2 A Yesu na kna, mna pɔ fiɛn wa yeeri, mna pan mu yire pe lalaa,

3 mna kna mbo, “Kpra na ni yuu e pan na, na e n eyɛ pe na biile lɛ kre, kolo ka n wa na ee sɛ nyjeeri ŋunumu kre nu fio.

4 Ŋmba we ja mbe uyɛ nyjii na pɔ ŋmba wi kre, wre we pe lekpɔɔ nyjeeri ŋunumu kre nu.

5 A ŋmba we le ni na, mbe pɔ fiɛn imi le kre, kena u ni le.

6 A ŋmba we ti biile fiɛn fiɛn mblɛ pe ni shɔ ŋga wa laa u shɔnlie kro kre, na pra dnɛ badaaŋga pɔ ufun lagboo mu u wa lɔɔ, a kra u li prɔ, ŋga we tni na.

7 Waŋgra na ki kaalɛɛ nyjɛ yi tia leele na punu Nyiɛkpɔɔ na kre, ki atɛ. Leele punu Nyiɛkpɔɔ na la, ŋmba we ti mbe ndro punu kre, u atɛ.

8 Kena na mu kɛ, ndee mu jele shie na mu ni sisam nu kre, ki kun mu wa. Ki nyu mu mu ŋga na mu sɛ ŋmaa lawee na kɛ nunu, ndee jele nunu ni, mu wɛ ŋga mu kɛnyi shiin, ndee jeelee shiin ta mbe sɛ kanhun ŋga kra fii kre nu.

9 A na mu nyini shie na mu ni sisam nu kre, ki foli mu wa. Ki nyu mu mu ŋga na mu sɛ na nyini nunu ni ŋmaa lawee, mu wɛ ŋga mu nyiɛlɛ shiin ta, mbe sɛ kanyana kanhun kre nu.”

10 “Kena e dɔɔ ta, mbe yaa shia bibɛɛlɛ mblɛ wa le fiɛn. Ŋgi na hin? Pee wa na nyjeeri bitumblɔ ni Ndoo wre jaara nyjeeri wa nyjila kro nu.

11 Lewo Biblɔ wre pan mbe paan mblɛ pe fun pre ŋmaa shɔ.

12 Kena na lewoo wa na mbaala lafaa ni, a nunu fun pe nu, mni e jawa na ufun we pe hin? Wa fuloe jijirɛ na kɛmbɔkɔɔnanyjirɛ pre ti pe kahaa wa, mbe sɛ nunu ŋmba u fun wre haa cha tun ree?

13 A na waa u nya, kpra na ni yuu e pan na, u yiɛ we shɔ u na mbe wɛ tataara mblɛ pe n fun pre na.

14 Pan ki nyi ni Lɛ ŋmba uu wa nyjeeri kre pan chɔ. Ki tia u n na chaa mbe bibɛɛlɛ mblɛ wa fun.”

15 “Kena na mu ŋmbrɔ fun mu na kre, sɛ mbe ŋu na wre shiin tni, mbe mu sisam ŋga u pe mu na kre yo u pan. Na waa u sisam nɔɔloo kre, kena e pe nunu.

16 A na u n shia ki nɔɔloo kre, kena mbe mu ndro nunu, ndee shiin cha mbe ya muyɛ na, mbe pe mu kee ŋga mu sɛ yo kre dansiɛrɛ li, mbe ya mu na.^a

17 A na u n shia pe kee ŋga pie yo u pan loo kre, kena mu sɛ kee kre ni Kristo leele pan. Na pe waa u yeeri, a u n shia pe kee loo kre, kena yaa ufun wre jawa Kristo ndro.

18 Kpra na ni yuu e pan na, kee ŋga ee yii tra mna kre, pe ki yii nyjeeri, a kee ŋga ee je tra mna kre, pe ki je nyjeeri.

19 Kpra na ni yuu e pan na, na e shiin nyu ta nunu tra mna kre, yira ŋga ee tali kpan, ni Lɛ ŋmba uu wa nyjeeri wre we ki pe mbe e ŋga.

20 Ŋgi na hin? Mna leele shiin ndee taarɛ we fni ni mɛɛ nu kre, na nii wa pe lalaa.”

21 Bawa Peter na taan mu yiri mna sɛ Yesu wie mbo, “Ni Tafun, na ni ŋmbrɔ sisam pe ni na, gbee mni ki fna mbe ni u sisam ti mbe u kɛ hin? Gbee kɔɔnashin ree?”

22 A Yesu na kna mbo, “Ki n pe gbee kɔɔnashin chiin, la, gbee kɔɔnashin ma tataara.”

23 “Kena nyjeeri ŋunumu kre, pan kie pe na ŋunu ŋmba wraa chaa mbe wre na u sumifɛɛnlɛ pe lalaa fɔɔlɛɛ kee le mbe yo yi.

24 Ŋga ŋunu wre na tni u fɔɔlɛɛ yire kee na kre, pra pan na u sumifɛɛnlɛ pre nunu ni, na u fɔlɔ li a ki da pɔni kagbeŋ lafɛɛ kɛ.

25 A u sumifun wre nsra swa kre ta mbe ki tɔ, a kra tia ŋunu wre na yo na pe sɛ wre, na u chɔ, na u biile, na u yirɛ nyjɛ yii wa u pan kro prɛ mbe paan fɔlɔ kre tɔ.

26 Bawa sumifun wre na kosie kan ŋunu wre yiɛ mna u tali mbo, ‘Jande, ni Tafun, frɔ ta, mbe ki cha mbe mu ŋga.’

27 Ŋga wra yo ma kre, u kee na pe u pan fooro ni, a wra fɔlɔ kre ti mu u kɛ, mna u wa a wra sɛ.

28 Ŋga wra yili wa kre, u ŋmbrɔ sumifun wa katoo wra sɛ, na u fɔlɔɔ wa u na kie pe pɔni lafaa gbi, a wra sɛ to u na na tini mbo, ‘Ni fɔlɔ tɔ.’

29 A u ŋmbrɔ sumifun wre na kosie kan u yiɛ mna u tali mbo, ‘Jande, frɔ ta, mbe ki tɔ mbe mu ŋga.’

30 Ŋga wra yo ma kre, wra je mna sɛ u le nyuŋgo mbe sɛ su nyjila ŋga nu we u fɔlɔ kre tɔ.

31 Ŋga kra pan ma kre, u ŋmbilɛ sumifɛɛnlɛ pre na kee kre kro nya, a kra pe pe fooro ni mu tro. A pra sɛ mandiɛ kre kro bɔ pe kro tafun wre pan.

32 Bawa ŋunu wre krɔ na kun u sumifun wre ni, a wra u yeeri a wra pan, a wra kna mbo, ‘Ŋu, mu ndra sheli. Lewaa titi wi ŋu. Ŋga ni mu yii ni fɔlɔ na mna, a mu ni tali, ni n ki ti mu mu kɛɛ?

33 Kena imi na ni mu fooro chin, mu mu wa kre, ŋgi ki tia a mu n mu ŋmbrɔ sumifun ŋmba fooro chin ma ŋga hin?’

34 Ŋga kra pan ma kre, ŋunu wre krɔ na kun kpɔɔ, a kra tia wra sɛ u sumifun wre le nyuŋgo lefɛɛnlɛ kɛɛ mbe pe u fiŋge mbe sɛ su ble ŋga na we fɔlɔ kre kro tɔ.”

35 A Yesu na kna mbo, “Na e n na tii na e ŋmbilɛ kee loloŋgo nu, pan ni lɛ ŋmba uu wa nyjeeri wre we e pe.”