Yesu U Yɛnyiŋge Chiɛri Nyina
9
A Yesu na yo pe pan mbo, “Kpra na ni yuu e pan na, plɛɛ wa mu yire mna, a pia kumu naa mbe le kuraa, mbe sɛ su na pie Nyiɛkpɔɔ ŋunumu kre nya, na ki paan jaŋga ni.”
2 Ble kɔɔnanu kɔkro kre, Yesu na sɛ na Peter, na James, na John chiin ni nyua gedeŋge ka na. Bawa wra chinɛ pe yiɛ na,
3 a u dodoŋgi naa chiɛnri mu fniŋge prupru, hali kre yonyi jefun n wa tra ŋga nu, mbe jaa yoŋgo je mbe ki fniŋge ma.
4 Bawa Elijah na Moses na peyɛ wɔ mu pe nyina, a pre na Yesu naa paara.
5 A Peter na kna mu yo Yesu pan, mbo, “Rabbi, Nyinafun, ki nyu titi na oo wa mna. Kena ti mbe o asɛkɛ taarɛ sin sin e pan, ŋu wo nunu, Moses wo nunu, Elijah wo nunu.”
6 Peter nsra chin kee ŋga u yuu, ŋgi na hin? Na fiɛrɛ pe yii titi.
7 Bawa tlo badaaŋga ka na pan mna pe tɔ, a mana ka na yili ki nu mbo, “Ŋmba wi ni Biblɔ ŋmba ni kori kre. Kena e ndie tɛɛ u pan.”
8 Titɛɛ kre nu, ŋga pra kna kre, pe nsra ndro nya na, na pre na Yesu chiin bɔkɔ.
Elijah Panhaa
9 Ŋga pra yiri nyua kre na na tri kre, Yesu na pe jaari na pia shia kee nyjɛ pe nya yire yo mbe ndro loo, fɔna Lewo Biblɔ wre ku mu nyi tun.
10 A pra tia kee kre na kro pe ndra, a pra kna na peyɛ wie mbo, “Mbe ku mbe ndruu nyi na, kre nɔɔ yi ŋgi hin?”
11 A pra Yesu wie mbo, “Ŋgi ki tia a Judae nyinafɛɛnlɛ pre na nyina na ki fna mbe Elijah klu mbe pan Kristo wre na hin?”
12 A wra yo pe pan mbo, “Yɛŋgɛ yi, na Elijah n klu mu pan mu lawee gbeele, wa jaa pan. A mni a pe ki nyunɔ na Lewo Biblɔ wre we kala nya tataara, mbe pe u le na lewaa wi hin?
13 La ni yuu e pan na, Elijah pan fuŋga ma, a nyjɛ praa chaa, pra yi taa u na, imi na pra ki nyunɔ mu tɛɛ kre.”
Tonkolifun Wa Tra Haa
14 Ŋga pra pan mu da twanfɛɛnlɛ hamblɛ pre na kre, pra nya na leele tataara fɛ mu pe kun, a pre na nyinafɛɛnlɛ pre na peyɛ nyu kaanri.
Jesus Heals a Boy with an Unclean Spirit (Mark 9:14-29)
16 A Yesu na pe wie mbo, “Yira ŋgi kee na e eyɛ nyu kaanri hin?”
17 A leele pre nunu na kna mbo, “Nyinafun, ŋumufɔɔn kii wa ni pɔ nu, a ki tia u pe kpo. Wre ni ni pan mu pan.
18 Lawee ŋga nu kie yiri u nu kpan, mbe ki u chan tra, mbe ti u sheli, mbe u nyu na tafɔkɔ kuun, mbe wra u ŋgaala kaa. Kre ni pan mu yo mu twanfɛɛnlɛ pre pan na pe ŋumu kre ni mbe yili u nu, a pe pra.”
19 A Yesu na kna mu yo pe pan mbo, “Yire aŋga leele mblɛ nu shɔnlie n wa, ni tni e jaara mbe sɛ su nyjila ŋgi nu hin? E pan na u ni e ni ŋga.”
20 A pra pan na u ni mu u ŋga. Ŋga ŋumu kre na Yesu nya kre, titɛɛ kre nu, a kra u viŋge mu chan tra, na u gbila, a u nyu naa tafɔkɔ kuun.
21 A Yesu na pɔ wre lɛ wie mbo, “Ŋga ki u pe ki mu ra?”
A wra kna mbo, “U bimi ki yire na u ni.
22 Ki u chaan kanhun, na nyumu nu, mbraa chaa mbe u gbo. Kena na mu kolo ka chin, mbe jaa pe o pan kre, jande, o fooro le mu ya o na.”
23 A Yesu na kna mu u wie mbo, “Mu yo, na mbe jaa? Kee kro we jaa pe mbe ŋmba u shɔnli ŋga.”
24 Titɛɛ kre nu, a pɔ wre lɛ na paara kpɔɔ mu yo Yesu pan mbo, “Ni shɔnli. Jande, na ni n shɔnli kpɔɔ kuraa o, ya ni na.”
25 Ŋga Yesu na nya na lenɛɛrɛ feni na paan wa kre, a wra fuu ŋumufɔɔn kre na mbo, “Ŋu ŋumu kpo, ni yo mu pan na, yili u nu mu sɛ, maa shia le u nu na fio.”
