Cheche Ŋga Ki Pe Ŋumu Wo
7
Ki ble ka Pharisee leele pre plɛ, na pe nyinafɛɛnlɛ pre plɛ, na yiri Jerusalem na, mna pan mu fni Yesu lawee.
2 Bawa pra nya na Yesu twanfɛɛnlɛ pre plɛ kɛnyi nyjɛ pe n je paala kolo na tɛɛ na lii.
3 Kre nyjila kre na Pharisee leele pre, na Judae pre kro, na wa n kɛnyi je chiriri wa li na yi ni ma. Ŋgi na hin? Pe fa loplombo paala yire kro praa toni.
4 Na pe yiri jafa na mu pan kuraa, na pe n peyɛ je, pia li, a paala yire tataara naa wa a pra yi pini. Pe gbɔ yirɛ, na pe chɔɛ, na pe tɔɔnrɔ yirɛ nyjɛ ni pe sro pini kro, fɔŋga pie yi je mbe chiin yi tɛɛ mbe yaka pe.
5 A kra tia Pharisee leele pre na nyinafɛɛnlɛ pre na Yesu wie, mbo, “Ŋgi ki tia mu twanfɛɛnlɛ pre na li fa loplombo kee yire na, mu na kɛnyi nyjɛ pe n je tɛɛ na lii ŋga hin?”
6 A Yesu na kna mu yo pe pan mbo, “Yɛŋgɛ na Isaiah na yire yiɛnyumufɛɛnlɛ mblɛ kee nya mu yo kre, imi na pe ki nyunɔ u hlɛ kre nu mbo,
‘Leele mblɛ, nyu ni pe ni mɛɛ yeeri,
a nde pe n na ni chaa pe lolonyi nu.
7 Finfin pe ni sumi.
Leele mbra nyjɛ pe le,
yire pe leele nyina, mu yo Nyiɛkpɔɔ mbra yi.’a
8 E Nyiɛkpɔɔ mbra yire ti, mu mbra nyjɛ leele le yire yii kɛ shiin.”
9 Wra ndru mu yo pe pan mbo, “E chin, imi ee pe mbe Nyiɛkpɔɔ kolo kre wa, mbe taa e fawolo kee yire na.
10 Moses na yo mbo,
‘Mu lɛ na mu lo ŋga buuro.’b
‘Ŋmba we u lo, ndee u lɛ kee sisaa yo kre,
kumu ni u fna.’c
11 A yire rɛ, e yo na, na ndro yo u lɛ, ndee u lo pan na, ŋga ki fna ni mu ŋga kre, ni ki tɛɛ mu sra wɔ mu Nyiɛkpɔɔ ŋga.
12 Na ki pan ma, e na ti mbe ufun yaka pe mbe u lɛ, ndee u lo ŋga na.
13 A e na fawolo kee nyjɛ krɛrɛ teeri na Nyiɛkpɔɔ kee kre klai. Hali kee nyjɛ nyini tataara wa, a e na yi pini, na teeri krofɛɛnlɛ pan.”
14 A wra lenɛɛrɛ pre kro yeeri, a pra pan mu fni u jaara, a wra kna mbo, “E kro, e ndie tɛɛ e loo. E kee kre nɔɔloo.
15 Fimi yira ka n wa, ŋga kie le lewo nu, mbe jaa u tɔ nɛɛrɛ ni, fɔna nyjɛ yie yiri u lam mbe yili fimi na kre, yire yi ja na u toni nɛɛrɛ ni.
16 Ŋmba uu wa ndie ni kre, ti ufun ndie tɛɛ mbe loo.”
17 Ŋga Yesu na yili lenɛɛrɛ pre nu mna sɛ katoo kre, a u twanfɛɛnlɛ pre na u wie yomini kre nɔɔ.
18 A Yesu na kna mu pe wie mbo, “Pan yire kuraa kala nɔɔ loohaa sheli imi ra? Kena e n chin na fimi yira ŋga ki lee lewo lɛɛ kre na ja mbe u tɔ na nɛɛrɛ ni ra?
19 Ŋgi na hin? Na kra le u loloŋgo nu, lɛɛ ki lee, mbe sɛ yili mbe wo tra.” Kena wra nyina na sro kro nyu.
20 A wra kna mu yo mbo, “Ŋga ki yilii lewo lam mbe pan kre, kre ki u toni na nɛɛrɛ ni.
21 Lewo loloŋgo nu jawala sisaa yilii na paan. Tiɛrɛɛ, na juuro, na linkuuro kee,
22 na chachaara, na blɛchaara, yirɛ kro chaara, ndra shelee, dnumu lie, jajaara, nyibinyiɛ sisaa, kro yoo, yɛkpɔɔmu, kepele fuɛn.
23 Yire sisam kee nyjɛ krɛrɛ, lewo loloŋgo nu yi kro yilii na paan, na nɛɛrɛ woni u na.”
Bichable Wa Tra Haa
24 Yesu na yiri wa mna sɛ Tyre, na Sidon lawee yire nu. Ŋga wra da wa kre, wra sɛ le katoo ka nu. U nsraa chaa mbe ndro u lee loo, a na wa jaa ndra.
25 Na ŋumufɔɔn wa chlɔ wa pɔ bichable wa nu, ŋga chlɔ wre na Yesu kee loo kre, titɛɛ kre nu, a wra sɛ kosie kan u yiɛ,
26 nde na Greek ndro wi chlɔ wre, a u sehaa kre, wra pe Syrian-Phoenicia ndro. A wra Yesu tali na u ŋumufɔɔn wre wɔ mbe yili u pɔ wre nu.
27 A Yesu na kna mu yo chlɔ wre pan mbo, “Ti mbe biile pre yɔɔ tun. Ki n fna mbe mu biile sro wru mbe wa nyikaanla pan.”
28 A chlɔ wre na kna mu yo Yesu pan, mbo, “Kii wa ma, ni Tafun, ande nyikaanla mblɛ pee wa tebru tapan kre kuraa kre, pe biile sro knumɛɛ nyjɛ yi mbru na woni tra kre yoori na kaa.”
29 A Yesu na kna, mbo, “Kee ŋga mu yo ŋga ndra na sɛ. Ŋumufɔɔn wre yili mu pɔ wre nu.”
30 Ŋga chlɔ wre na ndru mna sɛ le katoo kre, wra sɛ da na ŋumufɔɔn wre yili u pɔ wre nu mu sɛ, a uu wa mu sni.
Geŋgefun Wa Paara Haa
31 Yesu na yili Tyre tra nu, mna tro Sidon na mu sɛ Decapolis tra nu, Galilee epo kre mbɛɛ na.
32 Bawa leele plɛ na pan na geŋgefun dintaana wa ni Yesu pan, mna Yesu tali na u kɛ taa u na.
33 A Yesu na dintaana wre bali mu yili lenɛɛrɛ pre nu chiɛri, mna u kambɛɛlɛɛ le le u ndiile nu, mna tɛɛnrɛ hlu u kambɛlɛ na, mu taa u ndile na,
34 mna yiɛ wa mna le nyjeeri, mna ŋu mu tii lam, mna kna mu yo mbo, “Ephphatha! Ki nyina na, Nyaa.”
35 Titɛɛ kre nu to, a blɔ wre ndiile na nyaala, a u ndile na saan, a wra ja na paara chiriri.