.
21 Yaka ndra na ma, ki ble kre we pe kanyana ble kpɔɔ, mu yire waŋgra gbeele nyjila, ki ka n da mu pan tun, a ka waa pan ma na fio.
22 Nyiɛkpɔɔ we ka kun kanyana ble yire na. Na u n ka kun yi na kre, wa ndro nunu chom ta. Ki tia u yila mblɛ u wɔ pre na, mbe ka kun ble yire na.
Lewo Biblɔ Wre Panhaa
23 Kena na ndro waa yo e pan mbo, ‘E le, Kristo wre wi kre, ndee Kristo wre wi wa kre,’ yaashia ufun shɔ mbe li.
24 Ŋgi na hin? Plɛ we kalafnɛ na pre lɛ Kristo wre, a kafinɛ Nyiɛkpɔɔ keenyanyofɛɛnlɛ we yiri yire ble yire nu, mbe kebadɛnyi, na kawako kee pe, mbe yire yi na mbe lenɛɛrɛ wa mbe fun. Hali mblɛ Nyiɛkpɔɔ wre wɔ pre kuraa, na pie ja, pie pe fana.
25 E loo, kre na ni klu na ki yuu e pan mbe nyjila kre chiin da.
26 Kena na pe waa yo e pan na, e le, uu wa tablɔ tra kre nu kre, yaa shia yili mbe sɛ wa. Ndee na pe waa yo e pan na, e le, uu wa mu ndra lawee ka nu mnawa kre, yaa shia ki shɔ mbe li.
27 Kena imi na nyiɛ nyini yila finhaa, mbe nya yila tohaa kre, pan Lewo Biblɔ wre paan kre we pe.
28 A mna yurɔ gboo nyi kre, bawa kɔkɔsakie fni.
Na Lewo Biblɔ Wre Waa Pan
29 Kena na kanyana ble kpɔɛ yire nyu waa to,
ndram we wɔ lawee kro nu,
a nyiɛpɔ wa jaa fniŋge na,
mbe wɔɛlɛɛ na klɔ nyjeeri mbra tuuri tra.
Mbe jaŋga ŋga kii wa nyjeeri kro na seeri.b
30 Bawa pie kee ŋga kie pe Lewo Biblɔ wre paan nu kre nya nyjeeri. Kre nu waŋgra ŋga leele kro we nyɛni, a pie Lewo Biblɔ wre nya na u paan jaŋga, na yɛnyiŋge kpɔɔ ni tloe nu.
31 Kre nu we u nyjeeri bitumblɔ tun, mbe pe paan bnɔ badaaŋga fɔ, mbe u wolo mblɛ u wɔ pre wɔ mbe yili waŋgra kokoe jijirɛ yire kro nu.
E Fig Tiŋge Yomini Kre Tuan
32 E fig tiŋge kre yomini kre tuan. Na e waa nya na ki wrɛ nyaara kre, kena e chin na ndram wrɛm nyjila dani.
33 Kena na e waa yire kee nyjɛ nya na yi pini kre, kena e chin na nyjila kre dani, a ki mbra e na kuraa mu kɔ.
34 Kpra na ni yuu e pan, aŋga leele mblɛ wa kɔ, fɔna yire kee nyjɛ ni yuu ŋga krɛrɛ pe tun.
35 Nyjeeri na tra we kla, la, ni nyu kee wa jaa tro fio.
Nyiɛkpɔɔ Ŋunumu Kre Pan Ble
36 A ble kre, na nyjila kre, ndro n ki chin, nyjeeri bitumblɔ pre n ki chin, hali Nyiɛkpɔɔ Biblɔ wre titi kuraa n ki chin, fɔna ni Lɛ wre chiin bɔkɔ.
37 Imi na Noah nyjila kre, nyjila ŋga ni nyumu nsra ta mu tra yiɛ tɔ kre,
38 na leele kaa, na gboo, a chiɛlɛ na bilɛ naa peyɛ leŋgei, mna sɛ su ble ŋga na Noah na le krɔ kre nu.
39 Leele nsra chin ŋga ki pini. Bawa pra nyi, a nyiɛ na pan, a lɔɛ na nyi mna pe wru peii. Pan chɔɔ Lewo Biblɔ wre pan ble kre we leele fo.
40 Kre nyjila kre, leele shiin we pe see lam, mbe pe nunu wru mbe haŋu wre ti.
41 Chiɛlɛ shiin we na yirɛ suu, mbe pe nunu wru mbe nunu ti.
42 Kena e e ye le chichie. Ŋgi na hin? Na e n chin ŋga ble e Tafun wre we pan.
43 Kena e jawa e chin na, na katoofun na chin nyjila ŋga nu juo we pan u katoo kre, we na u shie. Wa na tni mbra le, mbe pe paan u katoo ja mbe le.
44 Kena yire, e eyɛ shie. Ŋgi na hin? Lewo Biblɔ wre we pan nyjila ŋga ni e n na u kra nu.
Sumifun Chichie
45 Kena ŋmbi u pe sumifun kprafun, mu pe kachiŋu hin? Wre fun wi ŋmba u tafun we wɔ mbe tɛɛ u katoo sumifɛɛnlɛ kro nyu na, mbe kolo kun, mbe wra pe le mbra pe kaan sro nyjila ŋga ni ki fna nu.
46 Na u ja mu pe le, a u tafun wre waa ndru mu pan kre, we dwamu ta u pan.
47 Kpra na ni yuu e pan na, na ki pan ma kre, we u tɛɛ u katoo yirɛ kro nyu na.
48 La, na sumifun wre waa pe lewo sisaa, maa jawa na u tafun wre mu titi,
49 maa sun ki na, na u ŋmbilɛ sumifɛɛnlɛ pre gbuun, a wre na gbɔgbɔɔlɔ na chaa na lii, na gboo na tro kre,
50 u tafun wre we pan mbe u fo, nyjila ŋga ni u n na u kra nu.
51 Bawa we u ndie tini, mbe sɛ u wa yiɛnyumufɛɛnlɛ pre lawee, bawa we na nyɛni, mbra ŋgaala chirɛ.