Kalalifun Wa Na Lekuchɔ Wa Kee
18
Ki ble ka Yesu na u twanfɛɛnlɛ pre gbun yomini ka, mna pe nyina na ki fna pra nyiɛtali nyjila kro nu, mbe pia pra.
Luke 18:1-17
2 Wra yo pe pan mbo, “Blɔ kalalifun wa naa wa chia ka na. Wre blɔ wre, u nsraa Nyiɛkpɔɔ fiɛ, a u kee ka na ma lewo ni.
3 A lekuchɔ wa naa wa chia kre na, nyjila kro, nu wraa shie na blɔ wre tali mbo, ‘Jande, mi na ni ŋmbrɔ wa o ta, a ni wo tna, kena ya ni na.’
4 Blɔ wre nsraa chaa mbe chlɔ wre kee kre yo. La, kra kɔ mu da wa, a wra kna mna yo uyɛ pan mbo, ‘Kii wa na ni n na Nyiɛkpɔɔ fiɛ, a ni kee ka ma na lewo ni.
5 La, imi na lekuchlɔ ŋmba ni hau ŋga, mbe kee kre le mbe ki kpra kun. Na kre ma, u paan mna kuraa we kɔɔ ni gbo.’”
6 A O Tafun Yesu na kee kre taa mbo, “E kalalifun denyjuufun ŋmba kee ŋga le.
7 Kena Nyiɛkpɔɔ leele mblɛ u wɔ, a pra nyɛni na u yeeri lafo na ble kre, wa pe kala li mbe pe shɔ sisampefɛɛnlɛ kɛɛ ree? E jawa na we pna pe kala ni ree?
8 Ni yuu e pan na, we pe kala li mbe pe shɔ nyaanyaa. Kena na Lewo Biblɔ wre waa pan, we shɔnlifun da tra ŋga naa?”
Pharisee Wo Na Tɔɔ Shɔfun Yomini
9 A Yesu na leele mblɛ praa peyɛ jawa na pe fraka, na pe ŋmbilɛ le na pre n fraka kre gbun yomini ka mbo,
10 “Bilɛ shiin plɛ pra sɛ suminyuŋgo nyiɛtali haa, nunu na pe Pharisee wo, a haŋu wre na pe tɔɔshɔfun.
11 Pharisee wo wre na uyɛ kun mna sɛ yire mna nyiɛtali mbo, ‘Ni Nyiɛkpɔɔ kaan mboo na ni fraka, ni n pe jajaarafun, a ni n pe denyjuufun ndee chachaa imi na leele hamblɛ nyi kre, ni mu kaan mboo na ni n pe na tɔɔshɔfun ŋmba u yire wa ŋga wi.
12 Ŋgi na, kranu kpan ni blefuni gbee shiin, a ni yirɛ nyjɛ ni taa, ni yi yɔɔlɛ kɛ, mbe mu ŋga nunu.’
13 A tɔɔshɔfun wre na yire lee. U nsra yiɛ yire kuraa mna nyiɛ yiɛ le. Kɛ wra taa gbun na, na yuu mbo, ‘Nyiɛkpɔɔ, sisampefun wi mi. Jande, ni fooro le.’”
14 A Yesu na kna mbo, “E ti ni yo e pan, wre sisampefun wre na fraka Nyiɛkpɔɔ pan, mna sɛ katoo, mu wɛ haŋu wre na. Ŋgi na hin? Ŋmba we uyɛ kpɔɔ kre, Nyiɛkpɔɔ we ufun pe fiɛn, a ŋmba we uyɛ pe fiɛn kre, Nyiɛkpɔɔ we u kpɔɔ.”
Yesu Na Biile Fiɛnfiɛn Dwan
15 Leele plɛ na pan na biile fiɛnfiɛn plɛ ni Yesu pan mbe u kɛ taa pe na. Ŋga u twanfɛɛnlɛ pre na pe nya kre, a praa fuuru leele pre na.
16 A Yesu na biile pre yeeri mna pan u jaara mna kna mbo, “E ti mbe biile pre pan ni pan. Yaa pe tɔ kolo. Ŋgi na hin? Mblɛ imi wo yi Nyiɛkpɔɔ ŋunumu kre.
17 Kpra na ni yuu e pan, ŋmba u n Nyiɛkpɔɔ ŋunumu kre shɔ na pɔ wi kre, wa le ki nu.”
Ble Nyini Ŋmaa
18 Bawa Judae lopom wa na kna mna Yesu wie mbo, “Nyinafun Chichio, kee ŋgi mbe pe mbe blenyini ŋmaa ta hin?”
Luke 18:18-43
19 A Yesu na kna mna yo u pan mbo, “Ŋgi ki tia mna ni yeeri lewo chichuo hin? Ndro n wa mu pe chiriri, fɔna Nyiɛkpɔɔ wre chiin bɔkɔ.
