Yesu Yili Galilee Na
19
Ŋga Yesu na kee nyjɛ yo a u nyu na to kre, wra yili Galilee na mna sɛ Judea tra nu, Jordan lɔɔ kre kro.
2 Ŋga wraa shie kre, yambla tataara na taa u kro, a wra pe kro tra.
Leŋgeere Jeere Kee
3 Bawa Pharisee leele pre plɛ na pan mna u pe mu le, mna u wie mbo, “Kena mbra kolo ŋga mbe lewo jaa sun ki na mbe u chɔ je ra?”
4 A Yesu na kna mna yo pe pan mbo, “E n ki tɔɔnri mu nya na, ŋmba wra lewo faanri kre, blɔ na chlɔ wra klu mu faanri ra?a
5 Kre ndra na, blɔ we u lo na u lɛ ti, mbe sɛ mbra u chɔ na, mbe pe pe wejikaara nunu.b
6 Na pe ta mu mbra mu kɔ, kena pe n pe leele shiin na, la, pe pe ndro nunu. Kena ŋga Nyiɛkpɔɔ mbra kre, yaa ti mbe lewo ki kla.”
7 A pra kna mna Yesu wie mbo, “Kena ŋgi ki tia Moses na mbra le na, na mu yo mu chlɔ je, ki fna mu u ŋga hlɛ mbe ki nyina na mu u je hin?”
8 A Yesu na kna mbo, “E ndikana ndra na Moses na tia e naa e chiɛlɛ jee, pan ma kra nyi jle kre.
9 La, mi yuu e pan na, na ki n yire tiɛrɛɛ na, a blɔ u chɔ je, maa sɛ wa leŋge kre, kena u leŋgeere kla.”
10 A Yesu twanfɛɛnlɛ pre na kna mu yo u pan mbo, “Kena na pan kre kee ŋga nyi blɔ na chlɔ lalaa rɛ, kena ki n fna mbe o na leŋgei.”
11 A Yesu na kna mbo, “Ndro kro ma we jaa tni mbe wa leŋge, fɔna mblɛ pe ŋga ki yi kre.
12 Leele plɛɛ wa pra leŋge. Pan pe pre se. A plɛɛ wa pe pe san, kre ki tia pra leŋge. A plɛɛ wa mu yila nyjeeri ŋunumu kre na, ki tia pra leŋge. Kena ŋmba we jaa li kre kolo kre na kre, e ti u taa ki na.”
Yesu Na Bibɛɛlɛ Dwan
13 Bawa leele plɛ na pan na biile plɛ ni Yesu pan na u kɛ taa taa pe ndrɛ na, mbe nyiɛtali mbe pe ŋga, a twanfɛɛnlɛ pre naa fuuru leele pre na.
14 A Yesu na kna mna yo u twanfɛɛnlɛ pre pan mbo, “E biile pre ŋga kolo mbe pe pan ni pan, yaa pe tɔ kolo, pre imi wo yi nyjeeri ŋunumu kre.”
15 A pra pe ŋga kolo, a leele pre na pan na biile pre ni, a Yesu na kɛ taa taa pe ndrɛ na, mna chin mu yili wa.
Ble Nyini Ŋmaa
16 Titɛɛ kre nu wa, yirifuŋu wa na pan mu Yesu wie mbo, “Nyinafun, kee chichie ŋgi mbe pe mbe blenyini ŋmaa ta hin?”
17 A Yesu na kna mbo, “Ŋgi ki tia mna ni wie kee chiriri ŋga mu jaa pe hin? Nyiɛkpɔɔ chiin u chichie piin. Kena na mu chaa mbe ŋmaa ta kre, li Nyiɛkpɔɔ mbra yire na.”
18 A blɔ wre na kna mu Yesu wie mbo, “Mbra nyji na Nyiɛkpɔɔ yo o taa hin?”
A Yesu na kna mbo, “Maa shia linkuuro kee pe, a maa shia leŋgeere kla, a maa shia ju, a maa shia kafinɛ dansiɛrɛ li.
19 Mu lo na mu lɛ shɔnli, mu mu ŋmbrɔ kori na ŋu titi wi.”c
20 A yirifuŋu wre na kna mbo, “Yire kee nyjɛ krɛrɛ, ni li yi na kro, kena ŋgi ki kro na hin?”
21 A Yesu na kna mbo, “Kena na mu chaa mbe pe cheche kre, sɛ yirɛ nyjɛ yii wa mu pan kro prɛ, mu shianfɛɛnlɛ ŋga yi swa kre, mu pan mu taa ni kro, kre mu krɔyirɛ ta nyjeeri.”
22 Ŋga yirifuŋu wre na kre kee ŋga loo kre, u sɔɔnrɔ na ku, a wra kna brɛmm na shie. Ŋgi na hin? Na yirɛɛ wa u pan tataara.
23 A Yesu na kna mna yo u twanfɛɛnlɛ pre pan mbo, “Kpra na ni yuu e pan, kie sheli mbe swafun ŋga na we sɛ nyjeeri ŋunumu kre nu.”
Kanyana Ŋga Kii Wa Wejiyirɛ Taara Nu
24 E le, kie pe yiɛyiɛ na nyuuma we le pandiɛ wee mu wɛ ŋga swafun we le nyjeeri ŋunumu kre nu na.
25 Ŋga twanfɛɛnlɛ pre na kre kee ŋga loo ma kre, kra pe pe kawako ni mu tro. A pra kna na yuu mbo, “A kena ndro ŋmbi haa we ŋmaa ta na hin?”
26 A Yesu na kna mu pe le komm, mna yo pe pan mbo, “Lewo pan kia jaa pe, la, Nyiɛkpɔɔ pan kre, kee kro we jaa pe.”
Imi Na Lewo U Yɛ Fɛɛ Yi
27 Bawa Peter na kna mna yo Yesu pan mbo, “Le, o o yirɛ kro ti mu pan mu taa mu kro, kena tnu ŋgi oo ta ki nu hin?”
28 A Yesu na kna mu yo pe pan mbo, “Kpra na ni yuu e pan na, waŋgra shiinwo kre nu kre, Lewo Biblɔ wre we tni u yɛnyiŋge ŋujɔɔn kre na, a yire mblɛ e taa u kro aŋga ŋga we tni ŋujɔɔn nununu kɛmbɔshiin na, mbra Israel sele kɛmbɔshiin yire kpra kuun.
29 A ŋmba u u kalonyi ndee, u chinlɛ, ndee u jaala, ndee mu u lɛ, ndee u lo, ndee mu u biile, ndee mu u tra ti mu pan mu taa ni kro kre, ufun we ndru mbe yi ta ma gbee lafaa lafaa, mbe blenyini ŋmaa kre ta mbe ya.
30 La, lenɛɛrɛ mblɛ pe yiɛklu kre we kɔɔ kro tɔ, mbe kotɔmblɔ kna mbe yiɛklu.”