2 Na pe fifiire tre dnɛ badaaŋga pɔ ufun lagboo, mu u wa epo nu a ki u li kre, ki prɔ ŋga ufun we tni, mbaa ti mbe ni biile mblɛ wa le sisam nu.”

3 “Kena e eyɛ dɔɔta. Na mu ŋmbrɔ sisaa pe mu na kre, u yiɛ kee yo u pan, na u waa laa u sisam kro kre, mbe mu u sisam ti mbe u kɛ.

4 Hali na u sisaa pe mu na gbee nununu kɔɔnashin ble nunu, na u pan gbee nununu kɔɔnashin mu yo mu pan na u u jawala chinɛ mu laa u sisam kro kre, ki fna mbe mu u sisam ti mbe u kɛ.”

5 A bitumblɔ pre na kna mu yo o Tafun wre pan mbo, “Jande, ka ya o shɔnlie na.”

6 A o Tafun wre na kna mu yo pe pan mbo, “Na e shɔnlie na pe fiɛn na mustard bie yi kuraa kre, ee na jaa yo tiŋge ŋga pan na kɔ mu sɛ kan epo nu, a kie na kɔ mbra sɛ kan ki nu.”

7 “Na e waa wa na sumifun ni, a wra fali, ndee na mbaala le kre, na sumifun wre sɛ nyaa mu le, we sɛ tni to mbra lii?

8 Kra pe ma, la, u lopom wre we yo u pan na, ‘Sro pe mu ni ŋga mbe ni li.’ We sro kre pe mbe u ŋga tun, mbe chin u wo li.

9 A u lopom wre wa u ŋga mboo. Ŋgi na hin? Sumifun tnumu ŋga ki fna u tun yi.

10 Pan chɔɔ e nyi, ŋga mbe yo e pe kre, na e ki pe, e yo na sumifɛɛnlɛ lɛ wre, o n fna mboo ni, o tnumu yi.”

11 Ŋga Yesu naa shie Jerusalem na kre, Samaria na Galilee lalaa wra tro.

12 Ŋga wraa dani seechia ka na kre, kokuefɛɛnlɛ kɛ plɛ na u fni, mna yire lee,

13 mu gble le kpɔɔ mbo, “Yesu o Tafun, o fooro le.”

14 Ŋga wra kna mna pe nya ma kre, a wra kna mna yo pe pan, mbo, “E sɛ eyɛ wru e srawɔfɛɛnlɛ pre nyina.” Ŋga praa shie kre to, a pra saanla.

15 Ŋga pe nunu na kna mna uyɛ nya na u saanla kre, wra ndru na gble leni kpɔɔ na Nyiɛkpɔɔ kaan mɛɛ.

16 Mna pan mu kosie kan Yesu yiɛ mna u ŋga mboo. Na wre blɔ wre pe Samaritan wo.

17 A Yesu na kna mbo, “Leele kɛ ma pe saanla kree, a sena Judae kɔɔnanyjirɛ pre nyi hin?

18 Kena pe nunu kuraa n ja mu ndru mu pan mu Nyiɛkpɔɔ ŋga mɛɛ, na fuŋu ŋmba chiin bɔkɔ?”

19 A Yesu na kna mna yo u pan mbo, “Yiri mu sɛ mu lawee. Mu shɔnlie tia mu saanla.”

20 Ki ble ka, Pharisee leele pre na pan mna Yesu wie, na nyjila ŋgi nu Nyiɛkpɔɔ ŋunumu kre we pan hin? A wra kna mna yo pe pan mbo, “Na Nyiɛkpɔɔ ŋunumu kre paan, kawako kee ka wa pe mbe e chin na ki paan.

21 A ndro wa yo na, ‘E le, Nyiɛkpɔɔ ŋunumu kre yi kre, ndee kre yi wa kre.’ Ŋgi na hin? Nyiɛkpɔɔ ŋunumu kree wa e nu.”

22 Bawa Yesu na kna mna yo u twanfɛɛnlɛ pre pan mbo, “Nyjila kaa wa na paan, mbe e na Lewo Biblɔ wre chaa mbe wra tni e jaara ble nunu chom, a yaa u ta.

23 Leele we pan mbe yo e pan na, uu wa mna ree mnawa, yaa shia taa pe na mbe sɛ u lehaa.

24 Imi na nyiɛ nyini nyjeeri kokoo ŋga na, mbe nya mbe sɛ su kokoo ŋgaa na kre, pan Lewo Biblɔ wre pan ble kre we pe.

25 La, ŋga ki yiɛklu, ki fna mbe u kala nya tataara, mbe aŋga leele mblɛ u je.

26 Imi na kra nyi Noah ble yire nu kre, pan kie pe Lewo Biblɔ wre pan ble yire nu.

27 Leele naa lii, mnaa gboo, mnaa leŋgei, na chiɛlɛ wru na bilɛ kaan, mna sɛ su ŋga ble Noah na le krɔ kre nu, a nyiɛ na pan, a nyumu na leele pre hamblɛ kla peii.

28 Pan kra nyi Lot ble yire nu na chɔɔ. Leele naa lii, mnaa gboo, mnaa loni na prɛ, mnaa yirɛ ndru, mnaa nyinyi siin.

29 La, ŋga ble Lot na yili Sodom na kre, Nyiɛkpɔɔ na tia kanhun na pua tuwe chaara na yiri nyjeeri mna pan mu Sodom leele kla peii.

30 Pan chɔɔ kie pe Lewo Biblɔ wre pan ble.

31 Ki ble kre, ŋmba uu wa nyuŋgo ndra na kre, waa shia tii mbe le katoo mbe u yaka wru. Pan chɔɔ ŋmba uu wa nyaa kre, waa shia ndru mbe pan katoo.

32 E Lot chɔ wre sɔɔnri.

33 Lewo ŋmba we na kɛ toni u ŋmaa na kre, kie yili u kɛɛ. La, ŋmba we u ŋmaa wa mbe fun kre, we ki ta.

34 E ti ni yo e pan, ki ble kre, na blee yi, leele shiin we chaa mbe sni dɛŋglɛ nunu na, mbe pe nunu wru, mbe nunu ti wa.

35-36 Chiɛlɛ shiin we chaa mbra yirɛ trei, mbe pe nunu wru, mbe nunu ti wa.”

37 A pra kna mna Yesu wie mbo, “O Tafun, sena kre kee ŋga we pe hin?”