2 A Pharisee leele pre na Judae mbra nyinafɛɛnlɛ pre naa taanri u na, na yuu mbo, “Blɔ ŋmba na sisam pefɛɛnlɛ pe nyaari, hali wra chaa na lii na pe ni.”

3 A Yesu na kna mna pe wie mbo,

4 “E nu, na waa wa mbaala lafaa ni, a nunu chom fun pe nu, ufun wa fuloe jijirɛ na kɛmbɔkɔɔnanyjirɛ pre ti pe kahaa wa, mbe sɛ nunu wre cha tun ree?

5 A na ki pan ma, a waa u nya kre, u yiɛ we shɔ, mbe u u bali mbe taa patia na mbe pan na u ni katoo.

6 Na waa le katoo, ki yɛshɔɔrɔ we ti u u nɔɔlɔ, na u tnifɛɛnlɛ yeeri mbe yo pe pan na, ‘Ni yiɛshɔ mu tro. Ni mbɔɔ u fun, a ni u nya. Kena e ti mbe o yɛshɔɔrɔ li.’

7 Na ndro nunu chom u jawala chinɛ mu laa u sisam kro kre, pan chɔɔ, mblɛ pee wa nyjeeri pre yiɛ we shɔ u na, mbe wɛ leele fuloe jijirɛ na kɛmbɔkɔɔnanyjirɛ mblɛ pe peyɛ jawa na pe fraka, a ki n shian na pie pe jawala chinɛ pre na.

8 Ndee e nu, chlɔ ŋmbi we swa finyi nununu kɛ ta, na nunu chom fun u pan, mbe wa kania mu, mbe pɔyira wru mbe katoo kre pɔ, mbe ki cha kama mbe sɛ su na we ki nya hin?

9 A na waa ki nya, we u nɔɔlɔ, na u tnifɛɛnlɛ yeeri mbe yo pe pan na, ‘E ti mbe mi na yire yiɛ shɔ. Ŋgi na, ni swa fun, a ni ki nya.’

10 Pan chɔɔ, na sisampefun nunu u jawala chinɛ mu laa u sisam kro kre, Nyiɛkpɔɔ bitumblɔ yiɛ we shɔ.”

11 A Yesu na kna mbo, “Blɔ wa na u bibilɛ shiin plɛ praa wa.

12 A ŋmba wra pe ble wre na yo pe lɛ pan mbo, ‘Ndoo, jande, mu krɔyirɛ yire yɔ mu ni ŋga nyjɛ mbe ta.’ A blɔ wre na yirɛ yire yɔ mna u biile pre ŋga.

13 Ki nsra mu, a pɔ wre na u yirɛ nyjɛ wra ta yire prɛ, mna swa kre bali, mna kolo kun mna sɛ waŋgra ka nu. Bawa wra sɛ swa kre tɛɛ mna uyɛ li, a kra kɔ mu u ti.

14 Ŋga swa kre kro na kɔ u kɛɛ kre, klo badaaŋga ka na to kre waŋgra kre nu. A na shian u yii kpɔɔ.

15 Bawa wra sɛ uyɛ mbra waŋgra kre ndro wa na, a wre naa u tuni wra shie na u prakoe kaan sro.

16 Klo sisaa na tia sroe yire wraa prakoe pre kaan kre kuraa na pe u pan niŋge ni, na u nsra ndro ta mbe u u ŋga yaka mbe u ka.

17 Ŋga wra u tnimu nya ma kre, a wra kna na yuu uyɛ pan mbo, ‘Leele mblɛ pe tnumu tuni ndoo pan kuraa lii na prai sro na, a klo na ni kuu kre.

18 Mbe ndru mbe sɛ yo ndoo pan na, Ndoo, ni sisaa pe mu ŋu na Nyiɛkpɔɔ taan.

19 Kena ni n fna na mu ni yeeri mu pɔ na. Ni wru mu pe mu sumifɛɛnlɛ pre wa.’

20 A wra yiri mnaa shie u lɛ pan.

21 A u pɔ wre na kna mbo, ‘Ndoo, ni sisaa pe Nyiɛkpɔɔ na, mu sisaa pe mu na, ki tia ni n fna na pie ni yeeri mu pɔ na.’

22 A u lɛ wre na kna mna yo u sumifɛɛnlɛ pre pan mbo, ‘E sɛ dodoŋgi titnɔŋɔ chichie titi wru e pan e u le, e u le feelee, na kpawrɛ.

23 Na e kɔ, mbe e sɛ nuu ŋmba nu nyina nyi yii mbe paan u gbo, mbe sro pe mbe o li, mbe oyɛ yiɛ shɔ.

24 Ŋgi na hin? Ni pɔ ŋmba, ki pe na kuu u ku mu nyi, wra fun, a ni u nya.’ A pra peyɛ yiɛ shɔ kama.

25 Kre nyjila kre na blɔ wre pɔ lopom wree wa see. Ŋga wraa paan mna da katoo nyu na kre, wra loo na pe mɛɛ koni na yoo.

26 A wra u lɛ sumifɛɛnlɛ pre nunu yeeri mna u wie mbo, ‘A ŋgi pe pini mna hin?’

27 A wra kna mna yo u pan mbo, ‘Mu chunu u le, a mu lɛ nuu yii mu gbo. Ŋgi na hin? Ŋga u u nya ki mu, a yaka n u ta.’

28 A krɔ na pɔ lopom wre kun, a wra yo wa le katoo. A u lɛ wre na yiri mna sɛ u tali na u pan katoo.

29 A pɔ lopom wre na kna mbo, ‘Ni mu sumi yɛlɛ tataara, ni n mu nyu kee je tun. Yira ŋgi mu ni ŋga tun hin? Hali sugbɔ kuraa mu n ni ŋga wa, a mi na ni nɔɔlɔ oyɛ yiɛ shɔ.

30 La, ŋga mu pɔ ŋmba u sɛ mu yirɛ kla tiɛrifɛɛnlɛ na kre le aŋga rɛ, a mu sɛ nuu yii mu gbo wre pan.’

31 A blɔ wre na kna mbo, ‘Ni pɔ, nyjila kro nu ŋuu wa ni jaara, a ni yira kro mu wo yi.

32 Kena ki fna mbe o oyɛ yiɛ shɔ. Ŋgi na hin? Mu chunu ŋmba u ku mu ndru mu nyi, wra fun, a o u nya.’”