Tnumutunfɛɛnlɛ Pre Kee
20
Yesu na yomini gbun mbo, “Pan nyjeeri ŋunumu kre nyi na, falifun ŋmba wra yiri bnimi pupu, mna sɛ falifɛɛnlɛ wru mbe pe sɛ fali u see.
2 Ŋga wre na pre na paara mna fni kre, pra yo ble nunu kre, pie shɔ swa denarii nununu, a wra tia pra sɛ na fali.
3 Kie pe nyjila kɔɔnanyjirɛ kre, wra sɛ leele plɛ da jafa lawee na pe yire finfin.
4 A wra kna mna yo pe pan mbo, ‘Wolo, yaa sɛ fali ni pan mbe ni e fɔlɔ tɔ imi na ki fnaa?’ A pra ki nɔɔ loo mna sɛ ya mblɛ pre na.
5 Kie pe nyjila kɛmbɔshiin na nyjila taarɛ lalɛɛ yire nu kre, seefun wre na sɛ plɛ da na, mna pe yeeri ma na.
6 A kie pe nyjila kunɔ kre, wra sɛ plɛ da na pee wa mu yire, a wra kna mna yo pe pan mbo, ‘Yira ŋgi e yire na ble poŋgo klai finfin ŋga hin?’
7 A pra kna mbo, ‘Na ndro n o wru tnumu ka nu.’ A seefun wre na kna mbo, ‘E tro e sɛ fali ni see wa.’
8 Ŋga yila na kɔ a pra pan katoo kre, seefun wre na u tnumu lefun wre yeeri a wra pan, a wra kna mbo, ‘Tnumutunfɛɛnlɛ pre kro yeeri mu pe fɔlɔ tɔ. Yire mblɛ pe kro tɔ pre na mu sɛ su yiɛkulo pre na.’
9 Ŋga mblɛ pra kro tɔ fali haa pre na pan, a wra pe tɔ denarii nununu kre,
10 yiɛkulo pre na chin na pre we ta mbe ki wɛ ma na. La, denarii nununu wra pre ŋga na.
11 Ŋga pra swɛ yire shɔ mu kɔ kre, a praa taanri seefun wre na mbo,
12 ‘Kotɔmblɔ mblɛ, nyjila nunu chom ni pe tnumu tun, a wre mblɛ wre kala nya a yila o gbun chiin kre, fɔtɔɔrɔ nunu o kro ta.’
13 A seefun wre na kna mna yo pe wa pan mbo, ‘Awe, ni n wa pe sisaa, mi na yire n paara a o fni, a e yo denarii nununu ee shɔ kre ra?
14 Kena yire e e swɛ shɔ e sɛ. Mi pan ki tna a ni mblɛ ŋga ma na.
15 Kena ni n kolo ni na mbe ni swa tɛɛ mbe ŋga ni chaa pe ree? Ndee mni a ni chichie pee kaari e pan krɔ ŋga hin?’”
16 A Yesu na u yomini kre nyu le mbo, “Kena ni yuu e pan na kotɔmblɔ we kna mbe yiɛklu, mbe yiɛkulo kna mbe kro tɔ.”
Yesu Na U Kumu Na U Nyiiɛ Kee Yo
17 Ŋga Yesu naa shie Jerusalem na kre, wra u twanfɛɛnlɛ kɛmbɔshiin pre yeeri mbɛɛ na mna yo pe pan mbo,
18 “E le, Jerusalem na o shie kre, bawa pie Lewo Biblɔ wre wɔ mbe le Judah srawɔfɛɛnlɛ loplombo pre, na pe mbra nyinafɛɛnlɛ pre kɛɛ, mbe pe u gbun kumu pimi ni,
19 mbe u wru mbe le leele mblɛ pe n Nyiɛkpɔɔ chin pre kɛɛ, mbe pe u tɛɛlɛ, mbe u frɔ, mbe sɛ u kan kanyana kumu kaan kre na, a ki ble taarɛ ble na we nyi.”
Nyjeeri Ŋunumu Lie
20 Bawa Zebedee chɔ na pan na u biile James na John ni, mna pan mu kosie kan Yesu yiɛ, na Yesu u ya u na.
21 A Yesu na kna mu u wie mbo, “Ŋgi mu chaa mbe ni pe mbe mu ŋga hin?”
A chlɔ wre na kna mbo, “Jande, na maa sɛ mu ŋunumu kre nu, ni chaa mbe mu ti mbe ni biile shiin mblɛ, mbe wa tni mu kalie, mbe wa tni mu kamɛŋɛ.”
22 A Yesu na kna mbo, “Mu n chin kee ŋga mu yuu.” Mna kna mu James na John wie mbo, “Ee jaa gbɔ kanyana gbɔyira ŋga ni ni gboo nii?”
A pra kna mbo, “Oo jaa gbɔ na ki ni.”
23 A Yesu na kna mna yo pe pan mbo, “Ee jaa gbɔ na kanyana gbɔyira ŋga ni ni gboo ni, la, mbe tni ni kalie na ni kamɛŋɛ rɛ, ni wo ma mbe ni jaa ki kolo ŋga, la, mblɛ pan ni lɛ ki gbeele mu tɛɛ pre wo yi.”
Sumiɛ Ki Lewo Kaan Kpɔɔmu Lawee
24 Ŋga twanfɛɛnlɛ kɛ hamblɛ pre na kre kee ŋga loo kre, pe krɔ na kun James na John ni.
25 A Yesu na twanfɛɛnlɛ pre kro yeeri mna yo pe pan mbo, “E chin na leele mblɛ pe n Nyiɛkpɔɔ chin kre, pe loplombo pre peyɛ pe tafɛɛnlɛ, na jaŋga lii hamblɛ naa?
26 A yire rɛ, pan ma ki nyi e nu. La, ŋmba we na chaa mbe pe lekpɔɔ e nu kre, u kaari e kro sumifun.
27 A ŋmba we na chaa mbe e yiɛklu kre, u kaari e kro tnu.
28 Lewo Biblɔ wre kuraa n pan na pe u sumi, la, sumi haa u pan, mbe u ŋmaa tɛɛ mbe sra wɔ mbe lenɛɛrɛ ŋga.”
Fuunlo Shiin Plɛ Tra Haa
29 Ŋga Yesu na u twanfɛɛnlɛ pre na yili Jericho na, na shie kre, leele tataara na taa pe kro.
30 Kre nyjila kre nu, na fuunlo shiin plɛɛ wa mu tni kolo mbɛɛ na. Ŋga pra loo na Yesu tro pe mbɛɛ na kre, a pra gble fɔɔri mu le mbo, “O Tafun, David nana, o fooro le.”
31 A lenɛɛrɛ pre naa fuuru pe na, na pe pieri, a pra taa kuraa na gble kre leni kpɔɔ na yaa mbo, “O Tafun, David nana, jande o fooro le.”
32 A Yesu na yire mna pe yeeri, mna pe wie mbo, “Kee ŋgi e chaa mbe ni pe mbe e ŋga hin?”
33 A pra kna mna yo Yesu pan mbo, “Jande, ti mbe o nyiɛlɛ nyaa.”
34 Ŋga pra yo ma kre, fooro na Yesu yii, a wra kɛ taa taa pe nyiɛlɛ yire na. Titɛɛ kre nu to, a yira nyaala, a pra taa Yesu kro.