Leele Kagbenyi Jijirɛ Sro Ŋgahaa
8
Yire ble yire nu, lenɛɛrɛ plɛ na ndru mu pan Yesu lawee. Ŋga kra pan na, pe n yaka ta mbe ka kre, Yesu na u twanfɛɛnlɛ pre yeeri mna yo pe pan mbo,
2 “Lenɛɛrɛ mblɛ kee pe fooro ni ni pan, yaka ma, pe ja mu tni ni jaara ble nununu taarɛ yi ŋga, a pe n yaka ni mbe ka.
3 A na ni tia pe sɛ na klo ni ma kre, yiɛ we kɔɔ wɔ pe plɛ na kolo, ŋgi na hin? Plɛ yiri haalee.”
4 A u twanfɛɛnlɛ pre na kna mu u wie mbo, “A sena ndro we ja mbe paanu ta lawee waa ŋga nu, mbe leele mblɛ ŋga mbe pe ka mbe yɔɔ hin?”
5 A Yesu na kna mu pe wie mbo, “Paanu mni yii wa e pan hin?”
A pra kna mbo, “Kɔɔnashin.”
6 A wra tia leele pre na tni tra. A Yesu na paanu kɔɔnashin yire wru mna Nyiɛkpɔɔ ŋga mboo, mna yi pile mna le u twanfɛɛnlɛ pre kɛɛ, na pe leele pre kɛ.
7 Na mbroe chiɛri plɛɛ wa pe pan na, a wra pe shɔ mna dwan mu le pe nu, mna yo na pe pe kɛ mbe ya leele pre pan.
8 A leele pre na ka mna yɔɔ, a pra yi knumɛɛ nyjɛ yira kro yire koli kakɛɛ nyini kɔɔnashin.
9 Na leele pre we pe kagbenyi jijirɛ, a wra chin mna pe wa kolo.
10 Titɛɛ kre nu, a Yesu na u twanfɛɛnlɛ pre na le krɔ nu, mna sɛ Dalmanutha lawee yire nu.
Pe Nyjeeri Kawako Kee Chaa Mbe Nya Tun
11 Bawa Pharisee leele pre na yili mna pan, mnaa Yesu wie kee bɛɛlɛ, mna u penle, na u nyjeeri kawako kee ka pe mbe pe nya.
12 A Yesu na ŋu fɛɛn, mna yo pe pan mbo, “Ŋgi ki tia aŋga leele na kawako kee chaa mbe nya ŋga hin? Kpra na ni yuu e pan, na aŋga leele mblɛ wa kawako kee ka nya na nyini ni.”
13 A wra pe ti wa, mna ndru mu sɛ tni krɔ kre nu na, mna kun lɔɔ kro.
Pharisee Leele Na Herod Yiisi Kee
14 Ŋga praa shie kre, pra fɛɛ na pe n paanu wru, paanu nunu chom ka kraa wa pe pan krɔ kre lam.
15 A wra kna mna yo u twanfɛɛnlɛ pre pan mbo, “E eyɛ le chichie Pharisee leele pre yiisi, na Herod yiisi yire na.”
16 U twanfɛɛnlɛ pre na ki kna na peyɛ ni, na paanu n wa pe pan mbe pe ka.
17 Yesu na chin kee nyjɛ pe jawa, a wra pe wie mbo, “Mni a e na yuu na paanu n wa e pan ŋga hin? Kena e n nya, ndee mu nɔɔloo ta tun ra? Kena e n jawala ni ra?
18 Nyiɛlɛ wa e pan, a nde e n na nyaa, a ndiile wa e pan, a nde e n na ndru. E le, kena e n na kee sɔɔnri ra?
19 Ŋga ndaa paanu kunɔ knumu mna bilɛ kagbenyi kunɔ ŋga kre, knumɛɛ kakɛɛ nyini mni e na koli hin?”
A pra kna mna yo u pan mbo, “Kɛmbɔshiin!”
20 “A ŋga ndaa kɔɔnashin knumu mna leele kagbenyi jijirɛ ŋga kre, knumɛɛ kakɛɛ nyini mni e na koli hin?”
A pra yo mbo, “Kɔɔnashin!”