26 A ŋumufɔɔn kre na pɔ wre chan tra, a wraa gble leni, na uyɛ tini na jaŋga ni, a ŋumufɔɔn kre na chin mu yili u nu. A wra sni na gboo wi, a lenɛɛrɛ naa yuu mbo, “U ku.”
27 A Yesu na u yii kɛ na mna u yire, mu yire sholo.
28 Ŋga Yesu na yiri wa mu sɛ katoo kre, a u twanfɛɛnlɛ pre chiin na u wie mbo, “Ŋgi ki tia o n ja mu ŋumufɔɔn kre wɔ pɔ wre nu hin?”
29 A wra kna mna yo pe pan mbo, “Kre yira ŋga nyini rɛ, ma jaa yaka tɛɛ mbe ki wɔ, fɔna mu blefun, mbe nyiɛtali.”
Yesu U Kumu Na U Nyiiɛ Kee Nya Mu Yo Shiinwo
30 Ŋga pra yili wa kre, pra sɛ tro Galilee na, a u nsraa chaa mbe ndro u kee loo.
31 Na kre nyjila kre, na u u twanfɛɛnlɛ pre nyina, na pie wre Lewo Biblɔ wre wɔ mbe le leele kɛɛ, mbe pe u gbo, a na pe u gbo, ki ble taarɛ ble na, mbe u nyi.
32 Kee kre wra yo kre, pe nsra ki nɔɔloo, a praa fiɛ na pie u wie ki nɔɔ.
Yɛnyjiimu
33 A pra sɛ le Capernaum na. Ŋga praa wa katoo kre, a Yesu na pe wie mbo, “Yira ŋgi kee e yuu kolo wa kre hin?”
34 A pra pieri, ŋgi na hin? Praa peyɛ wie kolo wa, na pe ŋmbihaa wi pe lekpɔɔ hin?
35 A Yesu na tni mna kɛmbɔshiin pre yeeri mu yo pe pan mbo, “Na wa chaa mbe pe yɛklo kre, u pe e kro kotɔŋu, mbe pe e kro sumifun.”
36 A Yesu na pɔ fiɛn wa wru mna yire pe lalaa, mna u kɔ mu yii, mna kna mu yo pe pan mbo,
37 “Ŋmba we pɔ fiɛn imi wa shɔ mi ndra na kre, kena u ni shɔ, a ŋmba we ni shɔ kre, mi ma u shɔ, la ŋmba u ni tun wre u shɔ.”
Yesu Yɛkpɔɔmu Kolo Tɔ
38 A John na kna mu yo mbo, “Nyinafun, o blɔ wa nya, a u mu mɛɛ tɛɛ na ŋumufuɛn woni leele nu, a o u tɔ kolo, na u n chaa o nu.”
39 A Yesu na kna mu yo mbo, “Yaa u tɔ kolo. Ndro wa jaa ni mɛɛ tɛɛ mbe kawako kee pe, mbe kɔ kre na mbe jaa ni kefɔɔn yo wa.
40 Ŋmba u n na kee ka pini na o taanla kre, e chin na o kro u nyi.
41 Ndro ŋmba we e ŋga nyumu chrɛgbɔɔ nyini mbe e gbɔ, na e pe Kristo wolo kre, kpra na ni yuu e pan na ufun wa ki fɔtɔɔrɔ la.”
Lewo Lehaa Sisam Nu
42 “Ŋmba we ti mbe bibɛɛlɛ mblɛ pe ni shɔnli ŋga wa le sisam nu kre, na pra fifiire tre dnɛ badaaŋga pɔ ufun lagboo mu u wa epo nu kuraa, kaa ki prɔ.
43 Kena na mu kɛ shie na mu ni sisam nu kre, ki kun mu wa. Ki nyu mu mu ŋga, na mu sɛ na kɛkɔɔn ni ŋmaa lawee, mu wɛ ŋga mu kɛnyi shiin ta, mbaa sɛ kanyana lawee kanhun ŋga kra fii kre nu,
44 mna fiɛnlɛ praa ku, a ki kanhun wa fii.
45-46 Na mu jele shie na mu ni sisam nu kre, ki kun mu wa. Ki nyu mu mu ŋga na mu sɛ na jeekɔɔn ni ŋmaa lawee, mu wɛ ŋga mu jeelee shiin ta mbe pe sɛ mu wa kanyana lawee kre nu.
47 A na mu nyini shie na mu ni sisam nu kre, ki foli mu wa. Ki nyu mu mu ŋga, na mu sɛ na nyini nunu ni Nyiɛkpɔɔ ŋunumu nu, mu wɛ ŋga mu nyiɛlɛ shiin ta, mbe pe sɛ na mu ni kanyana lawee kre nu na,
48 ‘mna fiɛnlɛ praa ku, a ki kanhun wa fii.’a
49 Ndro kro we tro kanhun nu mbe chiin pe chasi, imi na pe weŋge leni sra kaara nu mbe ki chiin pe chasi kre.
50 Weŋge nyu, a na weŋge ki tnamu wa mu fun, ŋgi kie ti ki tna na hin? Kena e ti mbe weŋge tni e nu, mbe ki ti e wejinyiŋge ta.”