3 A Yesu na kna mna Judae mbra nyinafɛɛnlɛ pre na Pharisee leele pre wie mbo, “Kena o mbra kolo ŋga mbe o yaŋu tra Wuuble ree, ndee mni hin?”

4 Pe nsra nyu kun, a Yesu na yaŋu wre tra a wra sɛ.

5 A wra kna mna pe wie mbo, “E ŋmbi haa biblɔ, ndee nablɛm we to lɔɔ Wuuble, mbe wa sɛ u wɔ titɛɛ kre nu hin?”

6 Pe nsra kala ka ta mu yo.

7 Ŋga Yesu na yiɛ wa mna leele mblɛ pra fni lihaa wa kre le, mna nya na pe kro sɛ tni tni loplombo tnihɛɛ nu kre, wra yo pe pan mbo,

8 “Na ndro e yeeri bijam nu kre, na e sɛ, yaa tni lawee chichiele nu tun. Na ki pan na pe ndro ŋmba u wɛ ŋu na yeeri wa kre,

9 ŋmba u e kro yeeri wa kre we paan yo mu pan na, ‘Yiri mu blɔ ŋmba ŋga jɔɔn.’ Bawa nyifɛɛrɛ we mu gbo, mbe mu yiri mbe sɛ tni kro.

10 Kena na pe mu yeeri lawee ka nu kre, sɛ tni lawee waa nu tun. Ŋmba u mu yeeri kre we pan mbe yo mu pan na, ‘Awe, yiri mu sɛ tni lawee chichie nu.’ Na ki pan ma kre, leele mblɛ nu mu sɛ chaa mbe tni kre we mu kpɔɔ.

11 Kena ŋmba we uyɛ kpɔɔ kre, pie u pe fiɛn, a ŋmba we uyɛ pe fiɛn kre, pie u kpɔɔ.”

12 Yesu na kna mna yo blɔ ŋmba wra u yeeri mna sɛ u katoo wre pan mbo, “Na mu lenɛɛrɛ yeeri fninlihaa kre, maa mu nɔɔlɔ, ndee mu nyjɔɔlɔ na mu chinlɛ, ndee mu sele leele, ndee mbe swafɛɛnlɛ mblɛ pe pe mu tnifɛɛnlɛ chiin yeeri. Ŋgi na hin? Na ki pan ma, pre we ndru mbe mu yeeri ka na, mbe nyjɛ ŋu pe mu pe ŋga kre fɔlɔ tɔ.

13 La, na mu leele yeeri fninlihaa kre, shianfɛɛnlɛ na finla, na fuunlo kro yeeri mu chaa.

14 Ŋgi na hin? Ŋga mu pe pre na kre, pia jaa mu fɔlɔ tɔ, la, kprafɛɛnlɛ kunnyiɛ nu kre, mu fɔtɔɔrɔ ta.”

15 Ŋga leele mblɛ pre na Yesu naa wa mu tni lihaa wa kre na u kee kre loo kre, a pe wa na kna mbo, “Leele mblɛ pie li Nyiɛkpɔɔ ŋunumu kre nu kre wo yi dwamu.”

16 A Yesu na kna mu yo u pan mbo, “Ki ble ka blɔ wa wra lenɛɛrɛ yeeri mbe pe sɛ li u katoo.

17 Ŋga wra sro kre pe mu kɔ kre, wra u sumifun tun na u sɛ leele mblɛ u kɛ wa mu yeeri kre yeeri mbo, ‘E pan, ni sro kre pe mu kɔ.’

18 A leele pre kro na kaalɛɛ fɔnyi ta na yuu. Jlewo wre na kna mbo, ‘Ni tra ka lɔ, a ki fna ni sɛ ki le. Kena ni mu tali, mba kolo ta mbe pan.’

19 A shiinwo na kna mbo, ‘Ni nui kɛ lɔ na shie pe lehaa. Kena jande, mba kolo ta mbe pan.’

20 A taarɛwo na kna mbo, ‘Ni chlɔ leŋge. Kena mba kolo ta mbe pan.’

21 A blɔ wre sumifun wre na ndru mna pan mu kalɛɛ nyjɛ pe yo yire kro yo u pan. A krɔ na blɔ wre kun, a wra kna mu yo u sumifun wre pan mbo, ‘Sɛ lete na nyaanyaa, mu sɛ shianfɛɛnlɛ, na finla, na fuunlo kro yeeri.’

22 A sumifun wre na sɛ mna pan mu yo u tafun wre pan mbo, ‘Ni Tafun, ŋga mu yo ni pe kre, ni ki pe, la lawee wa tɛ mbe leele tni.’

23 A u tafun wre na kna mu yo sumifun wre pan mbo, ‘Sɛ tro mbookrɔɛ yire nu, na kooloe na, mblɛ mu nya wa kro pe yeeri mbe pe pan, mbe ni katoo kre nyi.

24 Ŋgi na hin? Leele mblɛ ni klu mu yeeri kre, pe wa wa ni sro ŋga ka ta mbe naa.’”

25 Ŋga Yesu naa shie kre, lenɛɛrɛ na taa u kro, a wra kna mna yo pe pan mbo,

26 “Na wa chaa mbe taa ni kro, fɔna u ni kori mu wɛ u lɛ, ndee u lo, ndee u chɔ, ndee u biile, ndee u nyjɔɔlɔ na u chinlɛ na u jaala na, mbe u yɛ fɛɛ, wa jaa pe ni twanfun.

27 A ŋmba u n u kumu kanyana kaan wru mu taa ni kro wre, wa jaa pe ni twanfun.

28 Na e wa yo we nyuŋgo sin mbe ki gede kre, we kluu tni mbe ki fɔlɔ gbun mbe le tun, na we swa ta mbe jaa ki sin mbe kɔ rɛ?

29 Na kre ma, na u nyuŋgo kre nɔɔ le, a u n shia ja mu ki sin mu kɔ kre, mblɛ pie ki nya kre we na u tɛɛ,

30 mbra yuu na, ‘Blɔ ŋmba nyuŋgo siin, a u n ja mu ki kɔ.’

31 A na ŋunu wa shie sojae kagbenyi kɛ ni, mbe sɛ wi na ŋunu wa na u sojae kagbenyi fulo ni kre, we klu mbe tnii jawa na we jaa fni na u loŋgo wre ni ree?

32 Na waa nya na wa u ja kre, we leele tun mbe pe sɛ u loŋgo wre fni haalee, mbe pe peyɛ lalaa gbeele.

33 Pan ki nyi chɔɔ, ndro wa jaa pe ni twanfun, fɔna u yirɛ nyjɛ yii wa u pan kro kee fɛɛ.”

34 A Yesu na kna mbo, “Weŋge tna, la, na ki ki tnamu wa mu fun kre, yaka wa jaa ti ki tna na fio.

35 Kia nyu kuraa mbe jaa yaka pe, a tnu ka wa pe ki nu na, fɔna pie ki kna mbe wo.