21 A wra kna mbo, “Kre e je, a e n nɔɔloo ta tun ŋgaa?”
Fuun Na Nya Bethsaida Na
22 Ŋga pra le Bethsaida na kre, pra pan mu u ŋga fuun wa mna u tali na u kɛ taa u na.
23 A Yesu na fuun wre yii kɛ na, mna yili na u ni chia kre mbookrɔ, mna tɛɛnrɛ hlu mu wo u nyiɛlɛ yire na, mna kɛ ta u na, mna kna mu u wie mbo, “Mu nyaa ra?”
24 A wra yiɛ yire mna yo Yesu pan mbo, “Ni leele nyaa a pra tro, la, ni pe nyaa na tinyi yi.”
25 A Yesu na ndru mu kɛ taa u nyiɛlɛ yire na na, a wraa le haan, to, mna saanla, mnaa nyaa chiriri.
26 A wra tia wra sɛ u katoo, mna yo u pan na waa shia tro chia kre lam.
Yesu Wi Kristo Wre
27 Yesu na u twanfɛɛnlɛ pre na yiri wa mna sɛ Caesarea Philippi kabɛɛlɛ yire na. Ŋga praa shie kre, a wra u twanfɛɛnlɛ pre wie mbo, “Ndro ŋmbi sembremu leele ni jawa hin?”
28 A pra kna mbo, “Pe yo na John ndrajefun wre wi ŋu, a plɛ yo Elijah wi ŋu, a plɛ na yuu na Nyiɛkpɔɔ kee nyanyofɛɛnlɛ pre wa wi ŋu.”
29 A Yesu na kna mna pe wie mbo, “A yire, ndro ŋmbi e ni jawa hin?”
A Peter na kna mu yo u pan mbo, “Ŋu wi Kristo ŋmba Nyiɛkpɔɔ wɔ wre.”
30 A Yesu na pe jaari na pia shia u kee yo ndro pan.
Yesu U Kumu Na U Nyiiɛ Kee Nya Mu Yo
31 Bawa Yesu na yire mna na pe nyina kanyana tataara nyjɛ yi fna mbe wre Lewo Biblɔ wre nya, na imi na loplombo na srawɔfɛɛnlɛ loplombo na pe nyinafɛɛnlɛ pre we laa u kro mbe pe u gbo, ki ble taarɛ ble na mbe u ndru mbe nyi.
32 Ŋga wra kee kre yo mu wali ma kre, a Peter na u yeeri brɛmm mu sɛ na u ni mbɛɛ ka na, mna u yiɛ kee yo u pan.
33 A Yesu na kna mu twanfɛɛnlɛ hamblɛ pre le komm, mna kna mu Peter yiɛ kee yo u pan mbo, “Sutna, laa ni na. Mu n na Nyiɛkpɔɔ haa jawa, fɔna lewo haa.”
Muyɛ Fɛɛ
34 A Yesu na lenɛɛrɛ pre na u twanfɛɛnlɛ pre yeeri mu pan u jaara mna yo pe pan, mbo, “Na ndro chaa mbe taa ni kro kre, ufun u uyɛ fɛɛ, mbe u kanyana kumu kaan wru, mbe taa ni kro.
35 Ndro ŋmba we na kɛ toni u ŋmaa na kre, kie yili u kɛɛ. A ŋmba we u ŋmaa wa mbe fun mi na ketaan kre ndra na kre, we ki ta.
36 Na ndro waŋgra ŋga kro ta, mu u ŋmaa wa mu fun, tnu ŋgi kii wa ki nu hin?
37 Ndee yira ŋgi ni lewo we jaa tɛɛ mbe u ŋmaa chinɛ na hin?
38 A ndro ŋmba we nyifɛɛrɛ pe mi na ni kee kre na, aŋga leele leŋgeere klafɛɛnlɛ, na sisampefɛɛnlɛ mblɛ nu kre, ufun kee we pe Lewo Biblɔ wre pan nyifɛɛrɛ ni, ŋga ble wre Yesu, na Nyiɛkpɔɔ bitumblɔ chechee pre we pan, u Lɛ yɛnyiŋge kre nu kre.”