20 Mu Nyiɛkpɔɔ mbra yire chin, na yi yo na, ‘Maa shia leŋgeere kla, a maa shia liiku, a maa shia ju, a maa shia kafinɛ dansiɛrɛ li, a ki fna mu mu lɛ, na mu lo ŋga buuro.’”a
21 A blɔ wre na kna mbo, “Yire mbra nyjɛ krɛrɛ ni li yi na mu yire ni bimi.”
22 Ŋga Yesu na kre kee ŋga loo kre, a wra kna mna yo u pan mbo, “Kala nunu ki kro mbe mu pe. Sɛ mu yirɛ kro prɛ, mu swa kre yɔɔlɛ mu shianfɛɛnlɛ ŋga, mu pan mu taa ni kro. Kre mu krɔyirɛ ta nyjeeri.”
23 Ŋga blɔ wre na kre kee ŋga loo kre, u yiɛ na je. Ŋgi na hin? Wra pe swafun.
Swafun Na Nyiɛkpɔɔ Ŋunumu
24 Yesu na u le komm mna kna mbo, “Kie sheli na swafɛɛnlɛ we le Nyiɛkpɔɔ ŋunumu kre nu.
25 Kie pe yiɛyiɛ nyuuma pan na we le pandiɛ wee, mbe wɛ ŋga swafun we le Nyiɛkpɔɔ ŋunumu kre nu.”
26 Leele mblɛ pra kee ŋga loo kre na kna mbo, “Kena ŋmbi ŋmaa Nyiɛkpɔɔ we shɔ na hin?”
27 A Yesu na kna mbo, “Kee ŋga kia jaa pe lewo pan kre, kie jaa pe Nyiɛkpɔɔ pan.”
28 A Peter na kna mbo, “Le, o o yirɛ kro ti, mu pan mu taa mu kro.”
29 A Yesu na kna mna yo pe pan mbo, “Kpra na ni yuu e pan, ndro ŋmba we yila Nyiɛkpɔɔ ŋunumu kre na, mbe u katoo, ndee u chɔ, ndee u chinlɛ, ndee u lo na u lɛ, ndee mu u biile ti kre,
30 ufun we ndru mbe yi ta mbe wɛ jle na, fuŋgaami ble nyjɛ nu o nyi ŋga nu, mbe ndruu blenyini ŋmaa kre ta, waŋgra ŋga kie pan na kre nu.”
Yesu U Kumu Na U Nyiɛ Kee Nyanyo Taarɛwo
31 Yesu na bitumblɔ kɛmbɔshiin pre wru mna sɛ paara pe pan mbo, “E le! Jerusalem na o shie kre, a Lewo Biblɔ wre kee nyjɛ Nyiɛkpɔɔ keenyanyofɛɛnlɛ pre nyunɔ mu tɛɛ yire kro we pe.
32 Pie u wɔ mbe le leele mblɛ pe n Nyiɛkpɔɔ chin kɛɛ, mbe praa u pini mbra tɛɛ, mbe u tɛɛlɛ, mbe tɛɛnrɛ hlu mbe wo u na.
33 Pie u frɔ fwa ni, mbe sɛ u gbo, a u ble taarɛ ble na we nyi.”
34 Kee yire wra yo kre, pe nsra ka nɔɔloo. Nyiɛkpɔɔ na kee kre nɔɔ ndra pe na, a pe nsra chin kee ŋga u yuu.
Fuun Talifun Wa Tra Haa
35 Ŋga wraa dani Jericho na kre, na fuun waa wa mu tni kolo mbɛɛ na na tali.
36 Ŋga wra loo na lenɛɛrɛ pre tro u mbɛɛ na kre, a wra mblɛ praa wa u jaara kre wie mbo, “A kee ŋgi ki pini hin?”
37 A pra kna mbo, “Yesu ŋmba u yiri Nazareth na wre u tro.”
38 A wra kna mbo, “Yesu David Nana, ni fooro le.”
39 A leele mblɛ pra yiɛ klu kre naa fuuru u na, na u pieri, la wra je na gble leni kpɔɔ na yaa, mbo, “David nana, ni fooro le!”
40 A Yesu na yire, mna yo leele pre pan na pe pan na u ni. Ŋga wra da u mbɛɛ na kre, a wra u wie mbo,
41 “Ŋgi mu chaa ni pe mbe mu ŋga hin?”
A wra kna mbo, “Ni Tafun, ti mbe ni nyiɛlɛ nyjɛ nyaa.”